ਸਬਜ਼ੀ ਮੰਡੀ ਦੀਆਂ ਸਮੱਸਿਆਵਾਂ ਤੋਂ ਹਲਕਾ ਇੰਚਾਰਜ ਨੂੰ ਕਰਵਾਇਆ ਜਾਣੂ

ਅਮਰਜੀਤ ਸਿੰਘ ਵੇਹਗਲ, ਪੰਜਾਬੀ ਜਾਗਰਣ, ਜਲੰਧਰ : ਨਵੀਂ ਸਬਜ਼ੀ ਮੰਡੀ ਮਕਸੂਦਾਂ ’ਚ ਆੜ੍ਹਤੀਆ ਵੱਲੋਂ ਮੰਡੀ ਦੀਆਂ ਅੰਦਰੂਨੀ ਸਮੱਸਿਆਵਾਂ ਨੂੰ ਲੈ ਕੇ ਸੀਨੀਅਰ ਆੜ੍ਹਤੀ ਸੰਨੀ ਬੱਤਰਾ ਨਾਲ ਵਿਸ਼ੇਸ਼ ਮੀਟਿੰਗ ਕੀਤੀ ਗਈ। ਮੀਟਿੰਗ ਲਈ ਆੜ੍ਹਤੀ ਐਸੋਸੀਏਸ਼ਨ ਦੇ ਚੇਅਰਮੈਨ ਯਸ਼ਪਾਲ ਬਿੱਟਾ ਅਗਰਵਾਲ, ਪ੍ਰਧਾਨ ਕੰਵਲਜੀਤ ਸਿੰਘ ਲਵਲੀ ਟੀਮ ਸਮੇਤ ਉੱਤਰੀ ਹਲਕਾ ਇੰਚਾਰਜ ਦਿਨੇਸ਼ ਢੱਲਪੁੱਝੇ, ਜਿਨ੍ਹਾਂ ਦਾ ਆੜ੍ਹਤੀ ਸੰਨੀ ਬੱਤਰਾ, ਪਰਵੇਸ਼ ਕੁਮਾਰ, ਗੁਰਮਿੰਦਰ ਸਿੰਘ ਕੁੱਕੂ, ਹਰਚਰਨ ਸਿੰਘ ਕੁੱਕੂ, ਮਦਨ ਗਿਰਧਰ, ਗੁਲਸ਼ਨ, ਜੌਨੀ ਬੱਤਰਾ, ਬਠਲਾਣਾ, ਬਾਂਦਰ ਕੁਮਾਰ ਨੇ ਸਵਾਗਤ ਕੀਤਾ। ਜੌਨੀ ਬੱਤਰਾ ਤੇ ਤਰੁਣ ਬਠਲਾ ਨੇ ਨਵੀਂ ਸਬਜ਼ੀ ਮੰਡੀ ਬਾਰੇ ਜਾਣਕਾਰੀ ਦਿੰਦੇ ਹੋਏ ਦੱਸਿਆ ਕਿ ਮਾੜੇ ਟ੍ਰੈਫਿਕ ਪ੍ਰਬੰਧਾਂ ਕਾਰਨ, ਮੰਡੀ ਨੂੰ ਜਾਣ ਵਾਲੀ ਮੁੱਖ ਸੜਕ ਸਵੇਰੇ 4 ਵਜੇ ਤੋਂ ਹੀ ਜਾਮ ਲੱਗਣਾ ਸ਼ੁਰੂ ਹੋ ਜਾਂਦਾ ਹੈ। ਸੀਨੀਅਰ ਆੜ੍ਹਤੀ ਪਰਵੇਸ਼ ਕੁਮਾਰ, ਮਦਨ ਗਿਰੀਧਰ ਤੇ ਨੰਨੀ ਬੱਤਰਾ ਨੇ ਦੱਸਿਆ ਕਿ ਮੰਡੀ ’ਚ ਰੋਜ਼ਾਨਾ ਚੋਰੀਆਂ ਵਧ ਰਹੀਆਂ ਹਨ, ਤੇ ਆਲੇ ਦੁਆਲੇ ਦੇ ਇਲਾਕਿਆਂ ਤੋਂ ਨਸ਼ੇੜੀ ਗਿਰੋਹ ਬਣਾ ਕੇ ਸਾਮਾਨ ਚੋਰੀ ਕਰਨ ਲਈ ਨਿਲਾਮੀ ਸ਼ੈੱਡਾਂ ’ਚ ਜਾਂਦੇ ਹਨ। ਉਹ ਸੁਰੱਖਿਆ ਗਾਰਡਾਂ ਤੇ ਸਪਰੇਅ ਕਰਕੇ ਉਨ੍ਹਾਂ ਨੂੰ ਬੇਹੋਸ਼ ਕਰਕੇ ਉਨ੍ਹਾਂ ਨੂੰ ਲੁੱਟਦੇ ਹਨ। ਅਮਿਤ ਕਾਲੜਾ ਤੇ ਗੁਲਸ਼ਨ ਨੇ ਦੱਸਿਆ ਕਿ ਮੰਡੀ ’ਚ ਖੁੱਲ੍ਹੇਆਮ ਨਸ਼ੇ ਵੇਚਣ ਵਾਲਿਆਂ ਦੀ ਗਿਣਤੀ ਦਿਨ-ਬ-ਦਿਨ ਵੱਧ ਰਹੀ ਹੈ। ਆੜ੍ਹਤੀਆ ਸੰਨੀ ਬੱਤਰਾ ਨੇ ਕਿਹਾ ਕਿ ਜਿਵੇਂ ਹੀ ਸ਼ਾਮ ਹੁੰਦੀ ਹੈ, ਫੜੀ ਮਾਰਕੀਟ ਦੇ ਨੇੜੇ ਮਾਸਾਹਾਰੀ ਰੇਹੜੀਆਂ ਲੱਗਣੀਆਂ ਸ਼ੁਰੂ ਹੋ ਜਾਂਦੀਆਂ ਹਨ। ਸ਼ਰਾਬ ਦੇ ਆਦੀ ਸਟਾਲਾਂ ਦੇ ਆਲੇ-ਦੁਆਲੇ ਇਕੱਠੇ ਹੋ ਕੇ ਖੁੱਲ੍ਹੇਆਮ ਸ਼ਰਾਬ ਪੀਂਦੇ ਹਨ। ਇਸ ਤੋਂ ਇਲਾਵਾ ਰਾਤ 11 ਵਜੇ ਤੋਂ ਬਾਅਦ ਔਰਤਾਂ ਨਾਲ ਭਰੀਆਂ ਤਿੰਨ ਜਾਂ ਚਾਰ ਜੀਪਾਂ ਆਉਂਦੀਆਂ ਹਨ। ਇਥੇ ਜਿਸਮਫਰੋਸੀ ਹੁੰਦੀ ਹੈ। ਮੰਡੀ ’ਚ ਢਿੱਲ ਕਾਰਨ ਕੂੜੇ ਦੇ ਪਹਾੜ ਫਿਰ ਬਣਨੇ ਸ਼ੁਰੂ ਹੋ ਗਏ ਹਨ, ਜਿਸ ਕਾਰਨ ਬਦਬੂ ਫੈਲਦੀ ਹੈ। ਆੜ੍ਹਤੀਆ ਸੰਨੀ ਬੱਤਰਾ ਨੇ ਸਾਰੇ ਆੜ੍ਹਤੀਆਂ ਨੂੰ ਏਕਤਾ ਦਾ ਸਬਕ ਸਿਖਾਉਂਦੇ ਹੋਏ ਕਿਹਾ ਕਿ ਏਕਤਾ ਤੋਂ ਬਿਨਾਂ ਬਾਜ਼ਾਰ ਦੀਆਂ ਸਮੱਸਿਆਵਾਂ ਦਾ ਹੱਲ ਅਸੰਭਵ ਹੈ। ਉੱਤਰੀ ਹਲਕਾ ਇੰਚਾਰਜ ਦਿਨੇਸ਼ ਢੱਲ ਨੇ ਕਿਹਾ ਕਿ ਮੰਡੀ ’ਚ ਟ੍ਰੈਫਿਕ ਜਾਮ ਪ੍ਰਬੰਧਾਂ ਤੇ ਸੁਰੱਖਿਆ ਲਈ ਇਕ ਵਿਸ਼ੇਸ਼ ਯੋਜਨਾ ਤਿਆਰ ਕਰਨ ਤੋਂ ਬਾਅਦ ਮੰਡੀ ’ਚ ਪੁਲਿਸ ਟੀਮਾਂ ਤਾਇਨਾਤ ਕੀਤੀਆਂ ਜਾਣਗੀਆਂ। ਉਨ੍ਹਾਂ ਆੜ੍ਹਤੀਆਂ ਨੂੰ ਭਰੋਸਾ ਦਿੱਤਾ ਕਿ ਕਿਸੇ ਵੀ ਕਾਰੋਬਾਰੀ ਨੂੰ ਕੋਈ ਮੁਸ਼ਕਲ ਨਹੀਂ ਆਉਣ ਦਿੱਤੀ ਜਾਵੇਗੀ ਤੇ ਮੰਡੀ ’ਚ ਨਸ਼ੇ ਵੇਚਣ ਵਾਲਿਆਂ ਤੇ ਜਿਸਮਫਰੋਸੀ ਕਾਰਨ ਵਾਲੀਆਂ ਔਰਤਾਂ ਨੂੰ ਕਾਬੂ ਕਰਵਾਇਆ ਜਾਵੇਗਾ। ਮੰਡੀ ’ਚ ਸਫਾਈ ਪ੍ਰਣਾਲੀ ਤੇ ਕੂੜੇ ਦੇ ਵਧ ਰਹੇ ਢੇਰਾਂ ਨੂੰ ਹਟਾਉਣ ਸਬੰਧੀ ਮੰਡੀ ਦੇ ਉੱਚ ਅਧਿਕਾਰੀਆਂ ਨਾਲ ਮੀਟਿੰਗ ਵੀ ਕੀਤੀ ਜਾਵੇਗੀ। ਇਸ ਮੌਕੇ ਵਿਸ਼ਾਲ ਵਿੱਕੀ ਗੁਲਾਟੀ, ਵਿਜੇ ਦੁਆ ਵਿਨੋਦ ਸ਼ਰਮਾ, ਸ਼ੈਰੀ ਸਚਦੇਵਾ, ਬਿੱਟੂ ਪੰਡਵਾਲ, ਰਾਹੁਲ ਬਜਾਜ, ਹਨੀ ਮੱਟੂ, ਹਰਭਜਨ ਸਿੰਘ, ਸਰਵਜੀਤ ਸਿੰਘ ਮੱਕੜ, ਸਾਗਰ, ਮਿੰਕੂ ਅਟਵਾਲ, ਯਸ਼ਪਾਲ ਕੱਲੀ, ਧੀਰਜ ਵਰਮਾ, ਸੁਭਾਸ਼ ਸ਼ਰਮਾ, ਦਵਾਰਕਾ ਦਾਸ, ਅਨਮੋਲ, ਜਤਿੰਦਰ ਪਥੇਜਾ, ਅਮਿਤ ਸਮਗਲ, ਪੰਮਾ, ਸੰਜੂ ਸ਼ਰਮਾ, ਕਪਿਸ਼ ਆਦਿ ਹਾਜ਼ਰ ਹੋਏ।