ਅਮਰੀਕਾ ਦਾ ਲਾਗਾਰਡੀਆ ਹਵਾਈ ਜਹਾਜ਼ ਹਾਦਸਾ: ਮੌਤ ਨੂੰ ਮਾਤ; ਹਾਦਸੇ 'ਚ ਬਾਹਰ ਡਿੱਗੀ ਅਟੈਂਡੈਂਟ ਦੀ ਬਚੀ ਜਾਨ

ਡਿਜੀਟਲ ਡੈਸਕ, ਨਵੀਂ ਦਿੱਲੀ: ਅਮਰੀਕਾ ਦੇ ਨਿਊਯਾਰਕ ਸ਼ਹਿਰ ਦੇ ਲਾਗਾਰਡੀਆ ਏਅਰਪੋਰਟ 'ਤੇ ਐਤਵਾਰ ਦੇਰ ਰਾਤ 'ਏਅਰ ਕੈਨੇਡਾ ਜੈਜ਼' ਦਾ ਇਕ ਜਹਾਜ਼ ਲੈਂਡਿੰਗ ਦੌਰਾਨ ਰਨਵੇਅ 'ਤੇ ਖੜ੍ਹੇ ਫਾਇਰ ਟਰੱਕ ਨਾਲ ਟਕਰਾ ਗਿਆ। ਹਾਦਸੇ 'ਚ ਪਾਇਲਟ ਤੇ ਕੋ-ਪਾਇਲਟ ਦੀ ਮੌਤ ਹੋ ਗਈ, ਜਦਕਿ ਦਰਜਨਾਂ ਲੋਕ ਜ਼ਖਮੀ ਹੋਏ ਹਨ।

ਇਸੇ ਟੱਕਰ ਦੌਰਾਨ ਫਲਾਈਟ ਅਟੈਂਡੈਂਟ ਸੋਲਾਂਜ ਟ੍ਰੈਂਬਲੇ, ਸੀਟ ਬੈਲਟ ਨਾਲ ਬੱਝੀ ਹੋਣ ਦੇ ਬਾਵਜੂਦ ਜਹਾਜ਼ ਤੋਂ ਬਾਹਰ ਜਾ ਡਿੱਗੀ, ਪਰ ਉਸ ਦੀ ਜਾਨ ਬਚ ਗਈ। ਪਰਿਵਾਰ ਨੇ ਇਸ ਨੂੰ ਇਕ ਚਮਤਕਾਰ ਦੱਸਿਆ ਹੈ। ਟ੍ਰੈਂਬਲੇ ਦੀ ਬੇਟੀ ਸਾਰਾ ਲੇਪਿਨ ਨੇ ਕੈਨੇਡੀਅਨ ਚੈਨਲ ਨੂੰ ਦੱਸਿਆ ਕਿ ਉਸ ਦੀ ਮਾਂ ਦੀ ਇਕ ਲੱਤ ਵਿਚ ਕਈ ਫ੍ਰੈਕਚਰ ਹਨ ਅਤੇ ਸਰਜਰੀ ਕਰਨੀ ਪਵੇਗੀ, ਪਰ ਬਾਕੀ ਹਾਲਤ ਠੀਕ ਹੈ।

ਲੇਪਿਨ ਨੇ ਕਿਹਾ, "ਮੈਂ ਅਜੇ ਵੀ ਇਹ ਸਮਝਣ ਦੀ ਕੋਸ਼ਿਸ਼ ਕਰ ਰਹੀ ਹਾਂ ਕਿ ਇਹ ਸਭ ਕਿਵੇਂ ਹੋਇਆ, ਪਰ ਲੱਗਦਾ ਹੈ ਕਿ ਕੋਈ 'ਗਾਰਡੀਅਨ ਏਂਜਲ' (ਰਖਵਾਲਾ ਫ਼ਰਿਸ਼ਤਾ) ਉਨ੍ਹਾਂ ਦੀ ਰੱਖਿਆ ਕਰ ਰਿਹਾ ਸੀ।" ਇਹ ਜਹਾਜ਼ ਮਾਂਟਰੀਅਲ ਤੋਂ ਆ ਰਿਹਾ ਸੀ, ਜਿਸ ਵਿਚ 72 ਯਾਤਰੀ ਅਤੇ 4 ਕਰੂ ਮੈਂਬਰ ਸਵਾਰ ਸਨ।

ਅਧਿਕਾਰੀਆਂ ਮੁਤਾਬਕ, ਲੈਂਡਿੰਗ ਸਮੇਂ ਰਨਵੇਅ 'ਤੇ ਮੌਜੂਦ ਫਾਇਰ ਟਰੱਕ ਨਾਲ ਜਹਾਜ਼ ਦੀ ਟੱਕਰ ਹੋਈ। ਹਵਾਬਾਜ਼ੀ ਸੁਰੱਖਿਆ ਮਾਹਰ (Aviation Safety Expert) ਜੈਫ ਗੁਜੇਟੀ ਨੇ ਕਿਹਾ ਕਿ ਜਹਾਜ਼ ਦੇ ਅਗਲੇ ਹਿੱਸੇ ਨੂੰ ਹੋਏ ਭਾਰੀ ਨੁਕਸਾਨ ਨੂੰ ਦੇਖਦੇ ਹੋਏ ਟ੍ਰੈਂਬਲੇ ਦਾ ਬਚਣਾ ਬੇਹੱਦ ਹੈਰਾਨੀਜਨਕ ਹੈ।