ਈਰਾਨ ਜੰਗ ਵਿੱਚ ਟਰੰਪ ਕੋਲ ਹੁਣ ਘੱਟ ਅਧਿਕਾਰ, ਅਮਰੀਕੀ ਸੀਨੇਟ ਵਿੱਚ ਕ੍ਰਾਸ ਵੋਟਿੰਗ; ਰਾਸ਼ਟਰਪਤੀ ਖ਼ਿਲਾਫ਼ ਮਤਾ ਪਾਸ

ਡਿਜੀਟਲ ਡੈਸਕ, ਨਵੀਂ ਦਿੱਲੀ: ਈਰਾਨ ਜੰਗ ਵਿੱਚ ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਅਧਿਕਾਰਾਂ ਨੂੰ ਘਟਾਉਣ ਵਾਲਾ ਇੱਕ ਮਤਾ ਪਾਸ ਕੀਤਾ ਗਿਆ ਹੈ।ਅਮਰੀਕੀ ਸੰਸਦ ਦੇ ਉੱਪਰੀ ਸਦਨ (ਸੀਨੇਟ) ਵੱਲੋਂ ਪਾਸ ਕੀਤੇ ਗਏ ਇਸ ਮਤੇ ਦਾ ਸਮਰਥਨ ਟਰੰਪ ਦੀ ਰਿਪਬਲਿਕਨ ਪਾਰਟੀ ਦੇ ਚਾਰ ਸਾਂਸਦਾਂ ਨੇ ਵੀ ਕੀਤਾ ਹੈ। ਲਗਾਤਾਰ ਸੱਤ ਵਾਰ ਦੀ ਨਾਕਾਮਯਾਬੀ ਤੋਂ ਬਾਅਦ ਅੱਠਵੀਂ ਕੋਸ਼ਿਸ਼ ਵਿੱਚ ਇਸ ਮਤੇ 'ਤੇ ਸੀਨੇਟ ਦੀ ਮੋਹਰ ਲੱਗੀ ਹੈ।

ਟਰੰਪ ਦੇ ਖ਼ਿਲਾਫ਼ ਹੋਈ ਵੋਟਿੰਗ

ਸੀਬੀਐੱਸ ਨਿਊਜ਼ (CBS News) ਅਨੁਸਾਰ, ਸੀਨੇਟ ਵਿੱਚ ਮਤੇ ਦੇ ਪੱਖ ਵਿੱਚ 50 ਵੋਟਾਂ ਪਈਆਂ, ਜਦੋਂ ਕਿ ਵਿਰੋਧ ਵਿੱਚ 47 ਸੀਨੇਟਰਾਂ ਨੇ ਵੋਟਿੰਗ ਕੀਤੀ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਚਾਰ ਰਿਪਬਲਿਕਨ ਸੀਨੇਟਰਾਂ ਨੇ ਵੀ ਵਿਰੋਧੀ ਡੈਮੋਕ੍ਰੇਟਿਕ ਪਾਰਟੀ ਦੇ ਸਾਂਸਦਾਂ ਦਾ ਸਾਥ ਦਿੱਤਾ ਅਤੇ ਮਤੇ ਦੇ ਪੱਖ ਵਿੱਚ ਵੋਟ ਪਾਈ।

ਟਰੰਪ ਦੇ ਖ਼ਿਲਾਫ਼ ਵੋਟਿੰਗ ਕਰਨ ਵਾਲੇ ਰਿਪਬਲਿਕਨ ਸੀਨੇਟਰਾਂ ਵਿੱਚ ਸੁਸਾਨ ਕੋਲਿਨਜ਼, ਲੀਜ਼ਾ ਮੁਰਕੋਵਸਕੀ, ਰੈਂਡ ਪਾਲ ਅਤੇ ਬਿਲ ਕੈਸੀਡੀ ਸ਼ਾਮਲ ਹਨ। ਡੈਮੋਕ੍ਰੇਟਸ ਵੱਲੋਂ ਲਿਆਂਦਾ ਗਿਆ ਇਹ ਮਤਾ ਅੱਠਵੀਂ ਕੋਸ਼ਿਸ਼ ਵਿੱਚ ਪਾਸ ਹੋਇਆ ਹੈ।

ਡੈਮੋਕ੍ਰੇਟਿਕ ਸੀਨੇਟਰ ਟਿਮ ਕੇਨ ਨੇ ਇਸ ਮਤੇ ਨੂੰ ਪੇਸ਼ ਕੀਤਾ ਸੀ। ਇਸ ਮਤੇ ਦਾ ਮਕਸਦ ਰਾਸ਼ਟਰਪਤੀ ਦੀਆਂ ਫ਼ੌਜੀ ਸ਼ਕਤੀਆਂ 'ਤੇ ਕੰਟਰੋਲ ਰੱਖਣਾ ਅਤੇ ਸੰਸਦ ਦੀ ਭੂਮਿਕਾ ਨੂੰ ਯਕੀਨੀ ਬਣਾਉਣਾ ਹੈ।

ਮਤਾ ਪਾਸ ਹੋਣ 'ਤੇ ਡੈਮੋਕ੍ਰੇਟਿਕ ਸੀਨੇਟਰ ਐਡਮ ਸ਼ਿਫ਼ ਨੇ ਕਿਹਾ ਕਿ ਸੀਨੇਟ ਡੈਮੋਕ੍ਰੇਟਸ ਨੇ ਇੱਕ ਵਾਰ ਫਿਰ ਇਸ ਗ਼ੈਰ-ਸੰਵਿਧਾਨਕ ਜੰਗ ਨੂੰ ਖ਼ਤਮ ਕਰਨ ਲਈ ਵੋਟਿੰਗ ਕਰਨ ਵਾਸਤੇ ਮਜਬੂਰ ਕੀਤਾ ਹੈ।

ਰਾਇਟਰਜ਼ (Reuters) ਅਨੁਸਾਰ, ਇਹ ਮਤਾ ਭਾਵੇਂ 100 ਮੈਂਬਰੀ ਸੀਨੇਟ ਵਿੱਚੋਂ ਪਾਸ ਹੋ ਗਿਆ ਹੈ, ਪਰ ਇਸ ਨੂੰ ਰਿਪਬਲਿਕਨਾਂ ਦੇ ਕੰਟਰੋਲ ਵਾਲੇ 'ਹਾਊਸ ਆਫ਼ ਰਿਪ੍ਰੈਜ਼ੈਂਟੇਟਿਵਜ਼' (ਪ੍ਰਤੀਨਿਧੀ ਸਭਾ) ਤੋਂ ਵੀ ਪਾਸ ਕਰਵਾਉਣਾ ਪਵੇਗਾ। ਇੰਨਾ ਹੀ ਨਹੀਂ, ਟਰੰਪ ਦੇ ਸੰਭਾਵਿਤ ਵੀਟੋ (Veto) ਨੂੰ ਬੇਅਸਰ ਕਰਨ ਲਈ ਇਸ ਨੂੰ ਦੋਵਾਂ ਸਦਨਾਂ ਤੋਂ ਦੋ-ਤਿਹਾਈ ਬਹੁਮਤ ਨਾਲ ਪਾਸ ਕਰਵਾਉਣਾ ਲਾਜ਼ਮੀ ਹੋਵੇਗਾ।