ਟੋਏ ’ਚ ਡਿੱਗੇ ਬੱਚੇ ਦੇ ਮਾਮਲੇ ’ਚ ਮਾਪਿਆਂ ਨੇ ਨਹੀਂ ਦਿੱਤੀ ਸ਼ਿਕਾਇਤ

ਧਾਰਾ 174 ਅਧੀਨ ਕਾਰਵਾਈ, ਬਰਸਾਤੀ ਪਾਣੀ ਤੋਂ ਫ਼ਸਲ ਬਚਾਉਣ ਲਈ ਪੁੱਟੇ ਗਹਿਰੇ ਟੋਏ ਨੇ ਮਾਸੂਮ ਦੀ ਜਾਨ ਲੈ ਲਈ ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਜਲੰਧਰ : ਮਕਸੂਦਾਂ ’ਚ ਖੇਤ ਅੰਦਰ ਬਣੇ ਡੂੰਘੇ ਟੋਏ ’ਚ ਡਿੱਗਣ ਨਾਲ 9 ਸਾਲਾ ਬੱਚੇ ਦੀ ਮੌਤ ਦੇ ਮਾਮਲੇ ’ਚ ਮਾਪਿਆਂ ਨੇ ਕਿਸੇ ਵੀ ਵਿਅਕਤੀ ਖ਼ਿਲਾਫ਼ ਸ਼ਿਕਾਇਤ ਦਰਜ ਨਹੀਂ ਕਰਵਾਈ ਹੈ। ਥਾਣਾ ਨੰਬਰ ਇਕ ਦੀ ਪੁਲਿਸ ਨੇ ਧਾਰਾ 174 ਅਧੀਨ ਕਾਰਵਾਈ ਕਰਦੇ ਹੋਏ ਲਾਸ਼ ਵਾਰਸਾਂ ਨੂੰ ਸੌਂਪ ਦਿੱਤੀ ਹੈ। ਇਹ ਹਾਦਸਾ ਬਸੰਤ ਪੰਚਮੀ ਵਾਲੇ ਦਿਨ ਹੋਈ ਭਾਰੀ ਬਾਰਿਸ਼ ਤੋਂ ਬਾਅਦ ਵਾਪਰਿਆ, ਜਦੋਂ ਇਲਾਕੇ ਦੇ ਕਈ ਸਥਾਨਾਂ ’ਤੇ ਪਾਣੀ ਭਰਨ ਦੀ ਸਥਿਤੀ ਬਣੀ ਹੋਈ ਸੀ। ਮਕਸੂਦਾਂ ਦੇ ਸੂਰਾਨੁੱਸੀ ਪੈਟਰੋਲ ਪੰਪ ਦੇ ਨੇੜੇ ਇਕ ਕਿਸਾਨ ਨੇ ਆਪਣੀ ਫ਼ਸਲ ਨੂੰ ਬਰਸਾਤੀ ਪਾਣੀ ਤੋਂ ਬਚਾਉਣ ਲਈ ਖੇਤ ’ਚ ਲਗਭਗ 10 ਫੁੱਟ ਡੂੰਘਾ ਟੋਇਆ ਖੁਦਵਾਇਆ ਸੀ। ਬਾਰਿਸ਼ ਰੁਕਣ ਤੋਂ ਬਾਅਦ ਦੁਪਹਿਰ ਸਮੇਂ ਬੱਚੇ ਪਤੰਗ ਉਡਾਉਣ ਲਈ ਬਾਹਰ ਨਿਕਲੇ। ਇਸ ਦੌਰਾਨ ਪਤੰਗ ਲੁੱਟਣ ਲਈ ਕੁਝ ਬੱਚੇ ਖੇਤ ਵੱਲ ਦੌੜੇ, ਤਾਂ ਸ਼ਿਵਮ ਨਾਮਕ 9 ਸਾਲਾ ਬੱਚਾ ਖੇਤ ’ਚ ਬਣੇ ਡੂੰਘੇ ਟੋਏ ’ਚ ਡਿੱਗ ਗਿਆ। ਉਸਦੇ ਨਾਲ ਮੌਜੂਦ ਹੋਰ ਬੱਚੇ ਘਬਰਾ ਗਏ ਤੇ ਕਿਸੇ ਨੂੰ ਬਿਨਾਂ ਦੱਸੇ ਘਰ ਵਾਪਸ ਮੁੜ ਗਏ। ਜਦੋਂ ਦੇਰ ਸ਼ਾਮ ਤੱਕ ਸ਼ਿਵਮ ਘਰ ਨਹੀਂ ਪਹੁੰਚਿਆ, ਤਾਂ ਪਰਿਵਾਰਕ ਮੈਂਬਰਾਂ ਨੇ ਉਸਦੀ ਖੋਜ ਸ਼ੁਰੂ ਕੀਤੀ ਪਰ ਕੋਈ ਸੁਰਾਗ ਨਹੀਂ ਮਿਲਿਆ। ਇਸ ਤੋਂ ਬਾਅਦ ਪਰਿਵਾਰ ਨੇ 112 ਨੰਬਰ ’ਤੇ ਪੁਲਿਸ ਨੂੰ ਸੂਚਨਾ ਦਿੱਤੀ। ਸੂਚਨਾ ਮਿਲਦੇ ਹੀ ਥਾਣਾ ਨੰਬਰ ਇਕ ਦੀ ਪੁਲਿਸ ਮੌਕੇ ’ਤੇ ਪਹੁੰਚੀ ਤੇ ਬੱਚੇ ਦੀ ਤਲਾਸ਼ ਸ਼ੁਰੂ ਕੀਤੀ। ਲਗਭਗ ਰਾਤ 8 ਵਜੇ ਪੁਲਿਸ ਨੇ ਖੇਤ ’ਚ ਬਣੇ ਟੋਏ ’ਚੋਂ ਸ਼ਿਵਮ ਦੀ ਲਾਸ਼ ਬਰਾਮਦ ਕਰ ਲਈ। ਪੁਲਿਸ ਨੇ ਲਾਸ਼ ਨੂੰ ਕਬਜ਼ੇ ’ਚ ਲੈ ਕੇ ਪੋਸਟਮਾਰਟਮ ਲਈ ਸਿਵਲ ਹਸਪਤਾਲ ਭੇਜ ਦਿੱਤਾ। ਇਸ ਸਬੰਧੀ ਥਾਣਾ ਮੁਖੀ ਰਾਕੇਸ਼ ਕੁਮਾਰ ਨੇ ਦੱਸਿਆ ਕਿ ਮ੍ਰਿਤਕ ਦੇ ਵਾਰਸਾਂ ਨੇ ਫ਼ਿਲਹਾਲ ਪੁਲਿਸ ਕੋਲ ਕੋਈ ਲਿਖਤੀ ਬਿਆਨ ਦਰਜ ਨਹੀਂ ਕਰਵਾਇਆ। ਪਰਿਵਾਰਕ ਮੈਂਬਰਾਂ ਦਾ ਕਹਿਣਾ ਹੈ ਕਿ ਇਹ ਇਕ ਕੁਦਰਤੀ ਹਾਦਸਾ ਹੈ ਤੇ ਉਹ ਕਿਸੇ ਖ਼ਿਲਾਫ਼ ਸ਼ਿਕਾਇਤ ਨਹੀਂ ਕਰਨਾ ਚਾਹੁੰਦੇ। ਇਸ ਕਾਰਨ ਧਾਰਾ 174 ਅਧੀਨ ਕਾਰਵਾਈ ਕਰ ਕੇ ਲਾਸ਼ ਉਨ੍ਹਾਂ ਨੂੰ ਸੌਂਪ ਦਿੱਤੀ ਗਈ ਹੈ।