ਬਾਜ਼ਾਰ ਸੁੰਨੇ, ਖੁੱਲ੍ਹੇ 'ਚ ਨਮਾਜ਼ 'ਤੇ ਰੋਕ, 60 ਸਾਲਾਂ 'ਚ ਪਹਿਲੀ ਵਾਰ ਅਲ-ਅਕਸਾ ਮਸਜਿਦ ਬੰਦ... ਮਿਡਲ ਈਸਟ 'ਚ ਈਦ ਦੀ ਰੌਣਕ ਗਾਇਬ

ਡਿਜੀਟਲ ਡੈਸਕ, ਨਵੀਂ ਦਿੱਲੀ: ਇੱਕ ਪਾਸੇ ਜਿੱਥੇ ਦੁਨੀਆ ਭਰ ਵਿੱਚ ਈਦ ਦਾ ਜਸ਼ਨ ਮਨਾਇਆ ਜਾ ਰਿਹਾ ਹੈ, ਉੱਥੇ ਹੀ ਮਿਡਲ ਈਸਟ ਵਿੱਚ ਅਮਰੀਕਾ-ਇਜ਼ਰਾਈਲ ਅਤੇ ਈਰਾਨ ਵਿਚਾਲੇ ਚੱਲ ਰਹੀ ਜੰਗ ਨੇ ਇਲਾਕੇ ਵਿੱਚ ਇਸ ਤਿਉਹਾਰ ਨੂੰ ਫਿੱਕਾ ਕਰ ਦਿੱਤਾ ਹੈ।

ਈਰਾਨ ਵਿੱਚ ਬਾਜ਼ਾਰ ਸੁੰਨੇ ਪਏ ਹਨ, ਯੂਏਈ (UAE), ਕਤਰ ਅਤੇ ਕੁਵੈਤ ਵਿੱਚ ਖੁੱਲ੍ਹੇ ਮੈਦਾਨ ਵਿੱਚ ਨਮਾਜ਼ ਪੜ੍ਹਨ 'ਤੇ ਰੋਕ ਲਗਾ ਦਿੱਤੀ ਗਈ ਅਤੇ 60 ਸਾਲਾਂ ਵਿੱਚ ਪਹਿਲੀ ਵਾਰ ਇਜ਼ਰਾਈਲ ਦੇ ਯਰੂਸ਼ਲਮ ਵਿੱਚ ਅਲ-ਅਕਸਾ ਮਸਜਿਦ ਨੂੰ ਈਦ ਦੀ ਨਮਾਜ਼ ਲਈ ਬੰਦ ਕਰ ਦਿੱਤਾ ਗਿਆ।

ਮੁਸਲਮਾਨਾਂ ਦਾ ਤੀਜਾ ਸਭ ਤੋਂ ਪਵਿੱਤਰ ਸਥਾਨ ਅਲ-ਅਕਸਾ ਮਸਜਿਦ

1967 ਵਿੱਚ ਹੋਈ ਅਰਬ-ਇਜ਼ਰਾਈਲ ਜੰਗ ਤੋਂ ਬਾਅਦ ਇਹ ਪਹਿਲਾ ਮੌਕਾ ਹੈ ਜਦੋਂ ਇਸ ਮਸਜਿਦ ਨੂੰ ਪੂਰੀ ਤਰ੍ਹਾਂ ਬੰਦ ਕੀਤਾ ਗਿਆ ਹੋਵੇ। ਇਹ ਮੁਸਲਮਾਨਾਂ ਲਈ ਮੱਕਾ-ਮਦੀਨਾ ਤੋਂ ਬਾਅਦ ਤੀਜਾ ਸਭ ਤੋਂ ਵੱਡਾ ਪਵਿੱਤਰ ਸਥਾਨ ਹੈ। 28 ਫਰਵਰੀ ਤੋਂ ਅਮਰੀਕਾ-ਇਜ਼ਰਾਈਲ ਦੇ ਈਰਾਨ 'ਤੇ ਹਮਲੇ ਤੋਂ ਬਾਅਦ ਇਜ਼ਰਾਈਲੀ ਅਧਿਕਾਰੀਆਂ ਨੇ ਆਮ ਲੋਕਾਂ ਦੀ ਐਂਟਰੀ ਬੰਦ ਕਰ ਰੱਖੀ ਹੈ। ਸੁਰੱਖਿਆ ਕਾਰਨਾਂ ਕਰਕੇ ਸਿਰਫ਼ ਉੱਥੇ ਰਹਿਣ ਵਾਲੇ ਜਾਂ ਦੁਕਾਨਦਾਰ ਹੀ ਅੰਦਰ ਜਾ ਸਕਦੇ ਹਨ।

6 ਮਾਰਚ ਤੋਂ ਪੱਛਮੀ ਕੰਧ (Western Wall), ਅਲ-ਅਕਸਾ ਮਸਜਿਦ ਅਤੇ ਚਰਚ ਆਫ ਦਿ ਹੋਲੀ ਸੇਪਲਕਰ ਵਰਗੇ ਕਈ ਧਾਰਮਿਕ ਸਥਾਨ ਬੰਦ ਹਨ। ਪੂਰੇ ਇਜ਼ਰਾਈਲ ਵਿੱਚ ਭੀੜ 'ਤੇ ਵੀ ਪਾਬੰਦੀ ਲਗਾਈ ਹੋਈ ਹੈ। ਯਰੂਸ਼ਲਮ ਦੇ ਪੁਰਾਣੇ ਸ਼ਹਿਰ ਦੇ ਗੇਟ 'ਤੇ ਸ਼ੁੱਕਰਵਾਰ ਨੂੰ ਈਦ ਦੀ ਨਮਾਜ਼ ਦੌਰਾਨ ਸੈਂਕੜੇ ਨਮਾਜ਼ੀਆਂ ਅਤੇ ਪੁਲਿਸ ਵਿਚਾਲੇ ਝੜਪ ਵੀ ਹੋ ਗਈ।

ਈਰਾਨ ਵਿੱਚ ਬਾਜ਼ਾਰ ਸੁੰਨੇ

ਉੱਥੇ ਹੀ, ਈਰਾਨ ਵਿੱਚ ਸ਼ੁੱਕਰਵਾਰ ਨੂੰ ਈਦ ਮਨਾਈ ਗਈ ਪਰ ਬਾਜ਼ਾਰ ਸੁੰਨ੍ਹੇ ਪਏ ਰਹੇ। ਇਸ ਵਾਰ ਲੋਕਾਂ ਨੇ ਜੰਗ ਅਤੇ ਤਣਾਅ ਦੇ ਵਿਚਕਾਰ ਈਦ ਮਨਾਈ ਅਤੇ ਇਜ਼ਰਾਈਲੀ ਹਮਲਿਆਂ ਵਿੱਚ ਮਾਰੇ ਗਏ ਬੱਚਿਆਂ ਨੂੰ ਸ਼ਰਧਾਂਜਲੀ ਦਿੱਤੀ ਗਈ। ਰਮਜ਼ਾਨ ਖ਼ਤਮ ਹੋਣ ਤੋਂ ਬਾਅਦ ਦੇਸ਼ ਭਰ ਵਿੱਚ ਲੋਕਾਂ ਨੇ ਮਸਜਿਦਾਂ ਅਤੇ ਧਾਰਮਿਕ ਸਥਾਨਾਂ 'ਤੇ ਨਮਾਜ਼ ਅਦਾ ਕੀਤੀ। ਕਈ ਥਾਵਾਂ 'ਤੇ ਈਦ ਦਾ ਜਸ਼ਨ ਬੜੀ ਹੀ ਸਾਦਗੀ ਨਾਲ ਮਨਾਇਆ ਗਿਆ।

ਹੋਰ ਇਲਾਕਿਆਂ ਵਿੱਚ ਕਿਵੇਂ ਮਨਾਈ ਗਈ ਈਦ?

ਈਦ ਦੇ ਮੌਕੇ 'ਤੇ ਯੂਏਈ ਵਿੱਚ 4 ਦਿਨਾਂ ਦੀ ਛੁੱਟੀ ਦਾ ਐਲਾਨ ਕੀਤਾ ਗਿਆ। ਬਾਜ਼ਾਰਾਂ, ਮਾਲਾਂ ਅਤੇ ਜਨਤਕ ਥਾਵਾਂ 'ਤੇ ਸਜਾਵਟ ਕੀਤੀ ਗਈ ਅਤੇ ਲੋਕਾਂ ਦੀ ਭੀੜ ਵੀ ਦਿਖੀ। ਹਾਲਾਂਕਿ ਸੁਰੱਖਿਆ ਵਿਵਸਥਾ ਪਹਿਲਾਂ ਨਾਲੋਂ ਸਖ਼ਤ ਸੀ। ਉੱਥੇ ਹੀ, ਇਰਾਕ ਵਿੱਚ ਇਸ ਵਾਰ ਈਦ 'ਤੇ ਤਣਾਅ ਦਾ ਮਾਹੌਲ ਦੇਖਣ ਨੂੰ ਮਿਲਿਆ। ਅਮਰੀਕਾ-ਇਜ਼ਰਾਈਲ ਅਤੇ ਈਰਾਨ ਵਿਚਾਲੇ ਜੰਗ ਦਾ ਅਸਰ ਇੱਥੋਂ ਦੇ ਲੋਕਾਂ ਦੀ ਜ਼ਿੰਦਗੀ 'ਤੇ ਵੀ ਹੋਇਆ ਹੈ।