ਡੀਲ ਤੋੜਨ ਦੀ ਸਜ਼ਾ ! ਅਮਰੀਕੀ ਰਾਸ਼ਟਰਪਤੀ ਟਰੰਪ ਨੇ ਹੁਣ ਇਸ ਦੇਸ਼ 'ਤੇ ਲਗਾਇਆ 25 ਪ੍ਰਤੀਸ਼ਤ ਟੈਰਿਫ

ਡਿਜੀਟਲ ਡੈਸਕ, ਨਵੀਂ ਦਿੱਲੀ : ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਸੋਮਵਾਰ, 26 ਜਨਵਰੀ ਨੂੰ ਦੱਖਣੀ ਕੋਰੀਆ 'ਤੇ 25 ਫ਼ੀਸਦੀ ਟੈਰਿਫ ਲਗਾਉਣ ਦਾ ਐਲਾਨ ਕੀਤਾ ਹੈ। ਇਸ ਦੇ ਨਾਲ ਹੀ ਟਰੰਪ ਨੇ ਦੱਖਣੀ ਕੋਰੀਆ 'ਤੇ ਦੋਸ਼ ਲਗਾਇਆ ਕਿ ਉਹ ਅਮਰੀਕਾ ਨਾਲ ਹੋਏ ਪਿਛਲੇ ਵਪਾਰਕ ਸਮਝੌਤੇ ਦੀ ਪਾਲਣਾ ਨਹੀਂ ਕਰ ਰਿਹਾ ਹੈ।

ਟਰੰਪ ਨੇ ਆਪਣੇ 'ਟਰੂਥ ਸੋਸ਼ਲ' ਪਲੇਟਫਾਰਮ 'ਤੇ ਲਿਖਿਆ, "ਕਿਉਂਕਿ ਕੋਰੀਆਈ ਵਿਧਾਨ ਸਭਾ ਨੇ ਸਾਡੇ ਇਤਿਹਾਸਕ ਵਪਾਰਕ ਸਮਝੌਤੇ ਨੂੰ ਲਾਗੂ ਨਹੀਂ ਕੀਤਾ ਹੈ, ਜੋ ਕਿ ਉਨ੍ਹਾਂ ਨੂੰ ਕਰਨਾ ਚਾਹੀਦਾ ਸੀ, ਇਸ ਲਈ ਹੁਣ ਮੈਂ ਆਟੋ, ਲੱਕੜ, ਫਾਰਮਾ ਅਤੇ ਹੋਰ ਸਾਰੇ ਆਪਸੀ ਟੈਰਿਫਾਂ ਨੂੰ 15 ਫ਼ੀਸਦੀ ਤੋਂ ਵਧਾ ਕੇ 25 ਫ਼ੀਸਦੀ ਕਰ ਰਿਹਾ ਹਾਂ।"

ਟਰੰਪ ਨੇ ਦੱਖਣੀ ਕੋਰੀਆ 'ਤੇ ਲਗਾਇਆ ਟੈਰਿਫ

ਅਮਰੀਕੀ ਰਾਸ਼ਟਰਪਤੀ ਦਾ ਇਹ ਐਲਾਨ ਵਾਸ਼ਿੰਗਟਨ ਅਤੇ ਸਿਓਲ ਵਿਚਕਾਰ ਇੱਕ ਵਪਾਰਕ ਅਤੇ ਸੁਰੱਖਿਆ ਸਮਝੌਤੇ ਤੋਂ ਕੁਝ ਮਹੀਨਿਆਂ ਬਾਅਦ ਆਇਆ ਹੈ, ਜੋ ਮਹੀਨਿਆਂ ਦੀ ਤਣਾਅਪੂਰਨ ਗੱਲਬਾਤ ਤੋਂ ਬਾਅਦ ਸਿਰੇ ਚੜ੍ਹਿਆ ਸੀ।

ਅਮਰੀਕਾ ਅਤੇ ਦੱਖਣੀ ਕੋਰੀਆ ਵਿਚਾਲੇ ਇਹ ਸਮਝੌਤਾ ਅਕਤੂਬਰ ਵਿੱਚ ਟਰੰਪ ਅਤੇ ਲੀ ਜੇ ਮਯੁੰਗ ਦੀ ਮੁਲਾਕਾਤ ਤੋਂ ਬਾਅਦ ਫਾਈਨਲ ਹੋਇਆ ਸੀ। ਇਸ ਵਿੱਚ ਦੱਖਣੀ ਕੋਰੀਆ ਵੱਲੋਂ ਨਿਵੇਸ਼ ਦੇ ਵਾਅਦੇ ਦੇ ਨਾਲ-ਨਾਲ ਸੰਯੁਕਤ ਰਾਜ ਅਮਰੀਕਾ ਵੱਲੋਂ ਟੈਰਿਫ ਵਿੱਚ ਕਟੌਤੀ ਵੀ ਸ਼ਾਮਲ ਸੀ।

ਇਸ ਸਮਝੌਤੇ ਦੇ ਤਹਿਤ ਵਾਸ਼ਿੰਗਟਨ, ਦੱਖਣੀ ਕੋਰੀਆਈ ਸਾਮਾਨ ਜਿਵੇਂ ਕਿ ਵਾਹਨ, ਕਾਰਾਂ ਦੇ ਪੁਰਜ਼ੇ ਅਤੇ ਦਵਾਈਆਂ 'ਤੇ 15 ਫ਼ੀਸਦੀ ਤੱਕ ਟੈਕਸ ਲਗਾਉਣ ਵਾਲਾ ਸੀ।

ਇਸ ਸਮਝੌਤੇ ਦਾ ਦੱਖਣੀ ਕੋਰੀਆ ਨੂੰ ਸਭ ਤੋਂ ਵੱਡਾ ਫ਼ਾਇਦਾ ਇਹ ਹੋਇਆ ਸੀ ਕਿ ਡੀਲ ਦੀਆਂ ਸ਼ਰਤਾਂ ਕਾਰਨ ਦੱਖਣੀ ਕੋਰੀਆਈ ਕਾਰਾਂ 'ਤੇ ਅਮਰੀਕੀ ਟੈਰਿਫ 25 ਫ਼ੀਸਦੀ ਤੋਂ ਘਟ ਕੇ 15 ਫ਼ੀਸਦੀ ਰਹਿ ਗਿਆ ਸੀ। ਪਰ ਹੁਣ ਰਾਸ਼ਟਰਪਤੀ ਟਰੰਪ ਨੇ ਮੁੜ ਤੋਂ 25 ਫ਼ੀਸਦੀ ਟੈਰਿਫ ਲਗਾਉਣ ਦਾ ਐਲਾਨ ਕਰ ਦਿੱਤਾ ਹੈ।