ਪਾਈਪ ਲਾਈਨ ਪਾਉਣ ਲਈ ਨੈਸ਼ਨਲ ਹਾਈਵੇ ਦੀ 11 ਕਿਮੀ ਸਰਵਿਸ ਲੇਨ ’ਤੇ ਹੋਵੇਗੀ ਖੁਦਾਈ

ਪਾਈਪ ਲਾਈਨ ਪਾਉਣ ’ਚ ਲੱਗਣਗੇ 3 ਮਹੀਨੇ, ਸਰਵਿਸ ਲੇਨ ’ਤੇ ਟਰੈਫ਼ਿਕ ਰਹੇਗਾ ਪ੍ਰਭਾਵਿਤ ਡਿਪਟੀ ਚੀਫ ਰਿਪੋਰਟਰ, ਪੰਜਾਬੀ ਜਾਗਰਣ, ਜਲੰਧਰ : ਸਮਾਰਟ ਸਿਟੀ ਦੇ ਸਰਫ਼ੇਸ ਵਾਟਰ ਪ੍ਰਾਜੈਕਟ ਤਹਿਤ ਸ਼ਹਿਰ ’ਚ ਪਾਈਪ ਲਾਈਨ ਪਾਉਣ ਲਈ ਪੁੱਟੀਆਂ ਗਈਆਂ ਸੜਕਾਂ ਹੁਣ ਤੱਕ ਬਣ ਨਹੀਂ ਸਕੀਆਂ। ਉਨ੍ਹਾਂ ਹੀ ਹੁਣ ਨੈਸ਼ਨਲ ਹਾਈਵੇ ਦੀ ਸਰਵਿਸ ਲੇਨ ’ਤੇ ਖੁਦਾਈ ਦਾ ਕੰਮ ਸ਼ੁਰੂ ਹੋਣ ਜਾ ਰਿਹਾ ਹੈ। ਪ੍ਰੋਜੈਕਟ ਦੀ ਨੋਡਲ ਏਜੰਸੀ ਪੰਜਾਬ ਵਾਟਰ ਸਪਲਾਈ ਐਂਡ ਸੀਵਰੇਜ ਬੋਰਡ ਨੇ ਨੈਸ਼ਨਲ ਹਾਈਵੇ ਅਥਾਰਟੀ ਆਫ਼ ਇੰਡੀਆ (ਐੱਨਐੱਚਏਆਈ) ਨੂੰ ਚਿੱਠੀ ਭੇਜ ਕੇ ਸਰਵਿਸ ਲੇਨ ਦੀ ਖੁਦਾਈ ਕਰਨ ਦੀ ਮਨਜ਼ੂਰੀ ਮੰਗੀ ਹੈ। ਸਰਵਿਸ ਲੇਨ ’ਤੇ ਲਗਪਗ 10 ਕਿਲੋਮੀਟਰ ਲੰਬੀ ਸੜਕ ਦੀ ਖੁਦਾਈ ਹੋਣੀ ਹੈ। ਇਸ ਨੂੰ ਲੈ ਕੇ ਪਹਿਲਾਂ ਹੀ ਖਸਤਾਹਾਲ ਨੈਸ਼ਨਲ ਹਾਈਵੇ ਦੀ ਸਰਵਿਸ ਲੇਨ ’ਤੇ ਅਗਲੇ ਤਿੰਨ ਮਹੀਨਿਆਂ ਤੱਕ ਲੋਕਾਂ ਨੂੰ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ। ਸੀਵਰੇਜ ਬੋਰਡ ਦੇ ਐਕਸੀਅਨ ਮਨਿੰਦਰ ਸਿੰਘ ਨੇ ਦੱਸਿਆ ਕਿ ਸਰਵਿਸ ਲੇਨ ਦੀ ਖੁਦਾਈ ਲਈ ਐੱਨਐੱਚਏਆਈ ਤੋਂ ਮਨਜ਼ੂਰੀ ਮੰਗੀ ਗਈ ਹੈ। ਇਸ ਲਈ ਵਿਭਾਗ ਦੇ ਚੰਡੀਗੜ੍ਹ ਸਥਿਤ ਹੈੱਡ ਆਫ਼ਿਸ ਤੋਂ ਇਕ ਹਫ਼ਤਾ ਪਹਿਲਾਂ ਚਿੱਠੀ ਭੇਜੀ ਗਈ ਹੈ। ਜਿਵੇਂ ਹੀ ਐੱਨਐੱਚਏਆਈ ਵੱਲੋਂ ਮਨਜ਼ੂਰੀ ਮਿਲਦੀ ਹੈ, ਸਰਵਿਸ ਲੇਨ ਦੀ ਖੁਦਾਈ ਦਾ ਕੰਮ ਸ਼ੁਰੂ ਕਰ ਦਿੱਤਾ ਜਾਵੇਗਾ। ਸਰਫ਼ੇਸ ਵਾਟਰ ਪ੍ਰਾਜੈਕਟ ਤਹਿਤ ਪਾਈਪ ਲਾਈਨ ਪਾਉਣ ਲਈ ਵੈਰਕਾ ਮਿਲਕ ਪਲਾਂਟ ਤੋਂ ਲੈ ਕੇ ਸੂਰਿਆ ਇਨਕਲੇਵ ਤੱਕ ਸਰਵਿਸ ਲੇਨ ’ਤੇ ਪੁਟਾਈ ਕਰ ਕੇ ਪਾਈਪਾਂ ਪਾਈਆਂ ਜਾਣੀਆਂ ਹਨ। ਇਸ ਲਈ ਸੂਰਿਆ ਐਨਕਲੇਵ ਤੋਂ ਪਠਾਨਕੋਟ ਚੌਕ ਤੱਕ ਅੰਮ੍ਰਿਤਸਰ ਵੱਲ ਜਾਣ ਵਾਲੀ ਲੇਨ ’ਤੇ ਲਗਪਗ 6 ਕਿਮੀ ਖੁਦਾਈ ਹੋਵੇਗੀ। ਜਦਕਿ ਪਠਾਨਕੋਟ ਚੌਕ ਤੋਂ ਸ਼ਹੀਦ ਭਗਤ ਸਿੰਘ ਕਾਲੋਨੀ ਨਹਿਰ ਤੱਕ ਨੈਸ਼ਨਲ ਹਾਈਵੇ ਦੀ ਦੋਨਾਂ ਪਾਸਿਆਂ ਵਾਲੀ ਸਰਵਿਸ ਲੇਨ ’ਤੇ ਕਰੀਬ 5 ਕਿਮੀ ਲੰਬਾਈ ’ਚ ਖੁਦਾਈ ਹੋਵੇਗੀ। ਸਰਵਿਸ ਲੇਨ ਦੇ ਦੋਨਾਂ ਪਾਸਿਆਂ ਦੀ ਆਬਾਦੀ ਨੂੰ ਪਾਣੀ ਸਪਲਾਈ ਦੇਣ ਲਈ ਪਾਈਪ ਲਾਈਨ ਪਾਈ ਜਾ ਰਹੀ ਹੈ, ਜਿੱਥੇ ਮੇਨ ਸਪਲਾਈ ਲਾਈਨ ਲਈ ਕਰੀਬ ਸਵਾ ਤਿੰਨ ਫੁੱਟ ਡਾਇਮੀਟਰ ਵਾਲੀਆਂ ਵੱਡੀਆਂ ਪਾਈਪਾਂ ਪਾਈਆਂ ਜਾਣੀਆਂ ਹਨ। ਇਸ ਲਈ ਸਰਵਿਸ ਲੇਨ ’ਤੇ ਲਗਪਗ 6 ਫੁੱਟ ਚੌੜਾਈ ਤੇ 8 ਤੋਂ 10 ਫੁੱਟ ਡੂੰਘਾਈ ਤੱਕ ਖੁਦਾਈ ਹੋਵੇਗੀ। ਖੁਦਾਈ ਤੋਂ ਨਿਕਲਣ ਵਾਲੀ ਮਿੱਟੀ ਰੱਖਣ ਲਈ ਵੀ ਬਰਾਬਰ ਜਗ੍ਹਾ ਚਾਹੀਦੀ ਹੈ। ਇਸ ਕਾਰਨ ਜਿੱਥੇ ਦੋਨਾਂ ਪਾਸਿਆਂ ਖੁਦਾਈ ਹੋਵੇਗੀ, ਉਥੇ ਪ੍ਰਾਜੈਕਟ ਦੌਰਾਨ ਸਰਵਿਸ ਲੇਨ ’ਤੇ ਟਰੈਫ਼ਿਕ ਪੂਰੀ ਤਰ੍ਹਾਂ ਬੰਦ ਰਹੇਗਾ, ਜਿਸ ਨਾਲ ਖ਼ਾਸ ਕਰਕੇ ਦੋਪਹੀਆ ਸਵਾਰੀਆਂ ਨੂੰ ਕਾਫ਼ੀ ਦਿੱਕਤ ਆਵੇਗੀ। 3 ਮਹੀਨੇ ਤੱਕ ਟਰੈਫ਼ਿਕ ਦੀ ਪਰੇਸ਼ਾਨੀ ਸੀਵਰੇਜ ਬੋਰਡ ਦੇ ਐਕਸੀਅਨ ਮਨਿੰਦਰ ਸਿੰਘ ਨੇ ਦੱਸਿਆ ਕਿ ਐੱਨਐੱਚਏਆਈ ਦੀ ਮਨਜ਼ੂਰੀ ਮਿਲਦੇ ਹੀ ਸਰਵਿਸ ਲੇਨ ਦੀ ਖੁਦਾਈ ਦਾ ਕੰਮ ਸ਼ੁਰੂ ਹੋ ਜਾਵੇਗਾ। ਪੂਰੀ ਪਾਈਪ ਲਾਈਨ ਪਾਉਣ ’ਚ ਕਰੀਬ 3 ਮਹੀਨੇ ਲੱਗਣਗੇ। ਇਸ ਤੋਂ ਬਾਅਦ ਹੀ ਟੁੱਟੀ ਸੜਕ ਨੂੰ ਬਣਾਉਣ ਦਾ ਕੰਮ ਹੋਵੇਗਾ। ਇਸ ਕਾਰਨ ਪੂਰੀ ਠੰਢ ਦੌਰਾਨ, ਖ਼ਾਸਕਰ ਧੁੰਦ ’ਚ, ਲੋਕਾਂ ਨੂੰ ਸਰਵਿਸ ਲੇਨ ਦੀ ਬਜਾਏ ਮੇਨ ਹਾਈਵੇ ਤੋਂ ਹੀ ਆਉਣਾ–ਜਾਣਾ ਪਵੇਗਾ। ਨਵੀਂ ਸੜਕ ਐੱਨਐੱਚਏਆਈ ਬਣਾਏਗਾ ਸੀਵਰੇਜ ਬੋਰਡ ਨੂੰ ਸਰਵਿਸ ਲੇਨ ਦੀ ਖੁਦਾਈ ਦੀ ਮਨਜ਼ੂਰੀ ਦੇਣ ਦੇ ਨਾਲ ਹੀ ਐੱਨਐੱਚਏਆਈ ਸੜਕ ਬਣਾਉਣ ਦਾ ਖਰਚ ਵੀ ਦੱਸੇਗਾ। ਇਸ ਤੋਂ ਬਾਅਦ ਸੀਵਰੇਜ ਬੋਰਡ ਐੱਨਐੱਚਏਆਈ ਨੂੰ ਮੰਗਿਆ ਗਿਆ ਫੰਡ ਟ੍ਰਾਂਸਫਰ ਕਰੇਗਾ। ਸਰਵਿਸ ਲੇਨ ਦੇ ਪੁੱਟੇ ਗਏ ਹਿੱਸੇ ਨੂੰ ਫਿਰ ਐੱਨਐੱਚਏਆਈ ਨਵੇਂ ਸਿਰੇ ਤੋਂ ਤਿਆਰ ਕਰੇਗਾ।