33 ਸਾਲ ਪਹਿਲਾਂ 'ਬਾਂਦਰ' ਨੇ ਸਨੀ ਦਿਓਲ ਨੂੰ ਚਟਾਈ ਸੀ ਧੂੜ, ਅਨਿਲ-ਸ਼੍ਰੀਦੇਵੀ ਨੂੰ ਵੀ ਚਖਾਇਆ ਸੀ ਮਜ਼ਾ; ਬਲਾਕਬਸਟਰ ਹੋਈ ਸੀ ਉਹ ਫਿਲਮ

ਐਂਟਰਟੇਨਮੈਂਟ ਡੈਸਕ, ਨਵੀਂ ਦਿੱਲੀ : 90 ਦੇ ਦਹਾਕੇ 'ਚ ਕਈ ਅਜਿਹੀਆਂ ਫਿਲਮਾਂ ਆਈਆਂ ਜਿਨ੍ਹਾਂ ਦੀ ਬਹੁਤ ਚਰਚਾ ਹੋਈ ਅਤੇ ਉਹ ਮਹਿੰਗੇ ਬਜਟ 'ਚ ਬਣੀਆਂ, ਪਰ ਉਹ ਬਾਕਸ ਆਫਿਸ 'ਤੇ ਕਾਮਯਾਬ ਨਹੀਂ ਹੋ ਸਕੀਆਂ। ਹਾਲਾਂਕਿ, ਉਸੇ ਦੌਰ 'ਚ ਕੁਝ ਅਜਿਹੀਆਂ ਫਿਲਮਾਂ ਵੀ ਆਈਆਂ, ਜਿਨ੍ਹਾਂ ਦਾ ਕੋਈ ਪ੍ਰਚਾਰ ਨਹੀਂ ਹੋਇਆ ਤੇ ਨਾ ਹੀ ਕੋਈ ਹੀਰੋ ਪ੍ਰਮੋਸ਼ਨ ਕਰਦਾ ਦਿਖਿਆ, ਫਿਰ ਵੀ ਉਹ ਫਿਲਮਾਂ ਕਮਾਲ ਕਰ ਗਈਆਂ। ਅੱਜ ਗੱਲ ਕਰਦੇ ਹਾਂ ਉਸੇ ਫਿਲਮ ਦੀ ਜਿਸ ਵਿਚ ਇੱਕ ਬਾਂਦਰ ਨੇ ਅਨਿਲ ਕਪੂਰ, ਸ਼੍ਰੀਦੇਵੀ ਤੋਂ ਲੈ ਕੇ ਸਨੀ ਦਿਓਲ ਵਰਗੇ ਸਿਤਾਰਿਆਂ ਨੂੰ ਮਜ਼ਾ ਚਖਾ ਦਿੱਤਾ ਸੀ।

1993 'ਚ ਆਈਆਂ ਤਿੰਨ ਸ਼ਾਨਦਾਰ ਫਿਲਮਾਂ

ਸਾਲ 1993 'ਚ ਤਿੰਨ ਫਿਲਮਾਂ ਬਹੁਤ ਚਰਚਾ 'ਚ ਰਹੀਆਂ। ਵੱਡੀ ਗੱਲ ਇਹ ਸੀ ਕਿ ਇਹ ਫਿਲਮਾਂ ਆਸ-ਪਾਸ ਹੀ ਰਿਲੀਜ਼ ਹੋਈਆਂ ਅਤੇ ਬਾਕਸ ਆਫਿਸ 'ਤੇ ਉਹ ਕਮਾਲ ਨਹੀਂ ਦਿਖਾ ਸਕੀਆਂ, ਪਰ ਇਹਨਾਂ ਵਿੱਚੋਂ ਬਾਜ਼ੀ ਇੱਕ ਫਿਲਮ ਮਾਰ ਲੈ ਗਈ। ਉਸ ਸਾਲ ਇੱਕ ਪਾਸੇ ਹਿੰਦੀ ਸਿਨੇਮਾ ਦੀ ਸਭ ਤੋਂ ਮਹਿੰਗੀ ਫਿਲਮ ਸੀ, ਦੂਜੇ ਪਾਸੇ ਸਿਤਾਰਿਆਂ ਦੀ ਫੌਜ ਵਾਲੀ ਇੱਕ ਵੱਡੀ ਫਿਲਮ, ਅਤੇ ਤੀਜੇ ਪਾਸੇ ਸੀ ਇੱਕ 'ਬਿਨਾਂ ਸਿਰ-ਪੈਰ' ਵਾਲੀ ਕਾਮੇਡੀ ਫਿਲਮ। ਇਹਨਾਂ ਤਿੰਨਾਂ ਵਿੱਚੋਂ ਪਹਿਲੀ ਫਿਲਮ ਸੀ 'ਰੂਪ ਕੀ ਰਾਨੀ ਚੋਰੋਂ ਕਾ ਰਾਜਾ' (Roop Ki Rani Choron ka raja)।

ਇਹ ਫਿਲਮ ਉਸ ਸਮੇਂ ਦੀ ਸਭ ਤੋਂ ਵੱਡੀ ਫਿਲਮ ਸੀ। ਬੋਨੀ ਕਪੂਰ ਨੇ ਫਿਲਮ 'ਤੇ ਪਾਣੀ ਵਾਂਗ ਪੈਸਾ ਵਹਾਇਆ ਸੀ। ਇਹ ਉਸ ਦੌਰ ਦੀ ਸਭ ਤੋਂ ਮਹਿੰਗੀ ਫਿਲਮ ਸੀ। ਇਸ ਤੋਂ ਬਾਅਦ ਦੂਜੀ ਫਿਲਮ ਸਨੀ ਦਿਓਲ, ਸੰਜੇ ਦੱਤ, ਧਰਮਿੰਦਰ, ਵਿਨੋਦ ਖੰਨਾ, ਰਵੀਨਾ ਟੰਡਨ ਤੇ ਦਿਵਿਆ ਭਾਰਤੀ ਵਰਗੇ ਸਿਤਾਰਿਆਂ ਨਾਲ ਸਜੀ ਸੀ ਤੇ ਫਿਲਮ ਦਾ ਨਾਂ ਸੀ 'ਕਸ਼ਤਰੀਆ' (Kshatriya)। ਤੀਜੀ ਫਿਲਮ ਸੀ 'ਆਂਖੇਂ' (Aankhen), ਜਿਸ ਵਿਚ ਗੋਵਿੰਦਾ, ਚੰਕੀ ਪਾਂਡੇ, ਰਾਜ ਬੱਬਰ ਤੇ ਕਾਦਰ ਖਾਨ ਵਰਗੇ ਸਟਾਰ ਨਜ਼ਰ ਆਏ ਸਨ।

ਡੇਵਿਡ ਧਵਨ ਦੀ ਫਿਲਮ ਮਾਰ ਗਈ ਬਾਜ਼ੀ

ਫਿਲਮ 'ਆਂਖੇਂ' ਜਦੋਂ ਆਈ ਤਾਂ ਉਸਦੇ ਸਾਹਮਣੇ ਪਹਿਲਾਂ ਹੀ ਦੋ ਵੱਡੀਆਂ ਫਿਲਮਾਂ 'ਕਸ਼ਤਰੀਆ' ਅਤੇ 'ਰੂਪ ਕੀ ਰਾਨੀ ਚੋਰੋਂ ਕਾ ਰਾਜਾ' ਸਨ। ਇਨ੍ਹਾਂ ਦੋਵਾਂ ਫਿਲਮਾਂ 'ਚ ਵੱਡੇ ਸਟਾਰ ਸਨ, ਇਸ ਲਈ ਡੇਵਿਡ ਧਵਨ ਦੀ ਫਿਲਮ ਤੋਂ ਕਿਸੇ ਨੂੰ ਜ਼ਿਆਦਾ ਉਮੀਦਾਂ ਨਹੀਂ ਸਨ। ਉਪਰੋਂ ਫਿਲਮ 'ਆਂਖੇਂ' ਦੀ ਨਾ ਤਾਂ ਕੋਈ ਪ੍ਰਮੋਸ਼ਨ ਕੀਤੀ ਗਈ ਸੀ ਅਤੇ ਨਾ ਹੀ ਕੋਈ ਵੱਡੇ ਗਾਣੇ ਰਿਲੀਜ਼ ਕੀਤੇ ਗਏ ਸਨ।

ਹਾਲ ਹੀ 'ਚ ਡੇਵਿਡ ਧਵਨ ਦਾ ਇਕ ਇੰਟਰਵਿਊ ਵਾਇਰਲ ਹੋਇਆ ਜਿਸ ਵਿੱਚ ਉਨ੍ਹਾਂ ਦੱਸਿਆ ਕਿ ਉਸ ਵਕਤ ਜਦੋਂ ਫਿਲਮ ਆ ਰਹੀ ਸੀ ਤਾਂ ਕੁਝ ਖਾਸ ਨਹੀਂ ਸੀ, ਨਾ ਕੋਈ ਪੋਸਟਰ ਲਗਾਏ ਗਏ ਤੇ ਨਾ ਹੀ ਕੋਈ ਗਾਣਾ ਆਇਆ ਸੀ। 'ਆਂਖੇਂ' ਦੋ ਵੱਡੀਆਂ ਫਿਲਮਾਂ ਦੇ ਵਿਚਾਲੇ ਜਿਹੇ ਰਿਲੀਜ਼ ਹੋਈ ਸੀ। ਇਸ ਤੋਂ ਇਕ ਹਫਤਾ ਪਹਿਲਾਂ ਜੇਪੀ ਦੱਤਾ ਦੀ ਵੱਡੀ ਸਟਾਰਕਾਸਟ ਵਾਲੀ ਫਿਲਮ 'ਕਸ਼ਤਰੀਆ' ਆਈ ਸੀ ਤੇ ਉਸ ਤੋਂ ਅਗਲੇ ਹਫਤੇ 'ਰੂਪ ਕੀ ਰਾਨੀ...' ਆਈ। ਇਨ੍ਹਾਂ ਦੇ ਵਿਚਕਾਰ ਛੋਟੀ ਫਿਲਮ 'ਆਂਖੇਂ' ਕਮਾਲ ਕਰ ਗਈ ਅਤੇ ਸੁਪਰਹਿੱਟ ਰਹੀ।

ਸਨੀ-ਧਰਮਿੰਦਰ ਅਤੇ ਅਨਿਲ-ਸ਼੍ਰੀਦੇਵੀ ਨੂੰ ਹਰਾ ਕੇ ਹਿੱਟ ਹੋਇਆ ਸੀ ਬਾਂਦਰ

ਤੁਹਾਨੂੰ ਦੱਸ ਦੇਈਏ ਕਿ 'ਕਸ਼ਤਰੀਆ' ਫਿਲਮ ਨੂੰ ਜੇਪੀ ਦੱਤਾ ਨੇ ਬਣਾਇਆ ਸੀ ਅਤੇ ਇਸਦੀ ਸਟਾਰਕਾਸਟ ਬਹੁਤ ਵੱਡੀ ਸੀ, ਪਰ ਇਹ ਫਿਲਮ ਬਾਕਸ ਆਫਿਸ 'ਤੇ ਫਲਾਪ ਹੋ ਗਈ। 'ਰੂਪ ਕੀ ਰਾਨੀ ਚੋਰੋਂ ਕਾ ਰਾਜਾ' ਲਗਪਗ 9-10 ਕਰੋੜ ਦੇ ਬਜਟ ਵਿੱਚ ਬਣੀ ਸੀ, ਜੋ ਉਸ ਸਮੇਂ ਦੇ ਹਿਸਾਬ ਨਾਲ ਬਹੁਤ ਵੱਡੀ ਰਕਮ ਸੀ, ਪਰ ਸਤੀਸ਼ ਕੌਸ਼ਿਕ ਦੇ ਨਿਰਦੇਸ਼ਨ ਵਾਲੀ ਇਹ ਫਿਲਮ ਵੀ ਕੋਈ ਖਾਸ ਕਮਾਲ ਨਹੀਂ ਕਰ ਸਕੀ।

ਦੂਜੇ ਪਾਸੇ 'ਆਂਖੇਂ' 'ਚ ਗੋਵਿੰਦਾ, ਕਾਦਰ ਖਾਨ ਤੇ ਰਾਜ ਬੱਬਰ ਦੇ ਡਬਲ ਰੋਲ ਛਾ ਗਏ। ਇਸ ਤੋਂ ਇਲਾਵਾ ਫਿਲਮ 'ਚ ਬਾਂਦਰ ਦੀ ਐਂਟਰੀ ਸਭ ਨੂੰ ਬਹੁਤ ਪਸੰਦ ਆਈ। ਬਾਂਦਰ ਦੇ ਨਾਲ ਗੋਵਿੰਦਾ ਅਤੇ ਕਾਦਰ ਖਾਨ ਦੀ ਕਾਮਿਕ ਟਾਈਮਿੰਗ ਕਮਾਲ ਦੀ ਸੀ ਅਤੇ ਫਿਲਮ ਬਲਾਕਬਸਟਰ ਰਹੀ।