'ਸਾਬ੍ਹ! ਜ਼ਿਆਦਾ ਸ਼ਰਾਬ ਨਹੀਂ ਪੀਤੀ ਮੈਂ...', ਜਲੰਧਰ 'ਚ ਨਸ਼ੇ 'ਚ ਧੁੱਤ ਨੌਜਵਾਨਾਂ ਨੇ ਪੁਲਿਸ ਮੁਲਾਜ਼ਮ ਨੂੰ ਟੱਕਰ ਮਾਰ ਕੇ ਕੀਤਾ ਜ਼ਖ਼ਮੀ

ਜਲੰਧਰ: ਜਲੰਧਰ ਰੇਲਵੇ ਸਟੇਸ਼ਨ 'ਤੇ ਦੇਰ ਰਾਤ ਪੁਲਿਸ ਨੂੰ ਦੇਖ ਕੇ ਮੋਟਰਸਾਈਕਲ ਸਵਾਰ ਨੌਜਵਾਨਾਂ ਨੇ ਭੱਜਣ ਦੀ ਕੋਸ਼ਿਸ਼ ਕੀਤੀ। ਜਦੋਂ ਨਾਕੇ 'ਤੇ ਤਾਇਨਾਤ ਪੁਲਿਸ ਮੁਲਾਜ਼ਮ ਨੇ ਉਨ੍ਹਾਂ ਨੂੰ ਰੋਕਣ ਦੀ ਕੋਸ਼ਿਸ਼ ਕੀਤੀ, ਤਾਂ ਨੌਜਵਾਨਾਂ ਨੇ ਮੋਟਰਸਾਈਕਲ ਸਿੱਧਾ ਮੁਲਾਜ਼ਮ ਵਿੱਚ ਮਾਰ ਦਿੱਤਾ ਅਤੇ ਫਿਰ ਖ਼ੁਦ ਵੀ ਹੇਠਾਂ ਡਿੱਗ ਗਏ।

ਹੇਠਾਂ ਡਿੱਗਣ ਕਾਰਨ ਨੌਜਵਾਨਾਂ ਦੀਆਂ ਬਾਹਾਂ ਅਤੇ ਲੱਤਾਂ 'ਤੇ ਸੱਟਾਂ ਲੱਗੀਆਂ। ਫੜੇ ਜਾਣ ਤੋਂ ਬਾਅਦ ਇੱਕ ਨੌਜਵਾਨ ਬੋਲਿਆ, "ਜ਼ਿਆਦਾ ਸ਼ਰਾਬ ਨਹੀਂ ਪੀਤੀ, ਸਿਰਫ਼ ਪਾਈਆ ਦਾਰੂ ਪੀਤੀ ਹੈ।" ਜਦੋਂ ਪੁਲਿਸ ਨੇ ਬਾਈਕ ਨੂੰ ਜ਼ਬਤ ਕਰਨਾ ਸ਼ੁਰੂ ਕੀਤਾ, ਤਾਂ ਨੌਜਵਾਨ ਆਪਣੀ ਗ਼ਲਤੀ ਮੰਨਦੇ ਹੋਏ ਮਾਫ਼ੀਆਂ ਮੰਗਣ ਲੱਗੇ। ਪੁਲਿਸ ਨੇ ਜਦੋਂ ਅਲਕੋਹਲ ਮੀਟਰ ਨਾਲ ਜਾਂਚ ਕੀਤੀ ਤਾਂ ਸ਼ਰਾਬ ਦੀ ਮਾਤਰਾ 204 ਪੁਆਇੰਟ ਆਈ, ਜਿਸ ਤੋਂ ਬਾਅਦ ਕਾਗਜ਼ਾਤ ਨਾ ਹੋਣ ਕਾਰਨ ਪੁਲਿਸ ਨੇ ਬਾਈਕ ਜ਼ਬਤ ਕਰ ਲਈ।

ਕੰਟਰੋਲ ਗੁਆਉਣ ਕਾਰਨ ਹੋਇਆ ਹਾਦਸਾ

ਮਿੱਠੂ ਬਸਤੀ ਦੇ ਰਹਿਣ ਵਾਲੇ ਵੰਸ਼ੂ ਨੇ ਆਪਣੀ ਗ਼ਲਤੀ ਮੰਨਦਿਆਂ ਦੱਸਿਆ ਕਿ ਉਸ ਨੇ ਸ਼ਰਾਬ ਪੀਤੀ ਹੋਈ ਸੀ ਅਤੇ ਉਹ ਆਪਣੇ ਦੋਸਤ ਨਾਲ ਰੇਲਵੇ ਸਟੇਸ਼ਨ ਆਇਆ ਸੀ। ਪੁਲਿਸ ਦਾ ਨਾਕਾ ਦੇਖ ਕੇ ਅਤੇ ਮੁਲਾਜ਼ਮ ਨੂੰ ਸਾਹਮਣੇ ਆਉਂਦਾ ਦੇਖ ਕੇ ਉਹ ਘਬਰਾ ਗਿਆ। ਘਬਰਾਹਟ ਵਿੱਚ ਮੋਟਰਸਾਈਕਲ ਤੋਂ ਕੰਟਰੋਲ ਖ਼ਤਮ ਹੋ ਗਿਆ, ਜਿਸ ਕਾਰਨ ਬਾਈਕ ਮੁਲਾਜ਼ਮ ਨਾਲ ਜਾ ਟਕਰਾਈ।

ਪੁਲਿਸ ਦੀ ਕਾਰਵਾਈ

ਰੇਲਵੇ ਸਟੇਸ਼ਨ ਨਾਕੇ 'ਤੇ ਤਾਇਨਾਤ ਕੁਲਵਿੰਦਰ ਸਿੰਘ ਨੇ ਦੱਸਿਆ ਕਿ ਉਹ ਆਪਣੀ ਟੀਮ ਸਮੇਤ ਰਾਤ ਨੂੰ ਡਿਊਟੀ 'ਤੇ ਸਨ। ਇਸੇ ਦੌਰਾਨ ਇੱਕ ਬਾਈਕ 'ਤੇ ਸਵਾਰ ਦੋ ਨੌਜਵਾਨਾਂ ਨੂੰ ਕਾਂਸਟੇਬਲ ਨੇ ਰੋਕਣ ਦਾ ਇਸ਼ਾਰਾ ਕੀਤਾ। ਨੌਜਵਾਨਾਂ ਨੇ ਰੁਕਣ ਦੀ ਬਜਾਏ ਬਾਈਕ ਤੇਜ਼ ਕਰਕੇ ਭਜਾਉਣ ਦੀ ਕੋਸ਼ਿਸ਼ ਕੀਤੀ, ਪਰ ਸੰਤੁਲਨ ਵਿਗੜਨ ਕਾਰਨ ਬਾਈਕ ਕਾਂਸਟੇਬਲ ਵਿੱਚ ਜਾ ਵੱਜੀ।

ਪੁਲਿਸ ਨੇ ਦੱਸਿਆ ਕਿ ਫੜੇ ਜਾਣ 'ਤੇ ਨੌਜਵਾਨ ਨੇ ਬੜੀ ਮਾਸੂਮੀਅਤ ਨਾਲ 'ਪਾਈਆ ਦਾਰੂ' ਪੀਣ ਦੀ ਗੱਲ ਕਹੀ, ਪਰ ਮੀਟਰ ਵਿੱਚ ਨਸ਼ਾ ਬਹੁਤ ਜ਼ਿਆਦਾ ਪਾਇਆ ਗਿਆ। ਪੁਲਿਸ ਨੇ ਮੌਕੇ 'ਤੇ ਹੀ ਕਾਰਵਾਈ ਕਰਦੇ ਹੋਏ ਵਾਹਨ ਨੂੰ ਕਬਜ਼ੇ ਵਿੱਚ ਲੈ ਲਿਆ ਹੈ।