ਜਿਸ IMF ਤੋਂ ਪਾਕਿਸਤਾਨ ਵਾਰ-ਵਾਰ ਮੰਗਦਾ ਹੈ ਕਰਜ਼ਾ, ਉਸ ਨੇ ਭਾਰਤ ਨੂੰ ਦੱਸਿਆ ਦੁਨੀਆ ਦੀ ਆਰਥਿਕ ਤਰੱਕੀ ਦਾ ਇੰਜਣ

ਨਵੀਂ ਦਿੱਲੀ: ਜਿਸ ਅੰਤਰਰਾਸ਼ਟਰੀ ਸੰਸਥਾ ਤੋਂ ਪਾਕਿਸਤਾਨ ਵਾਰ-ਵਾਰ ਕਰਜ਼ਾ ਮੰਗਦਾ ਹੈ, ਉਸ ਨੇ ਭਾਰਤ ਨੂੰ ਦੁਨੀਆ ਦਾ ਆਰਥਿਕ ਇੰਜਣ ਦੱਸਿਆ ਹੈ। ਦਰਅਸਲ, ਅੰਤਰਰਾਸ਼ਟਰੀ ਮੁਦਰਾ ਕੋਸ਼ (IMF) ਅਨੁਸਾਰ, ਭਾਰਤ ਗਲੋਬਲ ਆਰਥਿਕਤਾ ਲਈ ਇੱਕ ਅਹਿਮ 'ਗ੍ਰੋਥ ਇੰਜਣ' ਬਣਿਆ ਹੋਇਆ ਹੈ ਅਤੇ ਇਸਦੀ ਆਰਥਿਕ ਕਾਰਗੁਜ਼ਾਰੀ ਮਜ਼ਬੂਤ ਅਤੇ ਟਿਕਾਊ ਹੈ। IMF ਦੀ ਬੁਲਾਰਾ ਜੂਲੀ ਕੋਜ਼ਾਕ ਨੇ ਵੀਰਵਾਰ ਨੂੰ ਇੱਕ ਮੀਡੀਆ ਬ੍ਰੀਫਿੰਗ ਦੌਰਾਨ ਭਾਰਤ ਦੇ ਵਧਦੇ ਮਹੱਤਵ 'ਤੇ ਜ਼ੋਰ ਦਿੱਤਾ।

ਉਨ੍ਹਾਂ ਕਿਹਾ ਕਿ ਭਾਰਤ ਤੋਂ ਆਏ ਤਾਜ਼ਾ ਆਰਥਿਕ ਅੰਕੜੇ ਉਮੀਦ ਨਾਲੋਂ ਕਿਤੇ ਵੱਧ ਮਜ਼ਬੂਤ ਰਹੇ ਹਨ, ਜਿਸ ਨਾਲ ਵਿਸ਼ਵ ਵਿਕਾਸ ਵਿੱਚ ਇੱਕ ਵੱਡੇ ਡਰਾਈਵਰ ਵਜੋਂ ਦੇਸ਼ ਦੀ ਭੂਮਿਕਾ ਹੋਰ ਮਜ਼ਬੂਤ ਹੋਈ ਹੈ।

ਭਾਰਤ ਬਾਰੇ ਗ਼ਲਤ ਸਾਬਤ ਹੋਇਆ IMF ਦਾ ਅਨੁਮਾਨ

ਅੰਤਰਰਾਸ਼ਟਰੀ ਮੁਦਰਾ ਕੋਸ਼ ਦੀ ਬੁਲਾਰਾ ਨੇ ਕਿਹਾ, "ਅਸੀਂ ਜੋ ਦੇਖਿਆ ਹੈ ਉਹ ਇਹ ਹੈ ਕਿ ਭਾਰਤ ਦੁਨੀਆ ਲਈ ਇੱਕ ਪ੍ਰਮੁੱਖ ਗ੍ਰੋਥ ਇੰਜਣ ਹੈ। 2025 ਵਿੱਚ ਭਾਰਤ ਦੇ ਵਿਕਾਸ ਨੂੰ ਲੈ ਕੇ ਜਦੋਂ ਅਸੀਂ 'ਆਰਟੀਕਲ IV ਸਟਾਫ ਰਿਪੋਰਟ' ਤਿਆਰ ਕੀਤੀ ਸੀ, ਉਦੋਂ ਅਸੀਂ ਵਿੱਤੀ ਸਾਲ 25-26 ਲਈ 6.6 ਪ੍ਰਤੀਸ਼ਤ ਵਿਕਾਸ ਦਰ ਦਾ ਅਨੁਮਾਨ ਲਗਾਇਆ ਸੀ, ਜੋ ਮਜ਼ਬੂਤ ਖਪਤ (Consumption) 'ਤੇ ਅਧਾਰਤ ਸੀ।"

ਜਲਦ ਜਾਰੀ ਹੋਵੇਗਾ ਸੋਧਿਆ ਹੋਇਆ GDP ਅਨੁਮਾਨ

ਉਨ੍ਹਾਂ ਅੱਗੇ ਦੱਸਿਆ ਕਿ ਆਰਟੀਕਲ IV ਰਿਪੋਰਟ ਜਾਰੀ ਹੋਣ ਤੋਂ ਬਾਅਦ ਭਾਰਤ ਦੀ ਤੀਜੀ ਤਿਮਾਹੀ ਦੀ ਵਿਕਾਸ ਦਰ ਉਮੀਦ ਨਾਲੋਂ ਮਜ਼ਬੂਤ ਰਹੀ ਹੈ। ਇਸ ਵਿਕਾਸ ਨਾਲ ਇਹ ਸੰਭਾਵਨਾ ਵਧ ਗਈ ਹੈ ਕਿ IMF ਜਲਦੀ ਹੀ ਭਾਰਤ ਲਈ ਆਪਣੇ ਵਿਕਾਸ ਦੇ ਅਨੁਮਾਨ ਨੂੰ ਹੋਰ ਵਧਾ ਸਕਦਾ ਹੈ।

ਜੂਲੀ ਕੋਜ਼ਾਕ ਨੇ ਕਿਹਾ, "ਅਸੀਂ ਦੇਖਿਆ ਹੈ ਕਿ ਭਾਰਤ ਵਿੱਚ ਤੀਜੀ ਤਿਮਾਹੀ ਦੀ ਗ੍ਰੋਥ ਉਮੀਦ ਤੋਂ ਵਧੀਆ ਰਹੀ ਹੈ, ਅਤੇ ਇਸ ਨਾਲ ਸੰਭਾਵਨਾ ਬਣਦੀ ਹੈ ਕਿ ਅਸੀਂ ਅੱਗੇ ਚੱਲ ਕੇ ਆਪਣੇ ਅਨੁਮਾਨ ਨੂੰ ਅਪਗ੍ਰੇਡ ਕਰਾਂਗੇ।"

ਉਨ੍ਹਾਂ ਅੱਗੇ ਕਿਹਾ ਕਿ IMF ਆਉਣ ਵਾਲੇ ਦਿਨਾਂ ਵਿੱਚ ਆਪਣਾ ਜਨਵਰੀ ਦਾ 'ਰੀਅਲ ਅਪਡੇਟ' ਜਾਰੀ ਕਰਨ ਵਾਲਾ ਹੈ, ਜਿਸ ਦੌਰਾਨ ਭਾਰਤ ਲਈ ਵਿਕਾਸ ਦਰ ਦਾ ਸੋਧਿਆ ਹੋਇਆ ਅੰਕੜਾ ਐਲਾਨਿਆ ਜਾਵੇਗਾ।