ਹੀਟਵੇਵ 'ਚ ਵਰਕਆਊਟ ਕਰਦੇ ਸਮੇਂ ਰਹੋ ਸਾਵਧਾਨ: ਤੇਜ਼ ਗਰਮੀ 'ਚ ਕਸਰਤ ਕਰਨ ਦਾ ਸਹੀ ਸਮਾਂ ਅਤੇ ਤਰੀਕਾ

ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ: ਉੱਤਰੀ ਭਾਰਤ ਵਿੱਚ ਪਾਰਾ 42 ਡਿਗਰੀ ਨੂੰ ਪਾਰ ਕਰ ਚੁੱਕਾ ਹੈ। ਅਜਿਹੀ ਤਪਦੀ ਗਰਮੀ ਅਤੇ ਲੂ ਦੇ ਵਿਚਕਾਰ ਖੁਦ ਨੂੰ ਫਿੱਟ ਰੱਖਣਾ ਇੱਕ ਵੱਡੀ ਚੁਣੌਤੀ ਹੈ। ਜੇਕਰ ਸਾਵਧਾਨੀ ਨਾ ਵਰਤੀ ਜਾਵੇ, ਤਾਂ ਗਰਮੀ ਵਿੱਚ ਕਸਰਤ ਫਾਇਦੇ ਦੀ ਬਜਾਏ ਨੁਕਸਾਨਦੇਹ ਹੋ ਸਕਦੀ ਹੈ। ਗਰਮੀ ਵਿੱਚ ਡੀਹਾਈਡ੍ਰੇਸ਼ਨ (ਪਾਣੀ ਦੀ ਕਮੀ) ਅਤੇ ਹੀਟ ਸਟ੍ਰੋਕ ਦਾ ਖਤਰਾ ਵਧ ਜਾਂਦਾ ਹੈ। ਸੁਰੱਖਿਅਤ ਵਰਕਆਊਟ ਲਈ ਇਨ੍ਹਾਂ ਗੱਲਾਂ ਦਾ ਧਿਆਨ ਰੱਖੋ:

1. ਸਹੀ ਸਮੇਂ ਦੀ ਚੋਣ ਕਰੋ

ਧੁੱਪ ਵਿੱਚ ਕਸਰਤ ਕਰਨਾ ਸਿਹਤ ਵਿਗਾੜ ਸਕਦਾ ਹੈ। ਸਵੇਰੇ 10 ਵਜੇ ਤੋਂ ਸ਼ਾਮ 4 ਵਜੇ ਤੱਕ ਕਸਰਤ ਕਰਨ ਤੋਂ ਬਚੋ। ਵਰਕਆਊਟ ਲਈ ਸਵੇਰ ਦਾ ਸਮਾਂ ਸਭ ਤੋਂ ਵਧੀਆ ਹੈ ਜਦੋਂ ਵਾਤਾਵਰਣ ਵਿੱਚ ਠੰਢਕ ਹੁੰਦੀ ਹੈ। ਜੇਕਰ ਸਵੇਰੇ ਸਮਾਂ ਨਹੀਂ ਮਿਲਦਾ, ਤਾਂ ਸੂਰਜ ਡੁੱਬਣ ਤੋਂ ਬਾਅਦ ਸ਼ਾਮ ਨੂੰ ਕਸਰਤ ਕਰੋ।

2. ਹਾਈਡ੍ਰੇਸ਼ਨ (ਪਾਣੀ ਦੀ ਮਾਤਰਾ) ਹੈ ਸਭ ਤੋਂ ਜ਼ਰੂਰੀ

ਪਸੀਨੇ ਰਾਹੀਂ ਸਰੀਰ ਵਿੱਚੋਂ ਜ਼ਰੂਰੀ ਤੱਤ ਬਾਹਰ ਨਿਕਲ ਜਾਂਦੇ ਹਨ। ਕਸਰਤ ਸ਼ੁਰੂ ਕਰਨ ਤੋਂ 20-30 ਮਿੰਟ ਪਹਿਲਾਂ 2 ਗਲਾਸ ਪਾਣੀ ਪੀਓ ਅਤੇ ਕਸਰਤ ਦੌਰਾਨ ਵੀ ਥੋੜ੍ਹਾ-ਥੋੜ੍ਹਾ ਪਾਣੀ ਪੀਂਦੇ ਰਹੋ। ਸਾਦੇ ਪਾਣੀ ਦੇ ਨਾਲ-ਨਾਲ ਨਾਰੀਅਲ ਪਾਣੀ, ਨਿੰਬੂ ਪਾਣੀ ਜਾਂ ORS ਦਾ ਘੋਲ ਲਓ ਤਾਂ ਜੋ ਸਰੀਰ ਵਿੱਚ ਸੋਡੀਅਮ ਅਤੇ ਪੋਟਾਸ਼ੀਅਮ ਦਾ ਸੰਤੁਲਨ ਬਣਿਆ ਰਹੇ।

3. ਪਹਿਰਾਵੇ ਵੱਲ ਧਿਆਨ ਦਿਓ

ਗਰਮੀ ਵਿੱਚ ਟਾਈਟ ਕੱਪੜੇ ਪਾਉਣ ਤੋਂ ਬਚੋ। ਹਮੇਸ਼ਾ ਸੂਤੀ ਜਾਂ 'ਡਰਾਈ-ਫਿਟ' ਫੈਬਰਿਕ ਵਾਲੇ ਹਲਕੇ ਅਤੇ ਖੁੱਲ੍ਹੇ ਕੱਪੜੇ ਪਾਓ। ਗੂੜ੍ਹੇ ਰੰਗ ਦੇ ਕੱਪੜੇ ਗਰਮੀ ਨੂੰ ਸੋਖਦੇ ਹਨ, ਇਸ ਲਈ ਹਲਕੇ ਰੰਗ ਦੇ ਕੱਪੜੇ ਹੀ ਚੁਣੋ।

4. ਵਾਰਮ-ਅੱਪ ਅਤੇ ਕੂਲ-ਡਾਊਨ

ਸਿੱਧਾ ਭਾਰੀ ਕਸਰਤ ਸ਼ੁਰੂ ਕਰਨ ਦੀ ਬਜਾਏ 10 ਮਿੰਟ ਸਟ੍ਰੈਚਿੰਗ ਅਤੇ ਹਲਕਾ ਵਾਰਮ-ਅੱਪ ਕਰੋ। ਵਰਕਆਊਟ ਖ਼ਤਮ ਕਰਨ ਤੋਂ ਤੁਰੰਤ ਬਾਅਦ ਠੰਢੇ ਪਾਣੀ ਨਾਲ ਨਾ ਨਹਾਓ; ਸਰੀਰ ਦੇ ਤਾਪਮਾਨ ਨੂੰ ਪਹਿਲਾਂ ਨਾਰਮਲ ਹੋਣ ਦਿਓ।

5. ਸਰੀਰ ਦੇ ਸੰਕੇਤਾਂ ਨੂੰ ਪਛਾਣੋ

ਜੇਕਰ ਕਸਰਤ ਦੌਰਾਨ ਚੱਕਰ ਆਉਣ, ਸਿਰ ਦਰਦ, ਜੀਅ ਕੱਚਾ ਹੋਣਾ, ਉਲਟੀ ਜਾਂ ਮਾਸਪੇਸ਼ੀਆਂ ਵਿੱਚ ਤੇਜ਼ ਖਿਚਾਅ ਮਹਿਸੂਸ ਹੋਵੇ, ਤਾਂ ਤੁਰੰਤ ਰੁਕ ਜਾਓ। ਇਹ ਹੀਟ ਸਟ੍ਰੋਕ ਦੇ ਲੱਛਣ ਹੋ ਸਕਦੇ ਹਨ।