80 ਕਰੋੜ ਲੋਕਾਂ ਦਾ ਸਲਾਹਕਾਰ ਬਣਿਆ AI ਟੂਲ ‘ChatGPT’, ਤਿੰਨ ਸਾਲਾਂ ’ਚ ਬਦਲ ਗਿਆ ਜਾਣਕਾਰੀ ਲੱਭਣ ਦਾ ਤਰੀਕਾ

ਮਿਸੀਸਿਪੀ, ਦ ਕਨਵਰਸੇਸ਼ਨ : ਸੂਚਨਾ ਕ੍ਰਾਂਤੀ ਯੁਗ ’ਚ ਜਨਰੇਟਿਵ ਏਆਈ ਪਲੇਟਫਾਰਮ ‘ਚੈਟਜੀਪੀਟੀ’ ਨੇ ਆਪਣੀ ਲਾਂਚਿੰਗ ਦੇ ਸਿਰਫ਼ ਤਿੰਨ ਸਾਲ ਦੇ ਅੰਦਰ ਕਿਸੇ ਵਿਸ਼ੇ ’ਤੇ ਜਾਣਕਾਰੀ ਹਾਸਲ ਕਰਨ ਦੇ ਤਰੀਕੇ ’ਚ ਕ੍ਰਾਂਤੀਕਾਰੀ ਤਬਦੀਲੀ ਲਿਆ ਦਿੱਤੀ ਹੈ। ਸਿਰਫ਼ ਤਿੰਨ ਸਾਲ ਦੇ ਅੰਦਰ ਅਮਰੀਕੀ ਕੰਪਨੀ ਓਪਨ ਏਆਈ ਦਾ ਇਹ ਚੈਟਬਾਟ 80 ਕਰੋੜ ਤੋਂ ਵੱਧ ਲੋਕਾਂ ਦਾ ਦੋਸਤ, ਸਲਾਹਕਾਰ ਤੇ ਐਕਸਪਰਟ ਬਣ ਚੁੱਕਾ ਹੈ। ਹੁਣ ਲੋਕਾਂ ਦੇ ਮਨ ’ਚ ਕੋਈ ਸਵਾਲ ਉੱਠਦਾ ਹੈ ਤਾਂ ਉਹ ‘ਗੂਗਲ ਸਰਚ’ ’ਤੇ ਜਾਣ ਦੀ ਥਾਂ ‘ਚੈਟਜੀਪੀਟੀ’ ’ਤੇ ਪੁੱਜਣਾ ਵੱਧ ਪਸੰਦ ਕਰਦੇ ਹਨ।

ਮਿਸੀਸਿਪੀ ਸਟੇਟ ਯੂਨੀਵਰਿਸਟੀ ਦੀ ਪ੍ਰੋਫੈਸਰ ਤੇ ਰਿਸਰਚ ਇੰਪੈਕਟ ਤੇ ਏਆਈ ਸਟ੍ਰੈਟਜੀ ਦੀ ਡਾਇਰੈਕਟਰ ਡੇਬੋਰਾ ਲੀ ਨੇ ਇਕ ਅਧਿਐਨ ਦੇ ਆਧਾਰ ’ਤੇ ਦੱਸਿਆ ਕਿ ਜਾਣਕਾਰੀ ਲੱਭਣ ਦਾ ਇਹ ਤਰੀਕਾ ਤਕਨੀਕ ਦੇ ਇਸਤੇਮਾਲ ’ਚ ਇਕ ਵੱਡੀ ਤਬਦੀਲੀ ਲਿਆ ਚੁੱਕਾ ਹੈ। ਉਨ੍ਹਾਂ ਨੇ ਪਾਇਆ ਕਿ ਚੈਟਜੀਪੀਟੀ ਨੇ ਕਿਸੇ ਹੋਰ ਟੂਲ ਨੂੰ ਖ਼ਤਮ ਨਹੀਂ ਕੀਤਾ, ਬਲਕਿ ਉਨ੍ਹਾਂ ਸਭ ਦੀ ਪ੍ਰਾਸੰਗਿਕਤਾ ਨੂੰ ਬਣਾਈ ਰੱਖਦੇ ਹੋਏ ਲੋਕਾਂ ਨੂੰ ਵਿਵਸਥਿਤ ਲੜੀ ’ਚ ਜਾਣਕਾਰੀਆਂ ਦੇਣਾ ਜਾਰੀ ਰੱਖਿਆ। 30 ਨਵੰਬਰ 2022 ਨੂੰ ਚੈਟਜੀਪੀਟੀ ਦੀ ਲਾਂਚਿੰਗ ਦੇ ਕੁਝ ਹੀ ਮਹੀਨਿਆਂ ਦੇ ਅੰਦਰ ਹਰ ਹਫ਼ਤੇ ਲਗਪਗ 10 ਕਰੋੜ ਲੋਕ ਚੈਟਜੀਪੀਟੀ ਦੀ ਮਦਦ ਲੈਣ ਲੱਗੇ ਸਨ। ਇਹ ਅੰਕੜਾ 2025 ਦੇ ਆਖ਼ਰ ’ਚ ਵਧ ਕੇ 80 ਕਰੋੜ ਜਾ ਪੁੱਜਾ ਹੈ।

ਗੂਗਲ ਦੇ ਟ੍ਰੈਫਿਕ ’ਚ ਗਿਰਾਵਟ

ਪਿਊ ਰਿਸਰਚ ਸੈਂਟਰ ਦੇ 2025 ਦੇ ਅਧਿਐਨ ’ਚ ਪਾਇਆ ਗਿਆ ਕਿ 34 ਫ਼ੀਸਦੀ ਅਮਰੀਕੀ ਚੈਟਜੀਪੀਟੀ ਦੀ ਵਰਤੋਂ ਕਰ ਰਹੇ ਹਨ, ਜੋ 2023 ਦੀ ਤੁਲਨਾ ’ਚ ਦੁੱਗਣੇ ਹਨ। 30 ਸਾਲ ਤੋਂ ਘੱਟ ਉਮਰ ਦੇ 58 ਫ਼ੀਸਦੀ ਨੌਜਵਾਨ ਏਆਈ ਤੋਂ ਮਦਦ ਲੈ ਰਹੇ ਹਨ।

ਜਨਰੇਟਿਵ ਏਆਈ ਦੇ ਵਧਦੇ ਹੋਏ ਦਬਦਬੇ ਦਾ ਅਸਰ ਇਹ ਹੈ ਕਿ ਗੂਗਲ ਦਾ ਸਰਚ ਇੰਜਣ ਪੱਛੜਣ ਲੱਗਾ ਹੈ। ਗੂਗਲ ਦੇ ਸਰਚ ਇੰਜਣ ’ਚ ਬੀਤੇ ਤਿੰਨ ਸਾਲਾਂ ਤੋਂ ਜ਼ਿਆਦਾ ਅਪਡੇਟ ਨਹੀਂ ਕੀਤਾ ਗਿਆ, ਕਿਉਂਕਿ ਕੰਪਨੀ ਨੇ ਵੀ ਆਪਣਾ ਪੂਰਾ ਧਿਆਨ ਏਆਈ ਟੂਲ ਜੈਮੀਨੀ ’ਤੇ ਕੇਂਦਰਿਤ ਰੱਖਿਆ ਹੈ।

ਸਿਮਿਲਰਵੈੱਬ ਡਾਟਾ ਦੀ ਰਿਪੋਰਟ ਮੁਤਾਬਕ ਗੂਗਲ ਤੋਂ ਸਮਾਚਾਰ ਵੈੱਬਸਾਈਟ ’ਤੇ ਜਾਣ ਦਾ ਟ੍ਰੈਫਿਕ 2024 ਦੇ ਮੱਧ ਦੇ 2.3 ਅਰਬ ਦੀ ਤੁਲਨਾ ’ਚ ਮਈ 2025 ’ਚ ਘੱਟ ਹੋ ਕੇ 1.7 ਅਰਬ ਪੁੱਜ ਗਿਆ ਹੈ। ਉਥੇ ਸਮਾਚਾਰ ਨਾਲ ਸਬੰਧਤ ਸਰਚ ਦੇ ਮਾਮਲੇ ’ਚ ਟ੍ਰੈਫਿਕ 56 ਫ਼ੀਸਦੀ ਤੋਂ ਵਧ ਕੇ ਸਾਲ ਭਰ ’ਚ ਹੀ 69 ਫ਼ੀਸਦੀ ’ਤੇ ਪੁੱਜ ਗਿਆ।

ਸਮਾਰਟ ਸਪੀਕਰ ਤੇ ਯੂਟਿਊਬ ’ਤੇ ਅਸਰ

ਚੈਟਜੀਪੀਟੀ ਆਉਣ ਤੋਂ ਬਾਅਦ ਤੋਂ ਐਲੇਕਸਾ ਤੇ ਗੂਗਲ ਹੋਮ ਵਰਗੇ ਵਾਇਸ ਅਸਿਸਟੈਂਟ ਦੀ ਵੀ ਪ੍ਰਾਸੰਗਿਕਤਾ ਘੱਟ ਹੋਈ ਹੈ। 2025 ਦੇ ਵਾਇਸ ਸਰਚ ਦੇ ਅੰਕੜਿਆਂ ਮੁਤਾਬਕ 12 ਸਾਲ ਤੋਂ ਉੱਪਰ ਦੇ 34 ਫ਼ੀਸਦੀ ਲੋਕਾਂ ਦੇ ਕੋਲ ਸਮਾਰਟ ਸਪੀਕਰ ਹਨ, ਜਦਕਿ 2023 ’ਚ ਇਹ ਗਿਣਤੀ 35 ਫ਼ੀਸਦੀ ਸੀ। ਇਸ ਦੇ ਉਲਟ, ਯੂਟਿਊਬ ਹੀ ਇਕੋ ਇਕ ਅਜਿਹਾ ਟੂਲ ਹੈ, ਜੋ ਚੈਟਜੀਪੀਟੀ ਨੂੰ ਸਖ਼ਤ ਟੱਕਰ ਦੇ ਰਿਹਾ ਹੈ। ਯੂਟਿਊਬ ’ਤੇ 2.74 ਅਰਬ ਯੂਜ਼ਰ ਹਨ। 90 ਫ਼ੀਸਦੀ ਅਮਰੀਕੀ ਬੱਚਿਆਂ ਨੇ ਦੱਸਿਆ ਕਿ ਉਹ ਯੂਟਿਊਬ ਦੀ ਵਰਤੋਂ ਕਰਦੇ ਹਨ। ਲੋਕ ਪਹਿਲਾਂ ਚੈਟਜੀਪੀਟੀ ਤੋਂ ਸਮਝਦੇ ਹਨ ਤੇ ਵਾਧੂ ਜਾਣਕਾਰੀ ਤੇ ਪ੍ਰਯੋਗਾਤਮਕ ਹੱਲ ਲਈ ਯੂਟਿਊਬ ਦਾ ਰੁਖ਼ ਕਰਦੇ ਹਨ।

ਕੀ ਕਹਿੰਦੇ ਹਨ ਅੰਕੜੇ

-10 ਕਰੋੜ ਲੋਕ 2023 ’ਚ ਹਰ ਹਫ਼ਤੇ ਚੈਟਜੀਪੀ ਤੋਂ ਪ੍ਰਾਪਤ ਕਰਦੇ ਸਨ ਜਾਣਕਾਰੀ

-2025 ’ਚ ਚੈਟਜੀਪੀਟੀ ਤੋਂ ਪੁੱਛਣ ਵਾਲਿਆਂ ਦੀ ਗਿਣਤੀ 80 ਕਰੋੜ ਤੱਕ ਪੁੱਜੀ

-74 ਫ਼ੀਸਦੀ ਅਮਰੀਕੀ ਨੌਜਵਾਨ ਏਪੀ-ਐੱਨਓਆਰਸੀ ਦੀ ਪੋਲ ਰਿਪੋਰਟ ਮੁਤਾਬਕ ਕਰਦੇ ਹਨ ਏਆਈ ਦੀ ਵਰਤੋਂ

-55 ਫ਼ੀਸਦੀ ਵਿਅਕਤੀਆਂ ਨੇ ਯੂਐੱਸ ਕੰਜ਼ਿਊਮਰ ਸਰਵੇ ’ਚ ਦੱਸਿਆ ਕਿ ਉਹ ਚੈਟਜੀਪੀਟੀ ਜਾਂ ਗੂਗਲ ਦੇ ਜੈਮੀਨੀ ਏਆਈ ਦੀ ਕਰ ਰਹੇ ਹਨ ਵਰਤੋਂ

-165 ਗੁਣਾ ਤੇਜ਼ੀ ਨਾਲ ਵਧ ਰਿਹਾ ਹੈ ਜਨਰੇਟਿਵ ਏਆਈ ਪਲੇਟਫਾਰਮ ’ਤੇ ਟ੍ਰੈਫਿਕ

-1.3 ਕਰੋੜ ਅਮਰੀਕੀ ਨੌਜਵਾਨਾਂ ਲਈ ਆਨਲਾਈਨ ਖੋਜ ਦਾ ਮੁੱਖ ਸ੍ਰੋਤ ਬਣਿਆ ਜਨਰੇਟਿਵ ਏਆਈ

-2.74 ਅਰਬ ਯੂਜ਼ਰਜ਼ ਦੇ ਨਾਲ ਯੂਟਿਊਬ ਦੇ ਰਿਹਾ ਹੈ ਚੈਟਜੀਪੀਟੀ ਨੂੰ ਸਖ਼ਤ ਟੱਕਰ

ਕੀ ਹੈ ਚੈਟਜੀਪੀਟੀ

ਚੈਟਜੀਪੀਟੀ ਇਕ ਏਆਈ ਚੈਟਬਾਟ ਹੈ, ਜਿਸ ਨੂੰ ਓਪਨਏਆਈ ਨੇ ਵਿਕਸਿਤ ਕੀਤਾ ਹੈ। ਇਹ ਇਨਸਾਨਾਂ ਦੀ ਤਰ੍ਹਾਂ ਭਾਸ਼ਾ ਸਮਝਣ ਤੇ ਜਵਾਬ ਦੇਣ ਦੀ ਸਮਰੱਥਾ ਰੱਖਦਾ ਹੈ। ਇਸ ਤੋਂ ਕਿਸੇ ਵੀ ਵਿਸ਼ੇ ’ਤੇ ਸਵਾਲ ਪੁੱਛ ਸਕਦੇ ਹਾਂ, ਜਾਣਕਾਰੀ ਲੈ ਸਕਦੇ ਹਾਂ, ਲਿਖਣ ’ਚ ਮਦਦ ਹਾਸਲ ਕਰ ਸਕਦੇ ਹਾਂ, ਜਾਂ ਗੱਲਬਾਤ ਕਰ ਸਕਦੇ ਹਾਂ।