ਅਦਾਕਾਰ Shreyas Talpade ਸਮੇਤ 15 ਖ਼ਿਲਾਫ਼ ਯੂਪੀ 'ਚ ਐਫਆਈਆਰ ਦਰਜ, ਲੱਗੇ ਇਹ ਦੋਸ਼

ਜਾਗਰਣ ਸੰਵਾਦਦਾਤਾ, ਮਹੋਬਾ: ਦ ਲੋਨੀ ਅਰਬਨ ਮਲਟੀ ਸਟੇਟ ਕਰੈਡਿਟ ਅਤੇ ਥ੍ਰਿਫਟ ਕੋਆਪਰੇਟਿਵ ਸੁਸਾਇਟੀ ਲਿਮਿਟਡ (ਐਲਯੂਸੀਸੀ) 'ਤੇ ਨਿਵੇਸ਼ ਦੇ ਕਰੋੜਾਂ ਰੁਪਏ ਗਬਨ ਦਾ ਆਰੋਪ ਲਗਾਇਆ ਗਿਆ ਹੈ। ਲੋਕਾਂ ਨੂੰ ਰਕਮ ਦੁੱਗਣੀ ਕਰਨ ਅਤੇ ਹੋਰ ਬਚਤ ਯੋਜਨਾਵਾਂ ਵਿਚ ਵੱਧ ਲਾਭ ਦਾ ਲਾਲਚ ਦਿੱਤਾ ਗਿਆ ਸੀ। ਜਦੋਂ ਲੋਕਾਂ ਨੇ ਰਕਮ ਵਾਪਸ ਮੰਗੀ, ਤਾਂ ਕੰਪਨੀ ਦੇ ਲੋਕ ਤਾਲਾ ਲਾ ਕੇ ਭੱਜ ਗਏ।

ਪੀੜਤਾਂ ਅਨੁਸਾਰ, ਕੰਪਨੀ ਦੱਸਦੀ ਸੀ ਕਿ ਅਦਾਕਾਰ ਸ਼੍ਰੇਯਸ ਤਲਪਦੇ ਅਤੇ ਆਲੋਕ ਨਾਥ ਵੀ ਉਨ੍ਹਾਂ ਨਾਲ ਜੁੜੇ ਹੋਏ ਹਨ। ਪੁਲਿਸ ਨੇ ਸ਼੍ਰੇਯਸ ਤਲਪਦੇ ਅਤੇ ਕੰਪਨੀ ਦੇ ਚੇਅਰਮੈਨ ਸਮੀਰ ਅਗਰਵਾਲ ਸਮੇਤ 15 ਲੋਕਾਂ ਖ਼ਿਲਾਫ਼ ਮੁਕੱਦਮਾ ਦਰਜ ਕੀਤਾ ਹੈ। ਇਸ ਸਬੰਧ ਵਿਚ ਸ਼੍ਰੇਯਸ ਤਲਪਦੇ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ, ਪਰ ਉਨ੍ਹਾਂ ਦਾ ਫੋਨ ਨਹੀਂ ਲੱਗਾ। ਕੰਪਨੀ ਦੇ ਲੋਕਾਂ ਦੇ ਫੋਨ ਵੀ ਸਵਿੱਚ ਆਫ ਹਨ।

ਪੀੜਤ ਨਾਰਾਇਣ ਦਾਸ ਨੇ ਦੱਸਿਆ ਕਿ ਲਲਿਤ ਵਿਸ਼ਵਕਰਮਾ ਨੇ ਕਰੀਬ 10 ਸਾਲ ਪਹਿਲਾਂ ਆਪਣੇ ਮਕਾਨ ਵਿਚ ਐਲਯੂਸੀਸੀ ਦਾ ਦਫਤਰ ਖੋਲਿਆ ਸੀ। ਉਨ੍ਹਾਂ ਦੱਸਿਆ ਸੀ ਕਿ ਕੰਪਨੀ ਸਾਗਾ ਗਰੁੱਪ ਨਾਲ ਜੁੜੀ ਹੋਈ ਹੈ ਅਤੇ ਗਾਜ਼ਿਆਬਾਦ ਤੋਂ ਚਲਾਈ ਜਾਂਦੀ ਹੈ। ਇਹ ਕਈ ਰਾਜਾਂ ਵਿਚ ਕੰਮ ਕਰਦੀ ਹੈ। ਮੁੰਬਈ ਦੇ ਨਿਵਾਸੀ ਸਮੀਰ ਅਗਰਵਾਲ ਸਾਗਾ ਕੰਪਨੀ ਦੇ ਚੇਅਰਮੈਨ ਹਨ। ਲਲਿਤ ਆਪਣੇ ਆਪ ਨੂੰ ਮੈਨੇਜਰ ਦੱਸਦਾ ਸੀ। ਉਸ ਦੇ ਨਾਲ ਡਾਲਚੰਦਰ ਕੁਸ਼ਵਾਹਾ, ਕਮਲ ਰੈਕਵਾਰ ਆਦਿ ਏਜੰਟ ਸਨ। ਕੰਪਨੀ ਦੇ ਲੋਕ ਵੱਖ-ਵੱਖ ਯੋਜਨਾਵਾਂ ਵਿਚ ਰਕਮ ਦੁੱਗਣੀ ਕਰਨ ਅਤੇ ਵੱਡਾ ਮੁਨਾਫਾ ਹੋਣ ਦੀ ਗੱਲ ਕਰਕੇ ਰਕਮ ਜਮ੍ਹਾਂ ਕਰਵਾਉਂਦੇ ਸਨ।

ਪੀੜਤਾਂ ਵਿਚ ਬਾਈਕ ਮਿਸਤਰੀ ਇਸ਼ਾਨ ਵੀ ਸ਼ਾਮਲ ਹਨ। ਉਨ੍ਹਾਂ ਦੱਸਿਆ ਕਿ ਉਨ੍ਹਾਂ ਨੇ ਸੌ-ਸੌ ਰੁਪਏ ਕਰਕੇ ਕਰੀਬ ਡੇਢ ਲੱਖ ਤੋਂ ਵੱਧ ਰਕਮ ਜਮ੍ਹਾਂ ਕੀਤੀ ਸੀ। ਕੰਪਨੀ ਵਿਚ ਅਦਾਕਾਰ ਸ਼੍ਰੇਯਸ ਤਲਪਦੇ ਅਤੇ ਆਲੋਕ ਨਾਥ ਵਰਗੇ ਚਿਹਰੇ ਜੁੜੇ ਹੋਣ ਕਾਰਨ ਉਨ੍ਹਾਂ ਨੂੰ ਭਰੋਸਾ ਹੋ ਗਿਆ ਸੀ। ਇਸ ਲਈ ਹੋਰ ਲੋਕਾਂ ਤੋਂ ਵੀ ਸੱਤ ਤੋਂ ਅੱਠ ਲੱਖ ਰੁਪਏ ਜਮ੍ਹਾਂ ਕਰਵਾਏ ਸਨ। ਪੀੜਤ ਨਾਰਾਇਣ ਦਾਸ ਨੇ ਦੱਸਿਆ ਕਿ ਉਨ੍ਹਾਂ ਨੇ ਦੋ ਸਾਲਾਂ ਵਿਚ 1.75 ਲੱਖ ਰੁਪਏ ਜਮ੍ਹਾਂ ਕੀਤੇ ਸਨ।

ਇਸ ਦੇ ਨਾਲ ਹੀ ਲਖਨ ਦੇ ਫਿਕਸ ਡਿਪਾਜ਼ਿਟ ਵਿਚ 20 ਹਜ਼ਾਰ, ਪ੍ਰਕਾਸ਼ ਅਤੇ ਕਿਸ਼ੋਰ ਦੇ ਇਕ-ਇਕ ਲੱਖ, ਰਮੇਸ਼ ਅਗਰਵਾਲ ਦੇ 78 ਹਜ਼ਾਰ, ਬ੍ਰਿਜਗੋਪਾਲ ਵਿਸ਼ਵਕਰਮਾ ਦੇ 2.50 ਲੱਖ, ਮਹੇਸ਼ਚੰਦਰ ਦੇ 60 ਹਜ਼ਾਰ, ਤੁਲਸੀ ਕੁਸ਼ਵਾਹਾ ਦੇ 1.36 ਲੱਖ, ਮਹਕ ਰਾਈਨ ਦੇ 2.16 ਲੱਖ ਸਮੇਤ ਬਹੁਤ ਸਾਰੇ ਲੋਕਾਂ ਨੇ ਵੱਖ-ਵੱਖ ਯੋਜਨਾਵਾਂ ਵਿਚ ਰਕਮ ਜਮ੍ਹਾਂ ਕੀਤੀ। ਸੱਤ ਮਹੀਨੇ ਪਹਿਲਾਂ ਸ਼੍ਰੀਨਗਰ ਸਥਿਤ ਦਫਤਰ ਵੀ ਬੰਦ ਹੋ ਗਿਆ। ਮੁਲਜ਼ਮਾਂ ਦੇ ਫੋਨ ਵੀ ਸਵਿੱਚ ਆਫ ਹੋ ਗਏ। ਪ੍ਰਭਾਰੀ ਨਿਰਿਕਸ਼ਕ ਅਵਧੇਸ਼ ਕੁਮਾਰ ਮਿਸ਼ਰ ਨੇ ਦੱਸਿਆ ਕਿ ਜਾਂਚ ਜਾਰੀ ਹੈ।

ਇਨ੍ਹਾਂ ਲੋਕਾਂ 'ਤੇ ਮੁਕੱਦਮਾ

ਮਹਾਰਾਸ਼ਟਰ ਦੇ ਨਿਵਾਸੀ ਚੇਅਰਮੈਨ ਸਮੀਰ ਅਗਰਵਾਲ, ਪਤਨੀ ਸਾਨੀਆ ਅਗਰਵਾਲ, ਸੰਜੈ ਮੁਦਗਿਲ, ਸ਼੍ਰੇਯਸ ਤਲਪਦੇ, ਲਲਿਤ ਵਿਸ਼ਵਕਰਮਾ, ਡਾਲਚੰਦਰ ਕੁਸ਼ਵਾਹਾ, ਸੁਨੀਲ ਵਿਸ਼ਵਕਰਮਾ, ਸਚਿਨ ਰੈਕਵਾਰ, ਕਮਲ ਰੈਕਵਾਰ, ਸੁਨੀਲ ਰੈਕਵਾਰ, ਮਹੇਸ਼ ਰੈਕਵਾਰ, ਮੋਹਨ ਕੁਸ਼ਵਾਹਾ, ਜਿਤਿੰਦਰ ਨਾਮਦੇਵ ਅਤੇ ਨਾਰਾਇਣ ਸਿੰਘ ਰਾਜਪੂਤ ਦੇ ਖ਼ਿਲਾਫ਼ ਮੁਕੱਦਮਾ ਦਰਜ ਕੀਤਾ ਗਿਆ ਹੈ।