ਰੂਸ ਤੋਂ ਡਿਪੋਰਟ ਹੋ ਕੇ ਵਾਪਸ ਆਏ ਨੌਜਵਾਨ ਨੇ ਵਪਾਰੀ ਤੋਂ ਮੰਗੀ 10 ਲੱਖ ਦੀ ਰੰਗਦਾਰੀ

- ਪੁਲਿਸ ਨੇ ਮੁਲਜ਼ਮ ਨੂੰ ਕੀਤਾ ਗ੍ਰਿਫ਼ਤਾਰ, ਰਿਮਾਂਡ ’ਤੇ ਲਿਆ

ਸੰਵਾਦ ਸਹਿਯੋਗੀ, ਜਾਗਰਣ, ਜਲੰਧਰ : ਰੂਸ ਤੋਂ ਡਿਪੋਰਟ ਹੋ ਕੇ ਭਾਰਤ ਵਾਪਸ ਆਏ ਇੱਕ ਨੌਜਵਾਨ ਨੇ ਖਰਚ ਹੋਏ ਰੁਪਏ ਵਾਪਸ ਲੈਣ ਲਈ ਸ਼ਾਹਕੋਟ ਦੇ ਇੱਕ ਵਪਾਰੀ ਤੋਂ 10 ਲੱਖ ਦੀ ਰੰਗਦਾਰੀ ਮੰਗੀ। ਪੁਲਿਸ ਨੇ ਧਮਕੀ ਦੇ ਕੇ ਭੇਜੇ ਗਏ ਸੁਨੇਹੇ ’ਚ ਆਵਾਜ਼ ਦੀ ਪਛਾਣ ਕਰ ਲਈ। ਪੁਲਿਸ ਨੇ ਇੱਕ ਨੈੱਟਵਰਕ ਬੁਣ ਕੇ ਮੁਲਜ਼ਮ ਨੂੰ ਸ਼ਾਹਕੋਟ ਦੇ ਬੱਸ ਸਟੈਂਡ ਤੋਂ ਗ੍ਰਿਫ਼ਤਾਰ ਕਰ ਲਿਆ ਅਤੇ ਮਾਮਲਾ ਦਰਜ ਕਰ ਲਿਆ। ਗ੍ਰਿਫ਼ਤਾਰ ਕੀਤੇ ਗਏ ਮੁਲਜ਼ਮ ਦੀ ਪਛਾਣ ਪਿੰਡ ਰਾਮੇ ਥਾਣਾ ਸ਼ਾਹਕੋਟ ਦੇ 23 ਸਾਲਾ ਸੁਖਵਿੰਦਰ ਸਿੰਘ ਉਰਫ ਸੁਖਾ ਦੇ ਤੌਰ ’ਤੇ ਹੋਈ ਹੈ। ਪੁਲਿਸ ਨੇ ਮੁਲਜ਼ਮ ਨੂੰ ਅਦਾਲਤ ਵਿਚ ਪੇਸ਼ ਕਰ ਕੇ ਦੋ ਦਿਨਾਂ ਦੀ ਰਿਮਾਂਡ ’ਤੇ ਲੈ ਕੇ ਪੁੱਛਗਿੱਛ ਸ਼ੁਰੂ ਕਰ ਦਿੱਤੀ ਹੈ।

ਜਾਣਕਾਰੀ ਅਨੁਸਾਰ ਸੁਖਵਿੰਦਰ ਕਾਰਪੇਂਟਰ ਦਾ ਕੰਮ ਕਰਦਾ ਸੀ। ਉਹ ਅਕਤੂਬਰ 2025 ਵਿਚ ਰੂਸ ਗਿਆ ਸੀ, ਪਰ ਟੂਰਿਸਟ ਵੀਜ਼ਾ ਦੀ ਮਿਆਦ ਖਤਮ ਹੋਣ ’ਤੇ 11 ਨਵੰਬਰ 2025 ਨੂੰ ਡਿਪੋਰਟ ਹੋ ਕੇ ਭਾਰਤ ਭੇਜ ਦਿੱਤਾ ਗਿਆ। ਭਾਰਤ ਆਉਣ ਤੋਂ ਬਾਅਦ ਵੀ ਉਸ ਨੇ ਆਪਣਾ ਰੂਸੀ ਨੰਬਰ ਬੰਦ ਨਹੀਂ ਕੀਤਾ। ਉਸ ਨੇ ਆਪਣੇ ਜਾਣਕਾਰਾਂ ਨੂੰ ਕਿਹਾ ਕਿ ਉਸ ਦੀ ਵਾਪਸੀ ਦੀ ਜਾਣਕਾਰੀ ਕਿਸੇ ਨੂੰ ਨਾ ਦੇਣ, ਕਿਉਂਕਿ ਉਹ ਜਲਦੀ ਹੀ ਦੁਬਾਰਾ ਵਿਦੇਸ਼ ਜਾਣ ਵਾਲਾ ਹੈ। ਉਸ ਨੇ ਰੂਸ ਜਾਣ ਵਿਚ ਖਰਚੇ ਹੋਏ ਪੈਸੇ ਵਾਪਸ ਲੈਣ ਲਈ ਵਪਾਰੀ ਤੋਂ ਰੰਗਦਾਰੀ ਮੰਗਣ ਦੀ ਯੋਜਨਾ ਬਣਾਈ, ਜਿਸ ਤੋਂ ਬਾਅਦ ਉਸ ਨੇ ਵਪਾਰੀ ਨੂੰ ਕਾਲ ਕਰ ਕੇ ਅਤੇ ਆਡੀਓ ਸੁਨੇਹੇ ਭੇਜ ਕੇ ਦਸ ਲੱਖ ਰੁਪਏ ਮੰਗੇ ਅਤੇ ਪੈਸੇ ਨਾ ਦੇਣ ’ਤੇ ਜਾਨ ਤੋਂ ਮਾਰਨ ਦੀ ਧਮਕੀ ਦਿੱਤੀ। 24 ਨਵੰਬਰ ਨੂੰ ਵਪਾਰੀ ਨੇ ਸ਼ਾਹਕੋਟ ਪੁਲਿਸ ਨੂੰ ਸ਼ਿਕਾਇਤ ਦਿੱਤੀ। ਡੀਐੱਸਪੀ ਸੁਖਪਾਲ ਸਿੰਘ ਅਤੇ ਇੰਸਪੈਕਟਰ ਬਲਵਿੰਦਰ ਸਿੰਘ ਭੁੱਲਰ ਨੇ ਮੁਲਜ਼ਮ ਦੀ ਆਵਾਜ਼ ਦੀ ਪਛਾਣ ਕੇ ਉਸ ਦੀ ਸਥਿਤੀ ਟਰੇਸ ਕਰ ਕੇ ਸ਼ਾਹਕੋਟ ਬੱਸ ਸਟੈਂਡ ਨੇੜੇ ਤੋਂ ਗ੍ਰਿਫ਼ਤਾਰ ਕਰ ਲਿਆ। ਪੁਲਿਸ ਹੁਣ ਇਹ ਜਾਂਚ ਕਰ ਰਹੀ ਹੈ ਕਿ ਕੀ ਇਸ ਮਾਮਲੇ ਵਿਚ ਮੁਲਜ਼ਮ ਦੇ ਨਾਲ ਕੋਈ ਹੋਰ ਵਿਅਕਤੀ ਵੀ ਸ਼ਾਮਲ ਸੀ ਜਾਂ ਨਹੀਂ ਅਤੇ ਮੁਲਜ਼ਮ ਨੂੰ ਕਿਸ ਨੇ ਮਦਦ ਦਿੱਤੀ।