ਇਨਸਾਨੀਅਤ ਸ਼ਰਮਸਾਰ: ICE ਨੇ ਮਾਂ ਨੂੰ 2 ਸਾਲ ਦੇ ਪੁੱਤਰ ਤੋਂ ਬਿਨਾਂ ਦੇਸ਼ 'ਚੋਂ ਕੱਢਿਆ, ਬਾਅਦ 'ਚ ਹੱਤਿਆ ਦਾ ਦੋਸ਼ ਵੀ ਮੜ੍ਹਿਆ

ਡਿਜੀਟਲ ਡੈਸਕ, ਨਵੀਂ ਦਿੱਲੀ: ਅਮਰੀਕਾ ਵਿੱਚ ਇੱਕ ਬੇਹੱਦ ਮੰਦਭਾਗੀ ਘਟਨਾ ਸਾਹਮਣੇ ਆਈ ਹੈ, ਜਿੱਥੇ ਇੱਕ ਮਾਂ ਨੇ ਇਮੀਗ੍ਰੇਸ਼ਨ ਐਂਡ ਕਸਟਮਜ਼ ਐਨਫੋਰਸਮੈਂਟ (ICE) 'ਤੇ ਗੰਭੀਰ ਦੋਸ਼ ਲਾਏ ਹਨ। ਹੋਂਡੁਰਾਸ ਦੀ ਰਹਿਣ ਵਾਲੀ ਵੈਂਡੀ ਹਰਨਾਂਡੇਜ਼ ਰੇਅਸ ਦਾ ਕਹਿਣਾ ਹੈ ਕਿ ਅਮਰੀਕੀ ਅਧਿਕਾਰੀਆਂ ਨੇ ਉਸ ਨੂੰ ਉਸ ਦੇ ਦੋ ਸਾਲ ਦੇ ਪੁੱਤਰ ਤੋਂ ਬਿਨਾਂ ਹੀ ਜ਼ਬਰਦਸਤੀ ਦੇਸ਼ੋਂ ਬਾਹਰ ਕੱਢ ਦਿੱਤਾ, ਜਿਸ ਤੋਂ ਕੁਝ ਮਹੀਨਿਆਂ ਬਾਅਦ ਬੱਚੇ ਦਾ ਬੇਰਹਿਮੀ ਨਾਲ ਕਤਲ ਕਰ ਦਿੱਤਾ ਗਿਆ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਹੁਣ ICE ਇਸ ਕਤਲ ਲਈ ਮਾਂ ਨੂੰ ਹੀ ਜ਼ਿੰਮੇਵਾਰ ਠਹਿਰਾ ਰਿਹਾ ਹੈ।

'ਦ ਵਾਸ਼ਿੰਗਟਨ ਪੋਸਟ' ਦੀ ਰਿਪੋਰਟ ਮੁਤਾਬਕ ਵੈਂਡੀ ਨੇ ਦੱਸਿਆ ਕਿ ਉਸ ਨੇ ਅਧਿਕਾਰੀਆਂ ਅੱਗੇ ਬਹੁਤ ਤਰਲੇ ਕੀਤੇ ਸਨ ਕਿ ਉਸ ਨੂੰ ਉਸ ਦੇ ਪੁੱਤਰ ਓਰਲਿਨ ਜੋਸਯੂ ਹਰਨਾਂਡੇਜ਼ ਰੇਅਸ ਤੋਂ ਬਿਨਾਂ ਵਾਪਸ ਨਾ ਭੇਜਿਆ ਜਾਵੇ, ਪਰ ਜਨਵਰੀ ਵਿੱਚ ਉਸ ਨੂੰ ਇਕੱਲਿਆਂ ਹੀ ਹੋਂਡੁਰਾਸ ਭੇਜ ਦਿੱਤਾ ਗਿਆ।

ਮਾਰਚ ਵਿੱਚ ਹੋਈ ਬੱਚੇ ਦੀ ਹੱਤਿਆ

ਮਾਂ ਦੇ ਦੇਸ਼ੋਂ ਨਿਕਾਲੇ ਤੋਂ ਬਾਅਦ ਦੋ ਸਾਲ ਦਾ ਬੱਚਾ ਫਲੋਰਿਡਾ ਵਿੱਚ ਆਪਣੇ ਚਾਚੇ ਨਾਲ ਰਹਿ ਰਿਹਾ ਸੀ। ਮਾਰਚ ਮਹੀਨੇ ਵਿੱਚ ਉਸ ਦੀ ਮੌਤ ਹੋ ਗਈ। ਜਾਂਚ ਵਿੱਚ ਸਾਹਮਣੇ ਆਇਆ ਕਿ ਬੱਚੇ ਦੀਆਂ ਕਈ ਪਸਲੀਆਂ ਟੁੱਟੀਆਂ ਹੋਈਆਂ ਸਨ, ਪੈਨਕ੍ਰੀਅਸ ਕੱਟਿਆ ਹੋਇਆ ਸੀ ਅਤੇ ਸਰੀਰ 'ਤੇ ਸੜਨ ਦੇ ਨਿਸ਼ਾਨ ਸਨ। ਪੁਲਿਸ ਨੇ ਕਤਲ ਦੇ ਦੋਸ਼ ਵਿੱਚ ਉਸ ਦੇ ਚਾਚੇ ਨੂੰ ਗ੍ਰਿਫਤਾਰ ਕਰ ਲਿਆ ਹੈ।

ICE ਦਾ ਪੱਖ ਅਤੇ ਮਾਂ ਦੇ ਇਲਜ਼ਾਮ

ਬੱਚੇ ਦੀ ਮੌਤ ਤੋਂ ਬਾਅਦ ICE ਨੇ ਇੱਕ ਪ੍ਰੈੱਸ ਰਿਲੀਜ਼ ਜਾਰੀ ਕਰਦਿਆਂ ਕਿਹਾ ਕਿ ਵੈਂਡੀ ਨੇ ਖੁਦ ਆਪਣੇ ਬੱਚੇ ਨੂੰ ਇੱਕ ਹਿੰਸਕ ਕਾਤਲ ਦੇ ਕੋਲ ਛੱਡਣ ਦਾ ਫੈਸਲਾ ਕੀਤਾ ਸੀ। ICE ਦੇ ਡਾਇਰੈਕਟਰ ਟੌਡ ਐਮ. ਲਾਇੰਸ ਨੇ ਕਿਹਾ ਕਿ ਉਨ੍ਹਾਂ ਨੇ ਮਾਂ ਨੂੰ ਬੱਚੇ ਦੇ ਨਾਲ ਜਾਣ ਦਾ ਮੌਕਾ ਦਿੱਤਾ ਸੀ, ਪਰ ਉਸ ਨੇ ਅਜਿਹਾ ਨਹੀਂ ਕੀਤਾ।

ਦੂਜੇ ਪਾਸੇ, ਰੋਂਦੀ ਹੋਈ ਮਾਂ ਨੇ ਇਨ੍ਹਾਂ ਦੋਸ਼ਾਂ ਨੂੰ ਸਿਰੇ ਤੋਂ ਨਕਾਰ ਦਿੱਤਾ ਹੈ। ਉਸ ਨੇ ਕਿਹਾ, "ਮੈਂ ਆਪਣੇ ਪੁੱਤਰ ਨੂੰ ਕਿਵੇਂ ਛੱਡ ਸਕਦੀ ਸੀ? ਉਹ ਮੇਰੀ ਜ਼ਿੰਦਗੀ ਦਾ ਸਭ ਤੋਂ ਵੱਡਾ ਪਿਆਰ ਸੀ। ਮੈਂ ਕੋਈ ਬੁਰੀ ਮਾਂ ਨਹੀਂ ਹਾਂ, ਮੈਂ ਤਾਂ ਅਧਿਕਾਰੀਆਂ ਨੂੰ ਮੈਨੂੰ ਮੇਰੇ ਬੱਚੇ ਨਾਲ ਮਿਲਾਉਣ ਦੀਆਂ ਗੁਹਾਰਾਂ ਲਾਈਆਂ ਸਨ।"

ਕਿਵੇਂ ਸ਼ੁਰੂ ਹੋਇਆ ਮਾਮਲਾ?

ਜਨਵਰੀ ਵਿੱਚ ਵੈਂਡੀ ਅਲਾਬਾਮਾ ਵਿੱਚ ਆਪਣੀ ਭੈਣ ਨਾਲ ਜਾ ਰਹੀ ਸੀ ਜਦੋਂ ਪੁਲਿਸ ਨੇ ਉਸ ਦੀ ਕਾਰ ਰੋਕ ਲਈ। ਬਾਅਦ ਵਿੱਚ ਉਸ ਨੂੰ ICE ਦੇ ਹਵਾਲੇ ਕਰ ਦਿੱਤਾ ਗਿਆ। ਅਧਿਕਾਰੀਆਂ ਅਨੁਸਾਰ, 2022 ਵਿੱਚ ਅਮਰੀਕਾ ਆਉਣ ਤੋਂ ਬਾਅਦ ਉਹ ਇਮੀਗ੍ਰੇਸ਼ਨ ਕੋਰਟ ਦੀ ਸੁਣਵਾਈ ਵਿੱਚ ਹਾਜ਼ਰ ਨਹੀਂ ਹੋਈ ਸੀ, ਜਿਸ ਕਾਰਨ ਜੱਜ ਨੇ ਪਹਿਲਾਂ ਹੀ ਉਸ ਨੂੰ ਦੇਸ਼ੋਂ ਕੱਢਣ ਦਾ ਹੁਕਮ ਦਿੱਤਾ ਹੋਇਆ ਸੀ।