ਸਰਕਾਰੀ ਸਕੂਲ ਤੋਂ ਪੜ੍ਹਾਈ ਤੇ ਖੇਤਾਂ 'ਚ ਟ੍ਰੈਕਟਰ...ਧਰਮਿੰਦਰ ਦਾ ਟਿਊਬਵੈੱਲ ਆਪਰੇਟਰ ਤੋਂ ਸੁਪਰ ਸਟਾਰ ਬਣਨ ਦਾ ਸਫ਼ਰ

ਰੋਹਿਤ ਸ਼ਰਮਾ, ਮਾਲੇਰਕੋਟਲਾ : ਲੁਧਿਆਣਾ ਤੇ ਮਾਲੇਰਕੋਟਲਾ ਜ਼ਿਲ੍ਹਿਆਂ 'ਚ ਫੈਲਿਆ ਪੰਜਾਬ ਦਾ ਮਾਲਵਾ ਖੇਤਰ ਸ਼ਾਇਦ ਅਦਾਕਾਰ ਧਰਮਿੰਦਰ ਦੇ ਸਭ ਤੋਂ ਵੱਧ ਪ੍ਰਸ਼ੰਸਕਾਂ ਵਾਲਾ ਇਲਾਕਾ ਹੈ। ਧਰਮਿੰਦਰ ਦਾ ਜਨਮ 8 ਦਸੰਬਰ 1935 ਨੂੰ ਕਿਸ਼ਨ ਸਿੰਘ ਅਤੇ ਸਤਵੰਤ ਕੌਰ ਦੇ ਘਰ ਹੋਇਆ ਸੀ। ਉਨ੍ਹਾਂ ਸਰਕਾਰੀ ਹਾਈ ਸਕੂਲ ਲਲਤੋਂ ਤੋਂ ਪੜ੍ਹਾਈ ਕੀਤੀ ਤੇ ਕੁਝ ਸਮੇਂ ਲਈ ਮਾਲੇਰਕੋਟਲਾ ਜ਼ਿਲ੍ਹੇ ਦੇ ਬਨਭੌਰਾ ਪਿੰਡ 'ਚ ਟਿਊਬਵੈੱਲ ਆਪਰੇਟਰ ਵਜੋਂ ਵੀ ਕੰਮ ਕੀਤਾ।

ਡਾਂਗੋ ਪਿੰਡ ਦੇ ਨਿਵਾਸੀ ਬੂਟਾ ਸਿੰਘ ਦਿਓਲ ਜੋ ਧਰਮਿੰਦਰ ਦੇ ਪਰਿਵਾਰਕ ਰਿਸ਼ਤੇ 'ਚ ਭਤੀਜੇ ਹਨ, ਆਪਣੇ ਤਾਇਆ ਜੀ ਨੂੰ ਪਿਆਰ ਨਾਲ ਯਾਦ ਕਰਦੇ ਹਨ। ਉਹ ਦੱਸਦੇ ਹਨ ਕਿ ਧਰਮਿੰਦਰ ਆਪਣੇ ਪਿਤਾ ਕਿਸ਼ਨ ਸਿੰਘ ਦਿਓਲ ਨਾਲ ਬਹੁਤ ਪਿਆਰ ਕਰਦੇ ਸਨ ਤੇ ਉਨ੍ਹਾਂ ਨੇ ਹੀ ਖੇਤੀ ਦੀ ਜ਼ਮੀਨ ਦੀ ਦੇਖਰੇਖ ਦੀ ਜ਼ਿੰਮੇਵਾਰੀ ਧਰਮਿੰਦਰ ਨੂੰ ਸੌਂਪੀ ਸੀ।

ਸੁਪਰਸਟਾਰ ਬਣਨ ਤੋਂ ਬਾਅਦ ਵੀ ਚਲਾਉਂਦੇ ਸਨ ਟਰੈਕਟਰ

ਭਾਵੇਂ ਤਾਇਆ ਜੀ ਨੇ ਆਪਣਾ ਬਚਪਨ ਆਪਣੀ ਮਾਂ ਦੇ ਜੱਦੀ ਪਿੰਡ ਨਸਰਾਲੀ ਹੈਬੋਵਾਲ 'ਚ ਬਿਤਾਇਆ, ਪਰ ਉਹ ਅਕਸਰ ਡਾਂਗੋ ਆਉਂਦੇ ਸਨ ਤੇ ਪਿੰਡ ਦੇ ਮਰਦਾਂ, ਔਰਤਾਂ ਤੇ ਬੱਚਿਆਂ ਨਾਲ ਸਮਾਂ ਬਿਤਾਉਂਦੇ ਸਨ। ਬੂਟਾ ਸਿੰਘ ਨੇ ਦੱਸਿਆ ਕਿ ਜਦੋਂ ਉਹ ਆਪਣੇ ਫਿਲਮੀ ਕਰੀਅਰ ਦੇ ਸਿਖਰ 'ਤੇ ਸਨ, ਉਦੋਂ ਵੀ ਧਰਮਿੰਦਰ ਜਦੋਂ ਡਾਂਗੋ ਆਉਂਦੇ ਤਾਂ ਆਪਣੇ ਖੇਤਾਂ 'ਚ ਟਰੈਕਟਰ ਚਲਾਉਣਾ ਨਹੀਂ ਭੁੱਲਦੇ ਸਨ।

ਬਨਭੌਰਾ ਪਿੰਡ ਦੇ ਬਜ਼ੁਰਗ ਗੁਰਮੇਲ ਸਿੰਘ ਯਾਦ ਕਰਦੇ ਹਨ ਕਿ ਧਰਮਿੰਦਰ ਨੇ ਕਿਸ ਤਰ੍ਹਾਂ ਟਿਊਬਵੈੱਲ ਆਪਰੇਟਰ ਵਜੋਂ ਕੰਮ ਕੀਤਾ। ਉਹ ਆਪਣੇ ਸਾਥੀ ਦਿਲਬਾਗ ਰਾਏ ਨਾਲ ਮਿਲ ਕੇ ਰਾਤ ਨੂੰ ਟਿਊਬਵੈੱਲ ਚਲਾਉਣ ਦਾ ਸਮਾਂ ਤੈਅ ਕਰਦੇ ਸਨ, ਤਾਂ ਜੋ ਕਿਸਾਨ ਆਪਣੀਆਂ ਫ਼ਸਲਾਂ ਨੂੰ ਸਹੀ ਸਮੇਂ 'ਤੇ ਪਾਣੀ ਦੇ ਸਕਣ।

ਭਾਵੇਂ ਉਨ੍ਹਾਂ ਨੂੰ ਡਿਊਟੀ ਦੌਰਾਨ ਟਿਊਬਵੈੱਲ 'ਤੇ ਰਹਿਣਾ ਪੈਂਦਾ ਸੀ, ਪਰ ਉਹ ਅਕਸਰ ਲੋਕਾਂ 'ਚ ਆ ਕੇ ਰਹਿੰਦੇ, ਲੋਕਾਂ ਦੀਆਂ ਸਮੱਸਿਆਵਾਂ ਦੇ ਸੁੱਖ-ਦੁੱਖ 'ਚ ਸ਼ਰੀਕ ਹੁੰਦੇ ਤੇ ਸਮੱਸਿਆਵਾਂ ਦਾ ਹੱਲ ਕਰਨ 'ਚ ਮਦਦ ਕਰਦੇ ਸਨ।

ਕਈ ਜਗ੍ਹਾ ਬੀਤਿਆ ਬਚਪਨ

ਪੱਖੋਵਾਲ ਦੇ ਡਾ. ਦਵਿੰਦਰ ਅਸ਼ੋਕ, ਜਿਨ੍ਹਾਂ ਨੇ ਧਰਮਿੰਦਰ 'ਤੇ ਕਿਤਾਬ ਲਿਖਣੀ ਸ਼ੁਰੂ ਕੀਤੀ ਸੀ, ਨੇ ਉਨ੍ਹਾਂ ਨੂੰ ਬਹੁਤ ਹੀ ਨਿਮਰ, ਸਰਲ ਤੇ ਬਹੁ-ਪ੍ਰਤਿਭਾਸ਼ਾਲੀ ਵਿਅਕਤੀ ਦੱਸਿਆ। ਉਨ੍ਹਾਂ ਕਦੇ ਕਿਸੇ ਨੂੰ ਨਿਰਾਸ਼ ਨਹੀਂ ਕੀਤਾ, ਡਾ. ਅਸ਼ੋਕ ਨੇ ਕਿਹਾ ਕਿ ਉਨ੍ਹਾਂ ਦੇ ਪਿਤਾ ਸਿੱਖਿਆ ਵਿਭਾਗ 'ਚ ਹੈੱਡ ਮਾਸਟਰ ਦੇ ਅਹੁਦੇ 'ਤੇ ਤਾਇਨਾਤ ਸਨ। ਉਨ੍ਹਾਂ ਦੇ ਵਾਰ-ਵਾਰ ਤਬਾਦਲੇ ਹੋਣ ਕਾਰਨ ਧਰਮਿੰਦਰ ਦਾ ਬਚਪਨ ਕਈ ਥਾਵਾਂ 'ਤੇ ਬੀਤਿਆ।

ਡਾ. ਅਸ਼ੋਕ ਦੱਸਦੇ ਹਨ ਕਿ ਧਰਮਿੰਦਰ ਨੇ ਆਪਣੀ ਸ਼ੁਰੂਆਤੀ ਸਿੱਖਿਆ ਸਰਕਾਰੀ ਹਾਈ ਸਕੂਲ ਲਾਲਤੋਂ ਤੋਂ ਪ੍ਰਾਪਤ ਕੀਤੀ, ਜਿੱਥੇ ਉਨ੍ਹਾਂ ਦੇ ਪਿਤਾ ਹੈੱਡਮਾਸਟਰ ਵਜੋਂ ਤਾਇਨਾਤ ਸਨ। ਅੱਜ ਜਦੋਂ ਇਹ ਮਹਾਨ ਅਭਿਨੇਤਾ 89 ਸਾਲ ਦੀ ਉਮਰ 'ਚ ਇਸ ਦੁਨੀਆ ਨੂੰ ਅਲਵਿਦਾ ਕਹਿ ਗਿਆ, ਪਰ ਆਪਣੇ ਚਾਹੁਣ ਵਾਲਿਆਂ ਦੇ ਦਿਲਾਂ 'ਚ ਉਹ ਹਮੇਸ਼ਾ ਜ਼ਿੰਦਾ ਰਹਿਣਗੇ।