ਹੰਟਾਵਾਇਰਸ ਦਾ ਕਹਿਰ: ਜਹਾਜ਼ 'ਚ ਦੋ ਭਾਰਤੀ ਵੀ ਸਨ ਸਵਾਰ, ਹੁਣ ਤੱਕ ਤਿੰਨ ਮੌਤਾਂ, WHO ਵੱਲੋਂ ਅਲਰਟ ਜਾਰੀ

ਡਿਜੀਟਲ ਡੈਸਕ, ਨਵੀਂ ਦਿੱਲੀ: ਅਟਲਾਂਟਿਕ ਮਹਾਸਾਗਰ ਵਿੱਚ ਕੇਪ ਵਰਡੇ ਨੇੜੇ ਫਸੇ ਇੱਕ ਕਰੂਜ਼ ਜਹਾਜ਼ 'ਤੇ ਹੰਟਾਵਾਇਰਸ (Hantavirus) ਦੇ ਮਾਮਲੇ ਸਾਹਮਣੇ ਆਏ ਹਨ। ਇਸ ਜਹਾਜ਼ 'ਤੇ ਮੌਜੂਦ ਕਰੂ ਮੈਂਬਰਾਂ ਵਿੱਚ ਦੋ ਭਾਰਤੀ ਵੀ ਸ਼ਾਮਲ ਹਨ। ਹੁਣ ਤੱਕ ਇਸ ਵਾਇਰਸ ਦੇ ਪੰਜ ਮਾਮਲਿਆਂ ਦੀ ਪੁਸ਼ਟੀ ਹੋਈ ਹੈ, ਜਿਨ੍ਹਾਂ ਵਿੱਚੋਂ ਤਿੰਨ ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ।

'Oceanwide Expeditions' ਦਾ ਇਹ ਲਗਜ਼ਰੀ ਕਰੂਜ਼ ਜਹਾਜ਼ 1 ਅਪ੍ਰੈਲ ਨੂੰ ਅਰਜਨਟੀਨਾ ਦੇ ਉਸ਼ੂਆਈਆ (Ushuaia) ਤੋਂ ਰਵਾਨਾ ਹੋਇਆ ਸੀ ਅਤੇ ਇਸ ਦੇ 10 ਮਈ ਨੂੰ ਸਪੇਨ ਦੇ ਕੈਨਰੀ ਆਈਲੈਂਡ ਪਹੁੰਚਣ ਦੀ ਉਮੀਦ ਹੈ।

ਕਰੂਜ਼ 'ਤੇ ਦੋ ਭਾਰਤੀ ਮੈਂਬਰ ਮੌਜੂਦ

ਰਿਪੋਰਟਾਂ ਮੁਤਾਬਕ, ਜਦੋਂ ਇਹ ਕਰੂਜ਼ ਰਵਾਨਾ ਹੋਇਆ ਸੀ, ਉਦੋਂ ਇਸ 'ਤੇ 28 ਦੇਸ਼ਾਂ ਦੇ ਲਗਭਗ 150 ਯਾਤਰੀ ਅਤੇ ਕਰੂ ਮੈਂਬਰ ਸਵਾਰ ਸਨ। ਬੀਬੀਸੀ ਦੀ ਰਿਪੋਰਟ ਅਨੁਸਾਰ, ਜਹਾਜ਼ 'ਤੇ ਸਵਾਰ ਲੋਕਾਂ ਵਿੱਚੋਂ 38 ਫਿਲੀਪੀਨਜ਼, 31 ਯੂਨਾਈਟਿਡ ਕਿੰਗਡਮ, 23 ਅਮਰੀਕਾ ਅਤੇ ਦੋ ਕਰੂ ਮੈਂਬਰ ਭਾਰਤ ਤੋਂ ਸਨ।

WHO ਨੇ ਕੀਤੀ ਮੌਤਾਂ ਦੀ ਪੁਸ਼ਟੀ

ਵਿਸ਼ਵ ਸਿਹਤ ਸੰਗਠਨ (WHO) ਨੇ ਪੰਜ ਮਾਮਲਿਆਂ ਦੀ ਪੁਸ਼ਟੀ ਕੀਤੀ ਹੈ। ਮਰਨ ਵਾਲਿਆਂ ਵਿੱਚ ਇੱਕ 69 ਸਾਲਾ ਡੱਚ ਔਰਤ, ਉਸਦਾ ਪਤੀ ਅਤੇ ਇੱਕ ਜਰਮਨ ਔਰਤ ਸ਼ਾਮਲ ਹੈ। ਯੂਨਾਈਟਿਡ ਨੇਸ਼ਨਜ਼ ਦੀ ਸਿਹਤ ਏਜੰਸੀ ਨੇ ਸਪੱਸ਼ਟ ਕੀਤਾ ਹੈ ਕਿ ਇਹ ਵਾਇਰਸ ਕੋਵਿਡ-19 ਵਾਂਗ ਕੋਈ ਮਹਾਮਾਰੀ ਨਹੀਂ ਹੈ, ਕਿਉਂਕਿ ਇਹ ਨਜ਼ਦੀਕੀ ਅਤੇ ਸਿੱਧੇ ਸੰਪਰਕ ਰਾਹੀਂ ਫੈਲਦਾ ਹੈ।

WHO ਦੀ ਮਾਹਿਰ ਮਾਰੀਆ ਵੈਨ ਕੇਰਖੋਵ ਨੇ ਦੱਸਿਆ ਕਿ ਹੰਟਾਵਾਇਰਸ ਆਮ ਤੌਰ 'ਤੇ ਚੂਹਿਆਂ ਵਰਗੇ ਜੀਵਾਂ ਤੋਂ ਫੈਲਦਾ ਹੈ, ਪਰ ਇਸ ਵਾਰ ਪਹਿਲੀ ਵਾਰ ਇਨਸਾਨਾਂ ਤੋਂ ਇਨਸਾਨਾਂ ਵਿੱਚ ਫੈਲਣ ਦੇ ਸੰਕੇਤ ਮਿਲੇ ਹਨ। ਅਧਿਕਾਰੀਆਂ ਨੇ ਜਹਾਜ਼ 'ਤੇ ਸਵਾਰ ਸਾਰੇ ਲੋਕਾਂ ਨੂੰ ਮਾਸਕ ਪਹਿਨਣ ਦੇ ਨਿਰਦੇਸ਼ ਦਿੱਤੇ ਹਨ।