ਰੂਸ ਦੀ ਦੋਹਰੀ ਚਾਲ? ਇੱਕ ਪਾਸੇ ਗੱਲਬਾਤ ਦੀ ਹਾਮੀ, ਦੂਜੇ ਪਾਸੇ ਮਿਜ਼ਾਈਲਾਂ ਦੀ ਬੁਛਾੜ; ਰੂਸੀ ਹਮਲੇ ਕਾਰਨ 10 ਲੱਖ ਲੋਕਾਂ ਦੇ ਘਰਾਂ 'ਚ ਛਾਇਆ ਹਨੇਰਾ
ਅਮਰੀਕਾ ਦੀ ਵਿਚੋਲਗੀ ਹੇਠ ਜੰਗ ਦੇ ਖ਼ਾਤਮੇ ਲਈ ਰੂਸ ਅਤੇ ਯੂਕਰੇਨ ਵਿਚਾਲੇ ਅਬੂ ਧਾਬੀ ਵਿੱਚ ਹੋ ਰਹੀ ਗੱਲਬਾਤ ਸ਼ਨੀਵਾਰ ਨੂੰ ਦੂਜੇ ਦਿਨ ਸੰਪੰਨ ਹੋਈ। ਦੋਵਾਂ ਦੇਸ਼ਾਂ ਨੇ ਇਸ ਗੱਲਬਾਤ ਨੂੰ ਸਕਾਰਾਤਮਕ ਦੱਸਦਿਆਂ ਭਵਿੱਖ ਵਿੱਚ ਵੀ ਚਰਚਾ ਜਾਰੀ ਰੱਖਣ ਦੀ ਸੰਭਾਵਨਾ ਜਤਾਈ ਹੈ। ਇਸ ਦੇ ਕੁਝ ਘੰਟਿਆਂ ਬਾਅਦ ਅਮਰੀਕਾ ਨੇ ਦੋਵਾਂ ਦੇਸ਼ਾਂ ਦੇ ਆਗੂਆਂ ਨਾਲ ਗੱਲ ਕਰਕੇ ਅਗਲੀ ਤ੍ਰਿਪੱਖੀ ਵਾਰਤਾ 1 ਫਰਵਰੀ (ਐਤਵਾਰ) ਨੂੰ ਹੋਣ ਦੀ ਸੂਚਨਾ ਦਿੱਤੀ ਹੈ।
Posted By Sunita
Publish Date: Sun, 25 Jan 2026 08:20 AM (IST)
Updated Date: Sun, 25 Jan 2026 08:21 AM (IST)
ਰਾਇਟਰਜ਼, ਕੀਵ: ਅਮਰੀਕਾ ਦੀ ਵਿਚੋਲਗੀ ਹੇਠ ਜੰਗ ਦੇ ਖ਼ਾਤਮੇ ਲਈ ਰੂਸ ਅਤੇ ਯੂਕਰੇਨ ਵਿਚਾਲੇ ਅਬੂ ਧਾਬੀ ਵਿੱਚ ਹੋ ਰਹੀ ਗੱਲਬਾਤ ਸ਼ਨੀਵਾਰ ਨੂੰ ਦੂਜੇ ਦਿਨ ਸੰਪੰਨ ਹੋਈ। ਦੋਵਾਂ ਦੇਸ਼ਾਂ ਨੇ ਇਸ ਗੱਲਬਾਤ ਨੂੰ ਸਕਾਰਾਤਮਕ ਦੱਸਦਿਆਂ ਭਵਿੱਖ ਵਿੱਚ ਵੀ ਚਰਚਾ ਜਾਰੀ ਰੱਖਣ ਦੀ ਸੰਭਾਵਨਾ ਜਤਾਈ ਹੈ। ਇਸ ਦੇ ਕੁਝ ਘੰਟਿਆਂ ਬਾਅਦ ਅਮਰੀਕਾ ਨੇ ਦੋਵਾਂ ਦੇਸ਼ਾਂ ਦੇ ਆਗੂਆਂ ਨਾਲ ਗੱਲ ਕਰਕੇ ਅਗਲੀ ਤ੍ਰਿਪੱਖੀ ਵਾਰਤਾ 1 ਫਰਵਰੀ (ਐਤਵਾਰ) ਨੂੰ ਹੋਣ ਦੀ ਸੂਚਨਾ ਦਿੱਤੀ ਹੈ।
ਇਸ ਦੌਰਾਨ, ਅਮਰੀਕੀ ਦੂਤ ਸਟੀਵ ਵਿਟਕਾਫ ਅਤੇ ਅਮਰੀਕੀ ਰਾਸ਼ਟਰਪਤੀ ਦੇ ਜਵਾਈ ਜੇਰੇਡ ਕੁਸ਼ਨਰ ਨੇ ਮਾਸਕੋ ਪਹੁੰਚ ਕੇ ਰੂਸੀ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਨਾਲ ਚਾਰ ਘੰਟੇ ਮੁਲਾਕਾਤ ਕੀਤੀ। ਪਰ ਸ਼ੁੱਕਰਵਾਰ-ਸ਼ਨੀਵਾਰ ਦੀ ਰਾਤ ਨੂੰ ਰੂਸ ਵੱਲੋਂ ਕੀਤੇ ਗਏ ਵੱਡੇ ਹਮਲੇ ਨੇ ਗੱਲਬਾਤ ਨਾਲ ਬਣੇ ਸਕਾਰਾਤਮਕ ਮਾਹੌਲ ਨੂੰ ਝਟਕਾ ਦਿੱਤਾ ਹੈ।
ਬਿਜਲੀ ਸੰਕਟ ਅਤੇ ਜਾਨੀ ਨੁਕਸਾਨ
ਰੂਸ ਦੇ ਮਿਜ਼ਾਈਲ ਅਤੇ ਡਰੋਨ ਹਮਲਿਆਂ ਕਾਰਨ ਯੂਕਰੇਨ ਦੇ ਊਰਜਾ ਪਲਾਂਟਾਂ ਨੂੰ ਭਾਰੀ ਨੁਕਸਾਨ ਪਹੁੰਚਿਆ ਹੈ, ਜਿਸ ਕਾਰਨ ਭਿਆਨਕ ਠੰਡ ਦੇ ਮੌਸਮ ਵਿੱਚ 10 ਲੱਖ ਤੋਂ ਵੱਧ ਲੋਕ ਬਿਜਲੀ ਤੋਂ ਵਾਂਝੇ ਹੋ ਗਏ ਹਨ। ਇਨ੍ਹਾਂ ਹਮਲਿਆਂ ਵਿੱਚ ਇੱਕ ਵਿਅਕਤੀ ਦੀ ਮੌਤ ਹੋ ਗਈ ਅਤੇ 31 ਲੋਕ ਜ਼ਖ਼ਮੀ ਹੋ ਗਏ। ਯੂਕਰੇਨ ਨੇ ਇਸ ਹਮਲੇ ਦੀ ਸਖ਼ਤ ਨਿਖੇਧੀ ਕੀਤੀ ਹੈ।
ਡੋਨਬਾਸ 'ਤੇ ਪੇਚ ਫਸਿਆ
ਅਬੂ ਧਾਬੀ ਵਾਰਤਾ ਵਿੱਚ ਕੋਈ ਸਾਂਝਾ ਬਿਆਨ ਜਾਰੀ ਨਹੀਂ ਹੋ ਸਕਿਆ। ਯੂਕਰੇਨ ਨੇ ਇੱਕ ਵਾਰ ਫਿਰ ਡੋਨਬਾਸ (ਲੁਹਾਂਸਕ ਅਤੇ ਡੋਨੇਟਸਕ) ਦੀ ਆਪਣੀ ਜ਼ਮੀਨ ਛੱਡਣ ਤੋਂ ਇਨਕਾਰ ਕਰ ਦਿੱਤਾ ਹੈ, ਜਦਕਿ ਰੂਸ ਪੂਰੇ ਡੋਨਬਾਸ 'ਤੇ ਕਬਜ਼ੇ ਦੀ ਸ਼ਰਤ 'ਤੇ ਅੜਿਆ ਹੋਇਆ ਹੈ। ਰੂਸ ਪਹਿਲਾਂ ਹੀ ਇਸ ਖਣਿਜ ਸੰਪੰਨ ਇਲਾਕੇ ਦੇ 90 ਫ਼ੀਸਦੀ ਹਿੱਸੇ 'ਤੇ ਕਬਜ਼ਾ ਕਰ ਚੁੱਕਾ ਹੈ।
ਯੂਕਰੇਨ 'ਤੇ ਵਧਦਾ ਦਬਾਅ
ਯੂਕਰੇਨ ਦੇ ਵਿਦੇਸ਼ ਮੰਤਰੀ ਆਂਦਰੀ ਸਿਬੀਹਾ ਨੇ ਤਾਜ਼ਾ ਹਮਲਿਆਂ ਨੂੰ ਬਰਬਰਤਾ ਕਰਾਰ ਦਿੰਦਿਆਂ ਕਿਹਾ ਕਿ ਇਹ ਮਿਜ਼ਾਈਲਾਂ ਸਿਰਫ਼ ਸਾਡੇ ਲੋਕਾਂ 'ਤੇ ਹੀ ਨਹੀਂ, ਸਗੋਂ ਗੱਲਬਾਤ ਦੀ ਮੇਜ਼ 'ਤੇ ਵੀ ਡਿੱਗੀਆਂ ਹਨ। ਵਿਸ਼ਲੇਸ਼ਕਾਂ ਦਾ ਮੰਨਣਾ ਹੈ ਕਿ ਨਾਟੋ (NATO) ਦੇ ਅੰਦਰੂਨੀ ਤਣਾਅ ਅਤੇ ਅਮਰੀਕਾ ਦੇ ਭਾਰੀ ਦਬਾਅ ਕਾਰਨ ਯੂਕਰੇਨ ਇਸ ਸਮੇਂ ਗੱਲਬਾਤ ਦੀ ਮੇਜ਼ ਤੋਂ ਹਟਣ ਦੀ ਸਥਿਤੀ ਵਿੱਚ ਨਹੀਂ ਹੈ।