ਟਲਿਆ ਵੱਡਾ ਹਾਦਸਾ: ਪਠਾਨਕੋਟ ਚੌਂਕ 'ਤੇ ਟੂਰਿਸਟ ਬੱਸ ਦੇ ਦੋ ਟਾਇਰ ਫਟੇ, ਸਵਾਰੀਆਂ ਨੇ ਇਸ ਵਜ੍ਹਾ ਕਾਰਨ ਤੋੜੇ ਬੱਸ ਦੇ ਸ਼ੀਸ਼ੇ

ਜਾਗਰਣ ਸੰਵਾਦਦਾਤਾ, ਜਲੰਧਰ: ਜਲੰਧਰ ਦੇ ਪਠਾਨਕੋਟ ਚੌਂਕ ਨੇੜੇ ਸਵਾਰੀਆਂ ਨੂੰ ਲੈ ਕੇ ਜਾ ਰਹੀ ਇੱਕ ਟੂਰਿਸਟ ਬੱਸ ਦੇ ਅਚਾਨਕ ਦੋ ਟਾਇਰ ਫਟ ਗਏ। ਖੁਸ਼ਕਿਸਮਤੀ ਰਹੀ ਕਿ ਹਾਦਸੇ ਦੌਰਾਨ ਕੋਈ ਜਾਨੀ ਨੁਕਸਾਨ ਨਹੀਂ ਹੋਇਆ। ਟਾਇਰ ਫਟਣ ਤੋਂ ਬਾਅਦ ਉਹਨਾਂ ਨੂੰ ਬਦਲਣ ਵਿੱਚ ਦੋ ਤੋਂ ਤਿੰਨ ਘੰਟੇ ਲੱਗ ਗਏ, ਜਿਸ ਕਾਰਨ ਸਵਾਰੀਆਂ ਨੇ ਵਿਰੋਧ ਕਰਦਿਆਂ ਪੈਸੇ ਵਾਪਸ ਮੰਗਣੇ ਸ਼ੁਰੂ ਕਰ ਦਿੱਤੇ। ਚਾਲਕ ਨੇ ਕੁਝ ਸਵਾਰੀਆਂ ਨੂੰ ਪੈਸੇ ਵਾਪਸ ਕਰ ਦਿੱਤੇ ਅਤੇ ਕੁਝ ਨੂੰ ਪੈਸੇ ਦੇਣ ਲਈ ਸਮਾਂ ਮੰਗਿਆ, ਪਰ ਸਵਾਰੀਆਂ ਨੇ ਗੁੱਸੇ ਵਿੱਚ ਆ ਕੇ ਤੋੜ-ਫੋੜ ਕੀਤੀ ਅਤੇ ਮੌਕੇ ਤੋਂ ਫ਼ਰਾਰ ਹੋ ਗਈਆਂ। ਇਸ ਦੀ ਜਾਣਕਾਰੀ ਬੱਸ ਕੰਡਕਟਰ ਰਾਜਾ (ਵਾਸੀ ਜੰਮੂ) ਨੇ ਥਾਣਾ ਡਿਵੀਜ਼ਨ ਨੰਬਰ 8 ਦੀ ਪੁਲਿਸ ਨੂੰ ਦਿੱਤੀ।

ਬੱਸ ਕੰਡਕਟਰ ਰਾਜਾ ਨੇ ਦੱਸਿਆ ਕਿ ਉਹ ਜੰਮੂ ਤੋਂ ਸਵਾਰੀਆਂ ਲੈ ਕੇ ਦਿੱਲੀ ਜਾ ਰਿਹਾ ਸੀ। ਜਿਵੇਂ ਹੀ ਉਹ ਪਠਾਨਕੋਟ ਚੌਂਕ ਨੇੜੇ ਪਹੁੰਚਿਆ ਤਾਂ ਗੱਡੀ ਦਾ ਅਚਾਨਕ ਐਕਸਲ ਟੁੱਟਣ ਕਾਰਨ ਦੋਵੇਂ ਟਾਇਰ ਫਟ ਗਏ ਅਤੇ ਬੱਸ ਰਸਤੇ ਵਿੱਚ ਹੀ ਰੁਕ ਗਈ। ਬੱਸ ਨੂੰ ਠੀਕ ਕਰਨ ਵਿੱਚ ਦੋ-ਤਿੰਨ ਘੰਟੇ ਲੱਗਣ ਕਾਰਨ ਸਵਾਰੀਆਂ ਪਰੇਸ਼ਾਨ ਹੋ ਰਹੀਆਂ ਸਨ, ਜਿਸ ਕਰਕੇ ਉਨ੍ਹਾਂ ਨੇ ਕੁਝ ਸਵਾਰੀਆਂ ਨੂੰ ਪੈਸੇ ਦੇ ਕੇ ਦੂਜੀ ਬੱਸ ਵਿੱਚ ਭੇਜ ਦਿੱਤਾ। ਬਾਕੀ ਸਵਾਰੀਆਂ ਵੀ ਪੈਸੇ ਮੰਗਣ ਲੱਗ ਪਈਆਂ। ਪੈਸੇ ਖਤਮ ਹੋਣ ਕਾਰਨ ਉਨ੍ਹਾਂ ਨੇ ਮਾਲਕ ਨੂੰ ਫੋਨ ਕੀਤਾ ਪਰ ਮਾਲਕ ਨੇ ਫੋਨ ਨਹੀਂ ਚੁੱਕਿਆ, ਜਿਸ ਕਾਰਨ ਗੁੱਸੇ ਵਿੱਚ ਆਈਆਂ ਸਵਾਰੀਆਂ ਨੇ ਬੱਸ ਦੇ ਸਾਰੇ ਸ਼ੀਸ਼ੇ ਅਤੇ ਅੰਦਰ ਤੋੜ-ਫੋੜ ਕਰ ਦਿੱਤੀ ਅਤੇ ਬਾਅਦ ਵਿੱਚ ਭੱਜ ਗਈਆਂ। ਉਨ੍ਹਾਂ ਨੇ ਇਸ ਦੀ ਸ਼ਿਕਾਇਤ ਥਾਣਾ 8 ਦੀ ਪੁਲਿਸ ਨੂੰ ਦਿੱਤੀ ਹੈ ਅਤੇ ਪੁਲਿਸ ਜਾਂਚ ਵਿੱਚ ਜੁਟ ਗਈ ਹੈ।