ਆਮਦਨ ਕਰ ਵਿਭਾਗ ਤੋਂ ਬਾਅਦ ਇਨਫੋਰਸਮੈਂਟ ਡਾਇਰੈਕਟੋਰੇਟ ਵੀ ਅਗਰਵਾਲ ਢਾਬੇ ਦੀ ਜਾਂਚ ਕਰੇਗੀ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਜਲੰਧਰ : ਕੂਲ ਰੋਡ ਸਥਿਤ ਅਗਰਵਾਲ ਢਾਬੇ ਤੋਂ 2 ਕਰੋੜ 84 ਲੱਖ ਰੁਪਏ ਮਿਲਣ ਤੋਂ ਬਾਅਦ ਹੁਣ ਇਨਫੋਰਸਮੈਂਟ ਡਾਇਰੈਕਟੋਰੇਟ (ਈਡੀ) ਵੀ ਜਾਂਚ ਕਰੇਗਾ। ਸੈਂਟਰਲ ਜੀਐੱਸਟੀ ਨੇ 18 ਨਵੰਬਰ ਨੂੰ ਢਾਬੇ ’ਤੇ ਛਾਪਾ ਮਾਰ ਕੇ ਇਹ ਨਕਦੀ ਬਰਾਮਦ ਕੀਤੀ ਸੀ ਤੇ ਟੈਕਸ ਚੋਰੀ ਦਾ ਦੋਸ਼ ਲਾਇਆ ਹੈ। ਜਾਂਚ ਲਈ ਜੀਐੱਸਟੀ ਨੇ ਜ਼ਮੀਨ, ਫਲੈਟਾਂ ਤੇ ਕਮਰਸ਼ੀਅਲ ਪ੍ਰਾਪਰਟੀ ਦੇ ਦਸਤਾਵੇਜ਼ ਵੀ ਜ਼ਬਤ ਕੀਤੇ ਸਨ। ਭਾਰੀ ਮਾਤਰਾ ’ਚ ਨਕਦੀ ਮਿਲਣ ’ਤੇ ਆਇਕਰ ਵਿਭਾਗ ਪਹਿਲਾਂ ਹੀ ਆਪਣੀ ਜਾਂਚ ਸ਼ੁਰੂ ਕਰ ਚੁੱਕਾ ਹੈ ਤੇ ਹੁਣ ਈਡੀ ਵੀ ਢਾਬਾ ਸੰਚਾਲਕ ਤੋਂ ਪੁੱਛਗਿੱਛ ਕਰੇਗੀ। ਢਾਬਾ ਮਾਲਕ ਵੱਲੋਂ ਸੈਂਟਰਲ ਜੀਐੱਸਟੀ ਅਧਿਕਾਰੀਆਂ ਨੂੰ ਕੁਝ ਦਸਤਾਵੇਜ਼ (ਸਬੂਤ) ਮੁਹੱਈਆ ਕਰਵਾਏ ਗਏ ਸਨ, ਜਿਨ੍ਹਾਂ ਦੀ ਜਾਣਕਾਰੀ ਈਡੀ ਨੇ ਮੰਗੀ ਹੈ। 21 ਨਵੰਬਰ ਨੂੰ ਅਗਰਵਾਲ ਢਾਬੇ ਦੇ ਮਾਲਕ ਨਰੇਸ਼ ਕੁਮਾਰ ਸੈਂਟਰਲ ਜੀਐੱਸਟੀ ਅਧਿਕਾਰੀਆਂ ਨੂੰ ਕੁਝ ਰਿਕਾਰਡ ਦੇ ਗਏ ਸਨ, ਪਰ ਇਸ ਨੂੰ ਹਾਲੇ ਵੀ ਨਾਕਾਫੀ ਦੱਸਿਆ ਜਾ ਰਿਹਾ ਹੈ। ਹਾਲਾਂਕਿ ਸੈਂਟਰਲ ਜੀਐੱਸਟੀ ਅਧਿਕਾਰੀ ਜਾਂਚ ਦੌਰਾਨ ਕੋਈ ਜਾਣਕਾਰੀ ਸਾਂਝੀ ਕਰਨ ਨੂੰ ਤਿਆਰ ਨਹੀਂ, ਪਰ ਸਰੋਤਾਂ ਅਨੁਸਾਰ ਹੁਣ ਇਸ ਮਾਮਲੇ ਦੀ ਜਾਂਚ ਲਈ ਕੇਂਦਰ ਦੇ ਤਿੰਨ ਵਿਭਾਗ ਮਿਲ ਕੇ ਕੰਮ ਕਰ ਰਹੇ ਹਨ। ਜਾਂਚ ਦੌਰਾਨ ਢਾਬੇ ਦੀ ਰੋਜ਼ਾਨਾ ਸੇਲ ਤੇ ਬੈਂਕ ਖਾਤਿਆਂ ਦੇ ਵੇਰਵੇ ਮਿਲਾਏ ਜਾ ਰਹੇ ਹਨ। ਸੈਂਟਰਲ ਜੀਐੱਸਟੀ ਅਧਿਕਾਰੀ ਢਾਬਾ ਮਾਲਕ ਦੇ ਬੈਂਕ ਖਾਤਿਆਂ ਤੇ ਪਿਛਲੇ ਮਹੀਨਿਆਂ ਦੀ ਸੇਲ ਦਾ ਰਿਕਾਰਡ ਖੰਗਾਲ ਰਹੇ ਹਨ। ਜਾਂਚ ਤੋਂ ਪਹਿਲਾਂ ਹੀ ਢਾਬਾ ਮਾਲਕ ਤੋਂ ਬਰਾਮਦ ਕੀਤੀ ਗਈ 2.84 ਕਰੋੜ ਰੁਪਏ ਦੀ ਨਕਦੀ ਉਸਦੇ ਬੈਂਕ ਖਾਤੇ ’ਚ ਜਮ੍ਹਾਂ ਕਰਾਈ ਜਾ ਚੁੱਕੀ ਹੈ, ਪਰ ਖਾਤਾ ਫ੍ਰੀਜ਼ ਹੈ। ਕੇਸ ਦੀ ਜਾਂਚ ਵਿਭਾਗ ਦੇ ਇੰਸਪੈਕਟਰ ਤਕਦੀਰ ਸਿੰਘ ਗਿੱਲ ਕਰ ਰਹੇ ਹਨ। ਅਗਰਵਾਲ ਢਾਬੇ ’ਤੇ ਸੈਂਟਰਲ ਜੀਐੱਸਟੀ ਦੀਆਂ ਦੋ ਟੀਮਾਂ ਨੇ ਛਾਪੇਮਾਰੀ ਕੀਤੀ ਸੀ ਤੇ ਬਰਾਮਦ ਕੀਤੀ ਗਈ ਨਕਦੀ ਨੂੰ ਲੈ ਕੇ ਢਾਬਾ ਮਾਲਕ ਨਰੇਸ਼ ਕੁਮਾਰ ਨੂੰ ਤਿੰਨ ਦਿਨ ਦਾ ਸਮਾਂ ਦਿੱਤਾ ਗਿਆ ਸੀ। ਵਿਭਾਗ ਇਸ ਨੂੰ ਅਜੇ ਇੱਕ ਆਰਥਿਕ ਅਪਰਾਧ ਮੰਨ ਰਿਹਾ ਹੈ।