ਮਾਂ ਦੇ ਅੰਧਵਿਸ਼ਵਾਸ ਨੇ ਪੁੱਤਰ ਨੂੰ ਬਣਾਇਆ ‘ਪਿੰਜਰ’, 4 ਸਾਲਾਂ ਤਕ ਕੀੜੇ ਪੀਂਦੇ ਰਹੇ ਖ਼ੂਨ... ਨੌਜਵਾਨ ਨੇ ਤੜਫ-ਤੜਫ ਕੇ ਤੋੜਿਆ ਦਮ

ਉਮੇਸ਼ ਭਾਰਗਵ, ਅੰਬਾਲਾ : ਵਾਰਡ ਨੰਬਰ 10 ਦੇ ਨਦੀ ਮੁਹੱਲਾ 'ਚ ਪਿਛਲੇ ਚਾਰ ਸਾਲਾਂ ਤੋਂ ਕਮਰੇ 'ਚ ਬੰਦ ਪ੍ਰਿੰਸ ਨੇ ਵੀਰਵਾਰ ਦੇਰ ਰਾਤ ਦਮ ਤੋੜ ਦਿੱਤਾ। 22 ਸਾਲਾ ਪ੍ਰਿੰਸ ਅੰਧਵਿਸ਼ਵਾਸ ਦੀਆਂ ਬੇੜੀਆਂ 'ਚ ਜਕੜਿਆ ਹੋਇਆ ਸੀ। ਉਹ ਚਾਰ ਸਾਲਾਂ ਤੋਂ ਇਕ ਕਮਰੇ 'ਚ ਜਿਊਂਦਾ ਪਿੰਜਰ ਬਣ ਕੇ ਕੈਦ ਸੀ। ਹਾਲਤ ਅਜਿਹੀ ਸੀ ਕਿ ਉਸਦੀ ਇਕ-ਇਕ ਹੱਡੀ ਗਿਣੀ ਜਾ ਸਕਦੀ ਸੀ। ਸਰੀਰ 'ਚ ਖ਼ੂਨ ਖ਼ਤਮ ਹੋ ਚੁੱਕਾ ਸੀ ਅਤੇ ਮਾਸ ਨਾਮ ਮਾਤਰ ਹੀ ਬਚਿਆ ਸੀ। ਉਹ ਸਿਰਫ਼ ਹੱਡੀਆਂ ਦਾ ਢਾਂਚਾ ਸੀ, ਬੱਸ ਸਾਹ ਹੀ ਕਿਸੇ ਤਰ੍ਹਾਂ ਚੱਲ ਰਹੇ ਸਨ।

ਮਾਂ ਨੇ ਮਰਨ ਲਈ ਛੱਡਿਆ

ਮਾਂ ਨੇ ਆਪਣੇ ਜਿਗਰ ਦੇ ਟੁਕੜੇ ਨੂੰ ਤਿਲ-ਤਿਲ ਮਰਨ ਲਈ ਛੱਡ ਦਿੱਤਾ ਸੀ। ਪ੍ਰਿੰਸ ਦੇ ਸਰੀਰ 'ਤੇ ਕੋਈ ਨਵਾਂ ਜ਼ਖਮ ਨਹੀਂ ਸੀ, ਸਗੋਂ ਪੁਰਾਣੇ ਜ਼ਖਮਾਂ ਨੇ ਹੀ ਉਸਦੇ ਸਰੀਰ ਨੂੰ ਢਕ ਲਿਆ ਸੀ। ਪਰਿਵਾਰ ਵਾਲੇ ਜ਼ਖਮਾਂ 'ਤੇ ਦਵਾਈ ਦੀ ਜਗ੍ਹਾ ਕਾਲਾ ਤੇਲ ਪਾ ਦਿੰਦੇ ਸਨ। ਚਾਰ ਸਾਲਾਂ ਤੋਂ ਇੱਕੋ ਜਗ੍ਹਾ ਪਏ ਰਹਿਣ ਕਾਰਨ ਉਸਦੇ ਸਰੀਰ 'ਚ ਕੀੜੇ ਚੱਲ ਰਹੇ ਸਨ ਅਤੇ ਵਾਲਾਂ 'ਚ ਚਿੱਟੀਆਂ ਜੂੰਆਂ ਦਾ ਘਰ ਸੀ। ਉਹ ਨਗਨ ਹਾਲਤ 'ਚ ਪਿਆ ਰਹਿੰਦਾ ਸੀ ਅਤੇ ਸਰੀਰ 'ਤੇ ਸਿਰਫ਼ ਇਕ ਗੰਦੀ ਰਜਾਈ ਹੁੰਦੀ ਸੀ। ਉਸਨੂੰ ਦੇਖ ਕੇ ਇੰਝ ਲੱਗਦਾ ਸੀ ਜਿਵੇਂ ਉਸਦੀ ਮੌਤ ਹੋ ਚੁੱਕੀ ਹੋਵੇ।

ਪ੍ਰਿੰਸ ਨੂੰ ਕੀ ਹੋਇਆ ਸੀ?

ਪ੍ਰਿੰਸ ਚਾਰ ਸਾਲ ਪਹਿਲਾਂ ਬਿਮਾਰ ਹੋਇਆ ਸੀ। ਮਾਪਿਆਂ ਨੇ ਡਾਕਟਰ ਕੋਲ ਲੈ ਜਾਣ ਦੀ ਬਜਾਏ ਅੰਧਵਿਸ਼ਵਾਸ ਨੂੰ ਚੁਣਿਆ। ਮਾਂ ਸ਼ੋਭਾ ਨੇ ਪੁੱਤਰ ਨੂੰ ਇਕ ਕਮਰੇ 'ਚ ਸੁੱਟ ਕੇ ਉਸਦੀ ਦੁਨੀਆ ਉੱਥੇ ਹੀ ਖ਼ਤਮ ਕਰ ਦਿੱਤੀ। ਪਿਤਾ ਸਤੀਸ਼ ਕੁਮਾਰ ਕੱਪੜਾ ਮਾਰਕੀਟ 'ਚ ਕੰਮ ਕਰਦੇ ਹਨ ਅਤੇ ਮਾਂ ਲੋਕਾਂ ਦੇ ਘਰਾਂ 'ਚ ਕੰਮ ਕਰਦੀ ਹੈ। ਘਰ ਵਿਚ ਉਸਦੀ ਛੇ ਸਾਲ ਦੀ ਛੋਟੀ ਭੈਣ ਹੈ, ਜਦਕਿ ਵੱਡੀ ਭੈਣ ਦਾ ਵਿਆਹ ਹੋ ਚੁੱਕਾ ਹੈ। ਪ੍ਰਿੰਸ ਆਵਾਜ਼ ਸੁਣਦਾ ਸੀ, ਪਰ ਕੋਈ ਜਵਾਬ ਦੇਣ ਦੇ ਯੋਗ ਨਹੀਂ ਸੀ। ਸਰੀਰ ਪੂਰੀ ਤਰ੍ਹਾਂ ਆਕੜ ਚੁੱਕਾ ਸੀ। ਇਹ ਵੀ ਸਾਹਮਣੇ ਆਇਆ ਹੈ ਕਿ ਇਕ ਪ੍ਰਾਈਵੇਟ ਨਰਸ ਦੀ ਮਦਦ ਨਾਲ ਪ੍ਰਿੰਸ ਦੇ ਖ਼ੂਨ ਦਾ ਸੈਂਪਲ ਲੈਣ ਦੀ ਕੋਸ਼ਿਸ਼ ਕੀਤੀ ਗਈ ਸੀ, ਪਰ ਉਸਦੇ ਸਰੀਰ 'ਚ ਇੰਨਾ ਵੀ ਖ਼ੂਨ ਨਹੀਂ ਸੀ ਕਿ ਸਰਿੰਜ 'ਚ ਆ ਸਕੇ। ਸ਼ੁੱਕਰਵਾਰ ਨੂੰ ਪ੍ਰਿੰਸ ਨੂੰ ਰੈਸਕਿਊ (ਬਚਾਅ) ਕੀਤਾ ਜਾਣਾ ਸੀ, ਪਰ...

ਕਈ ਵਾਰ ਬਚਾਉਣ ਦੀ ਕੋਸ਼ਿਸ਼ ਕੀਤੀ ਗਈ

ਜਦੋਂ 'ਵੰਦੇ ਮਾਤਰਮ' ਟੀਮ ਨੂੰ ਇਸ ਬਾਰੇ ਪਤਾ ਲੱਗਾ ਤਾਂ ਉਹ 23 ਦਸੰਬਰ ਨੂੰ ਉਸਨੂੰ ਦੇਖਣ ਪਹੁੰਚੀ, ਪਰ ਮਾਂ ਨੇ ਅੰਦਰ ਜਾਣ ਤੋਂ ਰੋਕ ਦਿੱਤਾ। ਕਾਫ਼ੀ ਸਮਝਾਉਣ ਤੋਂ ਬਾਅਦ ਮੋਬਾਈਲ ਬਾਹਰ ਰਖਵਾ ਕੇ ਅੰਦਰ ਜਾਣ ਦਿੱਤਾ ਗਿਆ। ਅੰਦਰ ਜੋ ਮੰਜ਼ਰ ਸੀ, ਉਸਨੇ ਸਭ ਨੂੰ ਹਿਲਾ ਕੇ ਰੱਖ ਦਿੱਤਾ। ਟੀਮ ਨੇ ਉਸਨੂੰ 'ਮਨੁੱਖਤਾ ਦੀ ਸੇਵਾ ਸਭ ਤੋਂ ਵੱਡੀ ਸੁਸਾਇਟੀ' ਦੇ ਹਸਪਤਾਲ (ਲੁਧਿਆਣਾ) 'ਚ ਭਰਤੀ ਕਰਾਉਣ ਦੀ ਕੋਸ਼ਿਸ਼ ਕੀਤੀ, ਪਰ ਮਾਂ ਨੇ ਇਲਾਜ ਤੋਂ ਮਨ੍ਹਾ ਕਰ ਦਿੱਤਾ। ਬਾਅਦ 'ਚ ਉਹ ਮੰਨ ਗਈ ਅਤੇ 24 ਦਸੰਬਰ ਨੂੰ ਦੁਪਹਿਰ ਦੋ ਵਜੇ ਆਉਣ ਲਈ ਕਿਹਾ।

ਜਦੋਂ ਟੀਮ ਐਂਬੂਲੈਂਸ ਲੈ ਕੇ ਪਹੁੰਚੀ ਤਾਂ ਪਰਿਵਾਰ ਵਾਲੇ ਘਰ ਨੂੰ ਤਾਲਾ ਲਗਾ ਕੇ ਚਲੇ ਗਏ ਸਨ। ਸੰਪਰਕ ਕਰਨ 'ਤੇ ਮਾਂ ਨੇ ਕਿਹਾ ਕਿ ਉਸਦਾ ਦਿਲ ਪ੍ਰਿੰਸ ਨੂੰ ਆਪਣੇ ਤੋਂ ਦੂਰ ਭੇਜਣ ਲਈ ਨਹੀਂ ਮੰਨਦਾ। ਟੀਮ ਨੇ ਗੁਆਂਢੀਆਂ ਦੀ ਛੱਤ ਤੋਂ ਪ੍ਰਿੰਸ ਦੀ ਵੀਡੀਓ ਬਣਾਈ ਅਤੇ ਪੁਲਿਸ ਤੇ ਪ੍ਰਸ਼ਾਸਨ ਨੂੰ ਭੇਜੀ। 25 ਦਸੰਬਰ ਨੂੰ ਟੀਮ ਨੇ ਫਿਰ ਕੋਸ਼ਿਸ਼ ਕੀਤੀ, ਪਰ ਸਫਲਤਾ ਨਹੀਂ ਮਿਲੀ।

ਅੱਜ ਜਦੋਂ ਟੀਮ ਪ੍ਰਿੰਸ ਨੂੰ ਬਚਾਉਣ ਪਹੁੰਚੀ ਤਾਂ ਉਹ ਮ੍ਰਿਤਕ ਪਾਇਆ ਗਿਆ। ਪ੍ਰਿੰਸ ਦੀ ਸ਼ੱਕੀ ਹਾਲਤ 'ਚ ਹੋਈ ਮੌਤ 'ਤੇ ਸਵਾਲ ਉੱਠ ਰਹੇ ਹਨ। ਹੁਣ ਉਸਦਾ ਪੋਸਟਮਾਰਟਮ ਕਰਵਾਇਆ ਜਾਵੇਗਾ, ਜਿਸ ਤੋਂ ਬਾਅਦ ਹੀ ਸਾਫ਼ ਹੋਵੇਗਾ ਕਿ ਇਹ ਕਤਲ ਹੈ ਜਾਂ ਕੁਦਰਤੀ ਮੌਤ। ਵੀਰਵਾਰ ਰਾਤ ਕਰੀਬ 11:40 ਵਜੇ ਪੁਲਿਸ ਨੇ ਲਾਸ਼ ਨੂੰ ਮੋਰਚਰੀ ਵਿੱਚ ਰਖਵਾ ਦਿੱਤਾ ਹੈ।