ਸਮਾਜਿਕ ਏਕਤਾ ਦੀ ਪ੍ਰਤੀਕ ਬਸੰਤ ਪੰਚਮੀ : ਮਹਾਜਨ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਜਲੰਧਰ : ਪੀਸੀਐੱਮ ਐੱਸਡੀ ਕਾਲਜ ਫਾਰ ਵੂਮੈਨ ਦੇ ਐੱਨਸੀਸੀ ਕੈਡਿਟਾਂ ਨੇ ਵਿਸ਼ੇਸ਼ ਬੱਚਿਆਂ ਨਾਲ ਬਸੰਤ ਪੰਚਮੀ ਮਨਾਕੇ ਹਮਦਰਦੀ ਤੇ ਸਮਾਵੇਸ਼ ਦਾ ਸੁਨੇਹਾ ਫੈਲਾਇਆ। ਏਐੱਨਓ ਕੈਪਟਨ ਪ੍ਰਿਆ ਮਹਾਜਨ, ਆਸ਼ੀਮਾ ਤੇ ਉਮਰ ਫਾਤਿਮਾ ਦੀ ਯੋਗ ਅਗਵਾਈ ਹੇਠ, ਕੈਡਿਟਾਂ ਨੇ ਰੈੱਡ ਕਰਾਸ ਸਕੂਲ ਫਾਰ ਦ ਡੈਫ਼ ਦਾ ਦੌਰਾ ਕੀਤਾ ਤੇ ਵਿਸ਼ੇਸ਼ ਬੱਚਿਆਂ ’ਚ ਖੁਸ਼ੀ, ਪਿਆਰ ਤੇ ਸਮਾਜਿਕ ਏਕਤਾ ਦਾ ਸੰਦੇਸ਼ ਪਹੁੰਚਾਇਆ। ਜਸ਼ਨ ਦੌਰਾਨ ਕੈਡਿਟਾਂ ਨੇ ਬੱਚਿਆਂ ਨਾਲ ਪਤੰਗ ਉਡਾਉਂਦੇ ਹੋਏ, ਰਿਫਰੈਸ਼ਮੈਂਟ ਸਾਂਝੇ ਕਰਦੇ ਤੇ ਉਨ੍ਹਾਂ ਨਾਲ ਖੇਡਾਂ ’ਚ ਸ਼ਾਮਲ ਹੋ ਕੇ ਹਾਸੇ ਤੇ ਭਾਵਨਾਤਮਕ ਬੰਧਨ ਦੇ ਪਲ ਬਣਾਏ। ਇਸ ਵਿਲੱਖਣ ਅੰਦਾਜ਼ ਨੇ ਸਮਾਜ ਨੂੰ ਇਹ ਸਿੱਖਿਆ ਦਿੱਤੀ ਕਿ ਸੱਚੀ ਖੁਸ਼ੀ ਵਿਸ਼ੇਸ਼ ਲੋੜਾਂ ਵਾਲੇ ਬੱਚਿਆਂ ਨਾਲ ਸਾਂਝਾ ਕਰਨ ਤੇ ਸਮਾਜਿਕ ਜ਼ਿੰਮੇਵਾਰੀ ਨਿਭਾਉਣ ’ਚ ਹੈ। ਇਸ ਪਹਿਲਕਦਮੀ ਨਾਲ ਕੈਡਿਟਾਂ ’ਚ ਮਾਨਵਤਾਵਾਦੀ ਮੁੱਲਾਂ ਤੇ ਸਮਾਜਿਕ ਜ਼ਿੰਮੇਵਾਰੀ ਦੀ ਭਾਵਨਾ ਨੂੰ ਮਜ਼ਬੂਤ ਕੀਤਾ ਗਿਆ। ਪ੍ਰਧਾਨ ਨਰੇਸ਼ ਬੁਧੀਆ, ਸੀਨੀਅਰ ਉਪ-ਪ੍ਰਧਾਨ ਵਿਨੋਦ ਦਾਦਾ, ਪ੍ਰਬੰਧਕੀ ਕਮੇਟੀ ਦੇ ਹੋਰ ਮੈਂਬਰ ਤੇ ਪ੍ਰਿੰਸੀਪਲ ਡਾ. ਪੂਜਾ ਪਰਾਸ਼ਰ ਨੇ ਐੱਨਸੀਸੀ ਟੀਮ ਦੇ ਯਤਨਾਂ ਦੀ ਸ਼ਲਾਘਾ ਕੀਤੀ ਤੇ ਭਾਈਚਾਰਕ ਸੇਵਾ ਤੇ ਸਮਾਜਿਕ ਉੱਨਤੀ ਲਈ ਉਨ੍ਹਾਂ ਦੀ ਨਿਰੰਤਰ ਵਚਨਬੱਧਤਾ ਦੀ ਪ੍ਰਸ਼ੰਸਾ ਕੀਤੀ।