ਨਾਸਾ ਨੇ ਸਾਲ ਦਾ ਪਹਿਲਾ 'ਸਪੇਸਵਾਕ' ਕੀਤਾ ਰੱਦ, ਜਾਣੋ ਕਿਉਂ ਲਿਆ ਗਿਆ ਇਹ ਫੈਸਲਾ?

ਡਿਜੀਟਲ ਡੈਸਕ, ਨਵੀਂ ਦਿੱਲੀ: ਅਮਰੀਕੀ ਪੁਲਾੜ ਏਜੰਸੀ ਨਾਸਾ (NASA) ਨੇ ਸਾਲ ਦਾ ਪਹਿਲਾ 'ਸਪੇਸਵਾਕ' (ਪੁਲਾੜ ਵਿੱਚ ਚਹਿਲਕਦਮੀ) ਰੱਦ ਕਰ ਦਿੱਤਾ ਹੈ। ਇਸ ਤੋਂ ਇਲਾਵਾ, ਨਾਸਾ ਅੰਤਰਰਾਸ਼ਟਰੀ ਪੁਲਾੜ ਸਟੇਸ਼ਨ (ISS) 'ਤੇ ਮੌਜੂਦ ਚਾਲਕ ਦਲ ਨੂੰ ਨਿਰਧਾਰਤ ਸਮੇਂ ਤੋਂ ਪਹਿਲਾਂ ਵਾਪਸ ਬੁਲਾਉਣ 'ਤੇ ਵੀ ਵਿਚਾਰ ਕਰ ਰਿਹਾ ਹੈ।

ਨਾਸਾ ਨੇ ਕਿਉਂ ਰੱਦ ਕੀਤੀ ਸਪੇਸਵਾਕ?

ਨਾਸਾ ਨੇ ਇਹ ਫੈਸਲਾ ਪੁਲਾੜ ਸਟੇਸ਼ਨ 'ਤੇ ਮੌਜੂਦ ਇੱਕ ਮੈਂਬਰ ਦੀ ਸਿਹਤ ਨਾਲ ਜੁੜੀ ਸਮੱਸਿਆ (Medical Issue) ਕਾਰਨ ਲਿਆ ਹੈ। ਨਾਸਾ ਅਨੁਸਾਰ, ਇਹ ਸਪੇਸਵਾਕ ਵੀਰਵਾਰ ਨੂੰ ਹੋਣੀ ਸੀ, ਪਰ ਇੱਕ ਪੁਲਾੜ ਯਾਤਰੀ ਦੀਆਂ ਡਾਕਟਰੀ ਸਥਿਤੀਆਂ ਕਾਰਨ ਇਸ ਨੂੰ ਮੁਲਤਵੀ ਕਰ ਦਿੱਤਾ ਗਿਆ ਹੈ।

ਨਾਸਾ ਨੇ ਫਿਲਹਾਲ ਪੁਲਾੜ ਯਾਤਰੀ ਦੀ ਪਛਾਣ ਜ਼ਾਹਰ ਨਹੀਂ ਕੀਤੀ ਹੈ। ਏਜੰਸੀ ਨੇ ਕਿਹਾ ਕਿ 'ਚਾਲਕ ਦਲ ਦੇ ਮੈਂਬਰ ਦੀ ਹਾਲਤ ਹੁਣ ਸਥਿਰ ਹੈ, ਪਰ ਉਹ ਮਿਸ਼ਨ ਨੂੰ ਸਮੇਂ ਤੋਂ ਪਹਿਲਾਂ ਖਤਮ ਕਰਨ ਸਮੇਤ ਸਾਰੇ ਆਪਸ਼ਨ ਦਾ ਸਰਗਰਮੀ ਨਾਲ ਮੁਲਾਂਕਣ ਕਰ ਰਹੇ ਹਨ।'

ਨਾਸਾ ਦੀ ਬੁਲਾਰਾ ਸ਼ੈਰਿਲ ਵਾਰਨਰ ਨੇ ਕਿਹਾ ਕਿ 'ਆਪਣੇ ਮਿਸ਼ਨਾਂ ਨੂੰ ਸੁਰੱਖਿਅਤ ਢੰਗ ਨਾਲ ਚਲਾਉਣਾ ਸਾਡੀ ਸਭ ਤੋਂ ਵੱਡੀ ਪਹਿਲ ਹੈ।' ਦੱਸ ਦੇਈਏ ਕਿ ਅਮਰੀਕਾ, ਜਾਪਾਨ ਅਤੇ ਰੂਸ ਦੇ ਚਾਰ ਮੈਂਬਰੀ ਦਲ ਨੇ ਫਲੋਰੀਡਾ ਤੋਂ ਉਡਾਣ ਭਰਨ ਤੋਂ ਬਾਅਦ ਅਗਸਤ ਤੋਂ ਹੀ ਪੁਲਾੜ ਪ੍ਰਯੋਗਸ਼ਾਲਾ ਵਿੱਚ ਆਪਣਾ ਕੰਮ ਜਾਰੀ ਰੱਖਿਆ ਹੋਇਆ ਹੈ।