ਦੁਨੀਆ ਦਾ ਸਭ ਤੋਂ ਇਕੱਲਾ ਪੈਂਗੁਇਨ: ਕਿਉਂ ਇੱਕ ਛੋਟੇ ਜਿਹੇ ਪੰਛੀ ਨੇ ਚੁਣੀ ਮੌਤ ਦੀ ਰਾਹ ਤੇ ਬਣ ਗਿਆ ਬਗਾਵਤ ਦਾ ਪ੍ਰਤੀਕ?

ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ: ਸੋਸ਼ਲ ਮੀਡੀਆ 'ਤੇ ਤੁਸੀਂ ਵੀ ਇਹ ਦੇਖਿਆ ਹੋਵੇਗਾ ਕਿ ਅੰਟਾਰਕਟਿਕਾ ਦੀ ਬੇਅੰਤ ਬਰਫ਼ ਦੇ ਵਿਚਕਾਰ ਇੱਕ ਇਕੱਲਾ ਪੈਂਗੁਇਨ, ਆਪਣੀ ਕਲੋਨੀ (ਝੁੰਡ) ਨੂੰ ਪਿੱਛੇ ਛੱਡ ਕੇ ਵਿਸ਼ਾਲ ਬਰਫ਼ੀਲੇ ਪਹਾੜਾਂ ਵੱਲ ਵਧ ਰਿਹਾ ਹੈ। ਇਨ੍ਹੀਂ ਦਿਨੀਂ ਇੰਟਰਨੈੱਟ 'ਤੇ ਇਹ ਵਾਇਰਲ ਵੀਡੀਓ (Viral Penguin Video) ਸਨਸਨੀ ਮਚਾ ਰਹੀ ਹੈ।

ਕਰੋੜਾਂ ਵਾਰ ਦੇਖੀ ਗਈ ਇਹ ਵੀਡੀਓ 'ਰੈਜ਼ਿਸਟੈਂਸ' (ਵਿਰੋਧ) ਅਤੇ ਬਗਾਵਤ ਦਾ ਇੱਕ ਵਿਲੱਖਣ ਪ੍ਰਤੀਕ ਬਣ ਗਈ ਹੈ। ਸੋਸ਼ਲ ਮੀਡੀਆ 'ਤੇ ਲੋਕ ਇਸ ਨੂੰ ਰੌਬਰਟ ਫਰੌਸਟ ਦੀ 'ਰੋਡ ਨੌਟ ਟੇਕਨ' (ਉਹ ਰਾਹ ਜੋ ਕਿਸੇ ਨੇ ਨਾ ਚੁਣਿਆ ਹੋਵੇ) ਚੁਣਨ ਵਾਲਾ ਦੱਸ ਰਹੇ ਹਨ ਅਤੇ ਹਰ ਕੋਈ ਇਹੀ ਜਾਣਨਾ ਚਾਹ ਰਿਹਾ ਹੈ ਕਿ ਆਪਣੀ ਕਲੋਨੀ ਨੂੰ ਛੱਡ ਕੇ ਆਖ਼ਰ ਉਹ ਪੈਂਗੁਇਨ ਇਕੱਲਾ ਪਹਾੜਾਂ ਵੱਲ ਕਿਉਂ ਜਾ ਰਿਹਾ ਹੈ?

ਕੀ ਹੈ ਇਸ 'ਨਿਹਲਿਸਟ ਪੈਂਗੁਇਨ' ਦੀ ਅਸਲੀ ਕਹਾਣੀ?

ਭਾਵੇਂ ਇਹ ਵੀਡੀਓ ਜਨਵਰੀ 2026 ਵਿੱਚ ਵਾਇਰਲ ਹੋ ਰਹੀ ਹੈ, ਪਰ ਇਹ ਹਾਲੀਆ (ਨਵੀਂ) ਨਹੀਂ ਹੈ। ਇਹ ਕਲਿੱਪ 19 ਸਾਲ ਪੁਰਾਣੀ ਇੱਕ ਡਾਕੂਮੈਂਟਰੀ 'ਐਨਕਾਊਂਟਰਸ ਐਟ ਦ ਐਂਡ ਆਫ ਦ ਵਰਲਡ' (2007) ਤੋਂ ਲਈ ਗਈ ਹੈ, ਜਿਸ ਨੂੰ ਜਰਮਨ ਫਿਲਮ ਨਿਰਮਾਤਾ ਵਰਨਰ ਹਰਜ਼ੋਗ ਨੇ ਨਿਰਦੇਸ਼ਿਤ ਕੀਤਾ ਸੀ। ਫਿਲਮ ਵਿੱਚ ਇੱਕ 'ਐਡਲੀ ਪੈਂਗੁਇਨ' ਨੂੰ ਆਪਣੀ ਕਲੋਨੀ ਤੋਂ ਦੂਰ ਜਾਂਦੇ ਦਿਖਾਇਆ ਗਿਆ ਹੈ।

ਆਮ ਤੌਰ 'ਤੇ ਪੈਂਗੁਇਨ ਸਮੁੰਦਰ ਵੱਲ ਜਾਂਦੇ ਹਨ, ਜਿੱਥੇ ਉਨ੍ਹਾਂ ਨੂੰ ਖਾਣਾ ਅਤੇ ਜੀਵਨ ਮਿਲਦਾ ਹੈ, ਪਰ ਇਹ ਪੈਂਗੁਇਨ ਉਨ੍ਹਾਂ ਤੋਂ ਉਲਟ ਦੁਰਗਮ (ਔਖੀਆਂ) ਪਹਾੜੀਆਂ ਵੱਲ ਚੱਲ ਪਿਆ। ਹਰਜ਼ੋਗ ਨੇ ਇਸ ਨੂੰ ‘ਡੇਥ ਮਾਰਚ’ ਯਾਨੀ ਮੌਤ ਦੀ ਯਾਤਰਾ ਕਿਹਾ, ਕਿਉਂਕਿ ਉਸ ਦਿਸ਼ਾ ਵਿੱਚ ਪੈਂਗੁਇਨ ਦਾ ਜਿਊਂਦਾ ਬਚਣਾ ਨਾਮੁਮਕਿਨ ਸੀ।

ਉਸਨੇ ਸਭ ਕੁਝ ਕਿਉਂ ਛੱਡ ਦਿੱਤਾ?

ਡਾ. ਡੇਵਿਡ ਏਿਨਲੀ ਨੇ ਫਿਲਮ ਵਿੱਚ ਦੱਸਿਆ ਕਿ ਜੇਕਰ ਉਸ ਪੈਂਗੁਇਨ ਨੂੰ ਫੜ ਕੇ ਵਾਪਸ ਕਲੋਨੀ ਵਿੱਚ ਛੱਡ ਵੀ ਦਿੱਤਾ ਜਾਂਦਾ, ਤਾਂ ਵੀ ਉਹ ਮੁੜ ਕੇ ਫਿਰ ਤੋਂ ਉਸੀ ‘ਡੇਥ ਮਾਰਚ’ (ਮੌਤ ਦੀ ਯਾਤਰਾ) 'ਤੇ ਨਿਕਲ ਪੈਂਦਾ। ਫਿਲਮ ਨਿਰਮਾਤਾ ਨੇ ਇਹ ਵੀ ਪੁਸ਼ਟੀ ਕੀਤੀ ਸੀ ਕਿ ਉਹ ਪੈਂਗੁਇਨ ਉਨ੍ਹਾਂ ਪਹਾੜਾਂ ਵੱਲ ਲਗਭਗ 70 ਕਿਲੋਮੀਟਰ ਤੱਕ ਚੱਲਿਆ, ਪਰ ਬਾਅਦ ਵਿੱਚ ਉਸਦੀ ਮੌਤ ਹੋ ਗਈ।

ਇੰਟਰਨੈੱਟ 'ਤੇ ਬਣਿਆ ਵਾਇਰਲ ਮੀਮ

ਹੁਣ ਹਜ਼ਾਰਾਂ ਲੋਕ ਇਸ ਪੈਂਗੁਇਨ ਦੀ ਵੀਡੀਓ ਅਤੇ ਮੀਮ ਸ਼ੇਅਰ ਕਰ ਰਹੇ ਹਨ। ਇਨ੍ਹਾਂ ਵਿੱਚ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਵੀ ਸ਼ਾਮਲ ਹਨ। ਉਨ੍ਹਾਂ ਨੇ ਪੈਂਗੁਇਨ ਦੇ ਨਾਲ ਇੱਕ ਏਆਈ (AI) ਜਨਰੇਟਿਡ ਪੋਸਟ ਸ਼ੇਅਰ ਕਰਕੇ ਗ੍ਰੀਨਲੈਂਡ 'ਤੇ ਕਬਜ਼ਾ ਕਰਨ ਦੀ ਆਪਣੀ ਧਮਕੀ ਨੂੰ ਹਵਾ ਦਿੱਤੀ।

ਉੱਥੇ ਹੀ ਕਈ ਹੋਰ ਲੋਕਾਂ ਨੇ ਇਸ ਵਾਇਰਲ ਵੀਡੀਓ ਨੂੰ ਸ਼ੇਅਰ ਕਰਕੇ 9-5 ਦੀ ਨੌਕਰੀ ਅਤੇ 'ਟੌਕਸਿਕ ਵਰਕ ਕਲਚਰ' (ਕੰਮ ਦਾ ਜ਼ਹਿਰੀਲਾ ਮਾਹੌਲ) ਆਦਿ 'ਤੇ ਨਿਸ਼ਾਨਾ ਸਾਧਿਆ ਹੈ। ਕਈ ਲੋਕ ਇਸ ਨੂੰ 'ਇਨਰ ਪੀਸ' (ਅੰਦਰੂਨੀ ਸ਼ਾਂਤੀ) ਨਾਲ ਜੋੜ ਕੇ ਦੇਖ ਰਹੇ ਹਨ ਕਿ ਇਹ ਪੈਂਗੁਇਨ ਦੁਨੀਆ ਦੇ ਦਿਖਾਵੇ ਨੂੰ ਛੱਡ ਕੇ ਇਕੱਲਾ ਨਿਕਲ ਪਿਆ ਹੈ। ਉਹ ਦੁਨੀਆ ਦੀ ਭੀੜ ਵਿੱਚ ਹੋਰ ਦਿਖਾਵਾ ਨਹੀਂ ਕਰਨਾ ਚਾਹੁੰਦਾ।

ਪੈਂਗੁਇਨ ਬਣਿਆ ਪ੍ਰੇਰਣਾ

ਅੱਜ ਇਹ ਇਕੱਲਾ ਪੰਛੀ ਉਨ੍ਹਾਂ ਲੋਕਾਂ ਲਈ ਪ੍ਰੇਰਣਾ ਬਣ ਗਿਆ ਹੈ ਜੋ ਸ਼ੋਰ-ਸ਼ਰਾਬੇ ਅਤੇ 'ਟੌਕਸਿਕ' (ਜ਼ਹਿਰੀਲੇ) ਮਾਹੌਲ ਤੋਂ ਦੂਰ ਜਾਣਾ ਚਾਹੁੰਦੇ ਹਨ। ਲੋਕ ‘Be the Penguin’ ਲਿਖ ਕੇ ਏਆਈ (AI) ਦੁਆਰਾ ਤਿਆਰ ਕੀਤੀਆਂ ਤਸਵੀਰਾਂ ਸਾਂਝੀਆਂ ਕਰ ਰਹੇ ਹਨ। ਇਹ ਛੋਟਾ ਜਿਹਾ ਪੰਛੀ ਅੱਜ ਲੱਖਾਂ ਲੋਕਾਂ ਲਈ ਦੁਨੀਆ ਦੀ ਭੀੜ ਤੋਂ ਵੱਖ ਚੱਲਣ ਅਤੇ ਆਪਣੀ ਸ਼ਾਂਤੀ ਚੁਣਨ ਦਾ ਸਭ ਤੋਂ ਵੱਡਾ ਸਬਕ ਬਣ ਗਿਆ ਹੈ।