6 ਹੋਰ ਕੇਸ ਹਾਰਿਆ ਇੰਪਰੂਵਮੈਂਟ ਟਰੱਸਟ, ਮੋੜੇਗਾ 1.22 ਕਰੋੜ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਜਲੰਧਰ : ਇੰਪਰੂਵਮੈਂਟ ਟਰਸਟ ਨੂੰ ਉਪਭੋਗਤਾ ਅਦਾਲਤ ’ਚ ਇੰਦਰਾਪੁਰਮ ਤੇ ਸੂਰਿਆ ਐਨਕਲੇਵ ਐਕਸਟੈਂਸ਼ਨ ਨਾਲ ਜੁੜੇ 6 ਹੋਰ ਮਾਮਲਿਆਂ ’ਚ ਹਾਰ ਦਾ ਸਾਹਮਣਾ ਕਰਨਾ ਪਿਆ ਹੈ। ਇਨ੍ਹਾਂ 6 ਕੇਸਾਂ ’ਚ ਪਲਾਟ ਤੇ ਫਲੈਟ ਲੈਣ ਵਾਲੇ ਲੋਕਾਂ ਨੂੰ ਉਨ੍ਹਾਂ ਦੀ ਮੂਲ ਰਕਮ, ਵਿਆਜ ਤੇ ਮੁਆਵਜ਼ੇ ਸਮੇਤ ਵਾਪਸ ਦੇਣੇ ਹੋਣਗੇ। ਇਹ ਕੁੱਲ ਰਕਮ 1.22 ਕਰੋੜ ਰੁਪਏ ਬਣਦੀ ਹੈ। ਫਲੈਟ ਤੇ ਪਲਾਟ ਲੈਣ ਵਾਲੇ ਲੋਕਾਂ ਨੇ ਸੁਵਿਧਾਵਾਂ ਤੇ ਕਬਜ਼ਾ ਨਾ ਮਿਲਣ ਕਾਰਨ ਇੰਪਰੂਵਮੈਂਟ ਟਰੱਸਟ ਖ਼ਿਲਾਫ਼ ਅਰਜ਼ੀਆਂ ਦਾਇਰ ਕਰਕੇ ਆਪਣੀ ਰਕਮ ਵਾਪਸ ਮੰਗੀ ਸੀ। ਕਰੀਬ 6 ਅਲਾਟੀਆਂ ਦੇ ਹੱਕ ’ਚ ਫੈਸਲਾ ਸੁਣਾਉਂਦੇ ਹੋਏ ਖਪਤਕਾਰ ਕਮਿਸ਼ਨ ਨੇ ਟਰੱਸਟ ਨੂੰ 45 ਦਿਨਾਂ ਦੇ ਅੰਦਰ 1.22 ਕਰੋੜ ਰੁਪਏ ਅਦਾ ਕਰਨ ਦੇ ਹੁਕਮ ਦਿੱਤੇ ਹਨ। ਜੇਕਰ ਟਰੱਸਟ 45 ਦਿਨਾਂ ’ਚ ਭੁਗਤਾਨ ਨਹੀਂ ਕਰਦਾ ਤਾਂ ਅਲਾਟੀਆਂ ਨੂੰ 12 ਫੀਸਦੀ ਵਿਆਜ ਸਮੇਤ ਰਕਮ ਅਦਾ ਕਰਨੀ ਪਵੇਗੀ। ਫੈਸਲਿਆਂ ਅਨੁਸਾਰ, ਇੰਦਰਾਪੁਰਮ ਦੀ ਅਲਾਟੀ ਜਲੰਧਰ ਦੀ ਕਾਮਨਾ ਢੀਂਗਰਾ ਨੇ ਫਲੈਟ ਲਈ 4.37 ਲੱਖ ਰੁਪਏ ਜਮ੍ਹਾਂ ਕਰਵਾਏ ਸਨ, ਇਸ ਲਈ ਹੁਣ ਉਨ੍ਹਾਂ ਨੂੰ ਟਰੱਸਟ ਵੱਲੋਂ 17 ਲੱਖ ਰੁਪਏ ਮਿਲਣਗੇ। ਜਲੰਧਰ ਦੇ ਮਦਨ ਮੋਹਨ ਜੋਸ਼ੀ ਨੇ 4.33 ਲੱਖ ਰੁਪਏ ਦਿੱਤੇ ਸਨ, ਜਿਸ ਦੇ ਬਦਲੇ ਉਨ੍ਹਾਂ ਨੂੰ 17 ਲੱਖ ਰੁਪਏ ਦਿੱਤੇ ਜਾਣਗੇ। ਅਲਾਟੀ ਆਰੋਹਿਤ ਕੁਮਾਰ ਨੇ 4.10 ਲੱਖ ਰੁਪਏ ਜਮ੍ਹਾਂ ਕਰਵਾਏ ਸਨ ਤੇ ਹੁਣ ਉਨ੍ਹਾਂ ਨੂੰ 16.50 ਲੱਖ ਰੁਪਏ ਮਿਲਣਗੇ। ਚੌਥੇ ਅਲਾਟੀ ਜਲੰਧਰ ਦੇ ਜਸਵਿੰਦਰ ਸਿੰਘ ਨੇ ਫਲੈਟ ਲਈ 4,49,669 ਰੁਪਏ ਦਿੱਤੇ ਸਨ, ਇਸ ਲਈ ਹੁਣ ਟਰਸਟ ਨੂੰ ਉਨ੍ਹਾਂ ਨੂੰ 17.25 ਲੱਖ ਰੁਪਏ ਅਦਾ ਕਰਨੇ ਪੈਣਗੇ। ਸੂਰਿਆ ਐਨਕਲੇਵ ਐਕਸਟੈਂਸ਼ਨ ਦੇ ਅਲਾਟੀ ਫਤਿਹਾਬਾਦ ਦੇ ਜਸਵਿੰਦਰ ਸਿੰਘ ਨੇ 20.91 ਲੱਖ ਰੁਪਏ ਜਮ੍ਹਾਂ ਕਰਵਾਏ ਸਨ। ਹੁਣ ਟਰੱਸਟ ਨੂੰ ਉਨ੍ਹਾਂ ਨੂੰ 50 ਲੱਖ ਰੁਪਏ ਦੇਣੇ ਪੈਣਗੇ। ਇਸੇ ਸਕੀਮ ਦੇ ਦੂਜੇ ਅਲਾਟੀ ਜਲੰਧਰ ਦੇ ਹਰੀਸ਼ ਕੁਮਾਰ ਨੇ 2.60 ਲੱਖ ਰੁਪਏ ਟਰੱਸਟ ਨੂੰ ਦਿੱਤੇ ਸਨ ਤੇ ਹੁਣ ਟਰੱਸਟ ਉਨ੍ਹਾਂ ਨੂੰ 5 ਲੱਖ ਰੁਪਏ ਅਦਾ ਕਰੇਗਾ। ਖਪਤਕਾਰ ਕਮਿਸ਼ਨ ਵੱਲੋਂ ਟਰੱਸਟ ਨੂੰ ਭੁਗਤਾਨ ਕਰਨ ਦੇ ਹੁਕਮਾਂ ’ਚ ਹਰ ਅਲਾਟੀ ਦੇ ਕੇਸ ’ਚ 30 ਹਜ਼ਾਰ ਰੁਪਏ ਮੁਆਵਜ਼ੇ ਦੇ ਨਾਲ 10 ਹਜ਼ਾਰ ਰੁਪਏ ਕਾਨੂੰਨੀ ਖਰਚ ਵੀ ਸ਼ਾਮਲ ਹਨ। ਇੰਪਰੂਵਮੈਂਟ ਟਰੱਸਟ ਨੂੰ ਪਹਿਲਾਂ ਹੀ 70 ਕਰੋੜ ਰੁਪਏ ਤੋਂ ਵੱਧ ਦਾ ਭੁਗਤਾਨ ਕਰਨਾ ਪੈਣਾ ਹੈ। ਇਸ ਕਾਰਨ ਇੰਪਰੂਵਮੈਂਟ ਟਰਸਟ ਜਲੰਧਰ ਲਗਾਤਾਰ ਆਰਥਿਕ ਸੰਕਟ ’ਚ ਫਸਦਾ ਜਾ ਰਿਹਾ ਹੈ।