ਸੋਨੇ ਦੀਆਂ ਵਧਦੀਆਂ ਕੀਮਤਾਂ ਵਿਚਾਲੇ ਵੱਡੀ ਖ਼ਬਰ: ਹੁਣ ਲੈਬ 'ਚ ਤਿਆਰ ਹੋਵੇਗਾ Gold, ਅਮਰੀਕੀ ਕੰਪਨੀ ਨੇ ਕੀਤਾ ਦਾਅਵਾ

ਨਵੀਂ ਦਿੱਲੀ: ਸੋਨੇ ਅਤੇ ਚਾਂਦੀ ਦੀਆਂ ਕੀਮਤਾਂ ਰੋਜ਼ਾਨਾ ਨਵੇਂ ਰਿਕਾਰਡ ਬਣਾ ਰਹੀਆਂ ਹਨ। ਰਿਕਾਰਡ ਤੋੜ ਕੀਮਤਾਂ ਦੇ ਵਿਚਕਾਰ ਇੱਕ ਅਜਿਹੀ ਖ਼ਬਰ ਆਈ ਹੈ ਜਿਸ ਨੇ ਸਭ ਦਾ ਧਿਆਨ ਖਿੱਚਿਆ ਹੈ। ਹੁਣ ਤੱਕ ਜਿਸ ਸੋਨੇ ਨੂੰ ਮਾਈਨਿੰਗ (ਖੁਦਾਈ) ਰਾਹੀਂ ਕੱਢਿਆ ਜਾਂਦਾ ਸੀ, ਹੁਣ ਖ਼ਬਰ ਹੈ ਕਿ ਉਸ ਨੂੰ ਲੈਬ ਦੇ ਅੰਦਰ ਵੀ ਬਣਾਇਆ ਜਾ ਸਕਦਾ ਹੈ। ਅਜਿਹਾ ਦਾਅਵਾ ਅਮਰੀਕਾ ਦੇ ਇੱਕ ਸਟਾਰਟਅੱਪ ਨੇ ਕੀਤਾ ਹੈ।

ਅਮਰੀਕੀ ਫਿਊਜ਼ਨ ਐਨਰਜੀ ਸਟਾਰਟਅੱਪ Marathon Fusion ਨੇ ਦਾਅਵਾ ਕੀਤਾ ਹੈ ਕਿ ਨਿਊਕਲੀਅਰ ਫਿਊਜ਼ਨ ਰਾਹੀਂ ਲੈਬ ਦੇ ਅੰਦਰ ਸੋਨਾ ਬਣਾਇਆ ਜਾ ਸਕਦਾ ਹੈ। ਸਟਾਰਟਅੱਪ ਨੇ ਦੱਸਿਆ ਕਿ ਉਸ ਨੂੰ ਆਪਣੇ ਪ੍ਰਯੋਗਾਂ ਵਿੱਚ ਚੰਗੇ ਨਤੀਜੇ ਮਿਲੇ ਹਨ ਅਤੇ ਉਹ ਇਸ ਦਿਸ਼ਾ ਵਿੱਚ ਤੇਜ਼ੀ ਨਾਲ ਅੱਗੇ ਵਧ ਰਿਹਾ ਹੈ।

ਸੈਨ ਫਰਾਂਸਿਸਕੋ ਸਥਿਤ ਇਸ ਕੰਪਨੀ ਅਨੁਸਾਰ, ਨਿਊਕਲੀਅਰ ਫਿਊਜ਼ਨ ਪ੍ਰਕਿਰਿਆ ਦੀ ਵਰਤੋਂ ਕਰਕੇ ਕੀਮਤੀ ਤੱਤਾਂ ਨੂੰ ਸੋਨੇ ਵਿੱਚ ਬਦਲਿਆ ਜਾ ਸਕਦਾ ਹੈ।

ਸਟਾਰਟਅੱਪ ਨੇ ਦੱਸਿਆ ਕਿਵੇਂ ਬਣੇਗਾ ਲੈਬ 'ਚ ਸੋਨਾ?

ਸਟਾਰਟਅੱਪ ਅਨੁਸਾਰ, ਨਿਊਕਲੀਅਰ ਫਿਊਜ਼ਨ ਰਿਐਕਟਰ ਵਿੱਚ ਨਿਊਟ੍ਰੋਨ ਕਣਾਂ ਦੀ ਰੇਡੀਓਐਕਟੀਵਿਟੀ ਦੀ ਵਰਤੋਂ ਕਰਕੇ, ਪਾਰੇ (Mercury) ਨੂੰ ਪਾਰਾ-197 ਵਿੱਚ ਬਦਲਿਆ ਜਾ ਸਕਦਾ ਹੈ। ਫਿਰ ਇਹ ਤੱਤ ਸੋਨੇ ਦੇ ਇੱਕ ਸਥਿਰ ਰੂਪ ਵਿੱਚ ਬਦਲ ਜਾਂਦਾ ਹੈ, ਜਿਸ ਨੂੰ ਗੋਲਡ-197 ਵਜੋਂ ਜਾਣਿਆ ਜਾਂਦਾ ਹੈ। ਭਾਵ ਆਉਣ ਵਾਲੇ ਸਮੇਂ ਵਿੱਚ ਸੋਨਾ ਕੁਦਰਤੀ ਨਹੀਂ ਬਲਕਿ ਬਣਾਉਟੀ ਤਰੀਕੇ ਨਾਲ ਚਾਰਦੀਵਾਰੀ ਦੇ ਅੰਦਰ ਤਿਆਰ ਕੀਤਾ ਜਾ ਸਕੇਗਾ।

ਮੈਰਾਥਨ ਫਿਊਜ਼ਨ ਦੇ ਸਲਾਹਕਾਰ ਅਤੇ ਬਿਲ ਗੇਟਸ ਦੀ ਕੰਪਨੀ ਦੇ ਸਾਬਕਾ ਸੀਟੀਓ (CTO) ਡੈਨ ਬਰੂਨਰ ਦਾ ਮੰਨਣਾ ਹੈ ਕਿ ਪਾਰੇ ਤੋਂ ਸੋਨਾ ਬਣਾਉਣ ਦੀ ਪ੍ਰਕਿਰਿਆ ਦੇ ਵਿਗਿਆਨਕ ਸਿਧਾਂਤ ਬਿਲਕੁਲ ਸਹੀ ਹਨ। ਹਾਲਾਂਕਿ, ਉਹਨਾਂ ਅਨੁਸਾਰ ਅਸਲ ਚੁਣੌਤੀ ਇਸ ਨੂੰ ਇੱਕ ਵਿਹਾਰਕ (Practical) ਇੰਜੀਨੀਅਰਿੰਗ ਪ੍ਰਣਾਲੀ ਵਿੱਚ ਬਦਲਣ ਦੀ ਹੈ।

ਰਿਕਾਰਡ ਪੱਧਰ 'ਤੇ ਪਹੁੰਚੀ ਸੋਨੇ ਦੀ ਕੀਮਤ

ਇਹ ਖ਼ਬਰ ਅਜਿਹੇ ਸਮੇਂ ਆਈ ਹੈ ਜਦੋਂ ਸੋਨਾ ਅੰਤਰਰਾਸ਼ਟਰੀ ਬਾਜ਼ਾਰ ਵਿੱਚ 4,500 ਡਾਲਰ ਪ੍ਰਤੀ ਔਂਸ ਨੂੰ ਪਾਰ ਕਰ ਗਿਆ ਹੈ ਅਤੇ ਭਾਰਤ ਵਿੱਚ ਇਸ ਦੀ ਕੀਮਤ 1,42,500 ਰੁਪਏ (ਪ੍ਰਤੀ 10 ਗ੍ਰਾਮ) ਤੱਕ ਪਹੁੰਚ ਗਈ ਹੈ। ਚਾਂਦੀ ਨੇ ਵੀ 2,24,300 ਰੁਪਏ ਪ੍ਰਤੀ ਕਿਲੋ ਦੇ ਰਿਕਾਰਡ ਪੱਧਰ ਨੂੰ ਛੂਹਿਆ ਹੈ।