ਪੰਜਾਬ ਦੇ ਕਈ ਵੈਸਟਰਨ ਯੂਨੀਅਨ ਆਪਰੇਟਰ ਪੁਲਿਸ ਦੇ ਰਡਾਰ ’ਤੇ

ਮਠਿਆਈ ਵਪਾਰੀ ਦੀ ਗ੍ਰਿਫਤਾਰੀ ਤੋਂ ਬਾਅਦ ਹਵਾਲਾ ਨੈੱਟਵਰਕ ਦੇ ਕਈ ਨਵੇਂ ਨਾਮ ਆਏ ਸਾਹਮਣੇ ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਜਲੰਧਰ : ਜਲੰਧਰ ਦੇ ਮਿਠਾਈ ਵਪਾਰੀ ਅਜੈ ਅਰੋੜਾ ਦੀ ਗ੍ਰਿਫਤਾਰੀ ਤੋਂ ਬਾਅਦ ਪੰਜਾਬ ’ਚ ਹਵਾਲਾ ਤੇ ਵੈਸਟਰਨ ਯੂਨੀਅਨ ਨੈੱਟਵਰਕ ਨਾਲ ਜੁੜੇ ਕਈ ਹੋਰ ਲੋਕ ਹੁਣ ਪੁਲਿਸ ਦੇ ਰਡਾਰ ’ਤੇ ਆ ਸਕਦੇ ਹਨ। ਨੂੰਹ ਪੁਲਿਸ ਨੇ ਆਈਐੱਸਆਈ ਲਈ ਫੰਡਿੰਗ ਦੇ ਦੋਸ਼ਾਂ ਹੇਠ ਅਜੈ ਅਰੋੜਾ ਨੂੰ ਗ੍ਰਿਫਤਾਰ ਕੀਤਾ ਸੀ। ਉਸ ਤੋਂ ਜਲੰਧਰ ’ਚ ਤਿੰਨ ਘੰਟਿਆਂ ਦੀ ਪੁੱਛਗਿੱਛ ਦੌਰਾਨ ਕਈ ਮਹੱਤਵਪੂਰਨ ਗੱਲਾਂ ਸਾਹਮਣੇ ਆਈਆਂ। ਪੁੱਛਗਿੱਛ ’ਚ ਇਹ ਵੀ ਖੁਲਾਸਾ ਹੋਇਆ ਕਿ ਅਜੈ ਦੇ ਪੰਜਾਬ ਦੇ ਵੱਖ–ਵੱਖ ਵੈਸਟਰਨ ਯੂਨੀਅਨ ਆਪਰੇਟਰਾਂ ਨਾਲ ਸੰਪਰਕ ਸਨ। ਜਾਣਕਾਰੀ ਮੁਤਾਬਕ ਜਲੰਧਰ ਸਮੇਤ ਕੁਝ ਹੋਰ ਜ਼ਿਲ੍ਹਿਆਂ ਦੇ ਵੈਸਟਰਨ ਯੂਨੀਅਨ ਸੰਚਾਲਕ ਉਸ ਨਾਲ ਸਾਂਝਾ ਕਾਰੋਬਾਰ ਕਰਦੇ ਸਨ ਤੇ ਲੈਣ-ਦੇਣ ਵੀ ਜਾਰੀ ਸੀ। ਇਸ ਕਾਰਨ ਨੂੰਹ ਪੁਲਿਸ ਹੁਣ ਇਨ੍ਹਾਂ ਸਾਰੇ ਲੋਕਾਂ ਦੀਆਂ ਗਤੀਵਿਧੀਆਂ ਦੀ ਜਾਂਚ ਕਰ ਰਹੀ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਨੂੰਹ ਪੁਲਿਸ ਨਾ ਸਿਰਫ ਜਾਲੰਧਰ ਪੁਲਿਸ, ਸਗੋਂ ਪੰਜਾਬ ਦੇ ਹੋਰ ਜ਼ਿਲ੍ਹਿਆਂ ਦੀ ਪੁਲਿਸ ਨਾਲ ਵੀ ਸੰਪਰਕ ਕਰ ਰਹੀ ਹੈ, ਤਾਂ ਜੋ ਇਹ ਪਤਾ ਲੱਗ ਸਕੇ ਕਿ ਫੰਡਿੰਗ ਦੇ ਇਸ ਨੈੱਟਵਰਕ ’ਚ ਹੋਰ ਕਿੰਨੇ ਲੋਕ ਸ਼ਾਮਲ ਹੋ ਸਕਦੇ ਹਨ। ਸਬੂਤ ਮਿਲਣ ’ਤੇ ਸਖ਼ਤ ਕਾਰਵਾਈ ਵੀ ਹੋ ਸਕਦੀ ਹੈ। ਹਵਾਲਾ ਨੈੱਟਵਰਕ ਵੱਡਾ, ਕਈ ਨਾਮ ਜ਼ੇਰੇ–ਨਜ਼ਰ ਜਾਣਕਾਰੀ ਅਨੁਸਾਰ ਸੂਬੇ ’ਚ ਹਵਾਲਾ ਨੈੱਟਵਰਕ ਕਾਫੀ ਫੈਲਿਆ ਹੋਇਆ ਹੈ ਤੇ ਕਈ ਲੋਕ ਵਿਦੇਸ਼ਾਂ ਤੋਂ ਪੈਸਾ ਮੰਗਵਾਉਣ ਤੇ ਅੱਗੇ ਭੇਜਣ ਦਾ ਕੰਮ ਕਰਦੇ ਹਨ। ਅਜੇ ਦੀ ਗ੍ਰਿਫਤਾਰੀ ਤੋਂ ਬਾਅਦ ਕੁਝ ਨਵੇਂ ਨਾਮ ਸਾਹਮਣੇ ਆਏ ਹਨ ਜਿਨ੍ਹਾਂ ਦੀਆਂ ਗਤੀਵਿਧੀਆਂ ’ਤੇ ਪੁਲਿਸ ਦੀ ਨਿਗਰਾਨੀ ਵਧਾਈ ਗਈ ਹੈ। ਪੁੱਛਗਿੱਛ ਦੌਰਾਨ ਅਜੇ ਨੇ ਕੁਝ ਲੋਕਾਂ ਦੇ ਨਾਮ ਵੀ ਨਸ਼੍ਰ ਕੀਤੇ ਹਨ, ਜਿਨ੍ਹਾਂ ਦੀ ਭੂਮਿਕਾ ਦੀ ਜਾਂਚ ਚੱਲ ਰਹੀ ਹੈ। ਹਾਲਾਂਕਿ ਪੁਲਿਸ ਨੇ ਇਸ ਬਾਰੇ ਅਧਿਕਾਰਕ ਪੁਸ਼ਟੀ ਨਹੀਂ ਕੀਤੀ। 35 ਲੱਖ ਦੇ ਇਕ ਨਹੀਂ, ਤਿੰਨ ਟ੍ਰਾਂਜ਼ੈਕਸ਼ਨ ਜਾਂਚ ’ਚ ਇਹ ਵੀ ਸਾਹਮਣੇ ਆਇਆ ਕਿ ਅਜੇ ਨੇ 35 ਲੱਖ ਦੇ ਸਿਰਫ਼ ਇਕ ਨਹੀਂ, ਤਿੰਨ ਵੱਖ-ਵੱਖ ਲੈਣ-ਦੇਣ ਕੀਤੇ ਸਨ। ਸਖ਼ਤ ਪੁੱਛਗਿੱਛ ਦੌਰਾਨ ਉਸ ਨੇ ਦੱਸਿਆ ਕਿ ਉਹ ਤਿੰਨ ਵਾਰ ਰਕਮ ਲੈ ਚੁੱਕਾ ਹੈ ਪਰ ਉਸ ਨੂੰ ਇਹ ਨਹੀਂ ਪਤਾ ਸੀ ਕਿ ਇਹ ਪੈਸਾ ਕਿਸ ਲਈ ਸੀ ਤੇ ਕਿੱਥੇ ਭੇਜਣਾ ਸੀ। ਇਸ ਦੀ ਅਧਿਕਾਰਿਕ ਪੁਸ਼ਟੀ ਹੁਣ ਤੱਕ ਨਹੀਂ ਹੋਈ। ਪੁਲਿਸ ਟ੍ਰਾਂਜ਼ੈਕਸ਼ਨਾਂ ਦੇ ਸਰੋਤ ਦੀ ਜਾਂਚ ਕਰ ਰਹੀ ਹੈ। ਪਰਿਵਾਰ ਦਾ ਦਾਅਵਾ ਅਜੇ ਬੇਗੁਨਾਹ, ਅਸਲੀ ਹਵਾਲਾ ਵਪਾਰੀ ਹੋਰ ਗ੍ਰਿਫਤਾਰ ਮਠਿਆਈ ਵਪਾਰੀ ਅਜੇ ਅਰੋੜਾ ਦੇ ਪਰਿਵਾਰਕ ਮੈਂਬਰ ਵੀਰਵਾਰ ਨੂੰ ਤਾਵਡੂ ਸਦਰ ਥਾਣੇ ਪਹੁੰਚੇ। ਉਨ੍ਹਾਂ ਦੱਸਿਆ ਕਿ ਅਜੇ ਬੇਕਸੂਰ ਹੈ ਤੇ ਪੁਲਿਸ ਨੇ ਗਲਤ ਵਿਅਕਤੀ ਨੂੰ ਫਸਾਇਆ ਹੈ। ਅਜੇ ਦੇ ਭਰਾ ਬਿੱਟੂ ਤੇ ਭੈਣ ਨੇ ਦੱਸਿਆ ਕਿ ਅਜੇ ਸਿਰਫ ਇਕ ਸਧਾਰਨ ਮਿਠਾਈ ਵੇਚਣ ਵਾਲਾ ਹੈ। ਰਕਮ ਰਿਜ਼ਵਾਨ ਨੇ ਉਸ ਨੂੰ ਦੁਕਾਨ ਦੇ ਮਾਲਕ ਪਰਮਜੀਤ ਦੇ ਕਹਿਣ ’ਤੇ ਦਿੱਤੀ ਸੀ। ਪਰਮਜੀਤ 30 ਅਕਤੂਬਰ ਨੂੰ ਵਿਦੇਸ਼ ਚਲਾ ਗਿਆ ਸੀ ਤੇ ਲੈਣ–ਦੇਣ ਦਾ ਅਸਲੀ ਕਾਰੋਬਾਰ ਉਹ ਕਰਦਾ ਸੀ। ਅਜੇ ਸਿਰਫ ਕਿਰਾਏ ਦੀ ਦੁਕਾਨ ’ਚ ਬੈਠਦਾ ਸੀ ਤੇ ਮਾਲਕ ਦੇ ਕਹਿਣ ’ਤੇ ਪੈਸੇ ਰੱਖ ਲੈਂਦਾ ਸੀ। ਉਸ ਨੂੰ ਪਤਾ ਨਹੀਂ ਸੀ ਕਿ ਇਹ ਪੈਸਾ ਕਿੱਥੋਂ ਆਇਆ ਤੇ ਕਿੱਥੇ ਜਾਣਾ ਸੀ। ਪੁਲਿਸ ਮਿਲਣ ਨਹੀਂ ਦੇ ਰਹੀ, ਪਰਿਵਾਰ ਨਾਰਾਜ਼ ਪਰਿਵਾਰ ਨੇ ਦੋਸ਼ ਲਾਇਆ ਕਿ ਉਹ ਪਿਛਲੇ ਦੋ ਦਿਨ ਤੋਂ ਅਜੇ ਨਾਲ ਮਿਲਣ ਦੀ ਕੋਸ਼ਿਸ਼ ਕਰ ਰਹੇ ਹਨ ਪਰ ਪੁਲਿਸ ਮਿਲਣ ਨਹੀਂ ਦੇ ਰਹੀ ਹੈ ਤੇ ਨਾ ਕੋਈ ਜਾਣਕਾਰੀ ਦੇ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨੂੰ ਪੁਲਿਸ ’ਤੇ ਭਰੋਸਾ ਨਹੀਂ ਪਰ ਅਦਾਲਤ ’ਤੇ ਪੂਰਾ ਵਿਸ਼ਵਾਸ ਹੈ ਤੇ ਉਹ ਕਾਨੂੰਨੀ ਲੜਾਈ ਲੜ ਕੇ ਉਨ੍ਹਾਂ ਨੂੰ ਬੇਗੁਨਾਹ ਸਾਬਤ ਕਰਨਗੇ। ਮਾਮਲਾ ਕੀ ਹੈ? ਕੁਝ ਦਿਨ ਪਹਿਲਾਂ ਨੂੰਹ ਪੁਲਿਸ ਨੇ ਨੌਜਵਾਨ ਵਕੀਲ ਰਿਜ਼ਵਾਨ ਨੂੰ ਦੇਸ਼ਧ੍ਰੋਹ ਸਮੇਤ ਗੰਭੀਰ ਧਾਰਾਵਾਂ ’ਚ ਗ੍ਰਿਫਤਾਰ ਕੀਤਾ ਸੀ। ਉਸ ਤੋਂ ਪੁੱਛਗਿੱਛ ’ਚ ਹੀ ਅਜੇ ਅਰੋੜਾ ਦਾ ਨਾਮ ਸਾਹਮਣੇ ਆਇਆ। ਦੋਵਾਂ ’ਤੇ ਪਾਕਿਸਤਾਨੀ ਖੁਫੀਆ ਏਜੰਸੀ ਆਈਐੱਸਆਈ ਲਈ ਫੰਡਿੰਗ ਪਹੁੰਚਾਉਣ ਦਾ ਦੋਸ਼ ਹੈ।