ਰਾਸ਼ਟਰਪਤੀ ਦ੍ਰੌਪਦੀ ਮੁਰਮੂ 16 ਨੂੰ ਆਉਣਗੇ ਜਲੰਧਰ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਜਲੰਧਰ : ਰਾਸ਼ਟਰਪਤੀ ਦ੍ਰੌਪਦੀ ਮੁਰਮੂ 16 ਜਨਵਰੀ ਨੂੰ ਜਲੰਧਰ ਆਉਣਗੇ। ਉਹ ਇਥੇ ਡਾ. ਬੀ.ਆਰ. ਅੰਬੇਡਕਰ ਰਾਸ਼ਟਰੀ ਤਕਨਾਲੋਜੀ ਸੰਸਥਾਨ (ਐੱਨਆਈਟੀ) ਦੇ 21ਵੇਂ ਡਿਗਰੀ ਵੰਡ ਸਮਾਗਮ ਦੌਰਾਨ ਮੁੱਖ ਮਹਿਮਾਨ ਵਜੋਂ ਸ਼ਿਰਕਤ ਕਰਨਗੇ। ਪੀਆਈਬੀ ਵੱਲੋਂ ਜਾਰੀ ਬਿਆਨ ’ਚ ਦੱਸਿਆ ਗਿਆ ਕਿ ਇਸ ਕਾਨਵੋਨਕੇਸ਼ਨ ਦੌਰਾਨ ਕੁੱਲ 1,452 ਵਿਦਿਆਰਥੀਆਂ ਨੂੰ ਡਿਗਰੀਆਂ ਦਿੱਤੀਆਂ ਜਾਣਗੀਆਂ। ਇਨ੍ਹਾਂ ’ਚ 1,011 ਅੰਡਰਗ੍ਰੇਜੂਏਟ (ਬੀ-ਟੈੱਕ), 238 ਪੋਸਟਗ੍ਰੇਜੂਏਟ(ਐੱਮ-ਟੈੱਕ), 21 ਐੱਮਬੀਏ, 90 ਐੱਮਐੱਸਸੀ ਤੇ 92 ਪੀਐੱਚਡੀ ਵਿਦਿਆਰਥੀ ਸ਼ਾਮਲ ਹਨ। ਇਸ ਮੌਕੇ ਪੰਜਾਬ ਦੇ ਰਾਜਪਾਲ ਗੁਲਾਬ ਚੰਦ ਕਟਾਰੀਆ ਸਮੇਤ ਕਈ ਉੱਘੀਆਂ ਸ਼ਖ਼ਸੀਅਤਾਂ ਦੀ ਆਮਦ ਦੀ ਸੰਭਾਵਨਾ ਹੈ। ਸਮਾਗਮ ਦੌਰਾਨ ਕੁੱਲ 31 ਐਵਾਰਡ ਦਿੱਤੇ ਜਾਣਗੇ, ਜਿਸ ’ਚ 30 ਵਿਸ਼ੇ-ਵਾਰ ਐਵਾਰਡ ਤੇ ਇਕ ਓਵਰਆਲ ਬੀ-ਟੈਕ ਟਾਪਰ ਐਵਾਰਡ ਸ਼ਾਮਲ ਹੈ। ਐੱਨਆਈਟੀ ਦੇ ਨਿਰਦੇਸ਼ਕ ਪ੍ਰੋ. ਬਿਨੋਦ ਕੁਮਾਰ ਕੰਨੋਜੀਆ ਨੇ ਕਿਹਾ ਕਿ ਇਹ ਸਮਾਗਮ ਵਿਦਿਆਰਥੀਆਂ ਦੀਆਂ ਅਕਾਦਮਿਕ ਉਪਲੱਬਧੀਆਂ ਦਾ ਮੌਕਾ ਹੈ।