ਸੂਰਿਆ ਐਨਕਲੇਵ ’ਚ ਆਈਸੀਏਆਈ ਭਵਨ ਦਾ ਕੀਤਾ ਗਿਆ ਉਦਘਾਟਨ

-ਆਈਸੀਏਆਈ ਦੇ ਪ੍ਰਧਾਨ ਚਰਨਜੋਤ ਸਿੰਘ ਨੰਦਾ ਵੱਲੋਂ ਸ਼ੁਭ ਆਰੰਭ ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਜਲੰਧਰ : ਆਈਸੀਏਆਈ ਜਲੰਧਰ ਬ੍ਰਾਂਚ (ਉੱਤਰੀ ਭਾਰਤ ਖੇਤਰੀ ਕੌਂਸਲ) ਵੱਲੋਂ ਸੂਰਿਆ ਐਨਕਲੇਵ ’ਚ ਸਥਿਤ ਚਾਰਟਰਡ ਅਕਾਊਂਟੈਂਟਸ ਸੰਸਥਾ ਦੇ ਅਤਿਆਧੁਨਿਕ ਨਵੇਂ ਭਵਨ ਦਾ ਸ਼ੁੱਕਰਵਾਰ ਨੂੰ ਉਦਘਾਟਨ ਕੀਤਾ ਗਿਆ। ਸਮਾਗਮ ਦਾ ਸ਼ੁੱਭ ਆਰੰਭ ਸੰਸਥਾ ਦੇ ਪ੍ਰਧਾਨ ਸੀਏ ਚਰਨਜੋਤ ਸਿੰਘ ਨੰਦਾ ਵੱਲੋਂ ਕੀਤਾ ਗਿਆ। ਉਦਘਾਟਨ ਉਪਰੰਤ ਧਾਰਮਿਕ ਰਸਮਾਂ ਅਨੁਸਾਰ ਹਵਨ ਯੱਗ ਕਰਵਾਇਆ ਗਿਆ। ਇਸ ਮੌਕੇ ਸੰਬੋਧਨ ਕਰਦਿਆਂ ਜਲੰਧਰ ਬ੍ਰਾਂਚ ਦੇ ਚੇਅਰਮੈਨ ਸੀਏ ਪੁਨੀਤ ਓਬਰਾਏ ਨੇ ਕਿਹਾ ਕਿ ਇਹ ਭਵਨ ਕਈ ਸਾਲਾਂ ਦੀ ਸਾਂਝੀ ਮਿਹਨਤ ਦਾ ਨਤੀਜਾ ਹੈ। ਜਲੰਧਰ ਬ੍ਰਾਂਚ ਕਰੀਬ 1500 ਚਾਰਟਰਡ ਅਕਾਊਂਟੈਂਟਸ ਅਤੇ 5000 ਤੋਂ ਵੱਧ ਵਿਦਿਆਰਥੀਆਂ ਨੂੰ ਸੇਵਾਵਾਂ ਪ੍ਰਦਾਨ ਕਰ ਰਹੀ ਹੈ, ਜਿਨ੍ਹਾਂ ਨੂੰ ਹੁਣ ਇੱਕ ਹੀ ਛੱਤ ਹੇਠਾਂ ਸਾਰੀਆਂ ਅਤਿਆਧੁਨਿਕ ਸੁਵਿਧਾਵਾਂ ਮਿਲਣਗੀਆਂ। ਨਵੇਂ ਭਵਨ ਵਿੱਚ ਦੋ ਜਾਣਕਾਰੀ ਤਕਨਾਲੋਜੀ ਲੈਬਾਂ ਹਨ। ਇਸ ਤੋਂ ਇਲਾਵਾ ਵਿਦਿਆਰਥੀਆਂ ਦੀ ਦਿਸ਼ਾ-ਨਿਰਦੇਸ਼ ਕਲਾਸਾਂ ਲਈ ਵੱਖਰਾ ਹਾਲ, ਲਿਫਟ ਸਹੂਲਤ, 24 ਘੰਟੇ ਬਿਜਲੀ ਬੈਕਅੱਪ, ਕੇਂਦਰੀਕ੍ਰਿਤ ਹਵਾ-ਨਿਯੰਤਰਿਤ ਪ੍ਰਣਾਲੀ ਅਤੇ ਵੱਖਰੀ ਲਾਇਬ੍ਰੇਰੀ ਦੀ ਵਿਵਸਥਾ ਵੀ ਕੀਤੀ ਗਈ ਹੈ। ਸਮਾਗਮ ਦੌਰਾਨ ਕੇਂਦਰੀ ਕੌਂਸਲ ਮੈਂਬਰ ਸੀਏ ਸੰਜੈ ਕੁਮਾਰ ਅਗਰਵਾਲ ਅਤੇ ਸੀਏ ਸੰਜੀਵ ਸਿੰਘਲ ਨੇ ਜਲੰਧਰ ਬ੍ਰਾਂਚ ਨੂੰ ਇਸ ਵੱਡੀ ਉਪਲਬਧੀ ਲਈ ਵਧਾਈ ਦਿੱਤੀ ਅਤੇ ਟੀਮ ਦੀ ਮਿਹਨਤ ਦੀ ਪ੍ਰਸ਼ੰਸਾ ਕੀਤੀ। ਆਪਣੇ ਸੰਬੋਧਨ ਵਿੱਚ ਸੰਸਥਾ ਦੇ ਪ੍ਰਧਾਨ ਸੀਏ ਚਰਨਜੋਤ ਸਿੰਘ ਨੰਦਾ ਨੇ ਮੈਂਬਰਾਂ ਨੂੰ ਅਪੀਲ ਕੀਤੀ ਕਿ ਇਸ ਭਵਨ ਨੂੰ ਆਪਣਾ ਸਮਝ ਕੇ ਇਸ ਦੀ ਸੰਭਾਲ ਕੀਤੀ ਜਾਵੇ। ਉਨ੍ਹਾਂ ਭਰੋਸਾ ਦਿੱਤਾ ਕਿ ਭਵਨ ਲਈ ਆਡੀਟੋਰੀਅਮ ਦੀ ਮਨਜ਼ੂਰੀ ਜਲਦ ਦਿੱਤੀ ਜਾਵੇਗੀ। ਨਾਲ ਹੀ ਕਿਹਾ ਕਿ ਮੈਂਬਰਾਂ ਅਤੇ ਵਿਦਿਆਰਥੀਆਂ ਲਈ ਲੋੜੀਂਦੀਆਂ ਸਾਰੀਆਂ ਸਹੂਲਤਾਂ ਬਿਨਾਂ ਦੇਰੀ ਉਪਲੱਬਧ ਕਰਵਾਈਆਂ ਜਾਣਗੀਆਂ। ਸਮਾਗਮ ਦਾ ਸਮਾਪਨ ਉੱਤਰੀ ਭਾਰਤ ਖੇਤਰੀ ਕੌਂਸਲ ਦੇ ਅਹੁਦੇਦਾਰਾਂ, ਸਾਬਕਾ ਚੇਅਰਮੈਨਾਂ ਅਤੇ ਬ੍ਰਾਂਚ ਟੀਮ ਦੇ ਸਨਮਾਨ ਨਾਲ ਹੋਇਆ। ਸਮਾਗਮ ਵਿੱਚ 300 ਤੋਂ ਵੱਧ ਮੈਂਬਰ ਸ਼ਾਮਲ ਹੋਏ। ਇਸ ਮੌਕੇ ਉੱਤਰੀ ਭਾਰਤ ਖੇਤਰੀ ਕੌਂਸਲ ਦੇ ਚੇਅਰਮੈਨ ਸੀਏ ਜਗਜੀਤ ਸਿੰਘ ਜੈਗਸ, ਵਾਈਸ ਚੇਅਰਮੈਨ ਸੀਏ ਹਿਤੇਸ਼ ਗੋਇਲ, ਸਕੱਤਰ ਸੀਏ ਅਜੀਤ ਸਿੰਘ ਚੰਡੇਲ, ਖਜ਼ਾਨਚੀ ਸੀਏ ਸਚਿਨ ਬਹਿਲ, ਵਿਦਿਆਰਥੀ ਸੰਘ ਦੇ ਚੇਅਰਮੈਨ ਸੀਏ ਨਿਤੀਸ਼ ਚੁੱਘ, ਸੀਏ ਜਤਿੰਦਰ ਮਲਿਕ ਸਮੇਤ ਅਨੇਕਾਂ ਸੀਨੀਅਰ ਤੇ ਨੌਜਵਾਨ ਚਾਰਟਰਡ ਅਕਾਊਂਟੈਂਟਸ ਹਾਜ਼ਰ ਰਹੇ।