ਕੰਟੈਕਟ ਲੈਨਜ਼ ਪਹਿਨਦੇ ਹੀ ਅੱਖਾਂ 'ਚ ਕਿਉਂ ਹੋਣ ਲੱਗ ਜਾਂਦੈ ਦਰਦ? ਡਾਕਟਰ ਨੇ ਦੱਸਿਆ ਇਸਤੇਮਾਲ ਦਾ ਸਹੀ ਤਰੀਕਾ

ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ : ਅੱਜਕੱਲ੍ਹ ਚਸ਼ਮੇ ਦੀ ਜਗ੍ਹਾ ਕੰਟੈਕਟ ਲੈਨਜ਼ ਦੀ ਵਰਤੋਂ ਕਾਫ਼ੀ ਤੇਜ਼ੀ ਨਾਲ ਵੱਧ ਰਹੀ ਹੈ, ਪਰ ਕੀ ਤੁਸੀਂ ਕਦੇ ਮਹਿਸੂਸ ਕੀਤਾ ਹੈ ਕਿ ਲੈਨਜ਼ ਪਹਿਨਦੇ ਹੀ ਤੁਹਾਡੀਆਂ ਅੱਖਾਂ 'ਚ ਦਰਦ, ਜਲਣ ਜਾਂ ਬੇਚੈਨੀ ਹੋਣ ਲੱਗਦੀ ਹੈ? ਦਰਅਸਲ, ਇਹ ਪਰੇਸ਼ਾਨੀ ਅਕਸਰ ਲੈਨਜ਼ ਨੂੰ ਗਲਤ ਤਰੀਕੇ ਨਾਲ ਪਹਿਨਣ ਜਾਂ ਉਨ੍ਹਾਂ ਦੀ ਠੀਕ ਤਰ੍ਹਾਂ ਦੇਖਭਾਲ ਨਾ ਕਰਨ ਕਰਕੇ ਹੁੰਦੀ ਹੈ। ਜੇਕਰ ਇਸ ਨੂੰ ਅਣਗੌਲਿਆ ਤਾਂ ਇਹ ਤੁਹਾਡੀਆਂ ਅੱਖਾਂ ਲਈ ਗੰਭੀਰ ਸਮੱਸਿਆ ਬਣ ਸਕਦੀ ਹੈ। ਆਓ, ਇਸ ਆਰਟੀਕਲ 'ਚ ਗਵਾਲੀਅਰ ਦੇ ਰਤਨ ਜਯੋਤੀ ਨੇਤਰਾਲਯ ਦੇ ਸੰਸਥਾਪਕ, ਨਿਰਦੇਸ਼ਕ ਤੇ ਸਰਜਨ, ਡਾ. ਪੁਰੇਂਦਰ ਭਸੀਨ ਤੋਂ ਇਸ ਸਮੱਸਿਆ ਦੇ ਮੁੱਖ ਕਾਰਨ ਤੇ ਲੈਨਜ਼ ਦੀ ਵਰਤੋਂ ਦਾ ਸਹੀ ਤਰੀਕਾ ਜਾਣਦੇ ਹਾਂ।

ਅੱਖਾਂ ਵਿਚ ਦਰਦ ਤੇ ਜਲਣ ਦੇ ਮੁੱਖ ਕਾਰਨ

ਡਾਕਟਰ ਅਨੁਸਾਰ, ਲੈਂਸ ਲਗਾਉਣ 'ਤੇ ਅੱਖਾਂ ਵਿੱਚ ਦਰਦ ਹੋਣ ਦੇ ਪਿੱਛੇ ਇਹ ਪ੍ਰਮੁੱਖ ਵਜ੍ਹਾ ਹੋ ਸਕਦੀਆਂ ਹਨ:

ਅੱਖਾਂ ਦਾ ਸੁੱਕਾਪਨ: ਜਦੋਂ ਤੁਸੀਂ ਬਹੁਤ ਲੰਬੇ ਸਮੇਂ ਤਕ ਲੈਨਜ਼ ਪਹਿਨੀ ਰੱਖਦੇ ਹੋ ਤਾਂ ਅੱਖਾਂ ਦੀ ਨਮੀ ਘੱਟ ਹੋਣ ਲੱਗਦੀ ਹੈ। ਇਸੇ ਸੁੱਕੇਪਣ ਕਾਰਨ ਅੱਖਾਂ 'ਚ ਜਲਣ ਤੇ ਰੜਕ ਮਹਿਸੂਸ ਹੁੰਦੀ ਹੈ।

ਗੰਦਗੀ ਅਤੇ ਬੈਕਟੀਰੀਆ: ਲੈਨਜ਼ ਨੂੰ ਠੀਕ ਤਰ੍ਹਾਂ ਸਾਫ਼ ਨਾ ਕਰਨ ਜਾਂ ਸਮੇਂ ਸਿਰ ਨਾ ਬਦਲਣ ਨਾਲ ਉਨ੍ਹਾਂ ਵਿੱਚ ਬੈਕਟੀਰੀਆ ਜਮ੍ਹਾਂ ਹੋ ਸਕਦੇ ਹਨ। ਇਸ ਨਾਲ ਅੱਖਾਂ 'ਚ ਖ਼ਤਰਨਾਕ ਇਨਫੈਕਸ਼ਨ ਦਾ ਖ਼ਤਰਾ ਕਾਫ਼ੀ ਵੱਧ ਜਾਂਦਾ ਹੈ।

ਗਲਤ ਸਾਈਜ਼ ਤੇ ਖ਼ਰਾਬ ਕੁਆਲਿਟੀ: ਜੇਕਰ ਤੁਹਾਡਾ ਲੈਨਜ਼ ਚੰਗੀ ਕੁਆਲਿਟੀ ਦਾ ਨਹੀਂ ਹੈ ਜਾਂ ਤੁਹਾਡੀਆਂ ਅੱਖਾਂ 'ਚ ਠੀਕ ਤਰ੍ਹਾਂ ਫਿੱਟ ਨਹੀਂ ਬੈਠ ਰਿਹਾ ਤਾਂ ਉਹ ਕੋਰਨੀਆ 'ਤੇ ਦਬਾਅ ਪਾਉਂਦਾ ਹੈ। ਇਸ ਕਾਰਨ ਅੱਖਾਂ ਦਾ ਲਾਲ ਹੋਣਾ, ਪਾਣੀ ਆਉਣਾ ਅਤੇ ਦਰਦ ਵਰਗੀਆਂ ਸਮੱਸਿਆਵਾਂ ਹੁੰਦੀਆਂ ਹਨ।

ਲੈਨਜ਼ ਪਹਿਨ ਕੇ ਸੌਂ ਜਾਣਾ: ਕਈ ਵਾਰ ਲੋਕ ਸੌਂਦੇ ਸਮੇਂ ਵੀ ਲੈਂਸ ਲਗਾ ਕੇ ਰੱਖਦੇ ਹਨ। ਅਜਿਹਾ ਕਰਨ ਨਾਲ ਅੱਖਾਂ ਨੂੰ ਲੋੜੀਂਦੀ ਆਕਸੀਜਨ ਨਹੀਂ ਮਿਲ ਪਾਉਂਦੀ ਅਤੇ ਜਲਣ ਕਾਫ਼ੀ ਵੱਧ ਜਾਂਦੀ ਹੈ।

ਕੰਟੈਕਟ ਲੈਂਸ ਦੀ ਵਰਤੋਂ ਦਾ ਸਹੀ ਤਰੀਕਾ

ਇਸ ਪਰੇਸ਼ਾਨੀ ਤੋਂ ਬਚਣ ਲਈ ਕੁਝ ਬਹੁਤ ਹੀ ਆਸਾਨ ਪਰ ਜ਼ਰੂਰੀ ਗੱਲਾਂ ਦਾ ਧਿਆਨ ਰੱਖਣਾ ਚਾਹੀਦਾ ਹੈ:

ਹੱਥਾਂ ਦੀ ਸਫਾਈ: ਕੰਟੈਕਟ ਲੈਨਜ਼ ਪਾਉਣ ਤੋਂ ਪਹਿਲਾਂ ਤੇ ਉਤਾਰਨ ਤੋਂ ਬਾਅਦ ਆਪਣੇ ਹੱਥਾਂ ਨੂੰ ਹਮੇਸ਼ਾ ਚੰਗੀ ਤਰ੍ਹਾਂ ਸਾਫ਼ ਕਰੋ।

ਸਹੀ ਸਲਿਊਸ਼ਨ ਦੀ ਵਰਤੋਂ: ਲੈਨਜ਼ ਨੂੰ ਧੋਣ ਲਈ ਸਿਰਫ਼ ਉਸੇ ਸਲਿਊਸ਼ਨ ਦੀ ਵਰਤੋਂ ਕਰੋ ਜੋ ਤੁਹਾਡੇ ਡਾਕਟਰ ਨੇ ਤੁਹਾਨੂੰ ਦੱਸਿਆ ਹੈ।

ਨਿਯਮਤ ਬਦਲਾਅ: ਲੈਨਜ਼ ਨੂੰ ਸਮੇਂ-ਸਮੇਂ 'ਤੇ ਬਦਲਦੇ ਰਹੋ। ਕੋਸ਼ਿਸ਼ ਕਰੋ ਕਿ ਇਨ੍ਹਾਂ ਨੂੰ ਲਗਾਤਾਰ ਬਹੁਤ ਲੰਬੇ ਸਮੇਂ ਤੱਕ ਨਾ ਪਹਿਨੋ।

ਸੌਂਦੇ ਸਮੇਂ ਕੱਢ ਦਿਓ: ਰਾਤ ਨੂੰ ਸੌਣ ਤੋਂ ਪਹਿਲਾਂ ਆਪਣੇ ਕੰਟੈਕਟ ਲੈਂਸ ਹਮੇਸ਼ਾ ਕੱਢ ਲਓ ਤਾਂ ਜੋ ਅੱਖਾਂ ਨੂੰ ਆਰਾਮ ਅਤੇ ਆਕਸੀਜਨ ਮਿਲ ਸਕੇ।

ਜੇਕਰ ਇਨ੍ਹਾਂ ਸਾਵਧਾਨੀਆਂ ਦੇ ਬਾਵਜੂਦ ਤੁਹਾਡੀਆਂ ਅੱਖਾਂ ਵਿੱਚ ਵਾਰ-ਵਾਰ ਦਰਦ, ਲਾਲੀ ਜਾਂ ਧੁੰਦਲਾ ਦਿਖਣ ਵਰਗੀ ਸਮੱਸਿਆ ਹੋ ਰਹੀ ਹੈ ਤਾਂ ਇਸ ਨੂੰ ਬਿਲਕੁਲ ਨਜ਼ਰਅੰਦਾਜ਼ ਨਾ ਕਰੋ ਅਤੇ ਤੁਰੰਤ ਕਿਸੇ ਅੱਖਾਂ ਦੇ ਮਾਹਿਰ (Eye Specialist) ਤੋਂ ਸਲਾਹ ਲਓ।