'ਹਾਂ, ਮੈਂ ਸਾਈਕੋ ਹਾਂ!' ਆਖਰ ਕਿਉਂ ਹਰ ਤੀਜਾ ਨੌਜਵਾਨ ਖੁਦ ਨੂੰ ਮੰਨ ਰਿਹਾ ਹੈ ਮਨੋਰੋਗੀ? ਸੋਚਣ 'ਤੇ ਮਜਬੂਰ ਕਰ ਦੇਵੇਗੀ ਇਹ ਰਿਪੋਰਟ

ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ: ਅੱਜ ਦੇ ਦੌਰ ਵਿੱਚ ਰਿਸ਼ਤੇ ਨਿਭਾਉਣਾ ਕਿੰਨਾ ਮੁਸ਼ਕਲ ਹੋ ਗਿਆ ਹੈ, ਇਸ ਦਾ ਅੰਦਾਜ਼ਾ ਅਮਰੀਕਾ ਵਿੱਚ ਹੋਏ ਇੱਕ ਨਵੇਂ ਸਰਵੇ ਤੋਂ ਲਗਾਇਆ ਜਾ ਸਕਦਾ ਹੈ।

ਟਾਕਰ ਰਿਸਰਚ ਦੇ ਇਸ ਅਧਿਐਨ ਨੇ ਕੁਝ ਅਜਿਹੀਆਂ ਗੱਲਾਂ ਉਜਾਗਰ ਕੀਤੀਆਂ ਹਨ, ਜੋ ਸੋਚਣ 'ਤੇ ਮਜਬੂਰ ਕਰ ਦਿੰਦੀਆਂ ਹਨ। ਸਭ ਤੋਂ ਹੈਰਾਨ ਕਰਨ ਵਾਲੀ ਗੱਲ ਇਹ ਹੈ ਕਿ ਨੌਜਵਾਨ ਨਾ ਸਿਰਫ਼ ਆਪਣਿਆਂ ਤੋਂ ਕੱਟ ਰਹੇ ਹਨ, ਸਗੋਂ ਆਪਣੀ ਮਾਨਸਿਕ ਸਿਹਤ (Mental Health) ਨੂੰ ਲੈ ਕੇ ਵੀ ਉਨ੍ਹਾਂ ਦੇ ਅਜੀਬੋ-ਗਰੀਬ ਦਾਅਵੇ ਹਨ। ਆਓ ਇਸ ਸਰਵੇ ਦੇ ਨਤੀਜਿਆਂ ਨੂੰ ਵਿਸਥਾਰ ਵਿੱਚ ਸਮਝੀਏ।

ਨੌਜਵਾਨਾਂ ਦੀ ਨਜ਼ਰ 'ਚ ਖੁਦ ਦੀ ਤਸਵੀਰ

ਇਸ ਖੋਜ ਦੀ ਸਭ ਤੋਂ ਹੈਰਾਨੀਜਨਕ ਗੱਲ ਇਹ ਰਹੀ ਕਿ ਅਮਰੀਕਾ ਦੇ 19 ਫੀਸਦੀ ਬਾਲਗਾਂ ਨੇ ਮੰਨਿਆ ਕਿ ਉਹ 'ਮਨੋਰੋਗੀ' (Psychopath) ਹਨ। ਜੇਕਰ ਗੱਲ ਸਿਰਫ਼ ਅੱਜ ਦੀ ਪੀੜ੍ਹੀ ਯਾਨੀ Gen-Z ਦੀ ਕਰੀਏ, ਤਾਂ ਹਰ ਤੀਜਾ ਨੌਜਵਾਨ (30%) ਖੁਦ ਨੂੰ ਅਜਿਹਾ ਹੀ ਮੰਨਦਾ ਹੈ। ਇਨ੍ਹਾਂ ਨੌਜਵਾਨਾਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੂੰ ਮਹੀਨੇ ਵਿੱਚ ਔਸਤਨ ਦੋ ਵਾਰ 'ਮਨੋਰੋਗ ਦੇ ਦੌਰੇ' ਪੈਂਦੇ ਹਨ। ਇਹ ਅੰਕੜਾ ਪੁਰਾਣੀ ਪੀੜ੍ਹੀ ਯਾਨੀ ਬੂਮਰਸ ਦੇ ਮੁਕਾਬਲੇ ਸਿੱਧਾ ਦੁੱਗਣਾ ਹੈ। ਦਿਲਚਸਪ ਗੱਲ ਇਹ ਹੈ ਕਿ ਕਈ ਨੌਜਵਾਨਾਂ ਨੇ ਇਹ ਵੀ ਦਾਅਵਾ ਕੀਤਾ ਕਿ ਉਹ ਇਨ੍ਹਾਂ ਦੌਰਿਆਂ ਦੇ ਆਉਣ ਦਾ ਪਹਿਲਾਂ ਹੀ ਸਹੀ ਅੰਦਾਜ਼ਾ ਲਗਾ ਲੈਂਦੇ ਹਨ।

ਹੁਣ ਰਿਸ਼ਤੇ ਸੁਧਾਰੇ ਨਹੀਂ, ਸਿੱਧੇ 'ਡਿਲੀਟ' ਕੀਤੇ ਜਾ ਰਹੇ

ਜਦੋਂ ਰਿਸ਼ਤਿਆਂ 'ਚ ਕੁੜੱਤਣ ਆਉਂਦੀ ਹੈ ਤਾਂ ਲੋਕ ਉਸ ਨੂੰ ਸੁਲਝਾਉਣ ਦੀ ਬਜਾਏ ਦੂਰੀ ਬਣਾਉਣਾ ਜ਼ਿਆਦਾ ਪਸੰਦ ਕਰਨ ਲੱਗੇ ਹਨ। ਸਰਵੇ ਦੱਸਦਾ ਹੈ ਕਿ ਕਰੀਬ 73% ਲੋਕ ਸਮੱਸਿਆਵਾਂ 'ਤੇ ਖੁੱਲ੍ਹ ਕੇ ਗੱਲ ਕਰਨ ਤੋਂ ਬਚਦੇ ਹਨ। ਪਿਛਲੇ ਇਕ ਸਾਲ ਦੇ ਅੰਕੜੇ ਦੇਖੀਏ ਤਾਂ 60% ਜੈਨ-ਜ਼ੀ ਤੇ 50% ਮਿਲੇਨੀਅਲਸ ਨੇ ਆਪਣੇ ਕਿਸੇ ਕਰੀਬੀ ਨਾਲ ਪੂਰੀ ਤਰ੍ਹਾਂ ਸੰਪਰਕ ਤੋੜ ਲਿਆ। ਇਸ ਦੇ ਉਲਟ, ਪੁਰਾਣੀ ਪੀੜ੍ਹੀ 'ਚ ਇਹ ਅੰਕੜਾ ਸਿਰਫ਼ 20% ਸੀ।

ਆਖਰ ਅਜਿਹਾ ਕਿਉਂ ਹੋ ਰਿਹਾ ਹੈ?

ਜਦੋਂ ਲੋਕਾਂ ਤੋਂ ਰਿਸ਼ਤੇ ਤੋੜਨ ਦੀ ਵਜ੍ਹਾ ਪੁੱਛੀ ਗਈ ਤਾਂ ਜ਼ਿਆਦਾਤਰ (36%) ਦਾ ਕਹਿਣਾ ਸੀ ਕਿ ਸਾਹਮਣੇ ਵਾਲਾ ਉਨ੍ਹਾਂ ਦਾ ਸਨਮਾਨ ਨਹੀਂ ਕਰਦਾ ਸੀ। ਇਸ ਤੋਂ ਇਲਾਵਾ, ਰਿਸ਼ਤੇ ਕਾਰਨ ਮਾਨਸਿਕ ਸ਼ਾਂਤੀ ਖੋਹੇ ਜਾਣਾ (29%), ਸਾਹਮਣੇ ਵਾਲੇ ਦਾ ਬਹੁਤ ਜ਼ਿਆਦਾ ਨਕਾਰਾਤਮਕ ਹੋਣਾ (27%) ਤੇ ਵਿਚਾਰਾਂ ਦਾ ਨਾ ਮਿਲਣਾ (24%) ਵੀ ਰਿਸ਼ਤੇ ਟੁੱਟਣ ਦੇ ਵੱਡੇ ਕਾਰਨ ਰਹੇ।

ਜਾਣ-ਪਛਾਣ ਵਾਲਿਆਂ ਨੂੰ ਦੇਖ ਕੇ ਰਸਤਾ ਬਦਲ ਲੈਂਦੇ ਹਨ 40% ਲੋਕ

ਇਹ ਦੂਰੀ ਸਿਰਫ਼ ਗੱਲਬਾਤ ਬੰਦ ਕਰਨ ਤਕ ਸੀਮਤ ਨਹੀਂ ਹੈ। ਪਿਛਲੇ ਇਕ ਸਾਲ ਵਿਚ 36% ਲੋਕਾਂ ਨੇ ਆਪਣੇ ਰਿਸ਼ਤੇਦਾਰਾਂ ਜਾਂ ਦੋਸਤਾਂ ਨੂੰ ਸੋਸ਼ਲ ਮੀਡੀਆ 'ਤੇ ਬਲਾਕ ਕੀਤਾ ਹੈ, ਜਦੋਂ ਕਿ 30% ਨੇ ਉਨ੍ਹਾਂ ਨੂੰ ਕਿਸੇ ਪੁਰਾਣੀ ਗੱਲ 'ਤੇ ਗਰੁੱਪ ਚੈਟ ਤੋਂ ਬਾਹਰ ਕੱਢ ਦਿੱਤਾ ਹੈ।

ਲੋਕ ਹੁਣ ਤਕਨੀਕ ਦੀ ਵਰਤੋਂ ਦੂਜਿਆਂ ਤੋਂ ਬਚਣ ਲਈ ਕਰ ਰਹੇ ਹਨ। 68% ਲੋਕ ਆਨਲਾਈਨ ਸ਼ਾਪਿੰਗ ਕਰਨਾ ਪਸੰਦ ਕਰਦੇ ਹਨ ਤੇ 64% ਲੋਕ ਸਟੋਰ 'ਚ ਮੁਲਾਜ਼ਮਾਂ ਤੋਂ ਬਚਣ ਲਈ 'ਸੈਲਫ-ਚੈੱਕਆਊਟ' ਮਸ਼ੀਨਾਂ ਦੀ ਵਰਤੋਂ ਕਰਦੇ ਹਨ। ਇੱਥੋਂ ਤਕ ਕਿ 37% ਲੋਕ ਕਿਸੇ ਅਜਨਬੀ ਨਾਲ ਛੋਟੀ ਜਿਹੀ ਗੱਲਬਾਤ ਤੋਂ ਬਚਣ ਲਈ ਫ਼ੋਨ 'ਤੇ ਗੱਲ ਕਰਨ ਦਾ ਦਿਖਾਵਾ ਕਰਦੇ ਹਨ। ਉੱਥੇ ਹੀ, 40% ਲੋਕ ਕਿਸੇ ਜਾਣੂ ਨੂੰ ਦੇਖ ਕੇ ਰਸਤਾ ਹੀ ਬਦਲ ਲੈਂਦੇ ਹਨ ਤਾਂ ਜੋ ਉਨ੍ਹਾਂ ਨੂੰ ਰੁਕ ਕੇ ਗੱਲ ਨਾ ਕਰਨੀ ਪਵੇ।

ਇਕੱਲੇਪਣ ਦਾ ਵਧਦਾ ਪਰਛਾਵਾਂ

ਲੋਕਾਂ ਤੋਂ ਬਚਣ ਦੀ ਇਸ ਆਦਤ ਦਾ ਸਿੱਧਾ ਅਸਰ ਉਨ੍ਹਾਂ ਦੀ ਮਾਨਸਿਕ ਸਿਹਤ 'ਤੇ ਪੈ ਰਿਹਾ ਹੈ। ਅੱਜ 47% ਲੋਕ ਆਪਣੇ ਰੋਜ਼ਾਨਾ ਦੇ ਜੀਵਨ ਵਿੱਚ ਇਕੱਲਾਪਣ ਮਹਿਸੂਸ ਕਰਦੇ ਹਨ। 34% ਲੋਕਾਂ ਦਾ ਮੰਨਣਾ ਹੈ ਕਿ ਪੰਜ ਸਾਲ ਪਹਿਲਾਂ ਦੀ ਤੁਲਨਾ ਵਿੱਚ ਅੱਜ ਉਹ ਸਮਾਜ ਨਾਲ ਬਹੁਤ ਘੱਟ ਜੁੜੇ ਹੋਏ ਹਨ।

ਕਿਵੇਂ ਹੋਣਾ ਚਾਹੀਦਾ ਹੈ ਇਕ ਮਜ਼ਬੂਤ ਰਿਸ਼ਤਾ?

ਸਰਵੇ 'ਚ ਇਹ ਵੀ ਸਾਹਮਣੇ ਆਇਆ ਕਿ ਲੋਕ ਇੱਕ ਚੰਗੇ ਰਿਸ਼ਤੇ ਤੋਂ ਕੀ ਉਮੀਦ ਕਰਦੇ ਹਨ। 47% ਲੋਕਾਂ ਦਾ ਮੰਨਣਾ ਹੈ ਕਿ ਇੱਕ ਸਿਹਤਮੰਦ ਰਿਸ਼ਤਾ ਉਹ ਹੈ ਜਿੱਥੇ ਉਹ ਸੁਰੱਖਿਅਤ ਮਹਿਸੂਸ ਕਰਨ ਅਤੇ ਬਿਨਾਂ ਡਰੇ ਆਪਣੀ ਗੱਲ ਰੱਖ ਸਕਣ। 41% ਲੋਕਾਂ ਲਈ ਇੱਕ-ਦੂਜੇ ਦੀ ਸਫਲਤਾ 'ਤੇ ਖੁਸ਼ ਹੋਣਾ, ਭਾਵਨਾਵਾਂ ਨੂੰ ਸਮਝਣਾ, ਰਿਸ਼ਤੇ ਵਿੱਚ ਭਰੋਸਾ ਹੋਣਾ ਅਤੇ ਇੱਕ-ਦੂਜੇ ਦੀਆਂ ਸੀਮਾਵਾਂ ਦਾ ਸਨਮਾਨ ਕਰਨਾ ਸਭ ਤੋਂ ਅਹਿਮ ਹੈ।

Source: Talker Research