30 ਨਵੰਬਰ ਨੂੰ ਹੋਵੇਗਾ ਪੁਆਧੀ ਪੰਜਾਬੀ ਸੱਥ ਦਾ 22ਵਾਂ ਸਾਲਾਨਾ ਸਨਮਾਨ ਸਮਾਗਮ, 9ਵੇਂ ਪਾਤਸ਼ਾਹ ਦੇ 350ਵੀਂ ਸ਼ਹੀਦੀ ਸ਼ਤਾਬਦੀ ਨੂੰ ਹੋਵੇਗਾ ਸਮਰਪਿਤ

ਰਣਜੀਤ ਸਿੰਘ ਰਾਣਾ, ਐਸ ਏ ਐਸ ਨਗਰ: ਪੁਆਧੀ ਪੰਜਾਬੀ ਸੱਥ ਮੁਹਾਲੀ ਦਾ 22ਵਾਂ ਸਾਲਾਨਾ ਸਨਮਾਨ ਸਮਾਗਮ-2025 ਸ੍ਰੀ ਗੁਰੂ ਤੇਗ ਬਹਾਦਰ ਜੀ ਦੀ 350ਵੀਂ ਸ਼ਹੀਦੀ ਸ਼ਤਾਬਦੀ ਨੂੰ ਸਮਰਪਿਤ ਹੋਵੇਗਾ। ਇਹ ਸਮਾਗਮ 30 ਨਵੰਬਰ, 2025 (ਐਤਵਾਰ) ਨੂੰ 10:30 ਵਜੇ ਸਵੇਰੇ, ਗੁਰਦੁਆਰਾ ਸਾਹਿਬ (ਸ਼ਾਹਪੁਰ) ਸੈਕਟਰ 38-ਬੀ ਚੰਡੀਗੜ੍ਹ ਵਿਖੇ ਕਰਵਾਇਆ ਜਾਵੇਗਾ। ਸੱਥ ਦੇ ਮੁਖੀ ਸ਼੍ਰੋਮਣੀ ਸਾਹਿਤਕਾਰ ਮਨਮੋਹਨ ਸਿੰਘ ਦਾਊ ਅਤੇ ਸੱਥ ਦੇ ਸਕੱਤਰ ਪ੍ਰਿੰ. ਗੁਰਮੀਤ ਸਿੰਘ ਖਰੜ ਵੱਲੋਂ ਦਿੱਤੀ ਜਾਣਕਾਰੀ ਅਨੁਸਾਰ ਇਸ ਵਰ੍ਹੇ 6 ਸ਼ਖਸ਼ੀਅਤਾਂ ਦਾ ਸਨਮਾਨ ਕੀਤਾ ਜਾਵੇਗਾ। ਜਿਨ੍ਹਾਂ ਵਿੱਚ ਗਿਆਨੀ ਸਾਹਿਬ ਸਿੰਘ ਗੁਰਮਤਿ ਵਿਦਵਾਨ ਸ਼ਾਹਬਾਦ ਮਾਰਕੰਡਾ ਨੂੰ ਸਾਹਿਤਕਾਰ ਗੁਰਬਖਸ਼ ਸਿੰਘ ਕੇਸਰੀ ਪੁਰਸਕਾਰ, ਸ੍ਰੀ ਕਾਹਨ ਸਿੰਘ ਪੰਨੂੰ ਸੇਵਾ-ਮੁਕਤ ਆਈ.ਏ.ਐਸ. ਨੂੰ ਮਾਸਟਰ ਸਰੂਪ ਸਿੰਘ ਨੰਬਰਦਾਰ ਪੁਰਸਕਾਰ, ਸ੍ਰੀ ਵਰਿੰਦਰ ਸਿੰਘ ਵਾਲੀਆ, ਸੰਪਾਦਕ ਪੰਜਾਬੀ ਜਾਗਰਣ ਨੂੰ ਜੱਥੇਦਾਰ ਅੰਗਰੇਜ਼ ਸਿੰਘ ਬਡਹੇੜੀ ਪੁਰਸਕਾਰ, ਢਾਡੀ ਬਲਦੇਵ ਸਿੰਘ ਸੁੰਡਰਾਂ ਨੂੰ ਭਗਤ ਆਸਾ ਰਾਮ ਪੁਰਸਕਾਰ (ਬਾਬਾ ਪ੍ਰਤਾਪ ਸਿੰਘ ਬੈਦਵਾਣ ਦੀ ਯਾਦ ਵਿੱਚ), ਸੰਗੀਤ ਅਧਿਆਪਕ ਗੁਰਮੀਤ ਸਿੰਘ ਖਾਲਸਾ (ਕਿਸ਼ਨਗੜ੍ਹ) ਨੂੰ ਮਾਸਟਰ ਰਘਬੀਰ ਸਿੰਘ ਬੈਦਵਾਣ ਪੁਰਸਕਾਰ ਅਤੇ ਬੀਬਾ ਸਿਮਰਨ (ਨਗਾਰੀ) ਸਬ-ਇੰਸਪੈਕਟਰ ਪੰਜਾਬ ਪੁਲਿਸ ਨੂੰ ਸਰਦਾਰਨੀ ਰਵਿੰਦਰ ਕੌਰ ਪੁਰਸਕਾਰ ਦਿੱਤਾ ਜਾਵੇਗਾ। ਪੁਰਸਕਾਰ ਵਿੱਚ ਨਕਦ ਰਾਸ਼ੀ ਯਾਦ-ਚਿੰਨ੍ਹ, ਸਨਮਾਨ-ਪੱਤਰ, ਲੋਈ ਤੇ ਪੁਸਤਕਾਂ ਭੇਟ ਕੀਤੀਆਂ ਜਾਂਦੀਆਂ ਹਨ। ਜ਼ਿਕਰਯੋਗ ਹੈ ਕਿ ਸੱਥ ਹੁਣ ਤੱਕ 120 ਪੁਆਧ ਦੀਆਂ ਨਾਮਣਾ ਖੱਟਣ ਵਾਲੀ ਸ਼ਖ਼ਸੀਅਤਾਂ ਨੂੰ ਸਨਮਾਨਿਤ ਕਰ ਚੁੱਕੀ ਹੈ। ਇਸ ਵਾਰ ਪੁਸਤਕ ਪੁਰਸਕਾਰ ਮਨਜੀਤ ਕੌਰ ਅੰਬਾਲਵੀ ਦੇ ਬਾਲ-ਨਾਟਕ ਸੰਗ੍ਰਹਿ' ਮਿੱਟੀ ਬੋਲ ਪਈ ਨੂੰ ਅਤੇ ਨਿਰੰਜਣ ਸਿੰਘ ਸੈਲਾਨੀ ਵੱਲੋਂ ਅਨੁਵਾਦਕ ਨਾਵਲ ਪਾਰੂ ਦੇ ਲਈ ਕਾਲਾ ਗੁਲਾਬ ਨੂੰ ਦੇਣ ਲਈ ਚੁਣਿਆ ਗਿਆ। ਪੁਆਧ ਖਾਲਸਾ ਪੰਥ ਦੀ ਜਨਮ ਭੂਮੀ ਟਕ ਮਨਮੋਹਨ ਸਿੰਘ ਦਾਉ, ਡਾ. ਮੁਖਤਿਆਰ ਸਿੰਘ ਅਤੇ ਪ੍ਰਿੰ. ਬਹਾਦਰ ਸਿੰਘ ਗੋਸਲ ਦੀ ਪੁਸਤਕ' ਸਿੱਖ ਇਤਿਹਾਸ ਦੇ ਅਜਬ ਪੰਨੇ ਲੋਕ-ਅਰਪਣ ਕੀਤੀਆਂ ਜਾਣਗੀਆਂ। ਇਸ ਸਮਾਗਮ ਦੇ ਮੁੱਖ-ਮਹਿਮਾਨ ਵੱਜੋਂ ਸ੍ਰੀ ਦੀਪਇੰਦਰ ਸਿੰਘ, ਸੇਵਾ-ਮੁਕਤ ਆਈ.ਏ.ਐਸ. ਅਤੇ ਵਿਸ਼ੇਸ਼-ਮਹਿਮਾਨ ਵੱਜੋਂ ਡਾ. ਲਖਮੀਰ ਸਿੰਘ ਸਿੱਧੂ, ਸੇਵਾ-ਮੁਕਤ, ਸਾਬਕਾ ਡੀਨ, ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਸ਼ਿਰਕਤ ਕਰਨਗੇ। ਸਮਾਗਮ ਦੀ ਪ੍ਰਧਾਨਗੀ ਸੇਵਾ-ਮੁਕਤ ਆਈਏ.ਐਸ. ਸ੍ਰੀ ਜੀ.ਕੇ. ਸਿੰਘ ਕਰਨਗੇ। ਸੱਥ ਦੇ ਸਰਪ੍ਰਸਤ ਡਾ. ਨਿਰਮਲ ਸਿੰਘ ਲਾਂਬੜਾ ਅਤੇ ਸਮਾਗਮ ਦੇ ਸੰਯੋਜਕ ਤਾਰਾ ਸਿੰਘ ਪ੍ਰਧਾਨ, ਗੁਰਦੁਆਰਾ ਸਾਹਿਬ (ਸ਼ਾਹਪੁਰ) ਸੈਕਟਰ 38-ਬੀ, ਚੰਡੀਗੜ੍ਹ ਸੱਥ ਦੇ ਸਮਾਗਮ ਨੂੰ ਵਿਸ਼ੇਸ਼ ਸਹਿਯੋਗ ਦੇਣਗੇ। ਇਸ ਮੌਕੇ ਸਾਹਿਤਕ ਕਾਵਿ-ਰੰਗ ਵੀ ਪੇਸ਼ ਕੀਤਾ ਜਾਵੇਗਾ। ਇਸ ਸਨਮਾਨ ਸਮਾਗਮ ਵਿੱਚ ਪੰਜਾਬ ਭਰ ਤੋਂ ਉੱਘੀਆਂ ਸ਼ਖ਼ਸੀਅਤਾਂ ਸ਼ਾਮਲ ਹੋਣਗੀਆ। ਸੱਥ ਦਾ ਸੋਵੀਨਾਰ ਵੀ ਲੋਕ-ਅਰਪਣ ਕੀਤਾ ਜਾਵੇਗਾ।