ਸ਼ਰਾਬ ਪੀਣ ਵਾਲੇ ਹੋ ਜਾਣ ਸਾਵਧਾਨ! ਕੈਂਸਰ ਸਮੇਤ 62 ਗੰਭੀਰ ਬਿਮਾਰੀਆਂ ਨੂੰ ਸੱਦਾ ਦੇ ਰਿਹਾ ਹੈ ਤੁਹਾਡਾ ਇਹ 'ਕੂਲ' ਸ਼ੌਕ

ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ: ਅੱਜ ਦੇ ਸਮੇਂ 'ਚ ਸ਼ਰਾਬ ਪੀਣਾ ਸਿਰਫ਼ ਇੱਕ ਆਦਤ ਨਹੀਂ, ਸਗੋਂ ਇੱਕ 'ਕੂਲ ਸਟੇਟਸ ਸਿੰਬਲ' ਬਣ ਗਿਆ ਹੈ। ਸ਼ਰਾਬ ਪੀਣ ਨਾਲ ਲਿਵਰ ਨੂੰ ਹੋਣ ਵਾਲੇ ਨੁਕਸਾਨ ਬਾਰੇ ਤਾਂ ਸਾਰੇ ਜਾਣਦੇ ਹਨ, ਪਰ ਹਾਲ ਹੀ 'ਚ ਹੋਈ ਇੱਕ ਸਟੱਡੀ 'ਚ ਹੋਰ ਵੀ ਖ਼ਤਰਨਾਕ ਗੱਲ ਸਾਹਮਣੇ ਆਈ ਹੈ। ਇਸ ਖੋਜ ਮੁਤਾਬਕ ਸ਼ਰਾਬ ਪੀਣ ਕਾਰਨ ਮਨੁੱਖੀ ਸਰੀਰ 'ਚ 62 ਤਰ੍ਹਾਂ ਦੇ ਵਿਕਾਰਾਂ (Disorders) ਦਾ ਖ਼ਤਰਾ ਵੱਧ ਜਾਂਦਾ ਹੈ।

ਇਹਨਾਂ ਬਿਮਾਰੀਆਂ ਦੀ ਸੂਚੀ 'ਚ ਕੈਂਸਰ ਵਰਗੀ ਜਾਨਲੇਵਾ ਬਿਮਾਰੀ ਵੀ ਸ਼ਾਮਲ ਹੈ। ਇਹ ਸਟੱਡੀ ਸਾਬਤ ਕਰਦੀ ਹੈ ਕਿ ਸ਼ਰਾਬ ਸਾਡੇ ਸਰੀਰ ਦੇ ਅੰਦਰ ਹੌਲੀ-ਹੌਲੀ ਕਿੰਨਾ ਵੱਡਾ ਨੁਕਸਾਨ ਪਹੁੰਚਾਉਂਦੀ ਹੈ। ਖੋਜਕਰਤਾਵਾਂ ਨੇ ਪੰਜ ਦਰਜਨ ਤੋਂ ਵੱਧ ਅਜਿਹੇ ਵਿਕਾਰਾਂ ਦੀ ਪਛਾਣ ਕੀਤੀ ਹੈ ਜੋ ਪੂਰੀ ਤਰ੍ਹਾਂ ਸ਼ਰਾਬ ਕਾਰਨ ਹੁੰਦੇ ਹਨ, ਜਿਨ੍ਹਾਂ 'ਚ ਇਨਫੈਕਸ਼ਨ ਵਾਲੀਆਂ ਬਿਮਾਰੀਆਂ, ਦਿਲ ਦੀਆਂ ਬਿਮਾਰੀਆਂ, ਪਾਚਨ ਪ੍ਰਣਾਲੀ ਦੀਆਂ ਸਮੱਸਿਆਵਾਂ ਅਤੇ ਕਈ ਤਰ੍ਹਾਂ ਦੇ ਕੈਂਸਰ ਸ਼ਾਮਲ ਹਨ।

ਸਰੀਰ ਦੀ ਇਮਿਊਨਿਟੀ 'ਤੇ ਸਿੱਧਾ ਹਮਲਾ

ਇਸ ਖੋਜ ਪੱਤਰ ਅਨੁਸਾਰ, ਸ਼ਰਾਬ ਨਾਲ ਸਿੱਧੇ ਤੌਰ 'ਤੇ ਹੋਣ ਵਾਲੀਆਂ ਇਹ ਬਿਮਾਰੀਆਂ ਮੁੱਖ ਤੌਰ 'ਤੇ ਗੈਰ-ਛੂਤਕਾਰੀ (Non-communicable) ਬਿਮਾਰੀਆਂ ਅਤੇ ਸਰੀਰਕ ਸੱਟਾਂ ਦੀ ਸ਼੍ਰੇਣੀ 'ਚ ਆਉਂਦੀਆਂ ਹਨ। ਇਸ ਤੋਂ ਇਲਾਵਾ, ਸ਼ਰਾਬ ਪੀਣ ਨਾਲ ਸਰੀਰ ਦੇ ਐਂਡੋਕ੍ਰਾਈਨ, ਮੈਟਾਬੋਲਿਜ਼ਮ ਅਤੇ ਮਾਨਸਿਕ ਤੇ ਵਿਵਹਾਰਕ ਵਿਕਾਰਾਂ ਦਾ ਜੋਖਮ ਵੀ ਬਹੁਤ ਵੱਧ ਜਾਂਦਾ ਹੈ।

ਸ਼ਰਾਬ ਸਾਡੇ ਸਰੀਰ ਦੇ ਇਮਿਊਨ ਸਿਸਟਮ ਨੂੰ ਕਮਜ਼ੋਰ ਕਰਦੀ ਹੈ, ਜਿਸ ਨਾਲ ਸਰੀਰ ਇਨਫੈਕਸ਼ਨ ਨਾਲ ਲੜਨ ਦੀ ਤਾਕਤ ਗੁਆ ਦਿੰਦਾ ਹੈ। ਸਟੱਡੀ ਦੇ ਲੇਖਕਾਂ ਵਿੱਚੋਂ ਇੱਕ, ਜੁਰਗਨ ਰੇਹਮ ਦਾ ਕਹਿਣਾ ਹੈ ਕਿ ਪਛਾਣੀਆਂ ਗਈਆਂ ਇਹਨਾਂ 62 ਬਿਮਾਰੀਆਂ ਪਿੱਛੇ ਸ਼ਰਾਬ ਹੀ ਮੁੱਖ ਵਜ੍ਹਾ ਹੈ।

ਹੋਰ ਗੰਭੀਰ ਬਿਮਾਰੀਆਂ 'ਚ ਭੂਮਿਕਾ

ਦੁਨੀਆ 'ਚ ਲਗਭਗ 30 ਹੋਰ ਅਜਿਹੀਆਂ ਬਿਮਾਰੀਆਂ ਹਨ ਜਿਨ੍ਹਾਂ 'ਚ ਸ਼ਰਾਬ ਸਿੱਧੇ ਤੌਰ 'ਤੇ ਵੱਡੀ ਭੂਮਿਕਾ ਨਿਭਾਉਂਦੀ ਹੈ। ਇਹਨਾਂ 'ਚ ਬ੍ਰੈਸਟ ਕੈਂਸਰ, ਦਿਲ ਦੇ ਰੋਗ, ਸਟ੍ਰੋਕ, ਡਾਇਬੀਟੀਜ਼ ਅਤੇ ਡਿਮੈਂਸ਼ੀਆ (ਯਾਦਦਾਸ਼ਤ ਦੀ ਕਮੀ) ਵਰਗੀਆਂ ਗੰਭੀਰ ਮਾਨਸਿਕ ਸਥਿਤੀਆਂ ਸ਼ਾਮਲ ਹਨ।

ਸਿਹਤ 'ਚ ਹੋ ਸਕਦਾ ਹੈ ਸੁਧਾਰ

ਇਸ ਡਰਾਉਣੇ ਖੋਜ ਦੇ ਵਿਚਕਾਰ ਇੱਕ ਰਾਹਤ ਦੀ ਖ਼ਬਰ ਵੀ ਹੈ। ਸ਼ਰਾਬ ਕਾਰਨ ਹੋਣ ਵਾਲੀਆਂ ਇਹਨਾਂ ਬਿਮਾਰੀਆਂ ਦੀ ਰਫ਼ਤਾਰ ਨੂੰ ਨਾ ਸਿਰਫ਼ ਹੌਲੀ ਕੀਤਾ ਜਾ ਸਕਦਾ ਹੈ, ਸਗੋਂ ਇਹਨਾਂ ਨੂੰ ਵਧਣ ਤੋਂ ਰੋਕਿਆ ਅਤੇ ਠੀਕ ਵੀ ਕੀਤਾ ਜਾ ਸਕਦਾ ਹੈ। ਇਮਿਊਨ ਸਿਸਟਮ 'ਤੇ ਸ਼ਰਾਬ ਦਾ ਬੁਰਾ ਪ੍ਰਭਾਵ ਬਹੁਤ ਲੰਬੇ ਸਮੇਂ ਤੱਕ ਨਹੀਂ ਟਿਕਦਾ। ਜੇਕਰ ਸਮਾਂ ਰਹਿੰਦੇ ਸ਼ਰਾਬ ਤੋਂ ਦੂਰੀ ਬਣਾ ਲਈ ਜਾਵੇ, ਤਾਂ ਸਰੀਰ ਕੁਝ ਹੀ ਦਿਨਾਂ ਤੋਂ ਲੈ ਕੇ ਇੱਕ ਹਫ਼ਤੇ ਦੇ ਅੰਦਰ ਵਾਪਸ ਆਪਣੀ ਆਮ ਸਥਿਤੀ 'ਚ ਆਉਣ ਲੱਗਦਾ ਹੈ ਅਤੇ ਖੁਦ ਨੂੰ ਦੁਬਾਰਾ ਸਿਹਤਮੰਦ ਬਣਾਉਣਾ ਸ਼ੁਰੂ ਕਰ ਦਿੰਦਾ ਹੈ।