ਹੋਰਮੁਜ਼ ਜਲਡਮਰੂ 'ਚ ਤਣਾਅ: 'ਹੋਰਮੁਜ਼ 'ਚ ਕੁਝ ਵੀ ਕੀਤਾ ਤਾਂ ਪਛਤਾਓਗੇ', ਇਰਾਨ ਦਾ ਟਰੰਪ ਨੂੰ ਸਿੱਧਾ ਅਲਟੀਮੇਟਮ

ਡਿਜੀਟਲ ਡੈਸਕ, ਨਵੀਂ ਦਿੱਲੀ: ਇਰਾਨ ਦੇ ਇਸਲਾਮਿਕ ਰਿਵੋਲਿਊਸ਼ਨਰੀ ਗਾਰਡ ਕੋਰਪਸ (IRGC) ਦੀ ਨੇਵੀ ਨੇ ਐਤਵਾਰ ਨੂੰ ਸਿੱਧੇ ਤੌਰ 'ਤੇ ਚਿਤਾਵਨੀ ਜਾਰੀ ਕੀਤੀ ਹੈ। ਸੋਸ਼ਲ ਮੀਡੀਆ ਪਲੇਟਫਾਰਮ X 'ਤੇ ਪੋਸਟ ਕਰਦਿਆਂ ਉਨ੍ਹਾਂ ਕਿਹਾ ਕਿ, ਹੋਰਮੁਜ਼ ਜਲਡਮਰੂ (Strait of Hormuz) ਵਿੱਚ ਦੁਸ਼ਮਣ ਵੱਲੋਂ ਕੀਤੀ ਗਈ ਕੋਈ ਵੀ ਗਲਤ ਹਰਕਤ ਦੇ ਘਾਤਕ ਨਤੀਜੇ ਹੋਣਗੇ। ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਹੋਰਮੁਜ਼ ਜਲਡਮਰੂ ਦੀ ਅਸਲ ਸਥਿਤੀ ਦੀ ਡਰੋਨ ਨਿਗਰਾਨੀ ਫੁਟੇਜ ਵੀ ਸਾਂਝੀ ਕੀਤੀ।

ਅਮਰੀਕਾ ਨੇ ਮੁਹਿੰਮ ਸ਼ੁਰੂ ਕਰਨ ਦਾ ਕੀਤਾ ਸੀ ਦਾਅਵਾ

IRGC ਦੀ ਨੇਵੀ ਨੇ ਕਿਹਾ ਕਿ, ਹੋਰਮੁਜ਼ ਜਲਡਮਰੂ ਵਿੱਚ ਸਾਰੀਆਂ ਹਲਚਲਾਂ ਅਤੇ ਠਹਿਰਾਅ ਇਰਾਨੀ ਹਥਿਆਰਬੰਦ ਬਲਾਂ ਦੇ ਪੂਰਨ ਨਿਯੰਤਰਣ ਵਿੱਚ ਹਨ। ਉਨ੍ਹਾਂ ਅੱਗੇ ਕਿਹਾ ਕਿ, "ਕੋਈ ਵੀ ਗਲਤ ਕਦਮ ਦੁਸ਼ਮਣ ਨੂੰ ਜਲਡਮਰੂ ਦੇ ਘਾਤਕ ਭੰਵਰਾਂ ਵਿੱਚ ਫਸਾ ਦੇਵੇਗਾ।"

ਦੂਜੇ ਪਾਸੇ, ਅਮਰੀਕਾ ਦੀ ਸੈਂਟਰਲ ਕਮਾਂਡ (CENTCOM) ਨੇ ਸ਼ਨੀਵਾਰ ਨੂੰ ਕਿਹਾ ਸੀ ਕਿ ਦੋ ਅਮਰੀਕੀ ਜੰਗੀ ਜਹਾਜ਼ ਹੋਰਮੁਜ਼ ਜਲਡਮਰੂ ਤੋਂ ਲੰਘੇ ਅਤੇ ਖਾੜੀ ਵਿੱਚ ਬਾਰੂਦੀ ਸੁਰੰਗਾਂ ਹਟਾਉਣ ਦੀ ਮੁਹਿੰਮ ਸ਼ੁਰੂ ਕੀਤੀ। ਇਰਾਨ ਦੀ ਮੁੱਖ ਫੌਜੀ ਕਮਾਂਡ, ਖਾਤਮ ਅਲ-ਅੰਬੀਆ ਸੈਂਟਰਲ ਹੈੱਡਕੁਆਰਟਰ ਨੇ ਇਸ ਗੱਲ ਨੂੰ ਖਾਰਜ ਕਰ ਦਿੱਤਾ ਅਤੇ CENTCOM ਦੇ ਉਸ ਦਾਅਵੇ ਦਾ ਖੰਡਨ ਕੀਤਾ ਕਿ ਅਮਰੀਕੀ ਜਹਾਜ਼ ਜਲਡਮਰੂ ਵਿੱਚ ਦਾਖਲ ਹੋਏ ਸਨ।

ਐਤਵਾਰ ਨੂੰ ਇੱਕ ਵਿਸ਼ੇਸ਼ ਰਿਪੋਰਟ ਵਿੱਚ, ਇਰਾਨ ਦੇ ਸਰਕਾਰੀ ਪ੍ਰੈੱਸ ਟੀਵੀ ਨੇ ਕਿਹਾ ਕਿ ਸ਼ਨੀਵਾਰ ਨੂੰ ਹੋਰਮੁਜ਼ ਜਲਡਮਰੂ ਤੋਂ ਦੋ ਵਿਨਾਸ਼ਕਾਰੀ ਜਹਾਜ਼ਾਂ (destroyers) ਨੂੰ ਲੰਘਾਉਣ ਦੀ ਅਮਰੀਕੀ ਫੌਜ ਦੀ ਕੋਸ਼ਿਸ਼ "ਇੱਕ ਅਸਫਲ ਪ੍ਰਚਾਰ ਸਟੰਟ ਵਜੋਂ ਖਤਮ ਹੋਈ, ਜਿਸਦਾ ਸਮਾਂ ਇਸਲਾਮਾਬਾਦ ਵਿੱਚ (ਤੇਹਰਾਨ-ਵਾਸ਼ਿੰਗਟਨ) ਗੱਲਬਾਤ ਦੇ ਨਾਲ ਮੇਲ ਖਾਣ ਲਈ ਤੈਅ ਕੀਤਾ ਗਿਆ ਸੀ।" ਪ੍ਰੈੱਸ ਟੀਵੀ ਨੇ ਅਮਰੀਕੀ ਜਹਾਜ਼ਾਂ ਦੀ ਪਛਾਣ USS ਮਾਈਕਲ ਮਰਫੀ ਅਤੇ USS ਫਰੈਂਕ ਈ. ਪੀਟਰਸਨ ਵਜੋਂ ਕੀਤੀ ਅਤੇ ਕਿਹਾ ਕਿ ਉਨ੍ਹਾਂ ਨੂੰ ਇਰਾਨੀ ਜਲ ਸੈਨਾ ਦੇ ਬਲਾਂ ਦੁਆਰਾ ਪਿੱਛੇ ਹਟਣ ਲਈ ਮਜਬੂਰ ਕੀਤਾ ਗਿਆ ਸੀ।

ਹੋਰਮੁਜ਼ ਵਿੱਚ ਕਿਸੇ ਵੀ ਫੌਜੀ ਜਹਾਜ਼ ਦੀ ਐਂਟਰੀ ਨਹੀਂ: IRGC

ਇਸ ਤੋਂ ਇਲਾਵਾ ਐਤਵਾਰ ਨੂੰ, IRGC ਨੇ ਇਕ ਹੋਰ ਬਿਆਨ ਵਿਚ ਕਿਹਾ ਕਿ, ਕੋਈ ਵੀ ਫੌਜੀ ਜਹਾਜ਼ ਜੋ ਕਿਸੇ ਵੀ ਨਾਮ ਜਾਂ ਬਹਾਨੇ ਨਾਲ ਹੋਰਮੁਜ਼ ਜਲਡਮਰੂ ਦੇ ਨੇੜੇ ਆਉਣ ਦਾ ਇਰਾਦਾ ਰੱਖਦਾ ਹੈ, ਉਸ ਨੂੰ ਜੰਗਬੰਦੀ (Ceasefire) ਦੀ ਉਲੰਘਣਾ ਮੰਨਿਆ ਜਾਵੇਗਾ ਅਤੇ ਉਸ ਨਾਲ ਸਖ਼ਤੀ ਨਾਲ ਨਜਿੱਠਿਆ ਜਾਵੇਗਾ।

ਦੱਸ ਦੇਈਏ ਕਿ ਇਰਾਨ ਅਤੇ ਸੰਯੁਕਤ ਰਾਜ ਅਮਰੀਕਾ ਵਿਚਾਲੇ ਦੋ ਹਫ਼ਤਿਆਂ ਦੀ ਜੰਗਬੰਦੀ ਬੁੱਧਵਾਰ ਨੂੰ ਲਾਗੂ ਹੋਈ ਸੀ। ਜਿਸ ਤੋਂ ਬਾਅਦ ਇਸਲਾਮਾਬਾਦ ਵਿੱਚ ਇਰਾਨੀ ਅਤੇ ਅਮਰੀਕੀ ਪ੍ਰਤੀਨਿਧ ਮੰਡਲਾਂ ਵਿਚਾਲੇ ਲੰਮੀ ਗੱਲਬਾਤ ਹੋਈ, ਜੋ ਕਿਸੇ ਸਮਝੌਤੇ 'ਤੇ ਪਹੁੰਚਣ ਵਿੱਚ ਅਸਫਲ ਰਹੀ।