ਨਗਰ ਨਿਗਮ ਦੁਬਾਰਾ ਲਾਏਗਾ 62.82 ਕਰੋੜ ਦਾ ਟੈਂਡਰ

ਜਾਸ, ਜਲੰਧਰ : ਜਲੰਧਰ ਵੈਸਟ ਤੇ ਨਾਰਥ ਵਿਧਾਨ ਸਭਾ ਖੇਤਰ ਦੇ ਸੀਵਰੇਜ ਦੇ ਰੱਖ-ਰਖਾਅ ਲਈ ਲਾਏ ਗਏ ਟੈਂਡਰ ਲਈ ਕਿਸੇ ਵੀ ਕੰਪਨੀ ਨੇ ਦਿਲਚਸਪੀ ਨਹੀਂ ਦਿਖਾਈ ਹੈ। ਇਸ ਲਈ, ਨਗਰ ਨਿਗਮ ਹੁਣ ਦੁਬਾਰਾ 62.82 ਕਰੋੜ ਰੁਪਏ ਦਾ ਟੈਂਡਰ ਲਾਏਗਾ। ਸੁਪਰ ਸੱਕਸ਼ਨ ਮਸ਼ੀਨ ਦੀ ਵਰਤੋਂ ਨਾਲ ਜ਼ੀਰੋ ਲੈਵਲ ਸਫਾਈ ਕੀਤੀ ਜਾਵੇਗੀ ਤੇ ਇਨ੍ਹਾਂ ਦੋਨਾਂ ਵਿਧਾਨ ਸਭਾ ਖੇਤਰਾਂ ’ਚ ਸੀਵਰੇਜ ਨਾਲ ਸਬੰਧਤ ਕਿਸੇ ਵੀ ਸ਼ਿਕਾਇਤ ਦਾ ਨਿਬੇੜਾ ਵੀ ਕੀਤਾ ਜਾਵੇਗਾ। ਜਦਕਿ ਜਲੰਧਰ ਸੈਂਟਰਲ ਤੇ ਕੈਂਟ ਵਿਧਾਨ ਸਭਾ ਖੇਤਰ ਦਾ ਕੰਮ ਨਗਰ ਨਿਗਮ ਖ਼ੁਦ ਦੇਖੇਗਾ। ਸ਼ਹਿਰ ’ਚ ਸੀਵਰੇਜ ਦੀ ਸਮੱਸਿਆ ਸਭ ਤੋਂ ਵੱਧ ਵੈਸਟ ਅਤੇ ਨਾਰਥ ਵਿਧਾਨ ਸਭਾ ਖੇਤਰ ’ਚ ਹੈ। ਇਥੇ ਕੁਝ ਇਲਾਕਿਆਂ ਵਿਚ ਤਾਂ ਦੋ ਤੋਂ ਤਿੰਨ ਸਾਲ ਪੁਰਾਣੀ ਸਮੱਸਿਆ ਦਾ ਵੀ ਨਿਬੇੜਾ ਨਹੀਂ ਹੋ ਸਕਿਆ ਹੈ ਤੇ ਲਗਪਗ 6 ਮਹੀਨੇ ਤੋਂ ਸਫਾਈ ਲਈ ਸੁਪਰ ਸੱਕਸ਼ਨ ਮਸ਼ੀਨ ਲੱਗੀ ਹੋਈ ਹੈ। ਇਹ ਟੈਂਡਰ 3 ਸਾਲਾਂ ਲਈ ਹੋਵੇਗਾ ਤੇ ਕੰਪਨੀ 3 ਸਾਲਾਂ ਤੱਕ ਸੇਵਾਵਾਂ ਦੇਵੇਗਾ। ਇਸ ਨੂੰ ਲੈ ਕੇ ਨਗਰ ਨਿਗਮ ਦੀ ਯੂਨੀਅਨ ਵਿਰੋਧ ਕਰ ਰਹੀ ਹੈ। ਹਾਲਾਂਕਿ ਇਹ ਟੈਂਡਰ ਪਹਿਲੀ ਵਾਰ ਪੂਰਾ ਨਹੀਂ ਹੋਇਆ ਪਰ ਨਗਰ ਪ੍ਰਸ਼ਾਸਨ ਨੂੰ ਉਮੀਦ ਹੈ ਕਿ ਦੁਬਾਰਾ ਟੈਂਡਰ ਕੱਢਣ ਨਾਲ ਇਹ ਕੰਮ ਪੂਰਾ ਹੋ ਜਾਵੇਗਾ। ਨਗਰ ਨਿਗਮ ਦੇ ਸੂਤਰਾਂ ਦਾ ਕਹਿਣਾ ਹੈ ਕਿ ਜਦੋਂ ਨਿੱਜੀ ਕੰਪਨੀ ਦੋਵਾਂ ਵਿਧਾਨ ਸਭਾ ਖੇਤਰਾਂ ’ਚ ਕੰਮ ਸੰਭਾਲ ਲਵੇਗੀ ਤਾਂ ਇਨ੍ਹਾਂ ਵਿਧਾਨ ਸਭਾ ਖੇਤਰਾਂ ਦੇ ਬਚੇ ਹੋਏ ਸਟਾਫ ਨੂੰ ਸੈਂਟਰਲ ਅਤੇ ਕੈਂਟ ਵਿਧਾਨ ਸਭਾ ਖੇਤਰਾਂ ’ਚ ਤਾਇਨਾਤ ਕੀਤਾ ਜਾਵੇਗਾ।