ਟਰੰਪ ਨੇ ਅਮਰੀਕਾ 'ਚ ਕਰ 'ਤੀ NO Entry ! ਸੀਰੀਆ ਤੇ ਮਾਲੀ ਸਣੇ 39 ਦੇਸ਼ਾਂ 'ਚ ਟ੍ਰੈਵਲ ਬੈਨ ਵਧਿਆ, ਦੇਖੋ ਸਾਰੇ ਦੇਸ਼ਾਂ ਦੀ ਲਿਸਟ

ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਮੰਗਲਵਾਰ ਨੂੰ ਪੂਰਨ ਯਾਤਰਾ ਪਾਬੰਦੀ ਦੇ ਦਾਇਰੇ 'ਚ ਆਉਣ ਵਾਲੇ ਦੇਸ਼ਾਂ ਦੀ ਸੂਚੀ ਦਾ ਵਿਸਥਾਰ ਕਰਦਿਆਂ ਸੀਰੀਆ ਸਮੇਤ ਸੱਤ ਹੋਰ ਦੇਸ਼ਾਂ ਦੇ ਨਾਗਰਿਕਾਂ ਦੇ ਅਮਰੀਕਾ 'ਚ ਦਾਖ਼ਲੇ 'ਤੇ ਰੋਕ ਲਗਾ ਦਿੱਤੀ ਹੈ।

ਵ੍ਹਾਈਟ ਹਾਊਸ ਨੇ ਦੱਸਿਆ ਕਿ ਟ੍ਰੰਪ ਨੇ ਇਸ ਪਾਬੰਦੀ ਸਬੰਧੀ ਐਲਾਨਨਾਮੇ 'ਤੇ ਹਸਤਾਖਰ ਕਰ ਦਿੱਤੇ ਹਨ। ਇਸ ਕਦਮ ਤਹਿਤ ਬੁਰਕੀਨਾ ਫਾਸੋ, ਮਾਲੀ, ਨਾਈਜਰ, ਦੱਖਣੀ ਸੂਡਾਨ, ਸੀਰੀਆ ਅਤੇ ਫਲਸਤੀਨੀ ਅਥਾਰਟੀ ਵੱਲੋਂ ਜਾਰੀ ਯਾਤਰਾ ਦਸਤਾਵੇਜ਼ਾਂ ਵਾਲੇ ਨਾਗਰਿਕਾਂ 'ਤੇ ਪਾਬੰਦੀ ਲਗਾ ਦਿੱਤੀ ਗਈ ਹੈ।

ਲਾਓਸ ਅਤੇ ਸਿਏਰਾ ਲਿਓਨ 'ਤੇ ਪੂਰਨ ਪਾਬੰਦੀ

ਇਸ ਕਾਰਵਾਈ ਦੇ ਤਹਿਤ ਲਾਓਸ ਅਤੇ ਸਿਏਰਾ ਲਿਓਨ 'ਤੇ ਵੀ ਪੂਰਨ ਪਾਬੰਦੀ ਲਗਾ ਦਿੱਤੀ ਗਈ ਹੈ, ਜਿਨ੍ਹਾਂ 'ਤੇ ਪਹਿਲਾਂ ਸਿਰਫ਼ ਅੰਸ਼ਕ (Partial) ਪਾਬੰਦੀਆਂ ਲਾਗੂ ਸਨ। ਇਹ ਵਿਸਤ੍ਰਿਤ ਪਾਬੰਦੀ 1 ਜਨਵਰੀ ਤੋਂ ਪ੍ਰਭਾਵੀ ਹੋਵੇਗੀ।

ਇਹ ਕਾਰਵਾਈ ਟਰੰਪ ਦੇ ਉਸ ਵਾਅਦੇ ਦੇ ਬਾਵਜੂਦ ਕੀਤੀ ਗਈ ਹੈ ਜਿਸ ਵਿੱਚ ਉਨ੍ਹਾਂ ਸੀਰੀਆਈ ਰਾਸ਼ਟਰਪਤੀ ਅਹਿਮਦ ਅਲ-ਸ਼ਾਰਾ ਨਾਲ ਨਵੰਬਰ 'ਚ ਹੋਈ ਗੱਲਬਾਤ ਤੋਂ ਬਾਅਦ ਸੀਰੀਆ ਨੂੰ ਸਫਲ ਬਣਾਉਣ ਲਈ ਹਰ ਸੰਭਵ ਯਤਨ ਕਰਨ ਦੀ ਗੱਲ ਕਹੀ ਸੀ। ਅਲ-ਸ਼ਾਰਾ ਅਲ-ਕਾਇਦਾ ਦੇ ਸਾਬਕਾ ਕਮਾਂਡਰ ਹਨ, ਜਿਨ੍ਹਾਂ 'ਤੇ ਹਾਲ ਹੀ ਤੱਕ ਵਾਸ਼ਿੰਗਟਨ ਨੇ ਵਿਦੇਸ਼ੀ ਅੱਤਵਾਦੀ ਹੋਣ ਦੀ ਪਾਬੰਦੀ ਲਗਾਈ ਹੋਈ ਸੀ।

6 ਮਹੀਨੇ ਪਹਿਲਾਂ ਵੀ ਲਗਾਈ ਸੀ ਪਾਬੰਦੀ

ਇਸ ਤੋਂ ਪਹਿਲਾਂ ਜੂਨ ਵਿੱਚ ਟਰੰਪ ਨੇ ਇਕ ਐਲਾਨਨਾਮੇ 'ਤੇ ਹਸਤਾਖਰ ਕੀਤੇ ਸਨ, ਜਿਸ ਤਹਿਤ 12 ਦੇਸ਼ਾਂ ਦੇ ਨਾਗਰਿਕਾਂ ਦੇ ਅਮਰੀਕਾ 'ਚ ਦਾਖ਼ਲੇ 'ਤੇ ਪਾਬੰਦੀ ਲਗਾਈ ਗਈ ਸੀ ਅਤੇ ਸੱਤ ਹੋਰ ਦੇਸ਼ਾਂ ਦੇ ਨਾਗਰਿਕਾਂ 'ਤੇ ਅੰਸ਼ਕ ਪਾਬੰਦੀ ਲਗਾਈ ਸੀ।

ਉਨ੍ਹਾਂ ਨੇ ਕਿਹਾ ਸੀ ਕਿ ਇਹ ਪਾਬੰਦੀ ਵਿਦੇਸ਼ੀ ਅੱਤਵਾਦੀਆਂ ਅਤੇ ਹੋਰ ਸੁਰੱਖਿਆ ਖਤਰਿਆਂ ਤੋਂ ਬਚਾਅ ਲਈ ਜ਼ਰੂਰੀ ਹੈ। ਇਨ੍ਹਾਂ 12 ਦੇਸ਼ਾਂ 'ਤੇ ਯਾਤਰਾ ਪਾਬੰਦੀ ਅਜੇ ਵੀ ਲਾਗੂ ਹੈ।