ਗਣਤੰਤਰ ਦਿਵਸ ਤੋਂ ਪਹਿਲਾਂ ਹਾਈ ਅਲਰਟ: ਦਿੱਲੀ ਪੁਲਿਸ ਨੇ ਅਲਕਾਇਦਾ ਦੇ 6 ਅੱਤਵਾਦੀਆਂ ਦੇ ਪੋਸਟਰ ਕੀਤੇ ਜਾਰੀ; ਸੁਰੱਖਿਆ ਏਜੰਸੀਆਂ ਮੁਸਤੈਦ

ਏ.ਐੱਨ.ਆਈ., ਨਵੀਂ ਦਿੱਲੀ: ਗਣਤੰਤਰ ਦਿਵਸ ਤੋਂ ਪਹਿਲਾਂ ਦਿੱਲੀ ਪੁਲਿਸ ਨੇ ਇੱਕ ਪੋਸਟਰ ਜਾਰੀ ਕੀਤਾ ਹੈ ਜਿਸ ਵਿੱਚ 6 ਅੱਤਵਾਦੀਆਂ ਨੂੰ ਦਿਖਾਇਆ ਗਿਆ ਹੈ। ਇਹਨਾਂ ਪੋਸਟਰਾਂ ਵਿੱਚ ਪਹਿਲੀ ਵਾਰ ਦਿੱਲੀ ਦੇ ਇੱਕ ਅੱਤਵਾਦੀ ਦੀ ਤਸਵੀਰ ਲਗਾਈ ਗਈ ਹੈ। ਇਹ ਅੱਤਵਾਦੀ ਮੁਹੰਮਦ ਰੇਹਾਨ ਹੈ, ਜੋ 'ਅਲ-ਕਾਇਦਾ ਇਨ ਦਾ ਇੰਡੀਅਨ ਸਬਕੌਂਟੀਨੈਂਟ' (AQIS) ਨਾਲ ਜੁੜਿਆ ਹੋਇਆ ਹੈ। ਪੁਲਿਸ ਅਤੇ ਖੁਫੀਆ ਏਜੰਸੀਆਂ ਕਾਫੀ ਸਮੇਂ ਤੋਂ ਉਸ ਦੀ ਭਾਲ ਕਰ ਰਹੀਆਂ ਹਨ। ਦਿੱਲੀ ਪੁਲਿਸ ਅਨੁਸਾਰ ਮੁਹੰਮਦ ਰੇਹਾਨ ਇੱਕ ਲੋੜੀਂਦਾ (ਵਾਂਟੇਡ) ਅੱਤਵਾਦੀ ਹੈ।

26 ਜਨਵਰੀ ਨੂੰ 77ਵੇਂ ਗਣਤੰਤਰ ਦਿਵਸ ਲਈ ਦਿੱਲੀ ਵਿੱਚ, ਖ਼ਾਸ ਕਰਕੇ ਕਰਤੱਵਿਆ ਪੱਥ 'ਤੇ, ਬਹੁਤ ਸਖ਼ਤ ਸੁਰੱਖਿਆ ਪ੍ਰਬੰਧ ਕੀਤੇ ਗਏ ਹਨ। ਕਈ ਖੁਫੀਆ ਏਜੰਸੀਆਂ ਤੋਂ ਮਿਲੀ ਜਾਣਕਾਰੀ ਦੇ ਅਧਾਰ 'ਤੇ ਇਹ ਤਿਆਰੀ ਕੀਤੀ ਗਈ ਹੈ। ਪੂਰੇ ਇਲਾਕੇ ਵਿੱਚ ਸੀਸੀਟੀਵੀ ਕੈਮਰੇ ਲਗਾਏ ਗਏ ਹਨ, ਜਿਨ੍ਹਾਂ ਵਿੱਚ ਚਿਹਰਾ ਪਛਾਣਨ ਵਾਲੀ ਉੱਨਤ ਤਕਨੀਕ (FRS) ਦੀ ਵਰਤੋਂ ਕੀਤੀ ਜਾ ਰਹੀ ਹੈ। ਲਗਪਗ 10,000 ਪੁਲਿਸ ਕਰਮਚਾਰੀ ਡਿਊਟੀ 'ਤੇ ਰਹਿਣਗੇ।

ਉੱਚੀਆਂ ਇਮਾਰਤਾਂ 'ਤੇ ਸਨਾਈਪਰ ਤਾਇਨਾਤ

ਸੁਰੱਖਿਆ ਲਈ ਕਈ ਪੱਧਰ ਬਣਾਏ ਗਏ ਹਨ। ਐਂਟੀ-ਡਰੋਨ ਯੂਨਿਟ ਹਵਾ ਤੋਂ ਨਜ਼ਰ ਰੱਖ ਰਹੀ ਹੈ। ਉੱਚੀਆਂ ਇਮਾਰਤਾਂ 'ਤੇ ਸਨਾਈਪਰ ਤਾਇਨਾਤ ਕੀਤੇ ਗਏ ਹਨ। ਹੋਟਲਾਂ, ਗੈਸਟ ਹਾਊਸਾਂ, ਕਿਰਾਏਦਾਰਾਂ ਅਤੇ ਘਰੇਲੂ ਨੌਕਰਾਂ ਦੀ ਜਾਂਚ ਚੱਲ ਰਹੀ ਹੈ। ਪੈਦਲ ਚੱਲਣ ਵਾਲਿਆਂ ਨੂੰ ਘੱਟੋ-ਘੱਟ ਤਿੰਨ ਵਾਰ ਮੈਟਲ ਡਿਟੈਕਟਰ ਨਾਲ ਚੈੱਕ ਕੀਤਾ ਜਾਵੇਗਾ।

ਐਡੀਸ਼ਨਲ ਪੁਲਿਸ ਕਮਿਸ਼ਨਰ ਦੇਵੇਸ਼ ਕੁਮਾਰ ਮਾਹਲਾ ਨੇ ਦੱਸਿਆ, "ਗਣਤੰਤਰ ਦਿਵਸ ਇੱਕ ਨਿਸ਼ਚਿਤ ਸਮੇਂ 'ਤੇ ਮਨਾਇਆ ਜਾਂਦਾ ਹੈ ਅਤੇ ਕਰਤੱਵ ਪੱਥ 'ਤੇ ਇਸ ਦਾ ਆਯੋਜਨ ਹੁੰਦਾ ਹੈ। ਇਸ ਨੂੰ ਦੇਖਦੇ ਹੋਏ, ਇੱਕ ਸੁਰੱਖਿਆ ਸਟੈਂਡਰਡ ਪ੍ਰੋਟੋਕੋਲ ਲਾਗੂ ਕੀਤਾ ਗਿਆ ਹੈ। ਲਗਭਗ 10,000 ਪੁਲਿਸ ਕਰਮਚਾਰੀ ਡਿਊਟੀ 'ਤੇ ਹੋਣਗੇ। ਅਸੀਂ ਜ਼ਮੀਨੀ ਪੱਧਰ 'ਤੇ 9 ਵਾਰ ਬ੍ਰੀਫਿੰਗ ਅਤੇ ਰਿਹਰਸਲ ਕੀਤੀ ਹੈ।"

ਕੰਟਰੋਲ ਰੂਮ ਵਿੱਚ ਲਗਪਗ 1,000 ਕੈਮਰੇ

ਕੰਟਰੋਲ ਰੂਮ ਵਿੱਚ ਲਗਪਗ 1,000 ਕੈਮਰੇ ਲਗਾਏ ਗਏ ਹਨ। AI ਅਤੇ FRS ਸਿਸਟਮ ਰਾਹੀਂ ਜੇਕਰ ਕੋਈ ਸ਼ੱਕੀ ਜਾਂ ਅਪਰਾਧਿਕ ਪਿਛੋਕੜ ਵਾਲਾ ਵਿਅਕਤੀ ਦਿਖਾਈ ਦਿੰਦਾ ਹੈ, ਤਾਂ ਤੁਰੰਤ ਅਲਰਟ ਮਿਲਦਾ ਹੈ। ਚੋਰੀ ਦੇ ਜਾਂ ਸ਼ੱਕੀ ਵਾਹਨਾਂ ਨੂੰ ਵੀ ਕੈਮਰੇ ਫੜ ਲੈਂਦੇ ਹਨ ਅਤੇ ਤੁਰੰਤ ਕਾਰਵਾਈ ਕੀਤੀ ਜਾਂਦੀ ਹੈ। ਪੁਲਿਸ ਮੁਲਾਜ਼ਮ ਲਗਾਤਾਰ ਹਰ ਚੀਜ਼ ਦੀ ਨਿਗਰਾਨੀ ਕਰ ਰਹੇ ਹਨ ਤਾਂ ਜੋ ਗਣਤੰਤਰ ਦਿਵਸ ਸੁਰੱਖਿਅਤ ਅਤੇ ਸ਼ਾਂਤੀਪੂਰਵਕ ਤਰੀਕੇ ਨਾਲ ਮਨਾਇਆ ਜਾ ਸਕੇ।