Aadhaar ਐਪ ਦਾ ਫੁੱਲ ਵਰਜ਼ਨ ਲਾਂਚ, ਮਿੰਟਾਂ ਵਿਚ ਹੁਣ ਇਸ ਤਰ੍ਹਾਂ ਅਪਡੇਟ ਕਰੋ ਮੋਬਾਈਲ ਨੰਬਰ

ਟੈਕਨਾਲੋਜੀ ਡੈਸਕ, ਨਵੀਂ ਦਿੱਲੀ : UIDAI ਨੇ ਆਧਾਰ ਐਪ ਦਾ ਬਿਲਕੁਲ ਨਵਾਂ ਵਰਜ਼ਨ ਪੇਸ਼ ਕਰ ਦਿੱਤਾ ਹੈ ਜੋ ਹੁਣ ਪਹਿਲਾਂ ਨਾਲੋਂ ਕਿਤੇ ਜ਼ਿਆਦਾ ਸਮਾਰਟ, ਆਧੁਨਿਕ ਤੇ ਯੂਜ਼ਰ-ਫ੍ਰੈਂਡਲੀ ਹੋ ਗਿਆ ਹੈ। ਇਸ ਵੱਡੇ ਅਪਡੇਟ ਤੋਂ ਬਾਅਦ ਨਾ ਸਿਰਫ ਐਪ ਦਾ ਇੰਟਰਫੇਸ ਪੂਰੀ ਤਰ੍ਹਾਂ ਬਦਲ ਗਿਆ ਹੈ, ਸਗੋਂ ਹੁਣ ਇਸ ਵਿਚ ਕਈ ਖਾਸ ਫੀਚਰਜ਼ ਵੀ ਸ਼ਾਮਲ ਕੀਤੇ ਗਏ ਹਨ ਜਿਨ੍ਹਾਂ ਨਾਲ ਆਧਾਰ ਦੀ ਵਰਤੋਂ ਕਰਨਾ ਹੋਰ ਵੀ ਆਸਾਨ ਹੋ ਜਾਵੇਗਾ।

ਦਰਅਸਲ, ਕੁਝ ਦਿਨ ਪਹਿਲਾਂ ਹੀ UIDAI ਨੇ X (ਟਵਿੱਟਰ) ਪੋਸਟ ਰਾਹੀਂ ਜਾਣਕਾਰੀ ਦਿੱਤੀ ਸੀ ਕਿ 28 ਜਨਵਰੀ ਨੂੰ ਐਪ ਦਾ ਵੱਡਾ ਅਪਗ੍ਰੇਡ ਜਾਰੀ ਕੀਤਾ ਜਾਵੇਗਾ। ਹੁਣ ਨਵੇਂ ਵਰਜ਼ਨ 'ਚ ਯੂਜ਼ਰਜ਼ ਨਾ ਸਿਰਫ ਆਪਣਾ ਆਧਾਰ ਡਿਜੀਟਲ ਤਰੀਕੇ ਨਾਲ ਸ਼ੇਅਰ ਕਰ ਸਕਦੇ ਹਨ, ਸਗੋਂ ਦੂਜਿਆਂ ਦਾ ਆਧਾਰ ਕਾਰਡ ਵੀ ਵੈਰੀਫਾਈ ਕਰ ਸਕਦੇ ਹਨ। ਇਸ ਦੇ ਨਾਲ ਹੀ ਨਵੇਂ ਵਰਜ਼ਨ 'ਚ ਹੁਣ ਆਧਾਰ ਨਾਲ ਜੁੜੇ ਮੋਬਾਈਲ ਨੰਬਰ ਨੂੰ ਅਪਡੇਟ ਕਰਨ ਦੀ ਸਹੂਲਤ ਵੀ ਜੋੜ ਦਿੱਤੀ ਗਈ ਹੈ।

ਕਿਤੇ ਵੀ, ਕਦੇ ਵੀ ਅਪਡੇਟ ਕਰ ਸਕਦੇ ਹੋ ਮੋਬਾਈਲ ਨੰਬਰ

UIDAI ਨੇ ਆਪਣੇ ਅਧਿਕਾਰਤ X ਅਕਾਊਂਟ ਰਾਹੀਂ ਫੁੱਲ ਆਧਾਰ ਐਪ ਦੇ ਲਾਂਚ ਦੀ ਅਧਿਕਾਰਤ ਪੁਸ਼ਟੀ ਕੀਤੀ ਹੈ। ਪੋਸਟ 'ਚ ਕਿਹਾ ਗਿਆ ਹੈ, "ਆਧਾਰ 'ਚ ਆਪਣਾ ਮੋਬਾਈਲ ਨੰਬਰ ਬਦਲਣਾ ਚਾਹੁੰਦੇ ਹੋ? ਆਧਾਰ ਆਪਣੀਆਂ ਸੇਵਾਵਾਂ ਦੇ ਵਿਕਲਪ ਵਧਾ ਰਿਹਾ ਹੈ ਤਾਂ ਜੋ ਆਧਾਰ ਨੰਬਰ ਧਾਰਕ ਕਿਤੇ ਵੀ, ਕਦੇ ਵੀ ਆਪਣਾ ਮੋਬਾਈਲ ਨੰਬਰ ਅਪਡੇਟ ਕਰ ਸਕਣ।"

ਦੋ ਸਟੈਪਸ 'ਚ ਹੋਵੇਗੀ ਵੈਰੀਫਿਕੇਸ਼ਨ

ਇੰਨਾ ਹੀ ਨਹੀਂ, UIDAI ਨੇ ਦੱਸਿਆ ਹੈ ਕਿ ਮੋਬਾਈਲ ਨੰਬਰ ਅਪਡੇਟ ਫੀਚਰ 'ਚ ਟੂ-ਸਟੈੱਪ ਵੈਰੀਫਿਕੇਸ਼ਨ ਪ੍ਰਕਿਰਿਆ ਹੈ।

ਸਭ ਤੋਂ ਪਹਿਲਾਂ, ਪੁਰਾਣੇ ਰਜਿਸਟਰਡ ਮੋਬਾਈਲ ਨੰਬਰ 'ਤੇ ਇਕ OTP ਭੇਜਿਆ ਜਾਵੇਗਾ।

ਦੂਜਾ, ਯੂਜ਼ਰ ਨੂੰ ਐਪ ਦੀ ਵਰਤੋਂ ਕਰ ਕੇ ਫੇਸ ਵੈਰੀਫਿਕੇਸ਼ਨ (Face Verification) ਪੂਰੀ ਕਰਨੀ ਹੋਵੇਗੀ। ਦੋਵੇਂ ਪੜਾਅ ਪੂਰੇ ਹੋਣ ਤੋਂ ਬਾਅਦ ਹੀ ਸਿਸਟਮ ਨਵੇਂ ਨੰਬਰ ਨੂੰ ਆਧਾਰ ਨਾਲ ਲਿੰਕ ਕਰਨ ਦੀ ਇਜਾਜ਼ਤ ਦੇਵੇਗਾ।

ਇਸ ਸਥਿਤੀ ਵਿਚ ਨੰਬਰ ਨਹੀਂ ਬਦਲੇਗਾ

UIDAI ਨੇ ਸਪੱਸ਼ਟ ਕੀਤਾ ਹੈ ਕਿ ਜੇਕਰ ਯੂਜ਼ਰ ਕੋਲ ਪੁਰਾਣੇ ਮੋਬਾਈਲ ਨੰਬਰ ਤਕ ਪਹੁੰਚ (access) ਨਹੀਂ ਹੈ ਤਾਂ ਐਪ ਰਾਹੀਂ ਅਪਡੇਟ ਨਹੀਂ ਕੀਤਾ ਜਾ ਸਕੇਗਾ। ਅਜਿਹੇ ਮਾਮਲਿਆਂ 'ਚ ਵਿਅਕਤੀ ਨੂੰ ਬਦਲਾਅ ਕਰਨ ਲਈ ਨਜ਼ਦੀਕੀ ਆਧਾਰ ਐਨਰੋਲਮੈਂਟ ਸੈਂਟਰ (Aadhaar Enrolment Centre) ਹੀ ਜਾਣਾ ਪਵੇਗਾ।

ਆਧਾਰ ਐਪ ਰਾਹੀਂ ਨੰਬਰ ਕਿਵੇਂ ਅਪਡੇਟ ਕਰੀਏ?

• ਸਭ ਤੋਂ ਪਹਿਲਾਂ ਆਪਣੇ ਫੋਨ 'ਤੇ ਨਵੀਂ ਆਧਾਰ ਐਪ ਡਾਊਨਲੋਡ ਅਤੇ ਇੰਸਟਾਲ ਕਰੋ।
• ਨਵੀਂ ਆਧਾਰ ਐਪ 'ਚ ਸਾਈਨ ਇਨ ਕਰੋ।
• ਸਕ੍ਰੀਨ ਦੇ ਹੇਠਾਂ ਦਿੱਤੇ ਪੌਪ-ਅੱਪ ਨੂੰ ਉੱਪਰ ਵੱਲ ਸਵਾਈਪ ਕਰੋ।
• 'Services' ਸੈਕਸ਼ਨ ਤਹਿਤ 'My Aadhaar Update' ਵਾਲੇ ਵਿਕਲਪ 'ਤੇ ਜਾਓ।
• 'Mobile Number Update' 'ਤੇ ਕਲਿੱਕ ਕਰੋ ਅਤੇ 'Continue' ਦਬਾਓ।
• ਨਵਾਂ ਮੋਬਾਈਲ ਨੰਬਰ ਪਾਓ ਅਤੇ 'Send OTP' 'ਤੇ ਟੈਪ ਕਰੋ।
• ਆਪਣੇ ਨਵੇਂ ਨੰਬਰ 'ਤੇ ਮਿਲਿਆ OTP ਦਰਜ ਕਰੋ ਅਤੇ 'Verify' 'ਤੇ ਟੈਪ ਕਰੋ।
• ਹੁਣ ਤੁਹਾਨੂੰ ਫੇਸ ਵੈਰੀਫਿਕੇਸ਼ਨ ਸਕ੍ਰੀਨ 'ਤੇ ਭੇਜਿਆ ਜਾਵੇਗਾ।
• ਇੱਥੇ 'Face Authenticate' ਦਬਾਓ ਅਤੇ 'Proceed' 'ਤੇ ਟੈਪ ਕਰੋ।
• ਆਪਣੇ ਚਿਹਰੇ ਨੂੰ ਸਰਕਲ ਦੇ ਅੰਦਰ ਰੱਖੋ ਅਤੇ ਫੋਨ ਨੂੰ ਸਥਿਰ ਰੱਖੋ।
• ਜਦੋਂ ਵੈਰੀਫਿਕੇਸ਼ਨ ਲਈ ਸਰਕਲ ਹਰਾ ਹੋ ਜਾਵੇ ਤਾਂ ਪਲਕ ਝਪਕਾਓ।
• ਪ੍ਰਕਿਰਿਆ ਪੂਰੀ ਹੋਣ ਤੋਂ ਬਾਅਦ, ਤੁਸੀਂ ਪੇਮੈਂਟ ਪੇਜ 'ਤੇ ਪਹੁੰਚ ਜਾਵੋਗੇ।

ਮੋਬਾਈਲ ਨੰਬਰ ਅਪਡੇਟ ਕਰਨ ਲਈ 75 ਰੁਪਏ ਦੀ ਫੀਸ ਅਦਾ ਕਰੋ।