ਦਸਤਾਵੇਜ਼ ਲੈ ਕੇ ED ਦਫ਼ਤਰ ਜਲੰਧਰ ਪੁੱਜਾ ਸੰਦੀਪ ਕੁਮਾਰ ਦਾ ਸਟਾਫ਼, CLU 'ਚ ਕਥਿਤ ਬੇਨਿਯਮੀਆਂ ਦੀ ਜਾਂਚ ਕਰ ਰਹੀ ED
ਇਹ ਜਾਂਚ ਮੁੱਖ ਤੌਰ 'ਤੇ ਸਨਟੈਕ ਸਿਟੀ (Suntec City) ਅਤੇ Altus Space Builders ਵਰਗੇ ਵੱਡੇ ਪ੍ਰੋਜੈਕਟਾਂ ਨੂੰ ਜਾਰੀ ਕੀਤੇ ਗਏ CLU ਲਾਇਸੈਂਸਾਂ ਵਿੱਚ ਕਥਿਤ ਧੋਖਾਧੜੀ ਅਤੇ ਮਨੀ ਲਾਂਡਰਿੰਗ ਨਾਲ ਸਬੰਧਤ ਹੈ।
Posted By Tejinder Thind
Publish Date: Mon, 18 May 2026 12:38 PM (IST)
Updated Date: Mon, 18 May 2026 12:45 PM (IST)
ਡਿਜੀਟਲ ਡੈਸਕ, ਜਲੰਧਰ : ਪੰਜਾਬ ਵਿੱਚ ਬਹੁ-ਚਰਚਿਤ Change of Land Use (CLU) ਬੇਨਿਯਮੀਆਂ ਦੇ ਮਾਮਲੇ ਵਿੱਚ ਇਨਫੋਰਸਮੈਂਟ ਡਾਇਰੈਕਟੋਰੇਟ (ED) ਦੀ ਜਾਂਚ ਤੇਜ਼ ਹੋ ਗਈ ਹੈ। ਅੱਜ ਜਲੰਧਰ ਸਥਿਤ ED ਦੇ ਜ਼ੋਨਲ ਦਫ਼ਤਰ ਵਿੱਚ ਗ੍ਰੇਟਰ ਮੋਹਾਲੀ ਏਰੀਆ ਡਿਵੈਲਪਮੈਂਟ ਅਥਾਰਟੀ (GMADA) ਦੇ ਚੀਫ਼ ਐਡਮਿਨਿਸਟ੍ਰੇਟਰ ਸੰਦੀਪ ਕੁਮਾਰ (IAS) ਦਾ ਸਟਾਫ਼ ਮਹੱਤਵਪੂਰਨ ਦਸਤਾਵੇਜ਼ ਲੈ ਕੇ ਪੇਸ਼ ਹੋਇਆ।
ਜ਼ਿਕਰਯੋਗ ਹੈ ਕਿ ED ਨੇ 2015 ਬੈਚ ਦੇ IAS ਅਧਿਕਾਰੀ ਸੰਦੀਪ ਕੁਮਾਰ ਨੂੰ ਨਿੱਜੀ ਤੌਰ 'ਤੇ ਜਾਂ ਕਿਸੇ ਗਜ਼ਟਿਡ ਅਧਿਕਾਰੀ ਰਾਹੀਂ ਰਿਕਾਰਡ ਪੇਸ਼ ਕਰਨ ਲਈ ਸੰਮਨ ਭੇਜਿਆ ਸੀ। ਇਸੇ ਤਹਿਤ ਅੱਜ ਉਨ੍ਹਾਂ ਦੇ ਨੁਮਾਇੰਦੇ ਦਸਤਾਵੇਜ਼ਾਂ ਦੀਆਂ ਫਾਈਲਾਂ ਲੈ ਕੇ ਪੁੱਜੇ।
ਇਹ ਜਾਂਚ ਮੁੱਖ ਤੌਰ 'ਤੇ ਸਨਟੈਕ ਸਿਟੀ (Suntec City) ਅਤੇ Altus Space Builders ਵਰਗੇ ਵੱਡੇ ਪ੍ਰੋਜੈਕਟਾਂ ਨੂੰ ਜਾਰੀ ਕੀਤੇ ਗਏ CLU ਲਾਇਸੈਂਸਾਂ ਵਿੱਚ ਕਥਿਤ ਧੋਖਾਧੜੀ ਅਤੇ ਮਨੀ ਲਾਂਡਰਿੰਗ ਨਾਲ ਸਬੰਧਤ ਹੈ।
ਦੋਸ਼ ਹਨ ਕਿ ਜਾਅਲੀ ਦਸਤਾਵੇਜ਼ਾਂ ਅਤੇ ਹਸਤਾਖਰਾਂ ਦੀ ਵਰਤੋਂ ਕਰਕੇ ਲਗਭਗ 30 ਏਕੜ ਜ਼ਮੀਨ ਦੇ CLU ਹਾਸਲ ਕੀਤੇ ਗਏ ਅਤੇ ਮੈਂਬਰਾਂ ਤੋਂ 150 ਕਰੋੜ ਰੁਪਏ ਤੋਂ ਵੱਧ ਦੀ ਰਕਮ ਇਕੱਠੀ ਕੀਤੀ ਗਈ।
ਹੁਣ ਤੱਕ ਦੀ ਕਾਰਵਾਈ
ਕਰੀਬ 10 ਦਿਨ ਪਹਿਲਾਂ (8 ਮਈ ਨੂੰ) ED ਨੇ ਮੋਹਾਲੀ, ਚੰਡੀਗੜ੍ਹ ਅਤੇ ਪਟਿਆਲਾ ਸਮੇਤ 12 ਥਾਵਾਂ 'ਤੇ ਛਾਪੇਮਾਰੀ ਕੀਤੀ ਸੀ, ਜਿੱਥੇ ਲਗਭਗ 1 ਕਰੋੜ ਰੁਪਏ ਦੀ ਨਕਦੀ ਬਰਾਮਦ ਹੋਈ ਸੀ।
ED ਨੇ GMADA ਤੋਂ ਉਨ੍ਹਾਂ ਸਾਰੇ ਅਧਿਕਾਰੀਆਂ ਦੀ ਸੂਚੀ ਅਤੇ ਫਾਈਲਾਂ ਮੰਗੀਆਂ ਹਨ ਜੋ ਇਹ ਮਨਜ਼ੂਰੀਆਂ ਦੇਣ ਦੀ ਪ੍ਰਕਿਰਿਆ ਵਿੱਚ ਸ਼ਾਮਲ ਸਨ।