ਜ਼ਰੂਰੀ ਖ਼ਬਰ: ਰੇਲ ਟਿਕਟ ਬੁਕਿੰਗ ਦੇ ਨਿਯਮ ਬਦਲੇ! ਹੁਣ ਓਪਨਿੰਗ ਡੇਅ 'ਤੇ ਟਿਕਟ ਬੁੱਕ ਕਰਨ ਲਈ ਆਧਾਰ ਲਿੰਕ ਹੋਣਾ ਜ਼ਰੂਰੀ, ਜਾਣੋ ਨਵਾਂ ਸਮਾਂ

ਡਿਜੀਟਲ ਡੈਸਕ, ਨਵੀਂ ਦਿੱਲੀ। ਭਾਰਤੀ ਰੇਲਵੇ ਨੇ ਆਨਲਾਈਨ ਟਿਕਟ ਬੁਕਿੰਗ ਨੂੰ ਹੋਰ ਪਾਰਦਰਸ਼ੀ ਬਣਾਉਣ ਲਈ ਨਵੇਂ ਨਿਯਮ ਲਾਗੂ ਕੀਤੇ ਹਨ। 5 ਜਨਵਰੀ ਤੋਂ ਜੋ ਯੂਜ਼ਰਜ਼ ਆਪਣੇ IRCTC ਅਕਾਊਂਟ ਨੂੰ ਆਧਾਰ ਨਾਲ ਲਿੰਕ ਨਹੀਂ ਕਰਨਗੇ, ਉਹ ਰਿਜ਼ਰਵੇਸ਼ਨ ਵਿੰਡੋ ਖੁੱਲ੍ਹਣ ਦੇ ਪਹਿਲੇ ਦਿਨ ਸਵੇਰੇ 8 ਵਜੇ ਤੋਂ ਸ਼ਾਮ 4 ਵਜੇ ਤੱਕ ਟਿਕਟ ਬੁੱਕ ਨਹੀਂ ਕਰ ਸਕਣਗੇ।

ਇਹ ਪਾਬੰਦੀ ਸਿਰਫ਼ ਟ੍ਰੇਨ ਦੇ ਚੱਲਣ ਦੀ ਤਰੀਕ ਤੋਂ 60 ਦਿਨ ਪਹਿਲਾਂ ਖੁੱਲ੍ਹਣ ਵਾਲੀ ਬੁਕਿੰਗ 'ਤੇ ਲਾਗੂ ਹੋਵੇਗੀ, ਤਾਂ ਜੋ ਆਮ ਯਾਤਰੀਆਂ ਨੂੰ ਪਹਿਲ ਦਿੱਤੀ ਜਾ ਸਕੇ।

ਰੇਲ ਮੰਤਰਾਲਾ ਇਸ ਬਦਲਾਅ ਨੂੰ ਪੜਾਅਵਾਰ ਤਰੀਕੇ ਨਾਲ ਲਾਗੂ ਕਰ ਰਿਹਾ ਹੈ:

ਪਹਿਲਾ ਪੜਾਅ (29 ਦਸੰਬਰ): ਬਿਨਾਂ ਆਧਾਰ ਵਾਲੇ ਯੂਜ਼ਰਜ਼ ਸਵੇਰੇ 8 ਤੋਂ ਦੁਪਹਿਰ 12 ਵਜੇ ਤੱਕ ਬੁਕਿੰਗ ਨਹੀਂ ਕਰ ਸਕੇ।

ਦੂਜਾ ਪੜਾਅ (5 ਜਨਵਰੀ): ਪਾਬੰਦੀ ਸਵੇਰੇ 8 ਤੋਂ ਸ਼ਾਮ 4 ਵਜੇ ਤੱਕ ਜਾਰੀ ਰਹੇਗੀ।

ਤੀਜਾ ਪੜਾਅ (12 ਜਨਵਰੀ): ਸਵੇਰੇ 8 ਵਜੇ ਤੋਂ ਅੱਧੀ ਰਾਤ ਤੱਕ ਅਜਿਹੇ ਅਕਾਊਂਟਸ ਤੋਂ ਟਿਕਟ ਬੁਕਿੰਗ ਪੂਰੀ ਤਰ੍ਹਾਂ ਬੰਦ ਹੋ ਜਾਵੇਗੀ।

ਫਰਜ਼ੀ ਬੁਕਿੰਗ 'ਤੇ ਲੱਗੇਗੀ ਲਗਾਮ

ਰੇਲਵੇ ਦਾ ਇਹ ਕਦਮ ਮੁੱਖ ਤੌਰ 'ਤੇ ਫਰਜ਼ੀ ਅਕਾਊਂਟਸ ਅਤੇ ਏਜੰਟਾਂ ਦੁਆਰਾ ਕੀਤੀ ਜਾਣ ਵਾਲੀ ਬੁਕਿੰਗ ਨੂੰ ਰੋਕਣ ਲਈ ਹੈ। ਇਸ ਨਾਲ ਆਮ ਆਦਮੀ ਨੂੰ ਆਨਲਾਈਨ ਪਲੇਟਫਾਰਮ 'ਤੇ ਬਰਾਬਰ ਮੌਕਾ ਮਿਲੇਗਾ ਅਤੇ ਸਾਫਟਵੇਅਰ ਰਾਹੀਂ ਹੋਣ ਵਾਲੀ ਹੇਰਾਫੇਰੀ ਰੁਕੇਗੀ।

ਨਵੇਂ ਨਿਯਮਾਂ ਨਾਲ ਜੁੜੇ ਅਹਿਮ ਸਵਾਲ-ਜਵਾਬ

ਸਵਾਲ 1: ਇਹ ਨਿਯਮ ਕਿਉਂ ਲਿਆਂਦਾ ਗਿਆ?

ਜਵਾਬ: ਟਿਕਟ ਏਜੰਟਾਂ ਅਤੇ ਫਰਜ਼ੀ ਸਾਫਟਵੇਅਰਾਂ ਨੂੰ ਰੋਕਣ ਲਈ। ਇਸ ਨਾਲ ਓਪਨਿੰਗ ਡੇਅ 'ਤੇ ਆਮ ਯਾਤਰੀਆਂ ਨੂੰ ਕਨਫਰਮ ਟਿਕਟ ਆਸਾਨੀ ਨਾਲ ਮਿਲ ਸਕੇਗੀ। ਸ਼ੁਰੂਆਤੀ ਘੰਟਿਆਂ ਵਿੱਚ ਹੁਣ ਏਜੰਟ ਟਿਕਟ ਬੁੱਕ ਨਹੀਂ ਕਰ ਸਕਣਗੇ।

ਸਵਾਲ 2: ਆਧਾਰ ਕਿਵੇਂ ਕੰਮ ਕਰੇਗਾ?

ਜਵਾਬ: ਤੁਹਾਨੂੰ ਆਪਣਾ IRCTC ਅਕਾਊਂਟ ਆਧਾਰ ਨਾਲ ਲਿੰਕ ਕਰਨਾ ਹੋਵੇਗਾ। ਬੁਕਿੰਗ ਵੇਲੇ ਤੁਹਾਡੇ ਰਜਿਸਟਰਡ ਮੋਬਾਈਲ 'ਤੇ ਇਕ OTP ਆਵੇਗਾ, ਜਿਸ ਨੂੰ ਭਰਨ ਤੋਂ ਬਾਅਦ ਹੀ ਟਿਕਟ ਕਨਫਰਮ ਹੋਵੇਗੀ।

ਸਵਾਲ 3: ਕੀ ਬਿਨਾਂ ਆਧਾਰ ਟਿਕਟ ਬੁੱਕ ਨਹੀਂ ਹੋਵੇਗੀ?

ਜਵਾਬ: ਬਿਨਾਂ ਆਧਾਰ ਲਿੰਕ ਵਾਲੇ ਯੂਜ਼ਰਜ਼ ਸ਼ੁਰੂਆਤੀ 4 ਤੋਂ 8 ਘੰਟਿਆਂ (ਪੜਾਅ ਅਨੁਸਾਰ) ਵਿੱਚ ਟਿਕਟ ਬੁੱਕ ਨਹੀਂ ਕਰ ਸਕਣਗੇ। ਉਸ ਤੋਂ ਬਾਅਦ ਹੀ ਉਨ੍ਹਾਂ ਨੂੰ ਮੌਕਾ ਦਿੱਤਾ ਜਾਵੇਗਾ।

ਸਵਾਲ 4: ਕੀ ਕਾਊਂਟਰ ਤੋਂ ਟਿਕਟ ਲੈਣ ਦੇ ਨਿਯਮ ਵੀ ਬਦਲੇ ਹਨ? ਜਵਾਬ: ਹਾਂ, ਕਾਊਂਟਰ ਤੋਂ ਟਿਕਟ ਲੈਣ ਵੇਲੇ ਵੀ OTP ਜ਼ਰੂਰੀ ਹੈ। ਤੁਹਾਡਾ ਮੋਬਾਈਲ ਨੰਬਰ ਆਧਾਰ ਨਾਲ ਲਿੰਕ ਹੋਣਾ ਚਾਹੀਦਾ ਹੈ। ਜੇਕਰ ਕਿਸੇ ਹੋਰ ਲਈ ਟਿਕਟ ਲੈ ਰਹੇ ਹੋ, ਤਾਂ ਉਸ ਦਾ ਆਧਾਰ ਅਤੇ OTP ਵੀ ਜ਼ਰੂਰੀ ਹੋਵੇਗਾ।

ਸਵਾਲ 5: IRCTC 'ਤੇ ਆਧਾਰ ਲਿੰਕ ਕਿਵੇਂ ਕਰੀਏ?

ਜਵਾਬ: IRCTC ਐਪ ਜਾਂ ਵੈੱਬਸਾਈਟ 'ਤੇ ਲੌਗ-ਇਨ ਕਰੋ। 'My Profile' ਸੈਕਸ਼ਨ ਵਿੱਚ ਜਾ ਕੇ 'Aadhaar KYC' ਦਾ ਆਪਸ਼ਨ ਚੁਣੋ ਅਤੇ ਵੇਰਵੇ ਅਪਡੇਟ ਕਰੋ।

ਸਵਾਲ 6: ਮਦਦ ਕਿੱਥੋਂ ਮਿਲੇਗੀ?

ਜਵਾਬ: ਬੁਕਿੰਗ ਜਾਂ OTP ਦੀ ਸਮੱਸਿਆ ਲਈ IRCTC ਹੈਲਪਲਾਈਨ ਨੰਬਰ (139) 'ਤੇ ਕਾਲ ਕਰੋ। ਆਧਾਰ ਦੀ ਸਮੱਸਿਆ ਲਈ UIDAI ਦੇ ਨੰਬਰ (1947) 'ਤੇ ਸੰਪਰਕ ਕਰੋ।

ਸਵਾਲ 7: 60 ਦਿਨਾਂ ਦਾ ਨਿਯਮ ਕੀ ਹੈ?

ਜਵਾਬ: 1 ਨਵੰਬਰ 2024 ਤੋਂ ਰੇਲਵੇ ਨੇ ਐਡਵਾਂਸ ਰਿਜ਼ਰਵੇਸ਼ਨ ਦੀ ਮਿਆਦ 120 ਦਿਨਾਂ ਤੋਂ ਘਟਾ ਕੇ 60 ਦਿਨ ਕਰ ਦਿੱਤੀ ਹੈ। ਯਾਨੀ ਤੁਸੀਂ ਯਾਤਰਾ ਤੋਂ ਵੱਧ ਤੋਂ ਵੱਧ 60 ਦਿਨ ਪਹਿਲਾਂ ਟਿਕਟ ਬੁੱਕ ਕਰ ਸਕਦੇ ਹੋ।

ਸਵਾਲ: ਕੀ ਇਹ ਪ੍ਰਣਾਲੀ ਪੂਰੇ ਦੇਸ਼ ਵਿੱਚ ਲਾਗੂ ਹੈ?

ਜਵਾਬ: ਹਾਂ।