ਪੰਜ ਸਾਲਾਂ ’ਚ ਘਟਣ ਦੀ ਬਜਾਏ ਵਧ ਕੇ 56 ਹੋਏ ਬਲੈਕ ਸਪਾਟ

ਡਿਪਟੀ ਚੀਫ ਰਿਪੋਰਟਰ, ਪੰਜਾਬੀ ਜਾਗਰਣ, ਜਲੰਧਰ : ਪਿਛਲੇ ਪੰਜ ਸਾਲਾਂ ’ਚ ਜਲੰਧਰ ਦੇ ਬਲੈਕ ਸਪਾਟ ਦੀ ਸਮੱਸਿਆ ਦਾ ਹੱਲ ਨਹੀਂ ਹੋ ਸਕਿਆ ਹੈ। ਜ਼ਿਲ੍ਹਾ ਪ੍ਰਸ਼ਾਸਨ ਦੀ ਸੂਚੀ ਮੁਤਾਬਕ ਇਸ ਸਮੇਂ ਜ਼ਿਲ੍ਹੇ ’ਚ 56 ਬਲੈਕ ਸਪਾਟ ਹਨ। ਇਨ੍ਹਾਂ ’ਚੋਂ 26 ਬਲੈਕ ਸਪਾਟ ਜਲੰਧਰ ਸ਼ਹਿਰ ਤੇ ਕੈਂਟ ਖੇਤਰ ’ਚ ਹਨ, ਜਦਕਿ 30 ਪਿੰਡਾਂ ’ਚ ਹਨ। ਸਾਲ 2020 ’ਚ ਇਹ ਗਿਣਤੀ 52 ਸੀ। ਟ੍ਰੈਫ਼ਿਕ ਪੁਲਿਸ ਦਾ ਦਾਅਵਾ ਹੈ ਕਿ ਪੀਏਪੀ ਚੌਕ, ਪਠਾਨਕੋਟ ਹਾਈਵੇ ਰੇਰੂ ਪਿੰਡ ਤੇ ਬਿਧੀਪੁਰ ਫਾਟਕ ’ਤੇ ਬੈਰੀਕੇਡ ਲਾ ਕੇ ਕੁਝ ਬਲੈਕ ਸਪਾਟਾਂ ਨੂੰ ਅਸਥਾਈ ਤੌਰ ’ਤੇ ਖਤਮ ਕੀਤਾ ਗਿਆ ਹੈ ਪਰ ਬਲੈਕ ਸਪਾਟਾਂ ਕਾਰਨ ਹੋ ਰਹੇ ਹਾਦਸਿਆਂ ਬਾਰੇ ਸਬੰਧਤ ਵਿਭਾਗ ਗੰਭੀਰ ਨਹੀਂ ਦਿਖਾਈ ਦੇ ਰਹੇ ਤੇ ਇਸ ਦਾ ਪੱਕਾ ਹੱਲ ਨਹੀਂ ਕੀਤਾ ਗਿਆ। ਡਿਪਟੀ ਕਮਿਸ਼ਨਰ ਡਾ. ਹਿਮਾਂਸ਼ੁ ਅਗਰਵਾਲ ਨੇ ਕਿਹਾ ਕਿ ਬਲੈਕ ਸਪਾਟ ਦੂਰ ਕਰਨ ਲਈ ਸਾਰੇ ਵਿਭਾਗਾਂ ਨੂੰ ਨਿਰਦੇਸ਼ ਜਾਰੀ ਕੀਤੇ ਗਏ ਹਨ ਤੇ ਹਰ ਜ਼ਿਲ੍ਹਾ ਰੋਡ ਸੇਫ਼ਟੀ ਕਮੇਟੀ ਦੀ ਮੀਟਿੰਗ ’ਚ ਇਸ ਦੀ ਸਮੀਖਿਆ ਕੀਤੀ ਜਾਂਦੀ ਹੈ। ਬਲੈਕ ਸਪਾਟ ਘਟਾਉਣ ਲਈ ਯਤਨ ਜਾਰੀ ਹਨ। ਪਿਛਲੇ ਦੋ ਸਾਲਾਂ ’ਚ ਹਰ ਸਾਲ ਬਲੈਕ ਸਪਾਟਾਂ ਕਾਰਨ ਜ਼ਿਲ੍ਹੇ ’ਚ ਸੜਕ ਹਾਦਸੇ ਹੋਏ, ਜਿਨ੍ਹਾਂ ’ਚ ਲਗਪਗ 65 ਲੋਕਾਂ ਦੀ ਮੌਤ ਹੋ ਗਈ। ਪਿਛਲੇ ਪੰਜ ਸਾਲਾਂ ’ਚ ਸੁਧਾਰ ਦੇ ਯਤਨ ਤਾਂ ਕੀਤੇ ਗਏ ਪਰ ਹਾਦਸਿਆਂ ਦੀ ਗਿਣਤੀ ’ਚ ਕੋਈ ਵੱਡਾ ਫਰਕ ਨਹੀਂ ਆਇਆ। ਸਾਲ 2020 ’ਚ ਹਾਦਸਿਆਂ ’ਚ ਮਰਨ ਵਾਲਿਆਂ ਦੀ ਗਿਣਤੀ 70 ਦੇ ਲਗਭਗ ਸੀ, ਜੋ ਹੁਣ ਵੀ ਲਗਪਗ ਉਨੀ ਹੀ ਹੈ। ਜ਼ਿਲ੍ਹਾ ਪ੍ਰਸ਼ਾਸਨ ਉਸ ਸਥਾਨ ਨੂੰ ਬਲੈਕ ਸਪਾਟ ਮੰਨਦਾ ਹੈ ਜਿੱਥੇ ਪੰਜ ਤੋਂ ਵੱਧ ਹਾਦਸੇ ਦਰਜ ਕੀਤੇ ਜਾਣ, ਹਾਲਾਂਕਿ ਨੈਸ਼ਨਲ ਹਾਈਵੇ ਅਥਾਰਟੀ ਦੇ ਮਾਪਦੰਡ ਕੁਝ ਵੱਖਰੇ ਹਨ।

---

ਤਿੰਨ ਬਲੈਕ ਸਪਾਟਾਂ ਦਾ ਆਰਜ਼ੀ ਹੱਲ

ਟ੍ਰੈਫ਼ਿਕ ਪੁਲਿਸ ਨੇ ਆਪਣੇ ਪੱਧਰ ’ਤੇ ਕੁਝ ਬਲੈਕ ਸਪਾਟਾਂ ਦਾ ਹੱਲ ਕੱਢਿਆ ਹੈ। ਪੀਏਪੀ ਚੌਕ 'ਤੇ ਰੈਂਪ ਨਾ ਹੋਣ ਕਾਰਨ ਵਾਹਨ ਸਿੱਧਾ ਫਲਾਈਓਵਰ ’ਤੇ ਚੜ੍ਹ ਕੇ ਹਾਦਸਿਆਂ ਦਾ ਕਾਰਨ ਬਣਦੇ ਸਨ, ਜਿਸ ਦਾ ਹੱਲ ਸੀਮੈਂਟ ਦੇ ਡਿਵਾਈਡਰ ਲਾ ਕੇ ਕੀਤਾ ਗਿਆ। ਪਠਾਨਕੋਟ ਹਾਈਵੇ, ਰੇਰੂ ਪਿੰਡ, ਬਿਧੀਪੁਰ ਫਾਟਕ ਇਨ੍ਹਾਂ ਸਥਾਨਾਂ ’ਤੇ ਬੈਰੀਕੇਡ ਲਾਏ ਗਏ ਹਨ। ਟ੍ਰੈਫਿਕ ਇੰਸਪੈਕਟਰ ਸੰਜੀਬ ਕੁਮਾਰ ਨੇ ਕਿਹਾ ਕਿ ਐੱਚਏਆਈ ਤੇ ਪੀਡਬਲਿਊਡੀ ਨਾਲ ਤਾਲਮੇਲ ਬਣਾਇਆ ਗਿਆ ਹੈ। ਹੁਣ ਰਾਮਾ ਮੰਡੀ ਚੌਕ ਦੀ ਸਮੱਸਿਆ ਦਾ ਹੱਲ ਲੱਭਣ ’ਤੇ ਕੰਮ ਚੱਲ ਰਿਹਾ ਹੈ।

---

ਹਾਈਵੇ ਦੇ ਢਾਬਿਆਂ ’ਤੇ ਨਾਜਾਇਜ਼ ਕੱਟ ਬਣੇ ਖਤਰਾ

ਹਾਈਵੇ 'ਤੇ ਢਾਬਿਆਂ ਨੇੜੇ ਨਾਜਾਇਜ਼ ਕੱਟ ਵੱਧ ਰਹੇ ਹਨ ਤੇ ਵੱਡੇ ਖਤਰੇ ਵਜੋਂ ਸਾਹਮਣੇ ਆ ਰਹੇ ਹਨ। ਖਜ਼ਾਨਾ ਢਾਬਾ, ਧੰਨੋਵਾਲੀ ਟੀ-ਪੁਆਇੰਟ ਮੈਕਡੋਲਨ ਰੋਡ ਟੀ-ਪੁਆਇੰਟ, ਜਮਸ਼ੇਰ ਜੰਡਿਆਲਾ-ਨੂਰਮਹਿਲ, ਸ਼ਮੀ ਢਾਬਾ ਪਿੰਡ ਰਾਓਵਾਲੀ, ਮਾਨ ਢਾਬਾ ਪਿੰਡ ਕਾਲਵਾਂ ਇੱਥੇ ਭਾਰੀ ਵਾਹਨ ਗਲਤ ਦਿਸ਼ਾ ’ਚ ਮੋੜ ਲੈਂਦੇ ਹਨ ਤੇ ਹਾਦਸਿਆਂ ਦਾ ਖਤਰਾ ਬਣਾ ਰਹੇ ਹਨ। ਇਨ੍ਹਾਂ ਥਾਵਾਂ ’ਤੇ ਕੋਈ ਸਿਗਨਲ ਜਾਂ ਦਿਸ਼ਾ-ਸੂਚਕ ਬੋਰਡ ਨਹੀਂ ਹੈ।

---

ਚੁਗਿੱਟੀ ਜਲੰਧਰ ਦਾ ਸਭ ਤੋਂ ਵੱਡਾ ਬਲੈਕ ਸਪਾਟ

ਚੁਗਿੱਟੀ ਤੋਂ ਲੰਘਦਾ ਹਾਈਵੇ ਬਾਟਲ ਨੇਕ ਹੈ। ਛੇ ਲੇਨ ਹਾਈਵੇ ਇਥੇ ਆ ਕੇ ਚਾਰ ਲੇਨ ਦਾ ਹੋ ਜਾਂਦਾ ਹੈ। ਵਾਹਨ ਤੇਜ਼ ਰਫ਼ਤਾਰ ਨਾਲ ਆਉਂਦੇ ਹਨ ਤੇ ਅੱਗੇ ਸੜਕ ਤੰਗ ਹੋਣ ਕਾਰਨ ਅਕਸਰ ਹਾਦਸੇ ਹੁੰਦੇ ਹਨ। ਇਸ ਸਾਲ ਇਥੇ 6 ਹਾਦਸੇ ਹੋ ਚੁੱਕੇ ਹਨ ਤੇ 3 ਲੋਕਾਂ ਦੀ ਮੌਤ ਹੋ ਗਈ ਹੈ। ਸੂਰਜ ਇਨਕਲੇਵ ਦੇ ਬਾਹਰ ਫ਼ਲਾਈਓਵਰ ਚੌੜਾ ਕਰਨ ਦਾ ਕੰਮ ਜਾਰੀ ਹੈ, ਜਿਸ ਦੇ ਪੂਰਾ ਹੋਣ ਤੋਂ ਬਾਅਦ ਰਾਹਤ ਮਿਲੇਗੀ।

---

ਮੌਤਾਂ ਵਧੀਆਂ, ਹਾਦਸਿਆਂ ’ਚ ਕੋਈ ਵੱਡਾ ਸੁਧਾਰ ਨਹੀਂ

ਸਾਲ 2020 ’ਚ ਹਾਦਸਿਆਂ ’ਚ ਮਰਨ ਵਾਲਿਆਂ ਦੀ ਗਿਣਤੀ 50-55 ਦੇ ਵਿਚਕਾਰ ਸੀ ਪਰ ਹੁਣ ਇਹ 65 ਦੇ ਨੇੜੇ ਪਹੁੰਚ ਗਈ ਹੈ। ਬਲੈਕ ਸਪਾਟ, ਤੇਜ਼ ਰਫ਼ਤਾਰੀ, ਘੱਟ ਦ੍ਰਿਸ਼ਟਤਾ, ਸਿਗਨਲਾਂ ਦੀ ਕਮੀ, ਨਾਜਾਇਜ਼ ਕੱਟ ਤੇ ਗਲਤ ਪਾਰਕਿੰਗ ਮੁੱਖ ਕਾਰਨ ਹਨ। ਕਈ ਥਾਵਾਂ ’ਤੇ ਛੋਟੇ ਮੁੱਦਿਆਂ ਨਾਲ ਬਲੈਕ ਸਪਾਟ ਦੂਰ ਹੋ ਸਕਦੇ ਸਨ ਪਰ ਇਹ ਪ੍ਰਬੰਧ ਨਹੀਂ ਕੀਤੇ ਗਏ।

---

ਬਲੈਕ ਸਪਾਟ ਦੂਰ ਕਰਨ ’ਤੇ ਚਰਚਾ ਹੋਵੇਗੀ

ਜਲੰਧਰ ਦੇ ਬਲੈਕ ਸਪਾਟ ਦੂਰ ਕਰਨਾ ਸਾਡੀ ਪਹਿਲ ਹੈ। ਕਈ ਥਾਵਾਂ ’ਤੇ ਸੁਧਾਰ ਹੋਏ ਹਨ ਪਰ ਜਿੱਥੇ ਕਮੀ ਹੈ ਉੱਥੇ ਵਿਭਾਗਾਂ ਨੂੰ ਮੁੜ ਯਾਦ ਦਿਵਾਇਆ ਜਾਵੇਗਾ। ਆਉਣ ਵਾਲੀ ਜ਼ਿਲ੍ਹਾ ਰੋਡ ਸੇਫਟੀ ਕਮੇਟੀ ਮੀਟਿੰਗ ’ਚ ਇਸ ਦੀ ਸਮੀਖਿਆ ਕੀਤੀ ਜਾਵੇਗੀ। ਲੋਕਾਂ ਦੀ ਸੁਰੱਖਿਆ ਸਭ ਤੋਂ ਮਹੱਤਵਪੂਰਨ ਹੈ।

-ਡਾ. ਹਿਮਾਂਸ਼ੂ ਅਗਰਵਾਲ, ਡਿਪਟੀ ਕਮਿਸ਼ਨਰ।