ਸਾਈਬਰ ਠੱਗਾਂ ਦਾ ਵੱਡਾ ਕਾਰਨਾਮਾ; ਸੁਪਰੀਮ ਕੋਰਟ ਦੇ ਸਾਬਕਾ ਚੀਫ਼ ਜਸਟਿਸ ਦਾ ਨਾਂ ਵਰਤ ਕੇ ਬਜ਼ੁਰਗ ਮਹਿਲਾ ਤੋਂ ਠੱਗੇ ₹3.71 ਕਰੋੜ

ਮੁੰਬਈ (ਪੀਟੀਆਈ) : ਸਾਈਬਰ ਠੱਗੀ ਦਾ ਇਕ ਅਜਿਹਾ ਮਾਮਲਾ ਸਾਹਮਣੇ ਆਇਆ ਹੈ, ਜਿਸ ’ਚ ਸਾਬਕਾ ਚੀਫ ਜਸਟਿਸ ਚੰਦਰਚੂੜ ਦੇ ਨਾਂ ’ਤੇ ਹੀ ਠੱਗੀ ਮਾਰ ਲਈ ਗਈ। ਮੁੰਬਈ ’ਚ ਸਾਈਬਰ ਅਪਰਾਧੀਆਂ ਨੇ ਜਸਟਿਸ ਚੰਦਰਚੂੜ ਬਣ ਕੇ ਪਹਿਲਾਂ 68 ਸਾਲਾ ਇਕ ਬਜ਼ੁਰਗ ਔਰਤ ਨੂੰ ਡਿਜੀਟਲ ਅਰੈਸਟ ਕੀਤਾ ਤੇ ਫਿਰ 3.71 ਕਰੋੜ ਰੁਪਏ ਠੱਗ ਲਏ। ਇਸ ਵਾਰਦਾਤ ਨੂੰ ਅੰਜਾਮ ਦੇਣ ਲਈ ਨਕਲੀ ਆਨਲਾਈਨ ਅਦਾਲਤ ਲਗਾਈ ਗਈ ਤੇ ਔਰਤ ਨੂੰ ਜ਼ਮਾਨਤ ਦਿਵਾਉਣ ਲਈ ਖ਼ੁਦ ’ਤੇ ਤਿੰਨ ਪੇਜ ਦਾ ਲੇਖ ਲਿਖਵਾਇਆ ਗਿਆ। ਇਸ ਮਾਮਲੇ ’ਚ ਪਿਛਲੇ ਹਫ਼ਤੇ ਇਕ ਵਿਅਕਤੀ ਨੂੰ ਗੁਜਰਾਤ ਦੇ ਸੂਰਤ ਤੋਂ ਗ੍ਰਿਫ਼ਤਾਰ ਕੀਤਾ ਗਿਆ। ਉਸ ਨੇ ਠੱਗੀ ਵਾਲੀ ਰਕਮ ਦਾ ਵੱਡਾ ਹਿੱਸਾ ਆਪਣੇ ਬੈਂਕ ਖਾਤੇ ’ਚ ਜਮ੍ਹਾ ਕਰਵਾਇਆ ਸੀ।

ਇਕ ਪੁਲਿਸ ਅਧਿਕਾਰੀ ਨੇ ਸੋਮਵਾਰ ਨੂੰ ਦੱਸਿਆ ਕਿ ਸਾਈਬਰ ਅਪਰਾਧੀਆਂ ਨੇ ਦੱਖਣੀ ਮੁੰਬਈ ਦੇ ਕੋਲਾਬਾ ਥਾਣੇ ਨਾਲ ਹੀ ਕੇਂਦਰੀ ਏਜੰਸੀਆਂ ਦੇ ਅਧਿਕਾਰੀ ਬਣ ਕੇ ਔਰਤ ਨੂੰ ਫੋਨ ਕੀਤਾ ਤੇ ਉਸ ਨੂੰ ਮਨੀ ਲਾਂਡ੍ਰਿੰਗ ਮਾਮਲੇ ’ਚ ਡਿਜੀਟਲ ਅਰੈਸਟ ਕੀਤਾ। ਇਸ ਵਾਰਦਾਤ ਨੂੰ 18 ਅਗਸਤ ਤੋਂ 13 ਅਕਤੂਬਰ ਵਿਚਾਲੇ ਅੰਜਾਮ ਦਿੱਤਾ ਗਿਆ ਸੀ।

ਅਧਿਕਾਰੀ ਨੇ ਦੱਸਿਆ ਕਿ 18 ਅਗਸਤ ਨੂੰ ਔਰਤ ਨੂੰ ਇਕ ਵਿਅਕਤੀ ਨੇ ਫੋਨ ਕੀਤਾ ਤੇ ਦਾਅਵਾ ਕੀਤਾ ਕਿ ਉਹ ਕੋਲਾਬਾ ਥਾਣੇ ਤੋਂ ਗੱਲ ਕਰ ਰਿਹਾ ਹੈ ਤੇ ਔਰਤ ਦੇ ਬੈਂਕ ਖਾਤੇ ਦੀ ਵਰਤੋਂ ਮਨੀ ਲਾਂਡ੍ਰਿੰਗ ਲਈ ਕੀਤੀ ਜਾ ਰਹੀ ਹੈ। ਉਸ ਨੇ ਮਾਮਲਾ ਸੀਬੀਆਈ ਨੂੰ ਸੌਂਪੇ ਜਾਣ ਦਾ ਦਾਅਵਾ ਕਰਦੇ ਹੋਏ ਔਰਤ ਤੋਂ ਬੈਂਕ ਵੇਰਵੇ ਮੰਗੇ। ਉਸ ਨੇ ਅਧਿਕਾਰੀ ਐੱਸਕੇ ਜਾਇਸਵਾਲ ਬਣ ਕੇ ਔਰਤ ਤੋਂ ਉਸ ਦੇ ਜੀਵਨ ’ਤੇ ਦੋ-ਤਿੰਨ ਪੇਜ ਦਾ ਲੇਖ ਵੀ ਲਿਖਵਾਇਆ। ਇਸ ਤੋਂ ਬਾਅਦ ਉਸ ਨੇ ਔਰਤ ਨੂੰ ਕਿਹਾ ਕਿ ਉਹ ਉਸ ਦੇ ਨਿਰਦੋਸ਼ ਹੋਣ ਦੀ ਗੱਲ ਤੋਂ ਸਹਿਮਤ ਹੈ ਤੇ ਇਹ ਯਕੀਨੀ ਬਣਾਏਗਾ ਕਿ ਉਸ ਨੂੰ ਜ਼ਮਾਨਤ ਮਿਲ ਜਾਵੇ।

ਅਧਿਕਾਰੀ ਨੇ ਕਿਹਾ ਕਿ ਇਸ ਤੋਂ ਬਾਅਦ ਸਾਈਬਰ ਠੱਗਾਂ ਨੇ ਔਰਤ ਨੂੰ ਵੀਡੀਓ ਕਾਲ ਦੇ ਰਾਹੀਂ ਕੋਰਟ ਰੂਮ ’ਚ ਇਕ ਵਿਅਕਤੀ ਸਾਹਮਣੇ ਪੇਸ਼ ਕੀਤਾ, ਜਿਸ ਨੇ ਖ਼ੁਦ ਨੂੰ ਜਸਟਿਸ ਚੰਦਰਚੂੜ ਦੱਸਿਆ। ਔਰਤ ਤੋਂ ਵੈਰੀਫਿਕੇਸ਼ਨ ਲਈ ਨਿਵੇਸ਼ ਵੇਰਵੇ ਮੰਗੇ ਗਏ। ਨਤੀਜੇ ਵਜੋਂ ਔਰਤ ਨੇ ਦੋ ਮਹੀਨੇ ਦੇ ਸਮੇਂ ’ਚ ਕਈ ਬੈਂਕ ਖਾਤਿਆਂ ਤੋਂ 3.71 ਕਰੋੜ ਰੁਪਏ ਟਰਾਂਸਫਰ ਕਰ ਦਿੱਤੇ। ਇਸ ਤੋਂ ਬਾਅਦ ਔਰਤ ਨੂੰ ਜਦ ਫੋਨ ਆਉਣਾ ਬੰਦ ਹੋਇਆ ਤਾਂ ਉਸ ਨੂੰ ਲੱਗਾ ਕਿ ਉਹ ਆਨਲਾਈਨ ਧੋਖਾਧੜੀ ਦਾ ਸ਼ਿਕਾਰ ਹੋ ਗਈ ਹੈ। ਇਸ ਤੋਂ ਬਾਅਦ ਉਸ ਨੇ ਸਾਈਬਰ ਪੁਲਿਸ ਸਟੇਸ਼ਨ ’ਚ ਸ਼ਿਕਾਇਤ ਕੀਤੀ।

1.95 ਕਰੋੜ ਦੀ ਆਨਲਾਈਨ ਧੋਖਾਧੜੀ ’ਚ ਦੋ ਗ੍ਰਿਫ਼ਤਾਰ

ਹੈਦਰਾਬਾਦ (ਪੀਟੀਆਈ) : ਪੁਲਿਸ ਨੇ ਸੋਮਵਾਰ ਨੂੰ ਇਕ ਔਰਤ ਨਾਲ 1.95 ਕਰੋੜ ਦੀ ਆਨਲਾਈਨ ਧੋਖਾਧੜੀ ਦੇ ਮਾਮਲੇ ’ਚ ਦੋ ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ। ਸਰਕਾਰੀ ਅਧਿਕਾਰੀ ਬਣ ਕੇ ਸਾਈਬਰ ਠੱਗਾਂ ਨੇ ਔਰਤ ਨੂੰ ਡਿਜੀਟਲ ਅਰੈਸਟ ਕੀਤਾ ਸੀ ਤੇ ਕਿਹਾ ਸੀ ਕਿ ਉਸ ਦਾ ਪਤੀ ਕਈ ਅਪਰਾਧਾਂ ’ਚ ਸ਼ਾਮਲ ਹੈ। ਇਸ ਤਰੀਕੇ ਨਾਲ ਉਸ ਨੂੰ ਧਮਕਾ ਕੇ ਇਸ ਆਨਲਾਈਨ ਧੋਖਾਧੜੀ ਨੂੰ ਅੰਜਾਮ ਦਿੱਤਾ ਗਿਆ ਸੀ। ਔਰਤ ਨੇ 13 ਦਸੰਬਰ ਨੂੰ ਸ਼ਿਕਾਇਤ ਦਰਜ ਕਰਵਾਈ ਸੀ।