ਵੰਦੇ ਭਾਰਤ ਤੇ ਸ਼ਤਾਬਦੀ 'ਚ ਹੁਣ ਬਾਇਓਡੀਗ੍ਰੇਡੇਬਲ ਥਾਲੀ 'ਚ ਮਿਲੇਗਾ ਖਾਣਾ, ਪਲਾਸਟਿਕ ਪਲੇਟਾਂ 'ਤੇ ਲੱਗੇਗੀ ਰੋਕ

ਡਿਜੀਟਲ ਡੈਸਕ, ਨਵੀਂ ਦਿੱਲੀ : ਭਾਰਤੀ ਰੇਲਵੇ ਇੱਕ ਵੱਡਾ ਬਦਲਾਅ ਕਰਨ ਜਾ ਰਿਹਾ ਹੈ। ਆਈਆਰਸੀਟੀਸੀ (IRCTC) ਨੇ ਵੰਦੇ ਭਾਰਤ, ਬੈਂਗਲੁਰੂ ਰਾਜਧਾਨੀ ਅਤੇ ਸ਼ਤਾਬਦੀ ਰੇਲਗੱਡੀਆਂ ਲਈ ਇੱਕ ਨਵੀਂ ਪਹਿਲ ਸ਼ੁਰੂ ਕੀਤੀ ਹੈ। ਇਨ੍ਹਾਂ ਟ੍ਰੇਨਾਂ ਵਿੱਚ ਹੁਣ ਸਾਫ਼-ਸੁਥਰੀ ਅਤੇ ਵਾਤਾਵਰਣ ਦੇ ਅਨੁਕੂਲ 'ਬਾਇਓਡੀਗ੍ਰੇਡੇਬਲ' (ਆਪਣੇ ਆਪ ਨਸ਼ਟ ਹੋਣ ਵਾਲੀ) ਥਾਲੀ ਦੀ ਵਰਤੋਂ ਕੀਤੀ ਜਾਵੇਗੀ।

ਵੰਦੇ ਭਾਰਤ, ਸ਼ਤਾਬਦੀ ਅਤੇ ਬੈਂਗਲੁਰੂ ਰਾਜਧਾਨੀ ਟ੍ਰੇਨ ਵਿੱਚ ਹੁਣ ਲੋਕ ਪਲਾਸਟਿਕ ਪਲੇਟ ਦੀ ਬਜਾਏ ਬਾਇਓਡੀਗ੍ਰੇਡੇਬਲ ਥਾਲੀ ਵਿੱਚ ਖਾਣਾ ਖਾਣਗੇ। ਇਸ ਨਾਲ ਹਰ ਮਹੀਨੇ 50,000 ਤੋਂ ਵੱਧ ਥਾਲੀਆਂ ਵਿੱਚ 300 ਕਿਲੋਗ੍ਰਾਮ ਤੋਂ ਵੱਧ ਪਲਾਸਟਿਕ ਦੀ ਬਚਤ ਹੋਵੇਗੀ।

ਕਦੋਂ ਤੋਂ ਮਿਲੇਗਾ ਬਾਇਓਡੀਗ੍ਰੇਡੇਬਲ ਥਾਲੀ 'ਚ ਖਾਣਾ?

IRCTC ਲਗਾਤਾਰ ਟ੍ਰੇਨਾਂ 'ਚ ਪਲਾਸਟਿਕ ਮੁਕਤ ਕੰਪਲੈਕਸ ਬਣਾਉਣ 'ਤੇ ਧਿਆਨ ਦੇ ਰਹੀ ਹੈ। ਇਸੇ ਕਦਮ ਨੂੰ ਅੱਗੇ ਵਧਾਉਂਦੇ ਹੋਏ ਹੁਣ ਭਾਰਤੀ ਰੇਲਵੇ ਪਲਾਸਟਿਕ ਪਲੇਟਾਂ ਵਿੱਚ ਖਾਣਾ ਸਰਵ ਕਰਨਾ ਬੰਦ ਕਰਨ ਜਾ ਰਹੀ ਹੈ। ਮਾਰਚ ਤੋਂ ਵੰਦੇ ਭਾਰਤ, ਸ਼ਤਾਬਦੀ ਅਤੇ ਬੈਂਗਲੁਰੂ ਰਾਜਧਾਨੀ ਐਕਸਪ੍ਰੈੱਸ ਵਿੱਚ ਬਾਇਓਡੀਗ੍ਰੇਡੇਬਲ ਥਾਲੀ ਵਿੱਚ ਖਾਣਾ ਪਰੋਸਣਾ ਸ਼ੁਰੂ ਕੀਤਾ ਜਾਵੇਗਾ।

ਭਾਰਤੀ ਰੇਲਵੇ ਦੇ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਪਹਿਲਾਂ ਇਨ੍ਹਾਂ ਤਿੰਨ ਪ੍ਰੀਮੀਅਮ ਟ੍ਰੇਨਾਂ ਵਿੱਚ ਇਹ ਪ੍ਰਕਿਰਿਆ ਸ਼ੁਰੂ ਕੀਤੀ ਜਾਵੇਗੀ। ਇਸ ਤੋਂ ਬਾਅਦ ਬਾਕੀ ਪ੍ਰੀਮੀਅਮ ਅਤੇ ਲੰਬੀ ਦੂਰੀ ਦੀ ਯਾਤਰਾ ਕਰਨ ਵਾਲੀਆਂ ਟ੍ਰੇਨਾਂ ਵਿੱਚੋਂ ਵੀ ਪਲਾਸਟਿਕ ਪਲੇਟਾਂ ਹਟਾ ਕੇ ਬਾਇਓਡੀਗ੍ਰੇਡੇਬਲ ਪਲੇਟਾਂ ਦੀ ਵਰਤੋਂ ਕੀਤੀ ਜਾਵੇਗੀ।

ਛੇ ਮਹੀਨਿਆਂ ਵਿੱਚ ਨਸ਼ਟ ਹੋ ਜਾਂਦੀ ਹੈ ਬਾਇਓਡੀਗ੍ਰੇਡੇਬਲ ਥਾਲੀ

ਬਾਇਓਡੀਗ੍ਰੇਡੇਬਲ ਥਾਲੀ ਸਬਜ਼ੀਆਂ-ਫਲਾਂ ਦੇ ਛਿਲਕਿਆਂ, ਕਾਗਜ਼ ਅਤੇ ਹੋਰ ਕਈ ਕੁਦਰਤੀ ਤੱਤਾਂ ਤੋਂ ਬਣਾਈ ਜਾਂਦੀ ਹੈ। ਇਸ ਦੀ ਵਰਤੋਂ ਕਰਨ ਦਾ ਫਾਇਦਾ ਇਹ ਹੋਵੇਗਾ ਕਿ ਇਹ ਥਾਲੀ ਵਰਤੋਂ ਤੋਂ ਬਾਅਦ ਤਿੰਨ ਤੋਂ ਛੇ ਮਹੀਨਿਆਂ ਦੇ ਅੰਦਰ ਆਪਣੇ ਆਪ ਨਸ਼ਟ ਹੋ ਜਾਵੇਗੀ।

ਬਾਇਓਡੀਗ੍ਰੇਡੇਬਲ ਥਾਲੀ ਨੂੰ ਬਣਾਉਣ ਵਿੱਚ ਵਰਤੇ ਗਏ ਪਦਾਰਥ ਤਿੰਨ ਤੋਂ ਛੇ ਮਹੀਨਿਆਂ ਵਿੱਚ ਗਲ-ਸੜ ਕੇ ਮਿੱਟੀ ਵਿੱਚ ਮਿਲ ਜਾਂਦੇ ਹਨ। ਦੂਜੇ ਪਾਸੇ ਪਲਾਸਟਿਕ ਪਲੇਟ ਨੂੰ ਨਸ਼ਟ ਹੋਣ ਵਿੱਚ 400 ਤੋਂ 500 ਸਾਲ ਲੱਗਦੇ ਹਨ। ਬਾਇਓਡੀਗ੍ਰੇਡੇਬਲ ਥਾਲੀ ਦੀ ਵਰਤੋਂ ਨਾਲ ਵਾਤਾਵਰਣ ਨੂੰ ਸਾਫ਼-ਸੁਥਰਾ ਬਣਾਉਣ ਵਿੱਚ ਵੱਡਾ ਯੋਗਦਾਨ ਪਾਇਆ ਜਾ ਸਕਦਾ ਹੈ।