ਮੈਕਸੀਕੋ ਦੀ ਸਦਰ ’ਤੇ ਹਮਲਾ ਮੰਦਭਾਗਾ

ਪੱਛਮ ’ਚ ਜਿੱਥੇ ਔਰਤਾਂ ਦੀ ਆਜ਼ਾਦੀ ਤੇ ਮਰਦਾਂ ਦੇ ਬਰਾਬਰ ਅਧਿਕਾਰਾਂ ਦੀ ਅਕਸਰ ਗੱਲ ਕੀਤੀ ਜਾਂਦੀ ਹੈ, ਹਕੀਕਤ ਵਿਚ ਉਥੇ ਔਰਤ ਵਰਗ ਹਰ ਪਲ ਅਸੁਰੱਖਿਅਤ ਹੈ ਤੇ ਜਿਨਸੀ ਸੋਸ਼ਣ ਦਾ ਸ਼ਿਕਾਰ ਹੋ ਰਹੀ ਹੈ। ਜਿਸ ਪੱਛਮੀ ਸਮਾਜ ’ਚ ਸਰਬਉੱਚ ਅਹੁਦੇ ’ਤੇ ਤਾਇਨਾਤ ਰਾਸ਼ਟਰਪਤੀ ਔਰਤ ਸੁਰੱਖਿਅਤ ਨਹੀਂ ਉੱਥੇ ਹੋਰ ਔਰਤਾਂ ਦੀ ਦੁਰਦਸ਼ਾ ਦਾ ਭਲੀਭਾਂਤ ਅੰਦਾਜ਼ਾ ਲਗਾਇਆ ਜਾ ਸਕਦਾ ਹੈ। ਔਰਤ ਦੇ ਅਪਮਾਨ ਅਤੇ ਸੁਰੱਖਿਆ ਸਬੰਧੀ ਇਸ ਤੋਂ ਵੱਡੀ ਸ਼ਰਮਨਾਕ ਅਤੇ ਭਿਆਨਕ ਘਟਨਾ ਹੋਰ ਕੀ ਹੋ ਸਕਦੀ ਹੈ ਕਿ ਜਦੋਂ ਮੈਕਸੀਕੋ ਦੀ ਰਾਸ਼ਟਰਪਤੀ ਕਲਾਉਡੀਆ ਸ਼ੀਨਾਬੌਮ ’ਤੇ ਇਕ ਸ਼ਰਾਬੀ ਵਿਅਕਤੀ ਜਿਨਸੀ ਹਮਲਾ ਕਰ ਦਿੰਦਾ ਹੈ ਤੇ ਉਸ ਨਾਲ ਇਤਰਾਜ਼ਯੋਗ ਹਰਕਤਾਂ ਕਰਨ ਦਾ ਯਤਨ ਕਰਦਾ ਹੈ।

ਇਹ ਘਟਨਾ 10 ਨਵੰਬਰ, 2025 ਨੂੰ ਮੈਕਸੀਕੋ ਦੀ ਰਾਜਧਾਨੀ ਵਿਚ ਵਾਪਰੀ ਜਦੋਂ ਰਾਸ਼ਟਰਪਤੀ ਰਾਸ਼ਟਰੀ ਮਹਿਲ ਵਿਚੋਂ ਨਿਕਲ ਕੇ ਸਿੱਖਿਆ ਵਿਭਾਗ ਦੀ ਇਮਾਰਤ ਵੱਲ ਜਾ ਰਹੀ ਹੁੰਦੀ ਹੈ। ਇਹ ਘਟਨਾ ਇਕ ਕੈਮਰੇ ਵਿਚ ਕੈਦ ਹੋ ਗਈ। ਇਸ ਦੇ ਵਾਇਰਲ ਹੋਣ ਤੋਂ ਬਾਅਦ ਪੂਰੇ ਦੇਸ਼ ਦੀਆਂ ਔਰਤਾਂ ਦਾ ਗੁੱਸਾ ਫੁੱਟ ਪਿਆ।

ਇਸ ਘਟਨਾ ਤੋਂ ਕੁਝ ਦਿਨ ਪਹਿਲਾਂ ਸਵੀਡਨ ਦੀ ਸੈਂਟਰ ਪਾਰਟੀ ਦੀ ਲੀਡਰ ਅੰਨਾ ਕਾਰਿਨ ਰਾਜਨੀਤੀ ਨੂੰ ਤਿਆਗਣ ਦਾ ਐਲਾਨ ਕਰ ਦਿੰਦੀ ਹੈ। ਕਾਰਨ ਇਹੀ ਕਿ ਉਸ ਨੂੰ ਲਗਾਤਾਰ ਜਿਨਸੀ ਧਮਕੀਆਂ ਦੇ ਕੇ ਤੰਗ ਪਰੇਸ਼ਾਨ ਕੀਤਾ ਜਾ ਰਿਹਾ ਸੀ । ਹੈਰਾਨਗੀ ਤਾਂ ਇਸ ਗੱਲ ਦੀ ਵੀ ਹੈ ਕਿ ਉਸ ਤੋਂ ਪਹਿਲਾਂ ਦੀ ਅਧਿਕਾਰੀ, ਪਾਰਟੀ ਆਗੂ ਐਨੀ ਲੂਫ ਨੇ ਵੀ ਨਿਊ ਨਾਜ਼ੀਵਾਦੀਆਂ ਵੱਲੋਂ ਧਮਕੀਆਂ ਮਿਲਣ, ਲਗਾਤਾਰ ਉਸ ਦਾ ਪਿੱਛਾ ਕਰਨ, ਆਨਲਾਈਨ ਤੰਗ ਪਰੇਸ਼ਾਨ ਕਰਨ ਤੋਂ ਦੁਖੀ ਹੋ ਕੇ ਅਸਤੀਫ਼ਾ ਦੇਣ ਦਾ ਐਲਾਨ ਕਰ ਦਿੱਤਾ ਸੀ।

ਆਸਟ੍ਰੇਲੀਆ ਦੀ ਮਹਿਲਾ ਪ੍ਰਧਾਨ ਮੰਤਰੀ ਜੂਲੀਆ ਜ਼ਿਲਾਰਡ ਨੂੰ ‘ ਜਾਣ ਬੁੱਝ ਕੇ ਬਾਂਝ ’ ਹੋਣ ਦੀਆਂ ਤਨਜ਼ਾਂ ਅਤੇ ਟਿੱਪਣੀਆਂ ਨਾਲ ਪਰੇਸ਼ਾਨ ਕੀਤਾ ਜਾਂਦਾ ਰਿਹਾ। ਇਸ ਤੋਂ ਇਲਾਵਾ ਟਰੰਪ ਵਿਰੁੱਧ ਡੈਮੋਕ੍ਰੇਟਿਕ ਪਾਰਟੀ ਵੱਲੋਂ ਚੋਣ ਲੜਨ ਵਾਲੀ ਭਾਰਤੀ ਮੂਲ ਨਾਲ ਸਬੰਧਤ ਕਮਲਾ ਹੈਰਿਸ ਨੂੰ ਸ਼ਬਦੀ ਜਿਨਸੀ ਸ਼ੋਸ਼ਣ ਦਾ ਸ਼ਿਕਾਰ ਬਣਾਇਆ ਜਾਂਦਾ ਰਿਹਾ ਹੈ। ਸੰਨ 2023 ’ਚ ਇਟਲੀ ਅੰਦਰ 7500 ਮਿਊਂਸਪਲ ਕਮੇਟੀਆਂ ਸਬੰਧੀ ਮੇਅਰਾਂ ’ਤੇ ਜਿਨਸੀ ਸੋਸ਼ਣ ਹਮਲਿਆਂ ਦਾ ਕਰੂਪ ਚਿਹਰਾ ਦੇਖਣ ਨੂੰ ਮਿਲਿਆ। ਇਸ ਦਾ ਇੰਕਸ਼ਾਫ਼ ਮਿਲਾਨ ਯੂਨੀਵਰਸਿਟੀ ਪ੍ਰੋਫੈਸਰ ਜੀਆਨ ਮਾਰਕੋ ਦਾਨੀਆਲ ਕਰਦੇ ਹਨ। ਇਸ ਸਾਲ ਸਾਬਕਾ ਡੱਚ ਸਿਆਸਤਦਾਨ ਸਿਗਾਰਡ ਕਾਗ ਨੇ ਚਿਤਾਵਨੀ ਦਿੱਤੀ ਸੀ ਕਿ ਅਜੋਕੇ ਸਮੇਂ ਘੱਟ ਗਿਣਤੀਆਂ ਤੇ ਵੱਖ-ਵੱਖ ਰੰਗਾਂ ਸਬੰਧੀ ਔਰਤਾਂ ਵੱਲੋਂ ਵਧ-ਚੜ੍ਹ ਕੇ ਰਾਜਨੀਤੀ ’ਚ ਹਿੱਸਾ ਲੈਣਾ ਦਰਜ ਕੀਤਾ ਗਿਆ ਪਰ ਜਿਨਸੀ ਸ਼ੋਸ਼ਣ ਤੇ ਤੰਗ-ਪਰੇਸ਼ਾਨ ਕਰਨ ਦੀ ਵਧਦੀ ਬਿਰਤੀ ਇਸ ਰੁਝਾਨ ਦਾ ਭੋਗ ਪਾ ਦੇਵੇਗੀ।

ਮੈਕਸੀਕਨ ਰਾਸ਼ਟਰਪਤੀ ’ਤੇ ਜਿਨਸੀ ਹਮਲੇ ਨੇ ਪੂਰੇ ਵਿਸ਼ਵ ਅੰਦਰ ਔਰਤਾਂ ਦੀ ਸੁਰੱਖਿਆ ਨੂੰ ਲੈ ਕੇ ਵੱਡੀ ਚਿੰਤਾਜਨਕ ਬਹਿਸ ਸ਼ੁਰੂ ਕਰ ਦਿੱਤੀ ਹੈ । ਔਰਤ ਅਜੋਕੇ 21ਵੀਂ ਸਦੀ ਦੇ ਆਧੁਨਿਕ ਯੁੱਗ ਵਿਚ ਵੀ ਅਸੁਰੱਖਿਅਤ ਹੈ ਤੇ ਅਸੀਂ ਉਸ ਦੀ ਰੱਖਿਆ ਕਰਨ ਲਈ ਕੋਈ ਸਮਾਜਿਕ, ਪ੍ਰਸ਼ਾਸਕੀ ਜਾਂ ਕਾਨੂੰਨੀ ਉਪਬੰਧ ਲਾਗੂ ਹੀ ਨਹੀਂ ਕਰ ਸਕੇ। ਇਹ ਬਹੁਤ ਸ਼ਰਮਨਾਕ ਗੱਲ ਹੈ? ਮੈਕਸੀਕੋ ਦੀ ਰਾਸ਼ਟਰੀ ਏਜੰਸੀ ਅਨੁਸਾਰ 10 ਮੈਕਸੀਕਨ ਔਰਤਾਂ ਵਿਚੋਂ 7 ਤੇ 15 ਸਾਲ ਦੀਆਂ ਬੱਚੀਆਂ ਵਿਚੋਂ 1 ਪੂਰੇ ਜੀਵਨ ਕਾਲ ਵਿਚ ਜਿਨਸੀ ਹਿੰਸਾ ਦਾ ਸ਼ਿਕਾਰ ਹੁੰਦੀਆਂ ਹਨ। ਇਨ੍ਹਾਂ ਦਾ ਮਨੋਵਿਗਿਆਨਿਕ ਅਤੇ ਜਿਨਸੀ ਸ਼ੋਸ਼ਣ ਜੀਵਨ ਤਬਾਹ ਕਰ ਕੇ ਰੱਖ ਦਿੰਦਾ ਹੈ। ਇਸ ਸਾਲ ਹੁਣ ਤੱਕ 25000 ਔਰਤਾਂ ਵਿਰੁੱਧ ਜਿਨਸੀ ਸੋਸ਼ਣ ਅਤੇ ਤੰਗ ਪਰੇਸ਼ਾਨ ਕਰਨ ਸਬੰਧੀ ਕੇਸ ਦਰਜ ਕਰਵਾਏ ਗਏ ਹਨ। ਜੋ ਦਰਜ ਨਹੀਂ ਕਰਵਾਏ ਗਏ, ਉਹ ਬੇਹਿਸਾਬ ਹਨ।

ਹਰ ਦੇਸ਼, ਸਮਾਜ, ਭਾਈਚਾਰੇ ’ਚ ਅੱਜ ਵੀ ਔਰਤਾਂ ਐਸੇ ਕੇਸ ਦਰਜ ਕਰਵਾਉਣ ਤੋਂ ਟਾਲ਼ਾ ਵੱਟਦੀਆਂ ਹਨ। ਪਰ ਹਰ ਗਲੀ, ਮੋੜ, ਦਫ਼ਤਰ, ਕੰਮ ਕਰਨ ਵਾਲੀਆਂ ਹੋਰ ਥਾਵਾਂ, ਯਾਤਰਾ ਅਤੇ ਰਾਜਕੀ ਜਾਂ ਗ਼ੈਰ ਰਾਜਕੀ ਸਮਾਰੋਹਾਂ ’ਚ ਅਜਿਹੀਆਂ ਘਟਨਾਵਾਂ ਦਾ ਵਾਪਰਨਾ ਆਮ ਪਾਇਆ ਜਾਂਦਾ ਹੈ। ਮੈਕਸੀਕਨ ਰਾਸ਼ਟਰਪਤੀ ਨੇ ਇਸ ਘਟਨਾ ਵਿਰੁੱਧ ਕੇਸ ਦਰਜ ਕਰਵਾਇਆ ਤਾਂ ਜੋ ਹਰ ਔਰਤ ਅਜਿਹੀ ਸੂਰਤ ਵਿਚ ਟਾਲ਼ਾ ਵੱਟਣ ਦੀ ਥਾਂ ਅੱਗੇ ਆਏ।

ਮੈਕਸੀਕੋ ਅੰਦਰ ਹਰ ਰੋਜ਼ 10 ਔਰਤਾਂ ਅਜਿਹੇ ਕੇਸਾਂ ਵਿਚ ਵਿਰੋਧ ਕਰਕੇ ਕਤਲ ਹੋ ਰਹੀਆਂ ਹਨ। ਇਸ ਸਾਲ ਦੇ ਪਹਿਲੇ 6 ਮਹੀਨਿਆਂ ਵਿਚ 500 ਔਰਤਾਂ ਕਤਲ ਕੀਤੇ ਜਾਣ ਦੇ ਕੇਸ ਸਾਹਮਣੇ ਆਏ ਹਨ। ਅਮਰੀਕਾ ਅਤੇ ਬ੍ਰਿਟੇਨ ਦੇ ਸਰਵੇ ਦਰਸਾਉਂਦੇ ਹਨ ਕਿ 5 ਵਿਚੋਂ 4 ਔਰਤਾਂ ਆਪਣੇ ਜੀਵਨ ਵਿਚ ਜਿਨਸੀ ਸ਼ੋਸ਼ਣ ਦੀਆਂ ਸ਼ਿਕਾਰ ਬਣਾਈਆਂ ਜਾਂਦੀਆਂ ਹਨ। ਉਹ ਕਿਤੇ ਵੀ ਸੁਰੱਖਿਅਤ ਨਹੀਂ ਹਨ।

ਮੈਕਸੀਕੋ ਦੀ ਔਰਤਾਂ ਦੇ ਮਾਮਲਿਆਂ ਬਾਰੇ ਸਕੱਤਰ (ਮੰਤਰੀ) ਸਿਟਲਾਲੀ ਹਰਨੈਂਡਜ਼ ਨੇ ਔਰਤਾਂ ਪ੍ਰਤੀ ਹਿੰਸਾ ਵਿਰੁੱਧ ਦੇਸ਼ ਅੰਦਰ ਸਖ਼ਤ ਕਦਮ ਉਠਾਉਣ ਲਈ ਇਕ ‘ਰਾਸ਼ਟਰਪਤੀ ਯੋਜਨਾ ’ ਅਧੀਨ ਪ੍ਰਸਤਾਵ ਲਿਆਂਦਾ ਹੈ। ਇਸ ਅਨੁਸਾਰ ਔਰਤਾਂ ਵਿਰੁੱਧ ਹਿੰਸਾ ਨੂੰ ਨਜਿੱਠਣ, ਪੁਲਿਸ ਨੂੰ ਰਿਪੋਰਟ ਕਰਨ ਲਈ ਉਤਸ਼ਾਹਿਤ ਕਰਨ, ਸਰਕਾਰੀ ਵਕੀਲਾਂ ਅਤੇ ਹੋਰ ਅਮਲੇ ਨੂੰ ਇਨ੍ਹਾਂ ਮਾਮਲਿਆਂ ਨੂੰ ਨਜਿੱਠਣ ਲਈ ਯੋਗ ਬਣਾਉਣ ਸਬੰਧੀ ਟ੍ਰੇਨਿੰਗ ਸ਼ਾਮਿਲ ਹੈ।

ਇਸ ਵਿਚ ਔਰਤਾਂ ਅੰਦਰ ਜਾਗਰੂਕਤਾ ਪੈਦਾ ਕਰਨਾ ਸ਼ਾਮਿਲ ਹੈ ਤਾਂ ਕਿ ਉਹ ਅਜਿਹੇ ਮਾਮਲਿਆਂ ਪ੍ਰਤੀ ਸੁਚੇਤ ਰਹਿਣ। ਉਨ੍ਹਾਂ ਨੇ ਸਪਸ਼ਟ ਕਿਹਾ ਕਿ ਮੈਕਸੀਕੋ ਅੰਦਰ ਔਰਤਾਂ ਆਪਣੇ ਆਪ ਨੂੰ ਲਾਵਾਰਿਸ ਨਾ ਸਮਝਣ। ਜਦੋਂ ਵੀ ਅਜਿਹੀ ਘਟਨਾ ਵਾਪਰੇ, ਤੁਰੰਤ ਰਿਪੋਰਟ ਕਰਨ। ਦੇਸ਼ ਦੀ ਰਾਸ਼ਟਰਪਤੀ ਉਨ੍ਹਾਂ ਨਾਲ ਹੈ ਅਤੇ ਉਨ੍ਹਾਂ ਦੀ ਸੁਰੱਖਿਆ ਪ੍ਰਤੀ ਵਚਨਬੱਧ ਹੈ। ਤੇਰਾਂ ਨਵੰਬਰ ਨੂੰ ਪ੍ਰੈੱਸ ਨੂੰ ਸੰਬੋਧਨ ਕਰਦਿਆਂ ਰਾਸ਼ਟਰਪਤੀ ਸ਼ੀਨਾਬੌਮ ਨੇ ਕਿਹਾ ਕਿ ‘ਜੇ ਉਹ ਰਾਸ਼ਟਰਪਤੀ ਨਾਲ ਅਜਿਹਾ ਵਰਤਾਅ ਕਰ ਸਕਦੇ ਹਨ ਤਾਂ ਦੇਸ਼ ਵਿਚ ਹੋਰ ਔਰਤਾਂ ਨਾਲ ਕੀ ਹੁੰਦਾ ਹੋਵੇਗਾ?’

ਮੈਕਸੀਕੋ ਦੇ 32 ਸੂਬਿਆਂ ਵਿਚ ਹੁਣ ਔਰਤਾਂ ’ਤੇ ਜਿਨਸੀ ਹਮਲਾ, ਛੇੜਛਾੜ, ਤੰਗ ਪਰੇਸ਼ਾਨ ਕਰਨਾ ਘਿਨਾਉਣਾ ਅਪਰਾਧ ਮੰਨਿਆ ਜਾਵੇਗਾ। ਇਸ ਸਬੰਧੀ ਇਕ ਅਜਿਹਾ ਫੈਡਰਲ ਕਾਨੂੰਨ ਘੜਿਆ ਜਾਵੇਗਾ ਜਿਸ ਅਨੁਸਾਰ ਦੋਸ਼ੀ ਵਿਅਕਤੀਆਂ ਨੂੰ 6 ਤੋਂ 10 ਸਾਲ ਤੱਕ ਜੇਲ੍ਹ ਦੀ ਸਜ਼ਾ ਦਿੱਤੀ ਜਾਵੇਗੀ । ਸੱਤਾਧਾਰੀ ਮੋਰੇਨਾ ਪਾਰਟੀ ਨਾਲ ਸਬੰਧਿਤ ਸੈਂਨਟਰ ਮਾਰਥਾ ਲੂਸੀਆ ਮਿਚਰ ਦਾ ਕਹਿਣਾ ਹੈ ਕਿ ਔਰਤਾਂ ਦੇ ਜਿਨਸੀ ਸ਼ੋਸ਼ਣ ਸਬੰਧੀ ਮੌਜੂਦਾ ਦੰਡ ਕੋਡ ਵਿਚ ਤਬਦੀਲੀ ਲਿਆਂਦੀ ਜਾਵੇਗੀ। ਸੈਨੇਟ ਸਦਨ ਐਸਾ ਕਦਮ ਉਠਾਏਗਾ ਕਿਉਂਕਿ ਹੁਣ ਪਾਣੀ ਸਿਰੋਂ ਲੰਘ ਰਿਹਾ ਹੈ।

ਇਹ ਅਪਰਾਧ ਤਾਂ ਹੁਣ ਜੱਜਾਂ ਦੀਆਂ ਧੀਆਂ, ਭੈਣਾਂ ਤੱਕ ਪੁੱਜ ਚੁੱਕਾ ਹੈ। ਇਹ ਪੁਲਿਸ, ਫ਼ੌਜ, ਚਰਚ, ਮੰਦਰ, ਮਸਜਿਦਾਂ ਵਿਚ ਵੜ ਚੁੱਕਾ ਹੈ। ਜੈਨੇਵਾ ਸਥਿਤ ਅੰਤਰ ਪਾਰਲੀਮੈਂਟਰੀ ਯੂਨੀਅਨ ਨਾਲ ਸਬੰਧਤ ਆਗੂ ਜੈਨਾ ਹਿਲਾਲ ਦਾ ਕਹਿਣਾ ਹੈ ਕਿ ਮੈਕਸੀਕਨ ਰਾਸ਼ਟਰਪਤੀ ’ਤੇ ਜਿਨਸੀ ਹਮਲਾ ਦਰਸਾਉਂਦਾ ਹੈ ਕਿ ਔਰਤਾਂ ਕਿਸ ਕਿਸਮ ਦੇ ਵਤੀਰੇ ਦਾ ਸ਼ਿਕਾਰ ਹਨ। ਸੰਨ 2016 ਵਿਚ ਇਸ ਯੂਨੀਅਨ ਵੱਲੋਂ 39 ਦੇਸ਼ਾਂ ਦੀਆਂ 55 ਸਿਆਸਤਦਾਨਾਂ ’ਤੇ ਕਰਵਾਏ ਸਰਵੇ ਵਿਚ 82 ਫ਼ੀਸਦੀ ਔਰਤਾਂ ਖ਼ਿਲਾਫ਼ ਜਿਨਸੀ ਸ਼ੋਸ਼ਣ ਹੋਇਆ ਪਾਇਆ ਗਿਆ, 44 ਫ਼ੀਸਦੀ ਨੇ ਕਤਲ ਤੇ ਬਲਾਤਕਾਰ ਕਰਨ ਦੀਆਂ ਧਮਕੀਆਂ ਦਾ ਜ਼ਿਕਰ ਕੀਤਾ। ਇਸ ਕਰਕੇ ਬਰਤਾਨੀਆ ਤੋਂ ਕੈਨੇਡਾ ਤੱਕ ਮਹਿਲਾ ਸਿਆਸਤਾਨਾਂ ਨੇ ਰਾਜਨੀਤੀ ਤੋਂ ਕਿਨਾਰਾ ਕਰਨਾ ਸਹੀ ਸਮਝਿਆ।

ਮੈਕਸੀਕੋ ਇੰਟਰਸੈਕਟਾਂ ਔਰਤ ਗਰੁੱਪ ਮੁਖੀ ਅਤੇ ਕਾਨੂੰਨੀ ਮਾਹਿਰ ਐਸਟੇਫਾਨੀਆ ਵੇਲਾ ਦਾ ਮੰਨਣਾ ਹੈ ਕਿ ਰਾਸ਼ਟਰਪਤੀ ’ਤੇ ਜਿਨਸੀ ਹਮਲੇ ਤੋਂ ਬਾਅਦ ਦੰਡ ਕੋਡ ਬਦਲਣ ਸਬੰਧੀ ਕਾਨੂੰਨ ਲਿਆਉਣਾ ਇਸ ਸਮੱਸਿਆ ਦਾ ਹੱਲ ਨਹੀਂ । ਵਤੀਰੇ ਦਾ ਕਾਰਨ ਮੁੱਖ ਤੌਰ ’ਤੇ ਇਹੀ ਹੈ ਕਿ ਉਹ ਔਰਤ ਹੈ ।

ਪ੍ਰੋ. ਕਾਰਡੋਨਾ ਦਾ ਕਹਿਣਾ ਹੈ ਕਿ ਉਹ 15 ਸਾਲ ਦੀ ਸੀ, ਜਦੋਂ ਮੱਕੇ ਹੱਜ ’ਤੇ ਗਈ ਤਾਂ ਉਸ ਨੂੰ ਦੋ ਵਾਰ ਜਿਨਸੀ ਹਮਲੇ ਦਾ ਸ਼ਿਕਾਰ ਬਣਾਇਆ ਗਿਆ। ਇਕ ਹਮਲਾ ਤਾਂ ਸਾਊਦੀ ਅਰਬ ਦੇ ਪੁਲਸੀਏ ਨੇ ਕੀਤਾ ਸੀ। ਜਦੋਂ 2018 ਵਿਚ ਉਸ ਨੇ ਇਸ ਦਾ ਆਨਲਾਈਨ ਇੰਕਸ਼ਾਫ਼ ਕੀਤਾ ਤਾਂ ਕਈ ਮੁਸਲਿਮ ਔਰਤਾਂ ਨੇ ਉਨ੍ਹਾਂ ’ਤੇ ਹੱਜ ਸਮੇਂ ਅਜਿਹੇ ਹਮਲਿਆਂ ਬਾਰੇ ਮੰਨਿਆ। ਪਰ ਹੁਣ 50 ਸਾਲ ਦੀ ਉਮਰ ’ਚ ਇਕ ਡਾਂਸ ਕਲੱਬ ਵਿਚ ਉਸ ’ਤੇ ਹਮਲਾ ਕਰਨ ਵਾਲੇ ਨੂੰ ਉਸ ਨੇ ਖ਼ੂਬ ਕੁਟਾਪਾ ਚਾੜ੍ਹ ਕੇ ਸਬਕ ਸਿਖਾਉਣ ਦਾ ਇੰਕਸ਼ਾਫ਼ ਇਸ ਲਈ ਕੀਤਾ ਕਿਉਂਕਿ ਉਹ ਚਾਹੁੰਦੀ ਹੈ ਕਿ ਔਰਤਾਂ ਆਪਣੀ ਰਾਖੀ ਲਈ ਆਪ ਅੱਗੇ ਆਉਣ। ਦਰਅਸਲ, ਸਜ਼ਾਵਾਂ ਨਾਲ ਐਸੇ ਹਮਲੇ ਰੁਕਣ ਵਾਲੇ ਨਹੀਂ । ਇਸ ਲਈ ਸਿੱਖਿਆ ਸਿਲੇਬਸ ਵਿਚ ਤਬਦੀਲੀ, ਸੱਭਿਆਚਾਰਕ ਬਦਲਾਅ, ਔਰਤਾਂ ਨੂੰ ਅਜਿਹੇ ਅਪਰਾਧਾਂ ਵਿਰੁੱਧ ਜਾਗ੍ਰਿਤ ਕਰਨ ਤੇ ਇਨ੍ਹਾਂ ਦੀ ਰੋਕਥਾਮ ਲਈ ਉਨ੍ਹਾਂ ਨੂੰ ਸੰਗਠਿਤ ਕਰਨ ਦੀ ਲੋੜ ਹੈ। ਮਨੁੱਖੀ ਵਰਤਾਰਾ ਔਰਤ ਦੇ ਸਸ਼ਕਤੀਕਰਨ ਬਿਨਾਂ ਬਦਲਣ ਵਾਲਾ ਨਹੀਂ। ਜ਼ਰਾ ਕੁ ਕੁਤਾਹੀ ਔਰਤ ਨੂੰ ਸਰੀਰਕ, ਮਾਨਸਿਕ, ਮਨੋਵਿਗਿਆਨਿਕ, ਸਮਾਜਿਕ, ਪਰਿਵਾਰਕ ਪੱਖੋਂ ਦਾਗ਼ਦਾਰ ਕਰ ਦਿੰਦੀ ਹੈ।

-ਦਰਬਾਰਾ ਸਿੰਘ ਕਾਹਲੋਂ

-(ਸਾਬਕਾ ਰਾਜ ਸੂਚਨਾ ਕਮਿਸ਼ਨਰ, ਪੰਜਾਬ)।-ਸੰਪਰਕ : +12898292929