ਕੀ ਹੈ ਇਲੈਕਟ੍ਰਿਕ ਬਲੈਂਕੇਟ? ਕਿੰਨਾ ਹੈ ਸੁਰੱਖਿਅਤ ਤੇ ਕਿਵੇਂ ਕਰੀਏ ਇਸ ਦੀ ਵਰਤੋਂ, ਜਾਣੋ ਸਭ ਕੁਝ

ਟੈਕਨਾਲੋਜੀ ਡੈਸਕ, ਨਵੀਂ ਦਿੱਲੀ। ਅੱਜ ਦੇਸ਼ ਦੇ ਕਈ ਹਿੱਸਿਆਂ ਵਿੱਚ ਕੜਾਕੇ ਦੀ ਠੰਢ ਪੈ ਰਹੀ ਹੈ, ਜਿਸ ਤੋਂ ਬਚਣ ਲਈ ਬਹੁਤ ਸਾਰੇ ਲੋਕ ਆਪਣੇ ਘਰਾਂ ਵਿੱਚ ਰੂਮ ਹੀਟਰ ਅਤੇ ਬਲੋਅਰ ਦੀ ਵਰਤੋਂ ਕਰ ਰਹੇ ਹਨ। ਇਹ ਡਿਵਾਈਸ ਤੇਜ਼ੀ ਨਾਲ ਗਰਮੀ ਤਾਂ ਦਿੰਦੇ ਹਨ, ਪਰ ਬਿਜਲੀ ਦਾ ਬਿੱਲ ਵੀ ਕਾਫੀ ਵਧਾ ਦਿੰਦੇ ਹਨ। ਅਜਿਹੇ ਵਿੱਚ ਹੁਣ ਕੁਝ ਲੋਕ ਇਲੈਕਟ੍ਰਿਕ ਬਲੈਂਕੇਟ (ਬਿਜਲੀ ਵਾਲੇ ਕੰਬਲ) ਦੀ ਵਰਤੋਂ ਕਰਨ ਲੱਗੇ ਹਨ, ਜੋ ਪਿਛਲੇ ਕੁਝ ਸਾਲਾਂ ਵਿੱਚ ਇੱਕ ਸਸਤਾ, ਸੁਵਿਧਾਜਨਕ ਅਤੇ ਬਿਜਲੀ ਬਚਾਉਣ ਵਾਲਾ ਆਪਸ਼ਨ ਬਣ ਕੇ ਸਾਹਮਣੇ ਆਇਆ ਹੈ।

ਪਰ ਇਸ ਦੀ ਵਰਤੋਂ ਦੌਰਾਨ ਸਾਰਿਆਂ ਦੇ ਮਨ ਵਿੱਚ ਇਹ ਸਵਾਲ ਜ਼ਰੂਰ ਆਉਂਦਾ ਹੈ ਕਿ ਕੀ ਇਹ ਪੂਰੀ ਤਰ੍ਹਾਂ ਸੁਰੱਖਿਅਤ ਹੈ? ਇਹ ਕਿੰਨੀ ਬਿਜਲੀ ਖਪਤ ਕਰਦਾ ਹੈ? ਅਤੇ ਇਸ ਨੂੰ ਸਹੀ ਤਰੀਕੇ ਨਾਲ ਕਿਵੇਂ ਵਰਤਿਆ ਜਾਵੇ? ਆਓ ਜਾਣਦੇ ਹਾਂ ਇਹਨਾਂ ਸਵਾਲਾਂ ਦੇ ਜਵਾਬ...

ਕੀ ਹੈ ਇਲੈਕਟ੍ਰਿਕ ਬਲੈਂਕੇਟ ਅਤੇ ਇਹ ਕਿਵੇਂ ਕੰਮ ਕਰਦਾ ਹੈ?

ਆਸਾਨ ਸ਼ਬਦਾਂ ਵਿੱਚ ਸਮਝੀਏ ਤਾਂ ਇਲੈਕਟ੍ਰਿਕ ਬਲੈਂਕੇਟ ਇੱਕ ਖਾਸ ਕਿਸਮ ਦਾ ਕੰਬਲ ਹੈ ਜਿਸਦੇ ਅੰਦਰ ਬਰੀਕ ਹੀਟਿੰਗ ਤਾਰਾਂ ਲੱਗੀਆਂ ਹੁੰਦੀਆਂ ਹਨ। ਜਿਵੇਂ ਹੀ ਤੁਸੀਂ ਇਸ ਨੂੰ ਬਿਜਲੀ ਨਾਲ ਕਨੈਕਟ ਕਰਦੇ ਹੋ, ਇਹ ਤਾਰਾਂ ਗਰਮ ਹੋ ਕੇ ਕੰਬਲ ਦੀ ਪੂਰੀ ਸਤ੍ਹਾ 'ਤੇ ਬਰਾਬਰ ਗਰਮੀ ਫੈਲਾਉਂਦੀਆਂ ਹਨ। ਇਸ ਵਿੱਚ ਲੱਗਾ ਥਰਮੋਸਟੈਟ ਤਾਪਮਾਨ ਨੂੰ ਕੰਟਰੋਲ ਕਰਦਾ ਹੈ ਤਾਂ ਜੋ ਓਵਰਹੀਟਿੰਗ ਨਾ ਹੋਵੇ। ਅੱਜਕੱਲ੍ਹ ਦੇ ਐਡਵਾਂਸ ਇਲੈਕਟ੍ਰਿਕ ਕੰਬਲਾਂ ਵਿੱਚ ਫਾਈਬਰਗਲਾਸ ਵਾਇਰ ਅਤੇ ਇਨਫਰਾਰੈੱਡ ਹੀਟਿੰਗ ਵਰਗੀ ਤਕਨੀਕ ਵਰਤੀ ਜਾਂਦੀ ਹੈ, ਜਿਸ ਨਾਲ ਇਹ ਪਹਿਲਾਂ ਨਾਲੋਂ ਕਿਤੇ ਜ਼ਿਆਦਾ ਸੁਰੱਖਿਅਤ ਹਨ।

ਸਹੀ ਵਰਤੋਂ ਕਿਵੇਂ ਕਰੀਏ?

ਸਭ ਤੋਂ ਪਹਿਲਾਂ ਇਸ ਕੰਬਲ ਨੂੰ ਬਿਸਤਰੇ 'ਤੇ ਸਿੱਧਾ ਵਿਛਾ ਕੇ ਉਸ ਦੇ ਉੱਪਰ ਬੈੱਡਸ਼ੀਟ ਵਿਛਾਓ।

ਸੌਣ ਤੋਂ 10-15 ਮਿੰਟ ਪਹਿਲਾਂ ਇਸ ਨੂੰ 'ਲੋਅ ਹੀਟ ਮੋਡ' (Low Heat Mode) 'ਤੇ ਆਨ ਕਰ ਦਿਓ ਤਾਂ ਜੋ ਬਿਸਤਰਾ ਗਰਮ ਹੋ ਜਾਵੇ।

ਮਾਹਿਰਾਂ ਅਨੁਸਾਰ, ਸੌਂਦੇ ਸਮੇਂ ਜਾਂ ਤਾਂ ਇਸ ਨੂੰ ਬੰਦ ਕਰ ਦਿਓ ਜਾਂ ਸਭ ਤੋਂ ਘੱਟ ਤਾਪਮਾਨ 'ਤੇ ਸੈੱਟ ਕਰੋ।

ਕਿੰਨੀ ਬਿਜਲੀ ਖਰਚ ਹੁੰਦੀ ਹੈ?

ਜ਼ਿਆਦਾਤਰ ਇਲੈਕਟ੍ਰਿਕ ਕੰਬਲ 100 ਤੋਂ 150 ਵਾਟ ਦੀ ਪਾਵਰ 'ਤੇ ਚੱਲਦੇ ਹਨ। ਜੇਕਰ ਤੁਸੀਂ 150 ਵਾਟ ਦਾ ਕੰਬਲ ਰੋਜ਼ਾਨਾ 6 ਘੰਟੇ, 4 ਮਹੀਨਿਆਂ ਤੱਕ ਵਰਤਦੇ ਹੋ, ਤਾਂ ਕੁੱਲ ਬਿਜਲੀ ਦੀ ਖਪਤ ਲਗਪਗ 108 ਯੂਨਿਟ ਹੋਵੇਗੀ। ਇਸ ਦੇ ਉਲਟ, ਰੂਮ ਹੀਟਰ 1500 ਤੋਂ 2000 ਵਾਟ ਬਿਜਲੀ ਖਪਤ ਕਰਦੇ ਹਨ, ਜਿਸ ਨਾਲ ਰੋਜ਼ਾਨਾ 7.5 ਤੋਂ 10 ਯੂਨਿਟ ਖਰਚ ਹੋ ਸਕਦੀ ਹੈ। ਯਾਨੀ ਇਲੈਕਟ੍ਰਿਕ ਬਲੈਂਕੇਟ ਬਹੁਤ ਕਿਫਾਇਤੀ ਹੈ।

ਕੀ ਰਾਤ ਭਰ ਵਰਤੋਂ ਕਰਨਾ ਸੁਰੱਖਿਅਤ ਹੈ?

ਨਵੇਂ ਮਾਡਲਾਂ ਵਿੱਚ ਆਟੋ ਸ਼ੱਟ-ਆਫ ਅਤੇ ਓਵਰਹੀਟ ਪ੍ਰੋਟੈਕਸ਼ਨ ਵਰਗੇ ਸੁਰੱਖਿਆ ਫੀਚਰ ਹੁੰਦੇ ਹਨ। ਜੇਕਰ ਕੰਬਲ ਵਧੀਆ ਕੁਆਲਿਟੀ ਦਾ ਹੈ, ਤਾਂ ਇਸ ਨੂੰ ਰਾਤ ਭਰ ਲੋਅ-ਹੀਟ 'ਤੇ ਚਲਾਉਣਾ ਸੁਰੱਖਿਅਤ ਮੰਨਿਆ ਜਾਂਦਾ ਹੈ। ਫਿਰ ਵੀ ਡਾਕਟਰ ਸਲਾਹ ਦਿੰਦੇ ਹਨ ਕਿ ਸੌਣ ਵੇਲੇ ਇਸ ਨੂੰ ਬੰਦ ਕਰਨਾ ਜਾਂ ਸਭ ਤੋਂ ਘੱਟ ਮੋਡ 'ਤੇ ਰੱਖਣਾ ਬਿਹਤਰ ਹੈ।

ਇਨ੍ਹਾਂ 7 ਗਲਤੀਆਂ ਤੋਂ ਬਚੋ

ਕੰਬਲ ਨੂੰ ਕਦੇ ਵੀ ਤਹਿ (Fold) ਕਰਕੇ ਨਾ ਚਲਾਓ।

ਗਿੱਲੇ ਕੰਬਲ ਦਾ ਪਲੱਗ ਕਦੇ ਨਾ ਲਗਾਓ।

ਜੇਕਰ ਤਾਰ ਸੜੀ ਜਾਂ ਟੁੱਟੀ ਹੋਈ ਦਿਖੇ, ਤਾਂ ਤੁਰੰਤ ਬੰਦ ਕਰ ਦਿਓ।

ਵਰਤੋਂ ਤੋਂ ਬਾਅਦ ਹਮੇਸ਼ਾ ਪਲੱਗ ਕੱਢ ਦਿਓ।

ਕੰਬਲ ਦੇ ਉੱਪਰ ਕਦੇ ਵੀ ਭਾਰੀ ਸਾਮਾਨ ਨਾ ਰੱਖੋ।

ਗਿੱਲੇ ਬਿਸਤਰੇ 'ਤੇ ਕੰਬਲ ਨਾ ਵਿਛਾਓ।

ਇਲੈਕਟ੍ਰਿਕ ਕੰਬਲ ਨੂੰ ਪਾਣੀ ਨਾਲ ਨਾ ਧੋਵੋ (ਧੋਣ ਤੋਂ ਪਹਿਲਾਂ ਕੰਪਨੀ ਦੀਆਂ ਹਦਾਇਤਾਂ ਜ਼ਰੂਰ ਪੜ੍ਹੋ)।