ਨਵੇਂ ਸਾਲ ਦਾ ਜਸ਼ਨ ਮਾਤਮ 'ਚ ਬਦਲਿਆ: ਰੂਸ ਦੇ ਹੋਟਲ 'ਤੇ ਯੂਕਰੇਨੀ ਡਰੋਨ ਹਮਲਾ, 24 ਲੋਕਾਂ ਦੀ ਮੌਤ

ਡਿਜੀਟਲ ਡੈਸਕ, ਨਵੀਂ ਦਿੱਲੀ: ਨਵੇਂ ਸਾਲ ਦੇ ਪਹਿਲੇ ਹੀ ਦਿਨ ਯੂਕਰੇਨ ਨੇ ਰੂਸ 'ਤੇ ਡਰੋਨ ਨਾਲ ਹਮਲਾ ਕੀਤਾ ਹੈ। ਕ੍ਰੇਮਲਿਨ (ਰੂਸ) ਨੇ ਦੋਸ਼ ਲਗਾਇਆ ਹੈ ਕਿ ਉਸ ਦੇ ਕਬਜ਼ੇ ਵਾਲੇ ਖੇਰਸਨ ਖੇਤਰ ਵਿੱਚ ਇੱਕ ਹੋਟਲ ਕੈਫੇ 'ਤੇ ਯੂਕਰੇਨੀ ਡਰੋਨ ਨੇ ਹਮਲਾ ਕੀਤਾ, ਜਿੱਥੇ ਨਵੇਂ ਸਾਲ ਦੀ ਪਾਰਟੀ ਚੱਲ ਰਹੀ ਸੀ। ਇਸ ਹਮਲੇ ਵਿੱਚ ਘੱਟੋ-ਘੱਟ 24 ਲੋਕਾਂ ਦੀ ਮੌਤ ਹੋ ਗਈ ਹੈ ਅਤੇ 50 ਤੋਂ ਵੱਧ ਲੋਕ ਜ਼ਖਮੀ ਹੋਏ ਹਨ।

ਯੂਕਰੇਨ ਦੇ ਦੱਖਣੀ ਖੇਰਸਨ ਇਲਾਕੇ ਵਿੱਚ ਰੂਸ ਵੱਲੋਂ ਨਿਯੁਕਤ ਗਵਰਨਰ ਵਲਾਦੀਮੀਰ ਸਾਲਡੋ ਨੇ ਦੱਸਿਆ ਕਿ ਇਹ ਹਮਲਾ ਖੋਰਲੀ ਵਿੱਚ ਹੋਇਆ, ਜੋ ਰੂਸ ਦੇ ਕੰਟਰੋਲ ਵਾਲੇ ਕਰੀਮੀਆ ਪ੍ਰਾਇਦੀਪ ਦੇ ਨੇੜੇ ਇੱਕ ਤੱਟਵਰਤੀ ਪਿੰਡ ਹੈ। 'ਰਾਇਟਰਜ਼' ਦੀ ਰਿਪੋਰਟ ਅਨੁਸਾਰ, ਟੈਲੀਗ੍ਰਾਮ 'ਤੇ ਇੱਕ ਪੋਸਟ ਵਿੱਚ ਸਾਲਡੋ ਨੇ ਕਿਹਾ ਕਿ ਡਰੋਨ ਹਮਲਾ ਇੱਕ ਹੋਟਲ ਅਤੇ ਕੈਫੇ 'ਤੇ ਹੋਇਆ, ਜਿੱਥੇ ਨਵੇਂ ਸਾਲ ਦਾ ਜਸ਼ਨ ਮਨਾਉਣ ਲਈ ਵੱਡੀ ਗਿਣਤੀ ਵਿੱਚ ਲੋਕ ਇਕੱਠੇ ਹੋਏ ਸਨ।

ਰੂਸ ਤੇ ਯੂਕਰੇਨ ਵਿਚਾਲੇ ਤਣਾਅ ਲਗਾਤਾਰ ਵਧਦਾ ਜਾ ਰਿਹਾ ਹੈ। ਇਹ ਦਾਅਵਾ ਅਜਿਹੇ ਸਮੇਂ ਵਿੱਚ ਆਇਆ ਹੈ ਜਦੋਂ ਦੋਵਾਂ ਦੇਸ਼ਾਂ ਦੇ ਸਬੰਧ ਬੇਹੱਦ ਖ਼ਰਾਬ ਚੱਲ ਰਹੇ ਹਨ। ਰੂਸ ਦੇ ਰੱਖਿਆ ਮੰਤਰਾਲੇ ਨੇ ਰਾਤ ਦੀ ਇੱਕ ਵੀਡੀਓ ਫੁਟੇਜ ਜਾਰੀ ਕੀਤੀ ਹੈ, ਜਿਸ ਵਿੱਚ ਉੱਤਰ-ਪੱਛਮੀ ਰੂਸ ਵਿੱਚ ਰਾਸ਼ਟਰਪਤੀ ਪੁਤਿਨ ਦੀ ਇੱਕ ਰਿਹਾਇਸ਼ ਦੇ ਨੇੜੇ ਡੇਗੇ ਗਏ ਇੱਕ ਯੂਕਰੇਨੀ ਡਰੋਨ ਦਾ ਮਲਬਾ ਦਿਖਾਇਆ ਗਿਆ ਹੈ।

ਮਾਸਕੋ (ਰੂਸ) ਨੇ ਇਸ ਕਥਿਤ ਘਟਨਾ ਨੂੰ ਇੱਕ 'ਅੱਤਵਾਦੀ ਹਮਲਾ' ਅਤੇ ਪੁਤਿਨ 'ਤੇ ਨਿੱਜੀ ਹਮਲਾ ਕਰਾਰ ਦਿੱਤਾ ਹੈ। ਦੂਜੇ ਪਾਸੇ, ਕੀਵ (ਯੂਕਰੇਨ) ਨੇ ਇਨ੍ਹਾਂ ਦੋਸ਼ਾਂ ਨੂੰ ਸਿਰੇ ਤੋਂ ਖਾਰਜ ਕਰਦਿਆਂ ਇਨ੍ਹਾਂ ਨੂੰ ਪੂਰੀ ਤਰ੍ਹਾਂ ਮਨਘੜਤ ਦੱਸਿਆ ਹੈ। ਬੁੱਧਵਾਰ ਨੂੰ ਜਾਰੀ ਕੀਤੀ ਗਈ ਵੀਡੀਓ ਵਿੱਚ ਇੱਕ ਜੰਗਲੀ ਇਲਾਕੇ ਵਿੱਚ ਬਰਫ਼ ਦੇ ਅੰਦਰ ਇੱਕ ਨੁਕਸਾਨਿਆ ਹੋਇਆ ਬਿਨਾਂ ਪਾਇਲਟ ਵਾਲਾ ਜਹਾਜ਼ (UAV) ਪਿਆ ਦਿਖਾਈ ਦੇ ਰਿਹਾ ਹੈ।

'ਪੁਤਿਨ ਨੂੰ ਨਿਸ਼ਾਨਾ ਬਣਾ ਕੇ ਕੀਤਾ ਗਿਆ ਹਮਲਾ'

ਰੂਸ ਦੇ ਰੱਖਿਆ ਮੰਤਰਾਲੇ ਦੇ ਅਨੁਸਾਰ, 28-29 ਦਸੰਬਰ ਦੀ ਰਾਤ ਨੂੰ ਨੋਵਗੋਰੋਡ ਖੇਤਰ ਵਿੱਚ ਸਥਿਤ ਰਾਸ਼ਟਰਪਤੀ ਪੁਤਿਨ ਦੀ ਰਿਹਾਇਸ਼ ਨੂੰ ਨਿਸ਼ਾਨਾ ਬਣਾਇਆ ਗਿਆ ਸੀ ਅਤੇ ਵੱਡੇ ਪੱਧਰ 'ਤੇ ਡਰੋਨਾਂ ਨੂੰ ਰੋਕਿਆ ਗਿਆ ਸੀ। ਰੂਸੀ ਅਧਿਕਾਰੀਆਂ ਨੇ ਦਾਅਵਾ ਕੀਤਾ ਕਿ ਇਸ ਘਟਨਾ ਦੌਰਾਨ 91 ਡਰੋਨ ਲਾਂਚ ਕੀਤੇ ਗਏ ਸਨ ਅਤੇ ਉਨ੍ਹਾਂ ਕਿਹਾ ਕਿ ਸਾਰਿਆਂ ਨੂੰ ਹਵਾਈ ਸੁਰੱਖਿਆ ਪ੍ਰਣਾਲੀ (Air Defence) ਦੁਆਰਾ ਨਸ਼ਟ ਕਰ ਦਿੱਤਾ ਗਿਆ ਸੀ।

ਮੰਤਰਾਲੇ ਨੇ ਦੱਸਿਆ ਕਿ ਹਰੇਕ ਡਰੋਨ ਵਿੱਚ ਛੇ ਕਿਲੋਗ੍ਰਾਮ ਵਿਸਫੋਟਕ ਸੀ। ਹਾਲਾਂਕਿ, ਇਹ ਸਪੱਸ਼ਟ ਨਹੀਂ ਕੀਤਾ ਗਿਆ ਕਿ ਰਿਹਾਇਸ਼ ਨੂੰ ਕੋਈ ਨੁਕਸਾਨ ਹੋਇਆ ਹੈ ਜਾਂ ਨਹੀਂ। ਰੱਖਿਆ ਮੰਤਰਾਲੇ ਨੇ ਅੱਗੇ ਕਿਹਾ ਕਿ ਇਹ ਕਥਿਤ ਹਮਲਾ ਪੂਰੀ ਤਰ੍ਹਾਂ ਟਾਰਗੇਟਿਡ ਸੀ, ਜਿਸ ਨੂੰ ਬਹੁਤ ਸਾਵਧਾਨੀ ਨਾਲ ਕਈ ਪੜਾਵਾਂ ਵਿੱਚ ਪਲਾਨ ਕੀਤਾ ਗਿਆ ਸੀ। ਹਾਲਾਂਕਿ, ਅਜੇ ਤੱਕ ਸੁਤੰਤਰ ਤੌਰ 'ਤੇ ਇਸ ਹਮਲੇ ਦੀ ਪੁਸ਼ਟੀ ਨਹੀਂ ਹੋ ਸਕੀ ਹੈ।