'ਹੁਣ 10 ਮਿੰਟ ਵਿਚ ਡਿਲੀਵਰੀ ਸੇਵਾ ਬੰਦ', ਕੇਂਦਰ ਸਰਕਾਰ ਨੇ ਬਲਿੰਕਿਟ, ਜ਼ੈਪਟੋ, ਸਵਿਗੀ ਨੂੰ ਦਿੱਤੇ ਨਿਰਦੇਸ਼

ਡਿਜੀਟਲ ਡੈਸਕ, ਨਵੀਂ ਦਿੱਲੀ: ਕੁਇੱਕ ਕਾਮਰਸ ਦੀ ਤੇਜ਼ ਰਫ਼ਤਾਰ ਨੂੰ ਹੁਣ ਬਰੇਕ ਲੱਗ ਗਈ ਹੈ। ਕੇਂਦਰੀ ਕਿਰਤ ਮੰਤਰੀ ਮਨਸੁਖ ਮਾਂਡਵੀਆ ਦੇ ਲਗਾਤਾਰ ਯਤਨਾਂ ਅਤੇ ਕਈ ਦੌਰ ਦੀਆਂ ਮੀਟਿੰਗਾਂ ਤੋਂ ਬਾਅਦ, ਵੱਡੀਆਂ ਡਿਲੀਵਰੀ ਕੰਪਨੀਆਂ ਨੇ ਆਪਣਾ ਮਸ਼ਹੂਰ '10 ਮਿੰਟ ਡਿਲੀਵਰੀ' ਦਾ ਵਾਅਦਾ ਖ਼ਤਮ ਕਰ ਦਿੱਤਾ ਹੈ।

ਬਲਿੰਕਿਟ, ਜੈਪਟੋ, ਜ਼ੋਮੈਟੋ ਅਤੇ ਸਵਿਗੀ ਵਰਗੇ ਪ੍ਰਮੁੱਖ ਪਲੇਟਫਾਰਮ ਹੁਣ ਆਪਣੇ ਗਾਹਕਾਂ ਨਾਲ ਇਹ ਵਾਅਦਾ ਨਹੀਂ ਕਰਨਗੇ ਕਿ ਸਾਮਾਨ ਸਿਰਫ਼ 10 ਮਿੰਟਾਂ ਵਿੱਚ ਪਹੁੰਚ ਜਾਵੇਗਾ। ਇਸ ਫੈਸਲੇ ਦਾ ਮਕਸਦ ਡਿਲੀਵਰੀ ਪਾਰਟਨਰਾਂ ਯਾਨੀ ਗਿਗ ਵਰਕਰਾਂ (Gig Workers) ਦੀ ਸੁਰੱਖਿਆ, ਸਿਹਤ ਅਤੇ ਕੰਮ ਕਰਨ ਦੀਆਂ ਬਿਹਤਰ ਸਥਿਤੀਆਂ ਨੂੰ ਯਕੀਨੀ ਬਣਾਉਣਾ ਹੈ।

ਗਿਗ ਵਰਕਰਾਂ ਦੀ ਸੁਰੱਖਿਆ ਨੂੰ ਮਿਲੀ ਪਹਿਲ

ਸਮਾਚਾਰ ਏਜੰਸੀ ਏ.ਐਨ.ਆਈ. (ANI) ਦੇ ਮੁਤਾਬਕ, ਕਿਰਤ ਮੰਤਰਾਲੇ ਨੇ ਇਹਨਾਂ ਕੰਪਨੀਆਂ ਨਾਲ ਇੱਕ ਅਹਿਮ ਮੀਟਿੰਗ ਕੀਤੀ ਸੀ, ਜਿਸ ਵਿੱਚ ਡਿਲੀਵਰੀ ਦੀ ਸਮਾਂ ਸੀਮਾ ਨਾਲ ਜੁੜੀਆਂ ਸਮੱਸਿਆਵਾਂ 'ਤੇ ਡੂੰਘੀ ਚਰਚਾ ਹੋਈ। ਮੀਟਿੰਗ ਵਿੱਚ ਇਹ ਸਾਫ਼ ਹੋਇਆ ਕਿ 10 ਮਿੰਟ ਦੀ ਸਖ਼ਤ ਸਮਾਂ ਸੀਮਾ ਡਿਲੀਵਰੀ ਵਾਲਿਆਂ 'ਤੇ ਇੰਨਾ ਦਬਾਅ ਪਾਉਂਦੀ ਹੈ ਕਿ ਉਹ ਤੇਜ਼ ਰਫ਼ਤਾਰ ਨਾਲ ਗੱਡੀ ਚਲਾਉਂਦੇ ਹਨ, ਟ੍ਰੈਫਿਕ ਨਿਯਮ ਤੋੜਦੇ ਹਨ ਅਤੇ ਕਈ ਵਾਰ ਆਪਣੀ ਜਾਨ ਜ਼ੋਖਮ ਵਿੱਚ ਪਾ ਦਿੰਦੇ ਹਨ।

ਮੰਤਰੀ ਮਨਸੁਖ ਮਾਂਡਵੀਆ ਨੇ ਕੰਪਨੀਆਂ ਨੂੰ ਸਮਝਾਇਆ ਕਿ ਗਾਹਕਾਂ ਨੂੰ ਤੇਜ਼ ਸੇਵਾ ਪਸੰਦ ਹੈ, ਪਰ ਇਸ ਦੇ ਲਈ ਕਰਮਚਾਰੀਆਂ ਦੀ ਜਾਨ ਅਤੇ ਸਿਹਤ ਨਾਲ ਖਿਲਵਾੜ ਨਹੀਂ ਕੀਤਾ ਜਾ ਸਕਦਾ। ਇਸ ਦਬਾਅ ਕਾਰਨ ਪਿਛਲੇ ਕੁਝ ਹਫ਼ਤਿਆਂ ਵਿੱਚ ਗਿਗ ਵਰਕਰਾਂ ਦੀਆਂ ਮੁਸ਼ਕਲਾਂ 'ਤੇ ਕਾਫ਼ੀ ਬਹਿਸ ਹੋਈ ਹੈ।