ਖੇਡ ਜਗਤ 'ਚ ਹੜਕੰਪ: Neeraj Chopra ਤੇ ਦਿੱਗਜ ਕੋਚ Jan Zeleznyý ਦੇ ਰਸਤੇ ਹੋਏ ਵੱਖ, ਇੱਕੋ ਸੀਜ਼ਨ 'ਚ ਖ਼ਤਮ ਹੋਈ ਸਾਂਝੇਦਾਰੀ!

ਡਿਜੀਟਲ ਡੈਸਕ, ਨਵੀਂ ਦਿੱਲੀ: ਦੋ ਵਾਰ ਦੇ ਓਲੰਪਿਕ ਤਮਗਾ ਜੇਤੂ ਭਾਰਤ ਦੇ ਸਟਾਰ ਜੈਵਲਿਨ ਥਰੋਅਰ ਨੀਰਜ ਚੋਪੜਾ ਨੇ ਸ਼ਨੀਵਾਰ ਨੂੰ ਚੈੱਕ ਗਣਰਾਜ ਦੇ ਦਿੱਗਜ ਕੋਚ ਜਾਨ ਜੇਲੇਜ਼ਨੀ (Jan Zelezny) ਨਾਲ ਆਪਣੀ ਸਾਂਝੇਦਾਰੀ ਖ਼ਤਮ ਕਰਨ ਦਾ ਐਲਾਨ ਕਰ ਦਿੱਤਾ ਹੈ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਇਹ ਕਰਾਰ ਸਿਰਫ਼ ਇੱਕ ਸੀਜ਼ਨ ਤੋਂ ਬਾਅਦ ਹੀ ਖ਼ਤਮ ਹੋ ਗਿਆ।

ਨੀਰਜ ਨੇ ਜੇਲੇਜ਼ਨੀ ਨਾਲ ਸਾਥ ਛੱਡਣ ਦਾ ਕੋਈ ਖ਼ਾਸ ਕਾਰਨ ਤਾਂ ਨਹੀਂ ਦੱਸਿਆ, ਪਰ ਉਨ੍ਹਾਂ ਕਿਹਾ ਕਿ ਇਹ ਸਫ਼ਰ ਤਰੱਕੀ, ਸਤਿਕਾਰ ਅਤੇ ਖੇਡ ਪ੍ਰਤੀ ਸਾਂਝੇ ਲਗਾਵ ਨਾਲ ਭਰਿਆ ਰਿਹਾ। ਦੱਸ ਦੇਈਏ ਕਿ ਜੇਲੇਜ਼ਨੀ ਦੇ ਨਾਂ ਇਸ ਖੇਡ ਦਾ ਵਿਸ਼ਵ ਰਿਕਾਰਡ ਦਰਜ ਹੈ ਅਤੇ ਉਨ੍ਹਾਂ ਦੇ ਮਾਰਗਦਰਸ਼ਨ ਹੇਠ ਹੀ ਨੀਰਜ ਨੇ ਪਿਛਲੇ ਸਾਲ ਪਹਿਲੀ ਵਾਰ 90 ਮੀਟਰ ਦੀ ਦੂਰੀ ਤੱਕ ਭਾਲਾ ਸੁੱਟਣ ਦਾ ਰਿਕਾਰਡ ਬਣਾਇਆ ਸੀ।

ਨੀਰਜ ਚੋਪੜਾ ਨੇ ਵਿਸ਼ਵ ਰਿਕਾਰਡਧਾਰੀ ਕੋਚ ਨਾਲ ਤੋੜਿਆ ਨਾਤਾ

ਨੀਰਜ ਨੇ ਆਪਣੇ ਤਜ਼ਰਬੇ ਬਾਰੇ ਗੱਲ ਕਰਦਿਆਂ ਕਿਹਾ ਕਿ ਬਚਪਨ ਤੋਂ ਜਿਸ ਐਥਲੀਟ ਨੂੰ ਉਹ ਆਪਣਾ ਆਦਰਸ਼ ਮੰਨਦੇ ਸਨ, ਉਨ੍ਹਾਂ ਤੋਂ ਹੀ ਖੇਡ ਦੇ ਗੁਰ ਸਿੱਖਣਾ ਉਨ੍ਹਾਂ ਲਈ ਇੱਕ ਸੁਪਨਾ ਸੱਚ ਹੋਣ ਵਾਂਗ ਸੀ। ਉਨ੍ਹਾਂ ਦੱਸਿਆ ਕਿ ਇਸ ਸਾਂਝੇਦਾਰੀ ਨਾਲ ਉਨ੍ਹਾਂ ਨੂੰ ਅਭਿਆਸ, ਤਕਨੀਕੀ ਵਿਚਾਰਾਂ ਤੇ ਨਵੇਂ ਨਜ਼ਰੀਏ ਦਾ ਇੱਕ ਬਿਲਕੁਲ ਨਵਾਂ 'ਟੂਲਬਾਕਸ' ਮਿਲਿਆ ਹੈ। ਦੂਜੇ ਪਾਸੇ 59 ਸਾਲਾ ਜਾਨ ਜੇਲੇਜ਼ਨੀ ਨੇ ਵੀ ਇਸ ਸਾਥ ਤੇ ਹੋਈ ਤਰੱਕੀ ਨੂੰ ਸਕਾਰਾਤਮਕ ਤੌਰ 'ਤੇ ਯਾਦ ਕੀਤਾ।

ਜੇਲੇਜ਼ਨੀ ਨੇ ਕਿਹਾ, "ਨੀਰਜ ਵਰਗੇ ਐਥਲੀਟ ਨਾਲ ਕੰਮ ਕਰਨਾ ਇੱਕ ਸ਼ਾਨਦਾਰ ਅਨੁਭਵ ਰਿਹਾ। ਮੈਨੂੰ ਖੁਸ਼ੀ ਹੈ ਕਿ ਅਸੀਂ ਮਿਲੇ ਅਤੇ ਮੈਂ ਉਨ੍ਹਾਂ ਨੂੰ ਪਹਿਲੀ ਵਾਰ 90 ਮੀਟਰ ਦਾ ਅੰਕੜਾ ਪਾਰ ਕਰਨ ਵਿੱਚ ਮਦਦ ਕਰ ਸਕਿਆ।" ਉਨ੍ਹਾਂ ਅੱਗੇ ਕਿਹਾ ਕਿ ਵਿਸ਼ਵ ਚੈਂਪੀਅਨਸ਼ਿਪ ਨੂੰ ਛੱਡ ਕੇ, ਨੀਰਜ ਨੇ ਜ਼ਿਆਦਾਤਰ ਮੁਕਾਬਲਿਆਂ ਵਿੱਚ ਘੱਟੋ-ਘੱਟ ਦੂਜਾ ਸਥਾਨ ਹਾਸਲ ਕੀਤਾ ਹੈ, ਜੋ ਕਿ ਇੱਕ ਬਹੁਤ ਵਧੀਆ ਰਿਕਾਰਡ ਹੈ।

ਪਰ, ਬਦਕਿਸਮਤੀ ਨਾਲ ਟੋਕੀਓ ਤੋਂ 12 ਦਿਨ ਪਹਿਲਾਂ ਲੱਗੀ ਪਿੱਠ ਦੀ ਸੱਟ ਨੇ ਨੀਰਜ ਦੀਆਂ ਉਮੀਦਾਂ ਨੂੰ ਕਾਫੀ ਪ੍ਰਭਾਵਿਤ ਕੀਤਾ। ਆਪਣੀ ਅਗਲੀ ਯੋਜਨਾ ਬਾਰੇ ਨੀਰਜ ਨੇ ਕਿਹਾ ਕਿ ਹੁਣ ਉਹ ਆਪਣੀ ਕੋਚਿੰਗ ਦੀ ਦਿਸ਼ਾ ਤੈਅ ਕਰਨ ਲਈ ਖੁਦ ਰਣਨੀਤੀ ਬਣਾ ਰਹੇ ਹਨ। ਉਨ੍ਹਾਂ ਨੇ ਵਿਸ਼ਵਾਸ ਨਾਲ ਕਿਹਾ, "ਮੈਂ ਸਾਲ 2026 ਨੂੰ ਲੈ ਕੇ ਬਹੁਤ ਉਤਸ਼ਾਹਿਤ ਹਾਂ।"