ਕਰਨ ਜੌਹਰ ਨੇ Met Gala 'ਚ ਇਸ ਸ਼ਾਹੀ ਲਿਬਾਸ ਨਾਲ ਖਿੱਚਿਆ ਸਭ ਦਾ ਧਿਆਨ, ਰਾਜਾ ਰਵੀ ਵਰਮਾ ਨਾਲ ਹੈ ਖ਼ਾਸ ਕੁਨੈਕਸ਼ਨ

ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ: ਫੈਸ਼ਨ ਦੀ ਦੁਨੀਆ ਦੇ ਸਭ ਤੋਂ ਵੱਡੇ ਮੰਚ 'ਮੇਟ ਗਾਲਾ' ਵਿੱਚ ਬਾਲੀਵੁੱਡ ਦੇ ਮਸ਼ਹੂਰ ਫਿਲਮ ਮੇਕਰ ਕਰਨ ਜੌਹਰ ਨੇ ਪਹਿਲੀ ਵਾਰ ਕਦਮ ਰੱਖਿਆ ਅਤੇ ਆਪਣੇ ਰਾਜਸੀ ਅੰਦਾਜ਼ ਨਾਲ ਸਭ ਦਾ ਧਿਆਨ ਆਪਣੇ ਵੱਲ ਖਿੱਚ ਲਿਆ। ਆਪਣੇ ਇਸ ਡੈਬਿਊ ਲਈ ਕਰਨ ਨੇ ਵੈਸਟਰਨ ਫੈਸ਼ਨ ਦੀ ਬਜਾਏ ਭਾਰਤੀ ਰਜਵਾੜਿਆਂ ਦੀ ਸ਼ਾਨ ਅਤੇ ਅਮੀਰ ਕਲਾ ਨੂੰ ਦੁਨੀਆ ਦੇ ਸਾਹਮਣੇ ਪੇਸ਼ ਕਰਨ ਦਾ ਫੈਸਲਾ ਕੀਤਾ।

ਉਨ੍ਹਾਂ ਦਾ ਇਹ ਲੁੱਕ ਭਾਰਤ ਦੇ ਪ੍ਰਸਿੱਧ ਚਿੱਤਰਕਾਰ ਰਾਜਾ ਰਵੀ ਵਰਮਾ ਦੀਆਂ ਬੇਮਿਸਾਲ ਕਲਾਕ੍ਰਿਤੀਆਂ ਤੋਂ ਪ੍ਰੇਰਿਤ ਸੀ, ਜਿਸ ਨੂੰ ਮਸ਼ਹੂਰ ਫੈਸ਼ਨ ਡਿਜ਼ਾਈਨਰ ਮਨੀਸ਼ ਮਲਹੋਤਰਾ ਨੇ ਆਪਣੇ ਹੁਨਰ ਨਾਲ ਇਕ ਸ਼ਾਨਦਾਰ ਲਿਬਾਸ ਵਿੱਚ ਢਾਲ ਦਿੱਤਾ। ਇਸ ਲੁੱਕ ਨੂੰ ਏਕਾ ਲਖਾਨੀ ਨੇ ਸਟਾਈਲ ਕੀਤਾ ਸੀ, ਜੋ ਖੁਦ ਵੀ ਪਹਿਲੀ ਵਾਰ ਮੇਟ ਗਾਲਾ ਦਾ ਹਿੱਸਾ ਬਣ ਰਹੀ ਸੀ।

ਕਿਹੋ ਜਿਹਾ ਸੀ ਇਹ ਸ਼ਾਹੀ ਲਿਬਾਸ?

ਕਰਨ ਜੌਹਰ ਨੇ ਇਸ ਮੌਕੇ 'ਤੇ ਜੋ ਆਊਟਫਿਟ ਪਹਿਨਿਆ, ਉਹ ਭਾਰਤੀ ਸ਼ਿਲਪਕਾਰੀ ਦਾ ਇਕ ਉੱਤਮ ਨਮੂਨਾ ਸੀ। ਉਨ੍ਹਾਂ ਦੇ ਇਸ ਪਹਿਰਾਵੇ ਵਿੱਚ ਇਕ ਬੰਦਗਲਾ, ਮੈਚਿੰਗ ਟਰਾਊਜ਼ਰ ਅਤੇ ਉਸਦੇ ਉੱਪਰ ਇਕ ਭਾਰੀ ਕਢਾਈ ਵਾਲਾ ਖੂਬਸੂਰਤ ਕੇਪ ਸ਼ਾਮਲ ਸੀ। ਇਸ ਡਰੈੱਸ ਨੂੰ ਵਿਰਾਸਤ ਦਾ ਸੱਚਾ ਰੂਪ ਦੇਣ ਲਈ ਇਸ ਵਿੱਚ ਕਈ ਤਰ੍ਹਾਂ ਦੀਆਂ ਕਲਾਵਾਂ ਦਾ ਬਿਹਤਰੀਨ ਮਿਸ਼ਰਣ ਕੀਤਾ ਗਿਆ ਸੀ:

ਹੱਥਾਂ ਨਾਲ ਕੀਤੀ ਗਈ ਚਿੱਤਰਕਾਰੀ

ਥ੍ਰੀ-ਡੀ ਸਕਲਪਟਿੰਗ

ਕਵਿਲਟਿੰਗ ਤਕਨੀਕ

ਬਾਰੀਕ ਅਤੇ ਰਵਾਇਤੀ ਜ਼ਰਦੋਜ਼ੀ ਦੀ ਕਢਾਈ

ਰਾਜਾ ਰਵੀ ਵਰਮਾ ਨੂੰ ਚੁਣਨ ਦੀ ਕੀ ਰਹੀ ਵਜ੍ਹਾ?

ਕਰਨ ਜੌਹਰ ਨੇ ਇੰਸਟਾਗ੍ਰਾਮ 'ਤੇ ਆਪਣੇ ਇਸ ਖ਼ਾਸ ਲੁੱਕ ਦੇ ਪਿੱਛੇ ਦੀ ਵਜ੍ਹਾ ਵੀ ਸਾਂਝੀ ਕੀਤੀ। ਉਨ੍ਹਾਂ ਨੇ ਦੱਸਿਆ ਕਿ ਰਾਜਾ ਰਵੀ ਵਰਮਾ ਦੀ ਕਲਾ ਉਨ੍ਹਾਂ ਨੂੰ ਹਮੇਸ਼ਾ ਪ੍ਰੇਰਿਤ ਕਰਦੀ ਰਹੀ ਹੈ ਕਿਉਂਕਿ ਉਨ੍ਹਾਂ ਦੀਆਂ ਪੇਂਟਿੰਗਜ਼ ਸਿੱਧੇ ਤੌਰ 'ਤੇ ਭਾਵਨਾਵਾਂ ਨੂੰ ਦਰਸਾਉਂਦੀਆਂ ਹਨ, ਅਤੇ ਬਤੌਰ ਫਿਲਮ ਮੇਕਰ ਕਰਨ ਵੀ ਸਿਨੇਮਾ ਵਿੱਚ ਇਹੀ ਕਰਨ ਦੀ ਕੋਸ਼ਿਸ਼ ਕਰਦੇ ਹਨ।

ਕਰਨ ਨੇ ਇਸ ਵਿਜ਼ਨ ਨੂੰ ਹਕੀਕਤ ਵਿੱਚ ਬਦਲਣ ਲਈ ਆਪਣੇ ਪੁਰਾਣੇ ਦੋਸਤ ਮਨੀਸ਼ ਮਲਹੋਤਰਾ ਦਾ ਸ਼ੁਕਰੀਆ ਅਦਾ ਕੀਤਾ। ਉਨ੍ਹਾਂ ਨੇ ਮਨੀਸ਼ ਦੀ ਤਾਰੀਫ਼ ਕਰਦੇ ਹੋਏ ਕਿਹਾ ਕਿ ਭਾਰਤੀ ਸੱਭਿਆਚਾਰ ਨੂੰ ਗਲੋਬਲ ਪੱਧਰ 'ਤੇ ਪੇਸ਼ ਕਰਨ ਦੀ ਜੋ ਕਲਾ ਮਨੀਸ਼ ਦੇ ਕੋਲ ਹੈ, ਉਹ ਬੇਮਿਸਾਲ ਹੈ। ਕਰਨ ਨੇ ਲਿਖਿਆ ਕਿ ਮਨੀਸ਼ ਨੇ ਉਨ੍ਹਾਂ ਨੂੰ ਆਪਣੀ ਕਲਾ ਨੂੰ ਉਕੇਰਨ ਲਈ ਇਕ 'ਕੈਨਵਸ' ਬਣਾ ਦਿੱਤਾ।

ਇਤਿਹਾਸਕ ਪੇਂਟਿੰਗਜ਼ ਦੀ ਦਿਖੀ ਝਲਕ

ਸਟਾਈਲਿਸਟ ਏਕਾ ਲਖਾਨੀ ਦੇ ਮੁਤਾਬਕ, ਰਾਜਾ ਰਵੀ ਵਰਮਾ ਦੀ ਕਲਾ ਨੂੰ ਥੀਮ ਬਣਾਉਣ ਦਾ ਆਈਡੀਆ ਖੁਦ ਕਰਣ ਜੌਹਰ ਦਾ ਸੀ। ਹਾਲਾਂਕਿ, ਏਕਾ ਲਈ ਵੀ ਇਹ ਬਹੁਤ ਖ਼ਾਸ ਸੀ ਕਿਉਂਕਿ ਕਾਸਟਿਊਮ ਡਿਜ਼ਾਈਨਿੰਗ ਦੀ ਪੜ੍ਹਾਈ ਦੌਰਾਨ ਰਾਜਾ ਰਵੀ ਵਰਮਾ ਉਹ ਪਹਿਲੇ ਕਲਾਕਾਰ ਸਨ ਜਿਨ੍ਹਾਂ ਦੇ ਕੰਮ ਦਾ ਉਨ੍ਹਾਂ ਨੇ ਅਧਿਐਨ ਕੀਤਾ ਸੀ।

ਮਨੀਸ਼ ਮਲਹੋਤਰਾ ਦੀ ਅਦਭੁਤ ਕਾਰੀਗਰੀ ਰਾਹੀਂ ਇਸ ਪੋਸ਼ਾਕ ਵਿੱਚ ਰਾਜਾ ਰਵੀ ਵਰਮਾ ਦੀਆਂ ਕੁਝ ਸਭ ਤੋਂ ਮਸ਼ਹੂਰ ਪੇਂਟਿੰਗਜ਼ ਨੂੰ ਪਰੋਇਆ ਗਿਆ ਸੀ, ਜਿਨ੍ਹਾਂ ਵਿੱਚ ਸ਼ਾਮਲ ਹਨ:

ਹੰਸ ਦਮਯੰਤੀ

ਕਾਦੰਬਰੀ

ਅਰਜੁਨ ਅਤੇ ਸੁਭਦਰਾ

ਐਕਸੈਸਰੀਜ਼ ਨਾਲ ਪੂਰਾ ਹੋਇਆ ਲੁੱਕ

ਆਪਣੇ ਇਸ ਰਾਜਸੀ ਮੇਟ ਗਾਲਾ ਲੁੱਕ ਨੂੰ ਫਾਈਨਲ ਟੱਚ ਦੇਣ ਲਈ ਕਰਣ ਜੌਹਰ ਨੇ ਐਕਸੈਸਰੀਜ਼ ਦੀ ਵੀ ਬਹੁਤ ਸਾਵਧਾਨੀ ਨਾਲ ਚੋਣ ਕੀਤੀ। ਉਨ੍ਹਾਂ ਨੇ ਤਿਆਨੀ ਜਵੈਲਰੀ ਦੇ ਸਟੇਟਮੈਂਟ ਗਹਿਣੇ ਪਹਿਨੇ ਅਤੇ ਨਾਲ ਹੀ ਆਰ. ਕੁਮਾਰ ਆਪਟੀਸ਼ੀਅਨਜ਼ ਦਾ ਟਿੰਟਡ ਚਸ਼ਮਾ ਲਗਾ ਕੇ ਆਪਣੇ ਇਸ ਸ਼ਾਨਦਾਰ ਡੈਬਿਊ ਨੂੰ ਹਮੇਸ਼ਾ ਲਈ ਯਾਦਗਾਰ ਬਣਾ ਦਿੱਤਾ।