ਮੁਕਾਬਲੇ ਦੌਰਾਨ ਭਗੌੜਾ ਅਪਰਾਧੀ ਹਰਸਿਮਰਨ ਮੰਡ ਗ੍ਰਿਫ਼ਤਾਰ, ਬੁਲੇਟ-ਪਰੂਫ ਜੈਕੇਟ ਨੇ ਬਚਾਈ ਐੱਸਐੱਚਓ ਦੀ ਜਾਨ

ਖੰਨਾ : ਖੰਨਾ ਪੁਲਿਸ ਵੱਲੋਂ ਮੁਕਾਬਲੇ ਦੌਰਾਨ ਭਗੌੜਾ ਅਪਰਾਧੀ ਹਰਸਿਮਰਨ ਮੰਡ ਨੂੰ ਕੀਤਾ ਗ੍ਰਿਫ਼ਤਾਰ ਕਰਨ ਵਿੱਚ ਸਫਲਤਾ ਹਾਸਲ ਕੀਤੀ ਹੈ।ਇਸ ਮੁਕਾਬਲੇ ‘ਚ ਦੋਰਾਹਾ ਦਾ ਅੇਸਐਚਓ ਇੰਸਪੈਕਟਰ ਅਕਾਸ਼ ਦੱਤ ਵਾਲ ਵਾਲ ਬਚ ਗਿਆ। ਮੁੱਖ ਮੁਲਜ਼ਮ ਹਰਸਿਮਰਨ ਮੰਡ ਵਾਸੀ ਪਿੰਡ ਭੁੱਟਾ, ਥਾਣਾ ਡੇਹਲੋਂ, ਆਪਣੇ ਸਾਥੀ ਨਾਲ ਕਾਲੇ ਰੰਗ ਦੀ ਸਕਾਰਪੀਓ ਵਿੱਚ ਘੁੰਮ ਰਿਹਾ ਸੀ। ਪੁਲਿਸ ਵੱਲੋਂ ਰੋਕੇ ਜਾਣ 'ਤੇ ਮੁਲਜ਼ਮਾਂ ਨੇ ਜਾਣਬੁੱਝ ਕੇ ਆਪਣੀ ਗੱਡੀ ਪੁਲਿਸ ਪਾਰਟੀ ਦੀ ਗੱਡੀ ਵਿੱਚ ਟੱਕਰ ਮਾਰ ਕੇ ਭੱਜਣ ਦੀ ਕੋਸ਼ਿਸ਼ ਕੀਤੀ।

ਇਸ ਤੋਂ ਬਾਅਦ, ਮੁਲਜ਼ਮ ਹਰਸਿਮਰਨ ਮੰਡ ਨੇ ਪੁਲਿਸ ਪਾਰਟੀ 'ਤੇ ਤਿੰਨ ਗੋਲ਼ੀਆਂ ਚਲਾਈਆਂ। ਗੋਲ਼ੀਆਂ ਪੁਲਿਸ ਗੱਡੀ ਨੂੰ ਲੱਗੀਆਂ ਅਤੇ ਐਸਐਚਓ ਦੋਰਾਹਾ ਦੀ ਛਾਤੀ 'ਤੇ ਵੀ ਲੱਗੀਆਂ ਜੋ ਬੁਲੇਟ-ਪਰੂਫ ਜੈਕੇਟ ਪਹਿਨਣ ਕਾਰਨ ਬਚ ਗਏ। ਇੰਸਪੈਕਟਰ ਆਕਾਸ਼ ਦੱਤ ਨੇ ਮੁਸੀਬਤ ਦਾ ਸਾਹਮਣਾ ਕਰਦੇ ਹੋਏ ਬਹਾਦਰੀ ਦਿਖਾਈ।ਪੁਲਿਸ ਪਾਰਟੀ ਵੱਲੋਂ ਸਵੈ-ਰੱਖਿਆ ਵਿੱਚ ਕੀਤੀ ਗਈ ਕਾਰਵਾਈ ਵਿੱਚ, ਦੋਸ਼ੀ ਹਰਸਿਮਰਨ ਮੰਡ ਦੇ ਹੇਠਲੇ ਅੰਗਾਂ ਵਿੱਚ ਗੋਲੀ ਲੱਗੀ।

ਦੋਵਾਂ ਮੁਲਜ਼ਮਾਂ ਨੂੰ ਮੌਕੇ 'ਤੇ ਹੀ ਗ੍ਰਿਫ਼ਤਾਰ ਕਰ ਲਿਆ ਗਿਆ। ਦੂਜੇ ਮੁਲਜ਼ਮ ਦੀ ਪਛਾਣ ਇਵਨਜੋਤ ਸਿੰਘ, ਵਾਸੀ ਰਾੜਾ ਸਾਹਿਬ, ਥਾਣਾ ਪਾਇਲ ਵਜੋਂ ਹੋਈ ਹੈ। ਉਨ੍ਹਾਂ ਦੇ ਕਬਜ਼ੇ ਵਿੱਚੋਂ ਦੋ ਗੈਰ-ਕਾਨੂੰਨੀ ਪਿਸਤੌਲ ਬਰਾਮਦ ਕੀਤੇ ਗਏ ਹਨ। ਜ਼ਖ਼ਮੀ ਮੁਲਜ਼ਮ ਨੂੰ ਤੁਰੰਤ ਐਮਰਜੈਂਸੀ ਡਾਕਟਰੀ ਇਲਾਜ ਲਈ ਹਸਪਤਾਲ ਭੇਜ ਦਿੱਤਾ ਗਿਆ। ਜ਼ਿਕਰਯੋਗ ਹੈ ਕਿ ਹਰਸਿਮਰਨ ਮੰਡ ਦਾ ਕਮਿਸ਼ਨਰੇਟ ਲੁਧਿਆਣਾ ਅਤੇ ਖੰਨਾ ਜ਼ਿਲ੍ਹੇ ਵਿੱਚ ਅਪਰਾਧਿਕ ਇਤਿਹਾਸ ਹੈ ਅਤੇ ਉਹ ਸੰਗਠਿਤ ਅਪਰਾਧ ਸਿੰਡੀਕੇਟ, ਹਿੰਸਕ ਘਟਨਾਵਾਂ ਅਤੇ ਗੈਰ-ਕਾਨੂੰਨੀ ਹਥਿਆਰਾਂ ਦੀ ਵਰਤੋਂ ਵਿੱਚ ਸ਼ਾਮਲ ਹੈ।